1. Ano ang posible nga matabo kon may mga tawo nga gusto gid maglabaw sa iban?

 MADAMO nga tawo subong ang gusto gid maglabaw sa iban, kag wala sila sing labot bisan pa masakitan ang iban sa ila ginahimo. Halimbawa, kon gusto gid labawan sang isa ka negosyante ang iya mga kompetensia sa negosyo, posible nga magahimo sia sang mga plano nga makahalit sa ila. Para magdaug sa isa ka hampang, posible nga hungod nga baldahon sang isa ka player ang iya kontra. Para makapasar sa entrance exam sa isa ka bantog nga unibersidad, posible nga mangodigo ang isa ka estudyante. Bilang mga Cristiano, kabalo kita nga sala ini, kay ‘mga buhat ini sang unod.’ (Gal. 5:19-21) Pero posible bala nga indi matalupangdan sang pila ka kauturan nga ginapabatyag na gali nila sa iban nga mas labaw sila sangsa ila? Importante ini nga pamangkot kay maapektuhan ang aton paghiusa kon may mga kauturan nga gusto gid maglabaw sa iban.

2. Ano ang binagbinagon naton sa sini nga artikulo?

² Sa sini nga artikulo, binagbinagon naton ang indi maayo nga mga kinaiya nga posible mag-impluwensia sa aton nga labawan ang iban. Binagbinagon man naton ang halimbawa sang mga alagad ni Jehova nga narekord sa Biblia nga wala nagtinguha nga labawan ang iban. Pero binagbinagon anay naton kon paano naton mausisa ang aton motibo.

3. Ano ang dapat naton ipamangkot sa aton kaugalingon?

³ Maayo gid kon usisaon naton pirme ang aton motibo. Mahimo naton pamangkuton ang aton kaugalingon: ‘Nalipay bala ako kon malabawan ko ang iban? Nagabulig bala ako sa mga hilikuton sang kongregasyon kay gusto ko nga tan-awon ako sang mga  kauturan nga ako ang pinakamaayo ukon gusto ko nga labawan ang isa ka utod? Ukon ginahimo ko bala ang akon bug-os nga masarangan kay gusto ko nga malipay sa akon si Jehova?’ Ngaa dapat naton ini ipamangkot? Binagbinagon naton ang ginasiling sang Pulong sang Dios parte sa sini.

4. Suno sa Galacia 6:3, 4, ngaa indi naton dapat pag-ipaanggid ang aton kaugalingon sa iban?

⁴ Ang Biblia nagasiling nga indi naton dapat pag-ipaanggid ang aton kaugalingon sa iban. (Basaha ang Galacia 6:3, 4.) Ngaa? Kay kon hunahunaon naton nga mas labaw kita sangsa aton mga utod, mahimo nga mangin bugalon kita. Kag kon hunahunaon naman naton nga mas maayo ang aton mga utod sangsa aton, mahimo maluyahan kita sang buot. Indi gid maayo ining duha ka panghunahuna. (Roma 12:3) Ang isa ka sister nga si Katerina, b nga taga-Greece, nagsiling: “Ginakumparar ko ang akon kaugalingon sa iban nga mas matahom, mas maayo mag-preaching, kag madamo sang abyan. Bangod sini, pamatyag ko daw waaywaay gid ako.” Dapat naton tandaan nga ginbuyok kita ni Jehova, indi bangod matahom kita, maayo gid kita maghambal, ukon madamo nga tawo ang nanamian sa aton. Ginbuyok niya kita bangod nakita niya nga gusto naton sia palanggaon kag gusto naton mamati sa iya Anak.—Juan 6:44; 1 Cor. 1:26-31.

5. Ano ang matun-an mo sa eksperiensia ni Hyun?

⁵ Ari pa ang puede naton ipamangkot sa aton kaugalingon, ‘Ano ang pagtan-aw sa akon sang mga kauturan? Nagabulig bala ako para may paghidait sa kongregasyon, ukon pirme lang ako may kontra?’ Binagbinaga ang natabo sa isa ka gulang nga si Hyun, nga taga-South Korea. Para sa iya, ginakompetensiahan sia sang iban nga may pribilehiyo man sa kongregasyon. Nagsiling sia, “Nahikay ako sa sini nga mga brother, kag pirme ko ginakontra ang ila ginasiling.” Ano ang resulta sang iya ginahimo? “Bangod sang akon panimuot, nabahinbahin ang kongregasyon,” siling niya. Ginbuligan si Hyun sang pila niya ka abyan nga matalupangdan ang iya indi maayo nga panimuot. Naghimo si Hyun sang mga pagbag-o. Subong, nangin maayo na sia nga gulang. Kon natalupangdan naton nga daw ginakompetensiahan naton ang iban sa baylo nga pabaloran ang paghidait, dapat kita gilayon maghimo sang mga pagbag-o.

