1. Ano ang ginapatuhuyan naton nga “kamatuoran”?

MAY nabatian ka na bala nga utod nga nagsiling, “Amo ini ang kamatuoran”? Basi ikaw mismo nakasiling man sini. Ano ang ginapatuhuyan naton nga “kamatuoran”? Sa masami, ang ginasiling naton nga “kamatuoran” amo ang aton ginapatihan, ang aton ginahimo para simbahon ang Dios, kag ang aton paagi sang pagkabuhi. Ang mga tawo nga “ara sa kamatuoran” kabalo sang ginatudlo sang Biblia, kag ginasunod nila ang mga prinsipio sa sini. Gani wala na sila nagapati sa butig nga mga panudlo kag malipayon gid sila bisan indi sila perpekto.—Juan 8:32.

2. Suno sa Juan 13:34, 35, ano ang posible nga rason kon ngaa nagtuon sang kamatuoran ang isa ka tawo?

² Ngaa nagtuon ka sang kamatuoran? Posible nga nagdayaw ka sa maayo nga pamatasan sang katawhan ni Jehova. (1 Ped. 2:12) Ukon posible nga napalig-on ka sa gugma nga ginapakita nila sa iban. Madamo ang nakatalupangod sini nga gugma sa una pa lang nila nga pagtambong sa miting, kag amo ini ang madumduman nila sangsa nabatian nila sa miting. Indi na kita matingala sa sini bangod nagsiling si Jesus nga makilala ang iya mga disipulo sa ila gugma sa isa kag isa. (Basaha ang Juan 13:34, 35.) Pero para mangin kumbinsido pa gid kita nga ara sa aton ang kamatuoran, may dapat pa kita nga himuon.

3. Ano ang posible nga matabo kon ang aton pagtuo sa Dios nabase lang sa gugma nga ginapakita sang aton mga kauturan?

³ Ang aton pagtuo dapat nabase indi lang sa gugma nga ginapakita sang katawhan sang Dios. Ngaa? Bangod ini nga pagtuo indi mabakod. Halimbawa, mahimo kita mag-untat sa pag-alagad kay Jehova kon makasala ang isa ka utod, ilabi na gid kon isa sia ka gulang ukon payunir. Mahimo man kita mag-untat sa pag-alagad  kay Jehova kon nasakitan kita sa ginhimo ukon ginsiling sang isa ka utod sa aton, ukon ang isa ka utod mangin apostata kag magsiling sia nga sala ang ginapatihan naton. Gani kon gusto naton nga mangin mabakod ang aton pagtuo, dapat nabase ini sa aton suod nga kaangtanan kay Jehova. Kon ang imo pagtuo sa Dios nabase lang sa ginahimo sang iban, kag indi sa imo kaangtanan kay Jehova, ang imo pagtuo indi mangin mabakod. Ang imo gugma kay Jehova kag sa iya katawhan makabulig sa imo pagtuo, pero importante gid nga tun-an mo sing maayo ang Biblia, hangpon ang imo mga ginatun-an, kag mag-research para mapamatud-an mo nga kamatuoran ang ginatudlo sang Biblia parte kay Jehova.—Roma 12:2.

4. Suno sa Mateo 13:3-6, 20, 21, ano ang natabo sa pagtuo sang iban sang nakaeksperiensia sila sang mga problema?

⁴ Nagsiling si Jesus nga ‘nalipay’ ang iban sang natun-an nila ang kamatuoran, pero nagluya ang ila pagtuo sang nakaeksperiensia sila sang mga problema. (Basaha ang Mateo 13:3-6, 20, 21.) Posible nga wala nila mahangpan nga ang mga nagasunod kay Jesus makaeksperiensia sang mga kabudlayan. (Mat. 16:24) Ukon posible nga abi nila nga kon mangin Cristiano ang isa, indi na sia makaeksperiensia sing problema, kundi puro lang pagpakamaayo. Pero indi gid malikawan ang mga kabudlayan sa sini nga kalibutan. Mahimo magbag-o ang aton kahimtangan nga makapasubo sa aton.—Sal. 6:6; Man. 9:11.

5. Ngaa masiling naton nga kumbinsido ang kalabanan sa aton mga kauturan nga ang ila ginapatihan amo ang kamatuoran?

⁵ Ang kalabanan sa aton mga kauturan kumbinsido gid nga ang ila ginapatihan amo ang kamatuoran. Ngaa masiling naton ini? Wala nagluya ang ila pagtuo bisan pa nasakitan sila sa ginhimo ukon ginsiling sang isa ka utod. Mabakod gihapon ang ila pagtuo bisan pa nga nakahimo sang sala ang isa ka utod. (Sal. 119:165) Kon may problema sila, wala nagaluya ang ila pagtuo, kundi mas nagabakod ini. (Sant. 1:2-4) Ano ang himuon mo para mangin pareho sini kabakod ang imo pagtuo?

