1. Ngaa madamo nga tawo ang nagapamensar nga imposible nga magkabuhi sing wala katapusan?

 MADAMO nga tawo ang nagahalong gid sa ila ginakaon kag pirme naga-exercise kay gusto nila nga indi sila magmasakit kag para maglawig ang ila kabuhi. Pero kabalo sila nga indi sini mapunggan ang pagtigulang kag kamatayon. Bangod sini, posible nagapamensar sila nga imposible nga magkabuhi sing wala katapusan. Pero nagsiling si Jesus sa Juan 3:16 kag 5:24 nga posible gid nga ‘mabuhi sing wala katapusan’ ang mga tawo.

2. Ano ang ginasiling sang Juan kapitulo 6 parte sa kabuhi nga wala sing katapusan? (Juan 6:​39, 40)

² Isa ka adlaw, ginpakaon ni Jesus sang tinapay kag isda ang linibo ka tawo paagi sa milagro. a Dalayawon gid ini, pero mas dalayawon ang ginsiling niya pagkasunod nga adlaw. Nagsunod sa iya ang mga tawo sa Capernaum nga malapit sa higad sang baybay sang Galilea diin ginsilingan niya sila nga puede mabanhaw ang mga patay kag makatigayon sang kabuhi nga wala sing katapusan. (Basaha ang Juan 6:​39, 40.) Base sa ginsiling ni Jesus, pamensara ang imo mga abyan kag ang imo mga miembro sang pamilya nga napatay. Ginapasalig kita sini nga madamo nga tawo ang mabanhaw, kag ikaw kag ang imo mga pinalangga makatigayon sang kabuhi nga wala sing katapusan.  Pero, madamo nga tawo asta subong ang wala nakaintiende sa ginsiling ni Jesus sa masunod nga mga bersikulo sang Juan kapitulo 6. Ano ang iya ginsiling?

3. Ano ang ginsiling ni Jesus parte sa iya kaugalingon sa Juan 6:51?

³ Pagkatapos ginhatagan ni Jesus sang pagkaon ang mga tawo sa Capernaum, nadumduman nila ang gin-aman ni Jehova nga manna sa mga Israelinhon sang ara sila sa kamingawan. Gintawag sang Kasulatan ina nga manna nga “tinapay halin sa langit.” (Sal. 105:40; Juan 6:31) Gani gingamit ni Jesus ang manna para tudluan sila sang importante nga leksion. Bisan pa ang manna gin-aman sang Dios, ang mga nagkaon sini napatay man gihapon. (Juan 6:49) Pero, gintawag ni Jesus ang iya kaugalingon nga “matuod nga tinapay halin sa langit,” “ang tinapay nga ginahatag sang Dios,” kag “ang tinapay sang kabuhi.” (Juan 6:​32, 33, 35) Ginpakita ni Jesus ang kinalain niya sa manna. Nagsiling sia: “Ako ang buhi nga tinapay nga nagpanaug halin sa langit. Ang bisan sin-o nga magkaon sini nga tinapay magakabuhi sing dayon.” (Basaha ang Juan 6:51.) Natingala gid ang mga Judiyo. Indi nila maintiendihan kon ngaa ginsiling ni Jesus nga sia ang “tinapay” halin sa langit kag mas maayo pa ini sangsa manna nga gin-aman sang Dios sa ila mga katigulangan. Dayon ginsilingan sila ni Jesus: “Ang tinapay nga akon ihatag . . . amo ang akon unod.” Ano ang iya buot silingon? Dapat naton ini maintiendihan para mabaton naton kag sang aton mga pinalangga ang kabuhi nga wala sing katapusan. Hibaluon naton kon ano ang buot silingon ni Jesus.

BUHI NGA TINAPAY KAG ANG IYA UNOD

4. Ngaa ang pila ka tawo nakibot gid sa ginsiling ni Jesus?

⁴ Ang pila sa mga nagapamati kay Jesus nakibot gid sang naghambal sia nga ihatag niya ang iya unod para mabuhi ang kalibutan. Mahimo nagapamensar sila nga ihatag ni Jesus ang iya mismo nga unod para kaunon nila. (Juan 6:52) Nakibot pa gid sila sa dugang nga ginsiling ni Jesus: “Kon indi kamo magkaon sang unod sang Anak sang tawo kag mag-inom sang iya dugo, indi kamo makatigayon sang kabuhi.”​—Juan 6:53.

