1-2. Ano ang ginsiling sang anghel sa mga babayi nga nagkadto sa lulubngan ni Jesus, kag ano ang ginsugo ni Jesus sa ila?

KAAGAHON sadto sang Nisan 16, 33 C.E. Nasubuan ang pila ka babayi nga mga alagad sang Dios sang nagkadto sila sa lulubngan ni Ginuong Jesucristo, nga ginlubong duha ka adlaw na ang nagligad. Nagkadto sila para butangan sang mahamot nga mga tanom kag mahamot nga mga lana ang bangkay ni Jesus. Pero pag-abot nila sa lulubngan, nakibot sila nga wala na ang iya bangkay! Ginsugiran sang anghel ang mga babayi nga nabanhaw na si Jesus kag ginsilingan sila: “Mauna sia sa inyo sa Galilea. Makita ninyo sia didto.”—Mat. 28:1-7; Luc. 23:56; 24:10.

² Paghalin sang mga babayi sa lulubngan, ginpalapitan sila ni Jesus kag ginsugo sila: “Lakat kamo, sugiri ninyo ang akon mga utod agod magkadto sila sa Galilea, kag didto makita nila ako.” (Mat. 28:10) Amo ini ang una nga tion nga ginsugo ni Jesus nga magtipon ang iya mga disipulo pagkatapos sia mabanhaw, kag magahatag sia sa ila sang importante gid nga mga instruksion.

3-4. Ngaa masiling naton nga indi lang sa mga apostoles ginhatag ang sugo sa Mateo 28:19, 20? (Tan-awa ang piktyur sa kober.)

³ Basaha ang Mateo 28:16-20. Sang nakigkita si Jesus sa iya mga disipulo, ginsugid niya ang importante nga hilikuton nga ila pagahimuon sadto nga tion, nga amo man ang ginahimo naton subong. Nagsiling si Jesus: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. . . . Tudlui ninyo sila nga tumanon ang tanan nga ginsugo ko sa inyo.”

⁴ Gusto ni Jesus nga magbantala ang tanan niya nga sumulunod. Indi lang ang iya 11 ka matutom nga mga apostoles ang ginsugo  niya. Ngaa sigurado kita sa sini? Sang ginhatag ni Jesus ang sugo nga tudluan ang mga tawo para mangin disipulo sila, indi lang ang mga apostoles ang ara sa bukid sa Galilea. Ngaa masiling naton ini? Dumduma nga nagsiling ang anghel sa mga babayi: “Makita ninyo sia [sa Galilea].” Gani posible gid nga ara man ang matutom nga mga babayi. Isa pa, nagsiling man si apostol Pablo nga “nagpakita [si Jesus] sa kapin sa 500 ka kauturan sa isa ka higayon.” (1 Cor. 15:6) Diin nagtipon ini nga mga kauturan?

5. Ngaa nagapati kita nga ang ginapatuhuyan sang 1 Corinto 15:6 amo ang pagtipon sang mga disipulo sa Galilea nga ginsambit sa Mateo kapitulo 28?

⁵ May mga rason kita nga magpati nga ang ginapatuhuyan ni Pablo amo ang pagtipon sang mga disipulo sa Galilea nga ginsambit sa Mateo kapitulo 28. Ano ini nga mga rason? Una, taga-Galilea ang kalabanan sang mga disipulo ni Jesus. Gani mas madali magtipon ang madamo nga tawo sa isa ka bukid sa Galilea sangsa isa ka balay sa Jerusalem. Ikaduha, nakigkita na si Jesus sa iya 11 ka apostoles sa isa ka balay sa Jerusalem pagkatapos sia mabanhaw. Kon gusto ni Jesus nga mga apostoles lang ang hatagan sang instruksion nga magbantala kag magtudlo, puede niya ini himuon sa Jerusalem imbes nga pakadtuon pa sila kag ang mga babayi kag ang iban pa sa Galilea para makigkita sa iya.—Luc. 24:33, 36.