6. Suno sa Galacia 5:26, ano nga indi maayo nga mga kinaiya ang posible nga mag-impluwensia sa aton nga tinguhaan nga labawan ang iban?

⁶ Basaha ang Galacia 5:26. Ano nga indi maayo nga mga kinaiya ang posible nga mag-impluwensia sa aton nga tinguhaan nga labawan ang iban? Ang isa amo ang bugal. Ang bugalon nga tawo nagapahambog kag ang iya lang kaayuhan ang iya ginapensar. Ang isa pa ka indi maayo nga kinaiya amo ang kahisa. Kon ang isa ka tawo may kahisa, magluwas nga gusto niya nga may ara man sia sang mga butang nga ara sa iban, gusto pa gid niya nga madula ini nga mga butang sa mga ginakahisaan niya. Gani kon nahisa ang isa ka tawo sa iban, pareho lang nga ginadumtan niya sila. Dapat gid naton likawan ini nga mga kinaiya nga daw pareho lang nga nagalikaw kita sa makamamatay nga virus.

7. Ano nga halimbawa ang nagapakita nga malain gid ang resulta kon bugalon kita kag nahisa?

⁷ Ang bugal kag kahisa daw pareho sang mga higko nga nakasimpon sa gasolina nga gintughong sa eroplano. Makalupad gihapon ang eroplano, pero mahimo nga magsupon ang mga higko sa ginaagyan sang gasolina. Bangod sini, mahimo mapatay ang makina kag ma-crash ang eroplano. Posible man ini nga matabo sa isa ka alagad ni Jehova. Kon may bugal sia kag kahisa,  malain gid ang mangin epekto sini sa iya. (Hulu. 16:18) Magauntat sia sa pag-alagad kay Jehova kag mahalitan niya ang iya kaugalingon kag ang iban. Gani ano ang dapat naton himuon para indi kita mangin bugalon kag malikawan naton nga mahisa?

8. Paano naton malikawan nga magpabugal?

⁸ Malikawan naton nga magpabugal kon sundon naton ang ginlaygay ni apostol Pablo sa mga taga-Filipos: “Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo.” (Fil. 2:3) Kon ginabaton naton nga ang iban mas madamo sang ikasarang sangsa aton, malikawan naton nga magkompetensia sa ila. Sa baylo, dapat kita malipay ilabi na gid kon ginagamit nila ang ila ikasarang sa pag-alagad kay Jehova kag para dayawon sia. Dapat man sundon sang mga utod nga madamo sang ikasarang ang ginlaygay ni Pablo. Kon sundon nila ini, makita nila ang aton maayo nga mga kinaiya. Bangod sini, nagabuligay kita tanan para may paghidait kag paghiusa sa kongregasyon.

9. Ano ang puede naton himuon para indi kita mahisa?

⁹ Malikawan naton nga mahisa sa aton mga kauturan kon batunon naton nga may mga limitasyon kita. Kon mapainubuson kita, wala kita nagatinguha para pamatud-an sa iban nga mas maayo kita sangsa ila. Sa baylo, tinguhaan naton nga makatuon sa mga utod nga mas madamo sang ikasarang sangsa aton. Halimbawa, kon maayo magpamulongpulong ang isa ka brother sa kongregasyon, puede naton sia pamangkuton kon paano sia nagahanda sa iya pamulongpulong. Kon ang isa ka sister maayo magluto, puede naton sia pamangkuton kon paano naton mapanamit ang aton ginaluto. Kag kon nabudlayan makig-abyan ang isa ka pamatan-on nga utod, puede sia makapangayo sang laygay sa utod nga madamo sang abyan. Kon himuon naton ini, indi kita mahisa kag magauswag ang aton mga ikasarang.