5. Ngaa masiling naton nga indi buot silingon ni Jesus nga imnon sang mga tawo ang iya mismo dugo?

⁵ Sang panahon ni Noe, nagsugo ang Dios nga indi dapat magkaon sang dugo ang mga tawo. (Gen. 9:​3, 4) Sang ulihi, ginsugo man ni Jehova ang mga Israelinhon nga indi sila magkaon sing dugo, kay ang bisan sin-o nga magkaon sini “dapat patyon.” (Lev. 7:27) Ginsugo ni Jesus ang mga Judiyo nga tumanon ang tanan nga sugo sang Dios. (Mat. 5:​17-19) Gani, indi gid sia magsugo sa mga Judiyo nga kaunon ang iya mismo nga unod kag imnon ang iya dugo. Kundi, gusto lang sila tudluan ni Jesus kon ano ang dapat nila himuon para matigayon ang “kabuhi nga wala sing katapusan.”​—Juan 6:54.

6. Ngaa masiling naton nga malaragwayon lang ang ginsiling ni Jesus parte sa pagkaon sang iya unod kag pag-inom sang iya dugo?

⁶ Maathag nga nagatudlo si Jesus sa malaragwayon nga paagi, pareho sang gin-istorya niya ang isa ka Samaritana: “Ang bisan sin-o nga nagainom sang tubig nga akon ihatag sa iya indi na gid pag-uhawon, kay ang tubig nga akon ihatag sa iya mangin tuburan sang tubig sa sulod niya nga nagaibwal agod maghatag sang kabuhi nga wala sing katapusan.” (Juan 4:​7, 14) b Indi buot silingon ni Jesus nga matigayon sang Samaritana ang kabuhi nga  wala sing katapusan paagi lang sa pag-inom sang literal nga tubig. Sing kaanggid, sang gin-istorya ni Jesus ang mga tawo sa Capernaum, indi niya buot silingon nga matigayon nila ang kabuhi nga wala sing katapusan kon kaunon nila ang iya mismo unod kag imnon ang iya dugo.

IBAN PA NGA TION NGA GINTUDLO NI JESUS ANG PARTE SA IYA UNOD KAG DUGO

7. Ano ang pagpati sang iban sa ginsiling ni Jesus sa Juan 6:53?

⁷ Nagapati ang iban nga relihioso nga tawo nga ang ginsiling ni Jesus sa Juan 6:53 parte sa pagkaon sang iya unod kag pag-inom sang iya dugo amo ang sulundan sa pagsaulog sang Panihapon sang Ginuo kay amo man ini nga mga tinaga ang gingamit ni Jesus sa sina nga okasyon. (Mat. 26:​26-28) Nagasiling sila nga ang tanan nga naga-attend sa Panihapon sang Ginuo dapat magkaon sang tinapay kag mag-inom sang alak nga ginapasa sa tumalambong. Husto bala sila? Importante gid nga mabal-an naton ang sabat kay kada tuig minilyon sa bilog nga kalibutan ang naga-attend sa sini nga okasyon. Hibaluon naton ang mga kinalain sang ginsiling ni Jesus sa Juan 6:53 kag sa iya ginsiling sa tion sang Panihapon sang Ginuo.