6. Suno sa Mateo 28:20, ngaa dapat tumanon asta subong ang sugo nga magtudlo sa mga tawo para mangin disipulo sila, kag ngaa masiling naton nga ginatuman ini nga sugo subong?

⁶ Binagbinaga ang ikatlo nga rason. Indi lang ang mga Cristiano sadto nga tion ang ginsugo ni Jesus nga magtudlo sa mga tawo para mangin disipulo sila. Ngaa masiling naton ini? Sang ginhatag ni Jesus ang mga instruksion sa iya mga sumulunod, amo ini ang katapusan niya nga ginsiling: “Kaupod ninyo ako sa tanan nga tion tubtob sa hingapusan sang sistema sang mga butang.” (Mat. 28:20) Gintuman gid ni Jesus ang iya ginsiling kay madamo subong ang nagatudlo sa mga tawo para mangin disipulo sila. Makalilipay gid nga kada tuig, halos 300,000 ang nagapabawtismo bilang mga Saksi ni Jehova kag mga disipulo ni Jesucristo!

7. Ano ang binagbinagon naton, kag ngaa?

⁷ Madamo sang nagatuon sang Biblia ang nagauswag kag nagapabawtismo. Pero may pila nga nagatuon sang Biblia ang daw indi pa makadesisyon nga mangin disipulo. Nanamian sila magtuon, pero wala sila nagauswag para magpabawtismo. Kon may ginatudluan ka sang Biblia, sigurado gid nga gusto mo sia buligan nga iaplikar ang iya natun-an kag mangin disipulo sang Cristo. Binagbinagon sa sini nga artikulo kon paano naton mabuligan ang aton ginatudluan nga palanggaon si Jehova kag mag-uswag. Ngaa dapat naton ini binagbinagon? Bangod posible nga dapat kita magdesisyon kon bala padayunon pa naton ang isa ka pagtuon ukon untaton na naton ini.

8. Ngaa mabudlay kon kaisa ang pagbulig sa aton mga ginatudluan nga palanggaon si Jehova?

⁸ Gusto ni Jehova nga alagdon sia sang mga tawo bangod palangga nila sia. Gani dapat naton buligan ang aton mga ginatudluan nga mahangpan nga nagaulikid si Jehova sa ila kag palangga gid niya sila. Gusto naton nga makilala nila si Jehova bilang “amay sang mga wala sing amay kag manugpangapin sang mga balo nga babayi.” (Sal. 68:5) Kon mahangpan nila nga palangga sila sang Dios, posible gid nga palanggaon man nila sia. Mahimo nga nabudlayan ang iban sa ila nga tamdon si Jehova bilang mahigugmaon nga Amay bangod wala sila ginpalangga sang ila mismo amay. (2 Tim. 3:1, 3) Gani itudlo sa ila ang dalayawon nga mga kinaiya ni Jehova samtang nagatuon kamo. Buligi sila nga mahangpan nga gusto sang aton mahigugmaon nga Dios nga mabuhi sila sing wala sing katapusan, kag handa sia sa pagbulig sa ila. Ano pa ang dapat naton himuon?

9-10. Ano nga mga libro ang dapat naton gamiton sa pagtudlo sang Biblia sa iban, kag ngaa?

 ⁹ Gamita ang mga libro nga “Ano ang Ginatudlo sang Biblia sa Aton?” kag “Kon Paano Magpabilin sa Gugma sang Dios.” Ginhimo ini nga mga libro para mabuligan naton ang aton mga ginatudluan nga palanggaon si Jehova. Halimbawa, ginabinagbinag sa kapitulo 1 sang Ginatudlo sa Aton nga libro ang sabat sa sini nga mga pamangkot: Nagaulikid bala ang Dios sa aton ukon mapintas sia?, Ano ang ginabatyag sang Dios sa pag-antos sang mga tawo?, kag Posible ka bala mangin abyan ni Jehova? Ang Magpabilin sa Gugma sang Dios nga libro magabulig naman sa aton ginatudluan nga mahangpan nga kon iaplikar niya ang mga prinsipio sa Biblia, mangin malipayon sia kag magasuod pa gid sia kay Jehova. Dapat ka maghanda sa tagsa ninyo nga pagtuon para mabinagbinag mo sing maayo ang mga punto nga makabulig gid sa iya, bisan pa nagamit mo na ini nga mga libro sa iban.