10. Ano nga problema ang naeksperiensiahan ni Gideon?

¹⁰ Binagbinaga ang natabo kay Gideon, nga halin sa tribo ni Manases, kag sa mga lalaki nga  halin sa tribo ni Efraim. Ginbuligan ni Jehova si Gideon kag ang iya 300 ka tinawo nga magdaug sa inaway. Puede gid kuntani nila ini ipabugal. Ginkadtuan si Gideon sang mga lalaki sang Efraim, indi para dayawon sia, kundi para baison sia. Naakig sila bangod wala sila ginpatawag dayon ni Gideon nga mag-upod sa iya sang nagpakig-away sia sa mga kaaway sang Dios. Natandog ang ila bugal kay importante gid sa ila nga padunggan sang mga tawo ang ila tribo. Pero wala nila makita nga mas importante ang nangin resulta sang ginhimo ni Gideon, kay napadunggan sini ang ngalan ni Jehova kag naamligan ang katawhan sang Dios.—Huk. 8:1.

11. Ano ang ginsiling ni Gideon sa mga lalaki sang Efraim?

¹¹ Mapainubuson nga nagsiling si Gideon sa mga lalaki sang Efraim: “Ano bala ang nahimo ko kon ipaanggid sa nahimo ninyo?” Dayon, ginpahanumdom niya sa ila ang dalayawon nila nga nahimo bangod sang bulig ni Jehova. Gani “nag-ugdaw ang ila kaakig.” (Huk. 8:2, 3) Nangin mapainubuson si Gideon kay gusto niya nga indi madula ang paghidait sa katawhan sang Dios.

12. Ano ang matun-an naton sa mga Efraimnon kag kay Gideon?

¹² Ano ang matun-an naton sa sini nga kasaysayan? Matun-an naton sa mga Efraimnon nga dapat kita magpokus sa pagpadungog kay Jehova, indi sa aton kaugalingon. Bilang mga ulo sang pamilya kag mga gulang, may matun-an kita kay Gideon. Kon may naakig sa aton ginhimo, dapat naton hangpon kon ngaa amo sina ang iya nabatyagan. Puede man naton sia dayawon sa nahimo niya nga maayo. Para mahimo naton ini, dapat kita mangin mapainubuson, ilabi na kon indi husto ang reaksion sang tawo nga naakig sa aton. Dapat naton tandaan nga mas importante ang paghidait sangsa pamatud-an nga kita gid ang husto.

13. Ano nga problema ang naeksperiensiahan ni Hana, kag ano ang iya ginhimo?

¹³ Binagbinaga man ang halimbawa ni Hana. Palangga gid sia sang iya bana nga si Elkana nga isa ka Levinhon. Pero may isa pa ka asawa si Elkana nga amo si Penina. Mas palangga ni Elkana si Hana sangsa kay Penina. Pero “si Penina may mga anak, apang si Hana wala.” Bangod sini, “pirme ginayaguta kag ginapaakig” ni Penina si Hana. Ano ang ginbatyag ni Hana? Nasubuan gid sia. ‘Naghibi sia kag indi na magkaon.’ (1 Sam. 1:2, 6, 7) Pero wala kita sang mabasa sa Biblia nga nagbalos si Hana kay Penina. Sa baylo, ginsugid niya kay Jehova ang tanan niya nga ginabatyag kag nagsalig sia nga buligan Niya sia. Nagbag-o bala si Penina? Wala ini ginasabat sang Biblia. Pero nakabalo kita nga naumpawan si Hana, nagtawhay ang iya hunahuna, kag “wala na sia nagkalisod.”—1 Sam. 1:10, 18.

14. Ano ang matun-an naton sa halimbawa ni Hana?

¹⁴ Ano ang matun-an naton sa halimbawa ni Hana? Kon may ginahimo ang isa ka utod para  ipabatyag sa imo nga mas maayo sia sangsa imo, tandai nga ikaw ang may kontrol sa imo reaksion. Indi mo kinahanglan pamatud-an nga mas maayo ka sangsa iya. Sa baylo nga magbalos sing malain sa ginhimo sa imo nga malain, tinguhai nga mangin maayo ang inyo kaangtanan. (Roma 12:17-21) Bisan pa indi sia magbag-o, mangin malipayon ka gihapon kag mangin matawhay ang imo hunahuna.

15. Ano ang pareho kay Apolos kag kay Pablo?

¹⁵ Binagbinagon naman naton ang matun-an naton sa halimbawa ni Apolos kag ni apostol Pablo. Pareho sila nga madamo sang nahibaluan sa Kasulatan. Pareho sila nga kilala kag maayo magtudlo. Kag pareho sila nga madamo sang nabuligan nga mangin disipulo. Pero wala sila nagkompetensiahanay.