8. Ano ang duha ka kinalain sang duha ka hitabo? (Tan-awa man ang mga piktyur.)

⁸ May ara sing duha ka kinalain sa sining duha ka hitabo. Una, san-o kag diin ginsiling ni  Jesus ang mabasa sa Juan 6:​53-56? Ginhambal ini ni Jesus sa mga Judiyo sa Galilea sang 32 C.E. Mga isa ka tuig pa ang nagligad sang ginsugdan ni Jesus ang Panihapon sang Ginuo sa Jerusalem. Ikaduha, para kay sin-o ang mensahe ni Jesus? Ang kalabanan sa nagpamati kay Jesus sa Galilea mas interesado sa pisikal nga pagkaon sangsa espirituwal nga pagkaon. (Juan 6:26) Sang may ginsiling si Jesus nga wala nila maintiendihan, wala na sila nagpati sa iya. Bisan gani ang pila sa iya mga disipulo nag-untat sa pagsunod sa iya. (Juan 6:​14, 36, 42, 60, 64, 66) Ini nga mga tawo lain gid sa matutom nga mga apostoles nga kaupod ni Jesus sang ginsugdan niya ang Panihapon sang Ginuo mga isa ka tuig sang ulihi sang 33 C.E. Sa sina nga okasyon, kaupod niya ang iya 11 ka matutom nga apostoles bisan pa wala nila maintiendihan sing bug-os ang tanan niya nga gintudlo. Indi pareho sa kalabanan sa Galilea, nagapati gid sila nga si Jesus amo ang Anak sang Dios kag halin sia sa langit. (Mat. 16:16) Gani, ginkomendahan sila ni Jesus: “Gin-unungan ninyo ako sa akon mga pagtilaw.” (Luc. 22:28) Ginapakita sining duha ka kinalain nga ang ginsiling ni Jesus sa Juan 6:53 wala nagapatuhoy sa Panihapon sang Ginuo. Binagbinagon naton ang dugang pa nga kinalain.

ANO ANG BUOT SILINGON SANG GINSILING NI JESUS PARA SA IMO?

9. Ano nga grupo ang ginapatuhuyan ni Jesus sa iya ginsiling sa tion sang Panihapon sang Ginuo?

⁹ Sa tion sang Panihapon sang Ginuo, ginhatagan ni Jesus ang iya mga apostoles sang tinapay nga wala sing lebadura kag ginsilingan niya sila nga nagarepresentar ini sang iya lawas. Dayon ginhatag niya sa ila ang alak kag nagsiling nga nagakahulugan ini sang “dugo sang katipan.” (Mar. 14:​22-25; Luc. 22:20; 1 Cor. 11:24) Importante gid ang kahulugan sini. Ang bag-o nga katipan ginhimo indi para sa tanan nga tawo, kundi para lang sa “panimalay sang [espirituwal nga] Israel” nga mangin kaupod ni Jesus sa paggahom sa langit. (Heb. 8:​6, 10; 9:15) Wala naintiendihan sing bug-os sang mga apostoles ini nga katipan sa sina nga tion. Pero sa indi madugay, haplasan sila sang balaan nga espiritu kag mangin bahin sila sang bag-o nga katipan para makaupod nila si Jesus sa langit.​—Juan 14:​2, 3.

10. Ano pa gid ang kinalain sang ginsiling ni Jesus sang ara sia sa Galilea kag sang iya ginsiling sa tion sang Panihapon sang Ginuo? (Tan-awa man ang piktyur.)

¹⁰ Talupangda nga ang ginsiling ni Jesus sa tion sang Panihapon sang Ginuo para lang sa “diutay nga panong.” Ang iya matutom nga mga apostoles nga kaupod niya sa sina nga tion amo ang una nga bahin sinang gamay nga grupo. (Luc. 12:32) Sila kag ang iban pa nga mangin bahin sina nga grupo dapat makigbahin sa duha ka emblema—ang tinapay kag ang alak. Mangin kaupod sila ni Jesus sa langit. Isa pa ini nga kinalain kay gamay lang nga grupo ang gin-istorya ni Jesus sa sini nga okasyon, pero madamo nga tawo ang gin-istorya niya sa Galilea.

11. Ano ang ginsiling ni Jesus nga nagapakita nga wala niya ginatumod ang gamay lang nga grupo sang mga tawo?

¹¹ Sang 32 C.E., ang kalabanan nga Judiyo nga gin-istorya ni Jesus sa Galilea gusto lang makakaon sang tinapay nga ihatag niya. Pero ginbuligan sila ni Jesus nga maintiendihan nga may ara sing mas importante pa sangsa tinapay. May ginsiling sia nga isa ka aman nga makahatag sa ila sang kabuhi nga wala sing katapusan. Kag nagsiling pa si Jesus nga ang mga napatay may paglaum nga mabanhaw sa katapusan nga adlaw kag mabuhi sing wala katapusan. Wala niya ginatumod ang gamay lang nga grupo, pareho sa nakaupod niya  sa Panihapon sang Ginuo. Kundi, ang ginatumod niya amo ang pagpakamaayo nga mabaton sang tanan nga tawo. Nagsiling pa sia: “Ang bisan sin-o nga magkaon sini nga tinapay magakabuhi sing dayon; . . . Ang tinapay nga akon ihatag agod mabuhi ang kalibutan amo ang akon unod.”​—Juan 6:51. c