¹⁰ Ano ang himuon mo kon ang topiko nga ginapamangkot sang imo ginatudluan wala sa mga publikasyon nga makita sa aton Mga Gamit sa  Pagpanudlo, pero ginabinagbinag ini sa iban nga publikasyon? Puede mo sia palig-unon nga personal niya nga basahon ini nga publikasyon para makapadayon kamo sa pagtuon sa Ginatudlo sa Aton nga libro ukon sa Magpabilin sa Gugma sang Dios nga libro.

11. San-o naton sugdan nga mangamuyo sa pagtuon, kag paano naton ipaathag sa aton ginatudluan nga importante ini?

¹¹ Sugdi ang pagtuon paagi sa pangamuyo. Sa masami, maayo gid kon mangamuyo na kita sa aton pagtuon mga pila pa lang ka semana nga regular na kita nga nagatuon. Mangamuyo kita sa umpisa kag pagkatapos sang pagtuon. Dapat naton ipaathag sa aton ginatudluan nga mahangpan lang naton ang Pulong sang Dios paagi sa bulig sang espiritu sang Dios. Ginagamit sang pila ka kauturan ang Santiago 1:5 para ipaathag sa ila ginatudluan kon ngaa nagapangamuyo kita kon nagatuon. Nagasiling ini: “Kon may isa sa inyo nga kulang sang kaalam, padayon sia nga magpangayo sa Dios.” Dayon ginapamangkot nila ang ila ginatudluan, “Paano kita makapangayo sang kaalam sa Dios?” Mahimo gid nga magasabat sia nga dapat kita mangamuyo sa Dios.

12. Paano mo gamiton ang Salmo 139:2-4 para palig-unon ang imo ginatudluan nga mangamuyo sing sinsero kay Jehova?

¹² Tudlui ang nagatuon kon paano mangamuyo. Pasaliga sia nga gusto ni Jehova pamatian ang iya sinsero nga mga pangamuyo. Ipaathag sa iya nga kon nagapangamuyo kita, puede naton isugid kay Jehova ang tanan naton nga ginabatyag, pati ang mga butang nga indi naton masugid sa iban nga tawo. Ang matuod, kabalo si Jehova sang aton mga ginahunahuna. (Basaha ang Salmo 139:2-4.) Palig-unon man naton ang aton ginatudluan nga mangamuyo sa Dios para buligan sia nga mabag-o ang iya sala nga panghunahuna kag mauntatan ang iya malain nga ginahimo. Halimbawa, basi medyo madugay na nga nagatuon ang aton ginatudluan pero nanamian sia gihapon sa isa ka selebrasyon nga indi dapat selebrahon sang mga Cristiano. Kabalo sia nga sala ini, pero may pila ka butang sa sini nga selebrasyon nga nanamian niya gihapon. Palig-una sia nga isugid kay Jehova ang iya ginabatyag kag mangamuyo nga buligan sia nga higugmaon lang ang ginahigugma sang Dios.—Sal. 97:10.

13. (a) Ngaa dapat naton agdahon dayon ang aton mga ginatudluan nga magtambong sa mga miting? (b) Paano naton sila mabuligan nga indi mahuya kon magtambong sila sa Kingdom Hall?

¹³ Agdaha dayon ang imo ginatudluan sang Biblia nga magtambong sa mga miting. Ang iya mabatian kag makita sa Cristianong mga miting makapalig-on sa iya nga alagaron si Jehova kag makabulig sa iya nga mag-uswag. Ipakita ang video nga Ano ang Ginahimo sa Kingdom Hall? kag hagara sia nga mag-upod sa imo. Buligi sia nga makatambong. Makabulig man kon lainlain nga mga utod ang iupod mo sa inyo pagtuon. Paagi sa sini, madamo na sang kakilala sa kongregasyon ang imo ginatudluan kag mahimo nga indi na sia mahuya kon magtambong sia sa aton mga miting.