6. Ngaa nagtuo ang mga disipulo sang unang siglo?

⁶ Nagtuo ang mga disipulo sang unang siglo bangod sang ila nabal-an sa Kasulatan kag sa mga gintudlo ni Jesucristo, nga amo “ang kamatuoran sang maayong balita.” (Gal. 2:5) Ini nga kamatuoran amo ang tanan nga ginapatihan naton bilang mga Cristiano, kag lakip sa sini ang parte sa halad-gawad ni Jesus kag sa iya pagkabanhaw. Kumbinsido si apostol Pablo nga matuod gid ini. Ngaa? Bangod ‘gingamit niya ang Kasulatan agod pamatud-an nga ang Cristo kinahanglan mag-antos kag mabanhaw.’ (Binu. 17:2, 3) Ginpatihan sang mga disipulo sang unang siglo ini nga mga panudlo kag nagsalig sila sa bulig sang balaan nga espiritu para mahangpan ang Pulong sang Dios. Ginsigurado gid nila nga ini nga mga panudlo nabase sa Kasulatan. (Binu. 17:11, 12; Heb. 5:14) Nagtuo sila indi lang bangod sa ila nabatyagan, kag gin-alagad nila si Jehova indi lang bangod nalipay sila kon kaupod nila ang mga kauturan. Nagtuo sila bangod sang ila “sibu nga ihibalo tuhoy sa Dios.”—Col. 1:9, 10.

7. Ano ang resulta kon nagapati gid kita sa ginatudlo sang Biblia?

⁷ Ang mga kamatuoran sa Biblia wala nagabag-o. (Sal. 119:160) Halimbawa, wala ini nagabag-o bisan pa nakahimo sang sala ang isa ka utod ukon nasakitan kita sa iya ginhimo ukon ginsiling sa aton. Kag wala ini nagabag-o bisan pa makaeksperiensia kita sang mga problema. Gani dapat nahangpan gid naton ang mga panudlo sang Biblia kag kumbinsido kita nga matuod ini. Kon nagapati gid kita sa ginatudlo sang Biblia, magapabilin kita nga matutom  kay Jehova bisan pa mabudlay ang mga kahimtangan, pareho sang angkla nga nagabulig sa barko nga indi maanod palayo kon may bagyo. Ano ang himuon mo para mangin kumbinsido ka pa gid nga matuod ang imo ginapatihan?

8. Suno sa 2 Timoteo 3:14, 15, ngaa nangin kumbinsido si Timoteo nga ang iya ginapatihan amo ang kamatuoran?

⁸ Kumbinsido si Timoteo nga ang iya ginapatihan amo ang kamatuoran. Ngaa? (Basaha ang 2 Timoteo 3:14, 15.) Ang iya iloy kag ang iya lola amo ang una nga nagtudlo sa iya sang parte sa “balaan nga mga sinulatan.” Pero sigurado gid nga sia mismo nagpanikasog nga tun-an ini nga mga sinulatan kag ginhatagan niya ini sing tion. Gani ‘nabuyok sia nga magpati’ nga amo ini ang kamatuoran. Sang ulihi, natun-an ni Timoteo, sang iya iloy, kag sang iya lola ang mga ginatudlo sang mga Cristiano. Sigurado gid nga nagdayaw si Timoteo sa gugma nga ginpakita sang mga sumulunod ni Jesus, kag gusto gid niya magpakig-upod sa iya mga kauturan kag magbulig sa ila. (Fil. 2:19, 20) Pero nagtuo sia indi bangod sang iya gugma sa mga tawo, kundi bangod kumbinsido sia nga matuod gid ang ginatudlo sang Biblia kag gusto niya mangin suod kay Jehova. Gani dapat mo man tun-an ang Biblia kag mangin kumbinsido sa mga ginatudlo sini parte kay Jehova.

9. Ano ang tatlo ka importante nga kamatuoran nga dapat mangin kumbinsido ka?

⁹ Sa umpisa, dapat nga mangin kumbinsido ka bisan sa tatlo lang anay ka importante nga kamatuoran. Una, dapat kumbinsido ka nga si Jehova nga Dios amo ang Manunuga sang tanan nga butang. (Ex. 3:14, 15; Heb. 3:4; Bug. 4:11) Ikaduha, dapat mapaathag mo kon ngaa nagapati ka nga ang Biblia amo ang mensahe sang Dios para sa mga tawo. (2 Tim. 3:16, 17) Kag ikatlo, dapat nagapati ka nga may organisado nga katawhan si Jehova nga nagasimba sa iya kag ginapangunahan sila sang Cristo, kag sila amo ang mga Saksi ni Jehova. (Isa. 43:10-12; Juan 14:6; Binu. 15:14) Indi kinahanglan nga nabal-an mo ang tanan nga ginatudlo sang Biblia para mangin kumbinsido ka sa sini nga mga kamatuoran. Dapat mo gamiton ang imo “ikasarang  sa pagpangatarungan” para mangin kumbinsido ka pa gid nga ang imo ginapatihan amo ang kamatuoran.—Roma 12:1.