12. Ano ang dapat himuon sang isa para mabaton niya ang kabuhi nga wala sing katapusan?

¹² Wala ginsilingan ni Jesus ang mga Judiyo sa Galilea nga ini nga pagpakamaayo ihatag sa tanan nga tawo nga nagkabuhi ukon mabun-ag pa. Kundi, ang mga “magkaon sini nga tinapay” ukon ang nagatuo kay Jesus amo lamang ang makabaton sini nga pagpakamaayo. Madamo nga tawo subong ang nagapati nga maluwas na sila kon magtuo lang sila kay Jesus kag batunon nila sia nga ila manluluwas. (Juan 6:29) Pero may dapat pa gid sila nga himuon, kay ang pila ka tawo sa Galilea nagtuo man kay Jesus pero sang ulihi nag-untat sila sa pagsunod sa iya. Ngaa?

13. Ano ang dapat himuon sang mga tawo para mangin matuod sila nga disipulo ni Jesus?

¹³ Ang kalabanan sa mga tawo nga ginpakaon ni Jesus nanamian gid mag-upod sa iya basta ihatag niya sa ila ang ila kinahanglanon. Gusto lang nila nga ayuhon ang ila balatian, makakaon, ukon tudluan sila sang gusto lang nila mabatian. Pero, gin-athag sa ila ni Jesus nga nagkadto sia sa duta indi lang para ihatag ang ila pisikal nga kinahanglanon, kundi dapat nila batunon ang iya pangagda nga ‘magkari sa iya’ kag tumanon ang tanan niya nga gintudlo sa ila.​—Juan 5:40; 6:44.

14. Ano ang dapat naton himuon para makabenepisyo kita sa unod kag dugo ni Jesus?

 ¹⁴ Gintudluan ni Jesus ang mga Judiyo nga para may paglaum sila nga mabuhi sing wala katapusan, dapat sila magtuo sa iya himuon nga paghalad sang iya unod kag dugo sa ulihi. Ini nga pagtuo dapat man naton ipakita subong. (Juan 6:40) Gani base sa ginsiling ni Jesus sa Juan 6:​53, dapat kita magtuo sa halad-gawad para mabaton naton ang kabuhi nga wala sing katapusan. Ini nga pagpakamaayo puede mabaton sang madamo nga tawo.​—Efe. 1:7.

15-16. Ano ang natun-an naton sa Juan kapitulo 6?

¹⁵ Madamo kita sang natun-an sa Juan kapitulo 6 nga nakapalig-on gid sa aton tanan. Ginpakita sini nga rekord nga palangga gid kita ni Jesus. Sang ara sia sa Galilea, gin-ayo niya ang mga may balatian, gintudluan ang mga tawo parte sa Ginharian, kag gin-amanan sila sang pagkaon. (Luc. 9:11; Juan 6:​2, 11, 12) Labaw sa tanan, gintudluan niya sila nga sia “ang tinapay sang kabuhi.”​—Juan 6:​35, 48.

¹⁶ Ang mga ginpatuhuyan ni Jesus nga “iban nga mga karnero” indi dapat magkaon sang tinapay ukon mag-inom sang alak sa tion sang Panihapon sang Ginuo. (Juan 10:16) Pero, makabenepisyo sila gihapon sa unod kag dugo ni Jesucristo kon magtuo sila sa iya halad-gawad. (Juan 6:53) Ginapakita naman sang mga nagakaon sang tinapay kag nagainom sang alak nga bahin sila sang bag-o nga katipan kag magagahom sila sa Ginharian sa langit. Gani, hinaplas man kita ukon bahin sang iban nga mga karnero, importante gid nga matun-an naton ang rekord sang Juan kapitulo 6. Ginatudluan kita sini nga dapat kita magpakita sang mabakod nga pagtuo sa halad-gawad para mabaton naton ang kabuhi nga wala sing katapusan.