14. Ano ang magapalig-on sa aton ginatudluan nga magbulig sa iban?

¹⁴ Dapat naton buligan ang aton ginatudluan sang Biblia nga mag-uswag. (Efe. 4:13) Mahimo nga interesado ang isa sa mga benepisyo nga mabaton niya sa pagtuon sang Biblia amo nga nagsugot sia nga magtuon. Pero samtang nagatubo ang iya gugma kay Jehova, mahimo gid nga hunahunaon na niya kon paano sia makabulig sa iban, pati na sa mga kauturan sa kongregasyon. (Mat. 22:37-39) Sa husto nga tion, isugid sa iya nga makabulig sia sa hilikuton sang Ginharian paagi sa pag-amot sing kuarta, kag isa ini ka pribilehiyo.

15. Paano naton mabuligan ang aton ginatudluan sang Biblia nga himuon ang husto kon may problema sia?

¹⁵ Tudlui ang nagatuon sang Biblia kon ano ang dapat himuon kon may problema sia. Halimbawa, ibutang ta nga isa na ka indi bawtismado nga  manugbantala ang imo ginatudluan, kag ginsugiran ka niya nga naglain ang iya buot sa isa ka utod sa kongregasyon. Imbes nga isiling sa iya kon sin-o ang husto ukon sin-o ang may sala, ipaathag sa iya ang ginasiling sang Biblia nga dapat niya himuon. Puede niya patawaron ang utod kag kalimtan na lang ini ukon istoryahon niya ang utod sing mainayuhon kag mahigugmaon kay gusto niya nga mag-ayuhay sila. (Ipaanggid ang Mateo 18:15.) Buligi sia nga maghanda sa iya ihambal. Tudlui sia kon paano gamiton ang JW Library^® nga app, ang Giya sa Pagtuon Para sa mga Saksi ni Jehova, kag ang jw.org^® sa pag-research para mabal-an niya ang puede himuon sa sini nga sitwasyon. Kon matun-an niya kon paano masolbar ang mga problema sa iya kaangtanan sa iban antes sia mabawtismuhan, mahimo gid nga mangin maayo ang iya kaangtanan sa mga kauturan sa kongregasyon kon mabawtismuhan na sia.

16. Ngaa maayo kon hagaron mo ang iban nga manugbantala nga updan ka sa imo ginatudluan?

¹⁶ Hagara ang iban nga kauturan nga updan ka sa imo ginatudluan, kag hagara man ang manugtatap sang sirkito kon magduaw sia sa inyo kongregasyon. Ngaa? Makabulig man sa imo ginatudluan ang iban nga manugbantala. Halimbawa, ibutang ta nga pila na ka beses nga gintinguhaan sang imo ginatudluan nga mag-untat sa pagpanigarilyo, pero nagpanigarilyo sia gihapon. Upda ang isa ka Saksi nga nagapanigarilyo sang una pero nauntat niya ini pagligad sang madamo nga beses niya nga pagtinguha. Mahimo nga makahatag sia sang laygay nga makabulig sa imo ginatudluan. Kon medyo nahuya ka magtudlo nga kaupod ang utod nga may madamo na nga eksperiensia sa pagtudlo, pangabaya sia nga sia lang anay ang magdumala sa pagtuon. Kon hagaron mo ang iban nga updan ka sa imo ginatudluan sang Biblia, may matun-an sia sa ila mga eksperiensia. Dumduma nga dapat naton buligan ang aton ginatudluan nga mag-uswag.

17-18. Ano ang dapat mo binagbinagon antes ka magdesisyon kon bala dapat mo untaton ang inyo pagtuon?