10. Kon nabal-an na naton ang kamatuoran, ano dayon ang dapat naton himuon?

¹⁰ Kon kumbinsido ka na parte sa tatlo ka importante nga kamatuoran parte sa Dios, sa Biblia, kag sa katawhan sang Dios, dapat mo man ini mapamatud-an sa iban paagi sa paggamit sang Kasulatan. Ngaa? Bangod responsibilidad naton bilang mga Cristiano nga itudlo sa mga magapamati sa aton ang mga kamatuoran nga natun-an naton. * (1 Tim. 4:16) Kag kon ginabuligan naton ang iban nga magpati sa sini nga mga kamatuoran sa Biblia, mangin kumbinsido pa gid kita sa sini.

11. Ano ang ginhimo ni apostol Pablo sang gintudluan niya ang mga tawo, kag paano naton sia mailog?

¹¹ Sang gintudluan ni apostol Pablo ang mga tawo, ‘ginkumbinsi niya sila nga magtuo kay Jesus paagi sa Kasuguan ni Moises kag sang mga Manalagna.’ (Binu. 28:23) Paano naton mailog si Pablo kon nagatudlo kita sa iban sang kamatuoran? Indi bastante nga isugid lang naton sa ila ang ginatudlo sang Biblia. Dapat man naton sila buligan nga magtuon kag hunahunaon sing maayo ang ila mga natun-an para magsuod sila kay Jehova. Gusto naton nga patihan nila ang kamatuoran, indi bangod nanamian sila sa aton, kundi bangod kumbinsido gid sila nga ang ila mga natun-an parte sa aton mahigugmaon nga Dios amo ang kamatuoran.

12-13. Paano mabuligan sang mga ginikanan ang ila kabataan nga indi mag-untat sa pag-alagad?

¹² Mga ginikanan, sigurado gid nga gusto ninyo nga indi mag-untat sa pag-alagad ang inyo kabataan. Basi maghunahuna kamo nga mangin mabakod ang ila pagtuo kon may maayo sila nga mga abyan sa kongregasyon. Pero para mangin kumbinsido sila nga ang ila ginapatihan amo ang kamatuoran, indi lang maayo nga mga abyan ang kinahanglan nila. Dapat sila mismo mangin suod sa Dios kag dapat sila mangin kumbinsido nga matuod gid ang ginatudlo sang Biblia.

¹³ Para matudluan sang mga ginikanan ang ila kabataan sang kamatuoran parte sa Dios, dapat makita sa ila halimbawa nga serioso sila sa ila pagtuon sang Biblia. Dapat may tion gid sila nga pamalandungan ang ila natun-an. Kon himuon nila ini, matudluan nila ang ila kabataan kon paano magtuon. Dapat nila tudluan ang ila kabataan sa pag-research sa aton mga gamit sa pagtuon sang Biblia, pareho sang ginahimo nila sa ila ginatudluan sang Biblia. Paagi sa sini, mabuligan nila ang ila kabataan nga palanggaon si Jehova kag magsalig sa “matutom kag mainandamon nga ulipon” nga ginagamit ni Jehova para mahangpan naton ang Biblia. (Mat. 24:45-47)  Mga ginikanan, indi bastante nga tudluan lang ninyo ang inyo kabataan sang madali mahangpan nga mga kamatuoran sa Biblia. Buligi sila nga magbakod ang ila pagtuo paagi sa pagtudlo sa ila sang “madalom nga mga butang sang Dios” nga mahangpan nila depende sa ila edad kag ikasarang.—1 Cor. 2:10.

14. Ngaa dapat naton tun-an ang mga tagna sa Biblia? (Tan-awa man ang kahon nga “ Mapaathag Mo Bala Ini nga mga Tagna?”)

¹⁴ Importante gid ang mga tagna sa Biblia kay makabulig ini sa aton para magbakod ang aton pagtuo kay Jehova. Ano nga mga tagna ang nagpabakod sang imo pagtuo? Mahimo ilakip mo ang mga tagna parte sa “katapusan nga mga adlaw.” (2 Tim. 3:1-5; Mat. 24:3, 7) Pero ano pa nga mga tagna nga natuman na ang makapabakod man sang imo pagtuo? Halimbawa, mapaathag mo bala kon paano natuman ang mga tagna sa Daniel kapitulo 2 ukon sa Daniel kapitulo 11 kag kon paano ini nagakatuman subong? * Kon nagatuo gid kita sa ginasiling sang Biblia, wala sang makapaluya sang aton pagtuo. Binagbinaga ang aton mga kauturan nga nag-antos sang grabe nga paghingabot sa Germany sang Bug-os Kalibutan nga Inaway II. Bisan pa nga wala nila nahangpan sing bug-os ang mga tagna sa Biblia parte sa katapusan nga mga adlaw, mabakod gid ang ila pagtuo sa Pulong sang Dios.

