Nabasa mo na bala sing maayo ang bag-o nga mga isyu sang Ang Lalantawan? Tilawi kon masabat mo ini nga mga pamangkot:

Ang Santiago 5:11 nagasiling nga si Jehova “mapinalanggaon gid” kag “maluluy-on.” Ano ang ginapasalig sini sa aton?

Bangod maluluy-on si Jehova, kabalo kita nga handa sia nga patawaron ang aton mga sala. Ginapasalig man sang Santiago 5:11 nga bangod palangga niya kita, gusto gid niya kita buligan. Maayo gid nga ilugon naton sia.—w21.01, p. 21.

Ngaa ginhatagan ni Jehova sang awtoridad ang iban?

Ginhimo niya ini bangod palangga niya kita. Bangod sini, organisado kag may paghidait ang iya pamilya. Kon maathag sa kada miembro sang pamilya kon sin-o ang ginhatagan ni Jehova sang awtoridad, kabalo sila kon sin-o ang magahimo sang desisyon kag kon sin-o ang magapatuman sini.—w21.02, p. 3.

Ngaa dapat gid maghalong ang mga Cristiano kon nagagamit sila sang mga messaging app?

Kon gusto sang isa nga maggamit sini nga mga app, dapat niya pilion sing maayo ang iya mga kaupdanan. Mabudlay ini himuon sa mga group chat nga madamo sang miembro. (1 Tim. 5:13) Dapat man kita maghalong kay basi mapasa naton ang mga istorya ukon mga report nga indi sigurado kon bala matuod, kag basi magamit naton ini para magnegosyo sa mga kauturan.—w21.03, p. 31.

Ngaa gintugutan sang Dios nga mag-antos kag mapatay si Jesus?

Ang isa ka rason amo ini: Paagi sa pagbutang kay Jesus sa usok, posible mahilway ang mga Judiyo sa pagpakamalaut sa ila. (Gal. 3:10, 13) Ang ikaduha: Ginhanas ni Jehova si Jesus sa iya responsibilidad bilang Mataas nga Saserdote. Kag ang ikatlo: Bangod nangin matutom si Jesus asta sa iya kamatayon, napamatud-an niya nga makapabilin nga matutom ang mga tawo bisan pa sang grabe nga mga pagtilaw. (Job 1:9-11)—w21.04, p. 16-17.

Ano ang puede mo himuon kon mabudlay maistorya ang mga tawo sa ila balay?

Magbantala sa oras nga labanlaban ang mga tawo ara sa ila balay. Puede ka man magbantala sa lain nga lugar. Kag laina ang imo paagi, pareho sang paghimo sing sulat.—w21.05, p. 15-16.

Ano ang buot silingon ni apostol Pablo sang nagsiling sia: “Paagi sa kasuguan napatay ako sa kasuguan”? (Gal. 2:19)

Paagi sa Mosaikong Kasuguan, nangin maathag sa indi perpekto nga mga tawo nga indi gid nila masunod sing bug-os ang Kasuguan, kag gintuytuyan sila sini padulong sa Cristo. (Gal. 3:19, 24) Gani ginbaton ni Pablo ang Cristo. Bangod sini, “napatay [si Pablo] sa kasuguan,” ukon nahilway na sia sa sini.—w21.06, p. 31.

Paano ginpakita ni Jehova ang iya pagbatas nga dapat naton ilugon?

Ginbatas ni Jehova ang pagpakahuya sa iya ngalan, ang pagpamatok sa iya kinamatarong sa paggahom, ang pagrebelde sang pila niya ka anak, ang pagpalapta ni Satanas sang mga kabutigan, ang pag-antos sang iya mga alagad, ang kahidlaw niya sa iya mga abyan nga napatay, ang pagpanghalit sang malain nga mga tawo sa iban, kag ang pagguba sang mga tawo sa duta nga iya gintuga.—w21.07, p. 9-12.

Paano ginpakita ni Jose ang pagkamapinasensiahon?

Ginbatas ni Jose ang indi maayo nga ginhimo sa iya sang iya mga utod. Gin-akusahan man sia sang sala nga wala niya ginhimo kag ginpriso sia sa Egipto sa madamo nga tinuig.—w21.08, p. 12.

Ano ang ginapahangop sang pag-uyog nga ginsambit sa Hageo 2:6-9, 20-22?

Indi maayo ang reaksion sang mga pungsod sa pagbantala parte sa Ginharian, pero madamo nga tawo ang nagbaton sang kamatuoran. Malapit na ang katapusan nga pag-uyog sa mga pungsod nga magalaglag sa ila.—w21.09, p. 15-19.

Ngaa indi kita dapat mag-untat sa pagbantala?

Makita ni Jehova ang aton mga pagpanikasog, kag nalipay sia sa sini. Kon indi kita mag-untat, mabaton naton ang kabuhi nga wala sing katapusan.—w21.10, p. 25-26.

Paano makabulig sa aton ang Levitico kapitulo 19 para maaplikar naton ang laygay nga “mangin balaan kamo sa tanan ninyo nga paggawi”? (1 Ped. 1:15)

Mahimo nga ginkutlo ini sa Levitico 19:2. Madamo sing halimbawa sa kapitulo 19 nga makabulig sa aton nga maaplikar ang 1 Pedro 1:15 sa aton pagkabuhi.—w21.12, p. 3-4.