¹⁷ Kon wala nagahimo sang pagbag-o sa iya kabuhi ang imo ginatudluan sang Biblia, maabot ang tion nga dapat mo pamangkuton ang imo kaugalingon, ‘Dapat ko bala untaton ang amon pagtuon?’ Antes ka magdesisyon, dapat mo anay binagbinagon ang iya ikasarang. Madasig mag-uswag ang iban, pero ang iban indi. Pamangkuta ang imo kaugalingon: ‘Nagauswag bala ang akon ginatudluan suno sa iya masarangan?’ ‘“Ginatuman” ukon ginaaplikar na bala niya ang iya natun-an?’ (Mat. 28:20) Mahimo nga nagakinahanglan sang malawig nga tion ang aton ginatudluan para mangin disipulo sia, pero dapat amat-amat sia nga maghimo sang mga pagbag-o sa iya kabuhi.

¹⁸ Ano ang himuon naton kon madugay na nga nagatuon ang isa pero wala niya ginaaplikar ang iya natun-an? Binagbinaga ini nga halimbawa: Natapos na sang imo ginatudluan nga tun-an ang Ginatudlo sa Aton nga libro kag ayhan nagatuon na kamo sa Magpabilin sa Gugma sang Dios nga libro, pero wala pa gid sia makatambong sa miting sang kongregasyon, kag bisan sa Memoryal!  Masami sia nagasiling nga indi anay kamo magtuon bangod sang indi man importante nga mga rason. Kon amo sini ang imo ginatudluan, dapat mo sia istoryahon sing prangka. *

19. Ano ang puede mo isiling sa isa nga wala nagaaplikar sa iya natun-an sa Biblia, kag ano ang dapat mo binagbinagon?

¹⁹ Puede mo sia pamangkuton, ‘Sa banta mo, ano ang ginahimo sang mga Saksi ni Jehova nga mabudlayan ka gid nga himuon?’ Basi isiling niya, ‘Gusto ko magtuon sang Biblia, pero indi lang ako mag-Saksi!’ Kon amo ini ang iya panimuot bisan pa madugay na sia nga nagatuon, basi dapat mo na untaton ang inyo pagtuon. Pero basi subong pa lang isugid sang imo ginatudluan kon ngaa wala sia nagauswag. Halimbawa, basi pamatyag niya mabudlayan gid sia magbantala. Kon mabal-an mo ang iya ginabatyag, mas madali mo sia nga mabuligan.

20. Paano kita mabuligan sang Binuhatan 13:48 sa pagdesisyon kon bala padayunon pa naton ang isa ka pagtuon ukon untaton na naton ini?

²⁰ Makapasubo nga ang iban sa aton ginatudluan nangin pareho sang mga Israelinhon sang panahon ni Ezequiel. Amo ini ang ginsiling ni Jehova kay Ezequiel parte sa ila: “Para sa ila daw kaangay ka lang sang manug-amba sing ambahanon sa gugma, nga maayo mag-amba kag magtokar sing de-kuerdas nga instrumento. Magapamati sila sa imo isiling, apang wala sing isa sa ila nga magahimo sini.” (Ezeq. 33:32) Mahimo nga mabudlay ang paghambal sa aton ginatudluan nga untaton na naton ang aton pagtuon. Pero “malip-ot na lang ang tion nga nabilin.” (1 Cor. 7:29) Mas maayo nga untaton na naton ang pagtudlo sa wala gid nagauswag. Dapat naton pangitaon ang tawo nga matuod gid nga “may husto nga panimuot sa pagtigayon sing kabuhi nga wala sing katapusan.”—Basaha ang Binuhatan 13:48.

21. Ano ang aton tuigan nga teksto sa 2020, kag ngaa nagakaigo ini?

²¹ Buligan kita sang aton tuigan nga teksto sa 2020 nga hunahunaon kon paano pa kita mag-uswag sa pagtudlo sa mga tawo para mangin disipulo sila. Nalakip ini sa ginsiling ni Jesus sa isa ka importante nga pagtilipon sa bukid sa Galilea: “Gani kadtui ninyo ang mga tawo . . . kag tudlui ninyo sila agod mangin disipulo ko. Bawtismuhi ninyo sila.”—Mat. 28:19.