15-17. Paano ang pagtuon sang Biblia nagpabakod sang aton mga kauturan nga ginhingabot sang mga Nazi?

¹⁵ Sang gingamhan sang mga Nazi ang Germany, linibo sang aton mga kauturan ang ginpriso. Akig gid sa mga Saksi ni Jehova si Hitler kag ang isa ka mataas nga opisyal nga si Heinrich Himmler. Suno sa isa ka sister, nagsiling si Himmler sa aton mga kauturan nga babayi sa isa ka prisuhan: “Si Jehova ninyo didto ’na ’ya sa langit, pero sa duta kami ’ya ang hari! Tan-awon ta kon sin-o ang mabilin sa ulihi, kamo ukon kami?” Ano ang nakabulig sa katawhan ni Jehova nga makapabilin nga matutom?

¹⁶ Kabalo ang mga Estudyante sang Biblia nga nagsugod na sa paggahom ang Ginharian sang Dios sang 1914. Wala sila matingala kon ngaa  grabe gid ang paghingabot sa ila. Pero nagapati gid ang katawhan ni Jehova nga indi mapunggan sang gobierno sang tawo ang Dios sa pagtuman niya sang iya katuyuan. Indi masarangan ni Hitler nga dulaon ang pagsimba kay Jehova kag indi mapierde sang iya gobierno ang Ginharian sang Dios. Nagapati gid ang aton mga kauturan nga may katapusan ang paggahom ni Hitler.

¹⁷ Husto gid ang ginapatihan sang aton mga kauturan. Pila lang ka tuig ang nagligad, nag-untat ang paggahom sang mga Nazi. Ano ang natabo kay Heinrich Himmler, nga nagsiling nga sila ang hari sa duta? Nagpalagyo sia. Isa ka adlaw, nakita niya si Brother Lübke, nga isa ka priso anay nga nakilala niya. Nasubuan gid si Himmler, kag ginpamangkot niya si Brother Lübke: “Ti, Estudyante sang Biblia, ano na ang matabo?” Ginpaathag ni Brother Lübke kay Himmler nga sa umpisa pa lang nagapati na ang mga Saksi ni Jehova nga luwason gid sila kag indi magadugay ang paggahom sang mga Nazi. Sang una, daw indi maubusan si Himmler sang malain nga ihambal sa mga Saksi ni Jehova. Pero sa sini nga tion, wala gid sia kahambal. Sang ulihi, naghikog sia. Ano ang matun-an naton sa sini? Ang aton pagtuon sang Biblia, lakip ang mga tagna sa sini, makabulig sa aton nga mangin mabakod ang aton pagtuo sa Dios kag mangin matutom kon hingabuton kita.—2 Ped. 1:19-21.

18. Base sa Juan 6:67, 68, ngaa kinahanglan naton “ang sibu nga ihibalo kag bug-os nga paghantop” nga ginsiling ni Pablo sa Filipos 1:9?

¹⁸ Dapat kita magpakita sang gugma, kay ang gugma amo ang nagapakilala sa matuod nga mga Cristiano. Pero kinahanglan man naton “ang sibu nga ihibalo kag bug-os nga paghantop.” (Fil. 1:9) Kon wala ini, mahimo kita maimpluwensiahan “sang tagsa ka hangin sang panudlo sang tuso nga mga tawo,” lakip sang mga apostata. (Efe. 4:14) Sang nag-untat sa pagsunod kay Jesus ang madamo niya nga disipulo sang unang siglo, nagsiling si apostol Pedro nga nagapati gid sia nga si Jesus ang may “pinamulong sang kabuhi nga wala sing katapusan.” (Basaha ang Juan 6:67, 68.) Bisan pa wala nahangpan sadto ni Pedro ang tanan nga detalye sini nga pinamulong, nagpabilin sia nga matutom bangod kumbinsido sia nga si Jesus amo ang Cristo. Dapat tinguhaan mo man nga mangin kumbinsido ka pa gid sa ginatudlo sang Biblia. Kon himuon mo ini, indi gid magaluya ang imo pagtuo bisan ano pa ang matabo, kag mabuligan mo ang iban nga magbakod man ang ila pagtuo.—2 Juan 1, 2.