16. Ano ang masiling mo parte kay Apolos?

¹⁶ Si Apolos ‘tumandok sang Alejandria.’ Gusto sang mga tawo sadto nga mag-eskwela sa sini nga lugar. Maayo gid sia magpamulongpulong, kag “madamo sia sing nahibaluan sa Kasulatan.” (Binu. 18:24) Sang nag-alagad si Apolos sa Corinto, may pila ka kauturan nga nagsiling nga mas nanamian sila sa iya sangsa kay Pablo kag sa iban pa nga mga utod. (1 Cor. 1:12, 13) Gusto bala ni Apolos nga mabahinbahin ang kongregasyon? Indi gid niya ina gusto matabo. Kay man, sang nagsaylo si Apolos sa iban nga lugar, ginpangabay sia ni Pablo nga magbalik sa Corinto. (1 Cor. 16:12) Indi gid ina paghimuon ni Pablo kon sa banta niya gusto ni Apolos nga mabahinbahin ang kongregasyon. Maathag nga gingamit ni Apolos ang iya mga ikasarang para ibantala ang maayong balita kag palig-unon ang iya mga kauturan. Sigurado man kita nga mapainubuson si Apolos. Halimbawa, wala kita sing mabasa sa Biblia nga naglain ang iya buot sang ‘ginpaathag sa iya ni Aquila kag ni Priscila sing sibu pa ang dalanon sang Dios.’—Binu. 18:24-28.

17. Paano ginpabaloran ni Pablo ang paghidait?

 ¹⁷ Nabal-an ni apostol Pablo ang maayo nga ginhimo ni Apolos. Posible nga hunahunaon sang iban nga mas maayo si Apolos sangsa kay Pablo, pero wala nagpaapekto sa sini si Pablo. Sang ginlaygayan ni Pablo ang kongregasyon sa Corinto, masiling gid naton nga mapainubuson sia kag makatarunganon. Wala sia nanamian sa ginasiling sang mga tawo nga “Ako kay Pablo.” Sa baylo, gusto niya nga si Jehova nga Dios kag si Jesucristo ang dayawon.—1 Cor. 3:3-6.

18. Suno sa 1 Corinto 4:6, 7, ano ang matun-an naton sa halimbawa ni Apolos kag ni Pablo?

¹⁸ Ano ang matun-an naton sa halimbawa ni Apolos kag ni Pablo? Posible nga nagapanikasog gid kita sa aton pag-alagad kay Jehova, kag posible nga madamo kita sang nabuligan nga mag-uswag kag magpabawtismo. Pero kabalo kita nga nahimo lang naton ini kay ginabuligan kita ni Jehova. May matun-an pa gid kita sa halimbawa ni Apolos kag ni Pablo. Kon madamo ang aton responsibilidad sa kongregasyon, madamo man kita sang mahimo para mapalig-on ang iban nga pabaloran ang paghidait. Nagapasalamat gid kita kon ginabuligan kita sang mga gulang kag mga ministeryal nga alagad nga pabaloran ang paghiusa kag paghidait. Ginahimo nila ini paagi sa paggamit sang Pulong sang Dios kon nagalaygay sila. Wala nila ini ginahimo para dayawon sila, kundi para buligan ang tanan sa kongregasyon nga tumanon si Cristo Jesus kag ilugon ang iya halimbawa.—Basaha ang 1 Corinto 4:6, 7.

19. Ano ang puede himuon sang kada isa sa aton? (Tan-awa man ang kahon nga “ Indi Magkompetensiahanay.”)

¹⁹ Ginhatagan sang Dios ang kada isa sa aton sang mga ikasarang. Puede naton gamiton ini nga mga ikasarang “sa pag-alagad sa isa kag isa.” (1 Ped. 4:10) Basi hunahunaon naton nga gamay lang ang mabulig naton. Pero hunahunaa ang isa ka matahom nga bayo. Importante ang kada tahi para mahuman ini. Gani bisan pamatyag mo daw kagamay lang sang imo nahimo, makabulig ini sa paghiusa sang kongregasyon. Kabay pa nga indi gid naton paghunahunaon nga labawan ang iban. Kag himuon naton ang aton bug-os nga masarangan nga indi madula ang paghidait kag indi maguba ang paghiusa sa kongregasyon.—Efe. 4:3.