Ang pagpanumpa “isa ka serioso kag pormal nga pagpahayag ukon promisa nga himuon ang isa ka butang, nga sa masami ginasambit ang Dios . . . bilang saksi.” Puede ihambal ang isa ka panumpa, kag puede man ini isulat.

Posible ginahunahuna sang iban nga sala ang magpanumpa bangod nagsiling si Jesus: “Indi kamo magpanumpa . . . Dapat nga ang inyo ‘Huo’ mangin huo, ang inyo ‘Indi,’ indi, kay ang labi pa sa sini halin sa isa nga malauton.” (Mat. 5:33-37) Kabalo si Jesus nga ginapatuman sang Mosaikong Kasuguan nga dapat magpanumpa ang mga Israelinhon sa pila ka sitwasyon, kag may matutom nga mga alagad sang Dios nga nagpanumpa sang una. (Gen. 14:22, 23; Ex. 22:10, 11) Kabalo man sia nga bisan gani si Jehova nagpanumpa man. (Heb. 6:13-17) Gani wala ginapahangop ni Jesus nga indi gid kita dapat magpanumpa. Sa baylo, ginapaandaman niya ang mga tawo parte sa pagpanumpa sa indi importante nga mga butang ukon parte sa pagpanumpa nga wala man sing nagakaigo nga rason. Dapat gid naton tumanon ang aton mga ginpanumpa, kay amo ini ang gusto ni Jehova nga himuon naton.

Ti, ano ang dapat mo himuon kon ginapangabay ka nga magpanumpa? Una, siguraduha nga masarangan mo nga himuon ang imo ipanumpa. Kon indi ka sigurado kon bala masarangan mo ini, mas maayo kon indi ka magpanumpa. Ginapaandaman kita sang Pulong sang Dios: “Mas maayo pa nga indi ka magpanaad sangsa magpanaad ka nga indi mo pagtumanon.” (Man. 5:5) Dayon, binagbinaga ang mga prinsipio sa Biblia nga may kaangtanan sa ginapangabay sa imo nga ipanumpa, kag magdesisyon base sa imo konsiensia. Ano ang pila sa sini nga mga prinsipio sa Biblia?

May pila ka panumpa nga nahisuno sa kabubut-on sang Dios. Halimbawa, nagasumpaanay ang ginakasal nga mga Saksi ni Jehova. Sa atubangan sang Dios kag sang mga saksi, nagapanumpa ang nobyo kag ang nobya nga higugmaon, palanggaon, kag tahuron nila ang isa kag isa ‘tubtob nagakabuhi sila.’ (Posible nga indi gid pareho sa sini ang ginasiling sang iban nga ginakasal, pero nagapanumpa sila gihapon sa atubangan sang Dios.) Dayon mangin bana na sila kag asawa, kag mangin mag-asawa sila sa bilog nila nga kabuhi. (Gen. 2:24; 1 Cor. 7:39) Nagakaigo ini nga pagsumpaanay sa kasal, kag nahisuno ini sa kabubut-on sang Dios.

May pila ka panumpa nga wala nahisuno sa kabubut-on sang Dios. Halimbawa, indi gid magpanumpa ang isa ka matuod nga Cristiano nga maggamit sia sang armas para depensahan ang ila pungsod ukon ipanghiwala niya ang iya pagtuo sa Dios. Kay man, nagalapas ini sa mga sugo sang Dios. ‘Indi bahin sang kalibutan’ ang mga Cristiano, gani indi kita dapat mag-entra sa mga isyu kag sa mga inaway sa kalibutan.—Juan 15:19; Isa. 2:4; Sant. 1:27.

May pila ka panumpa nga nagadepende sa konsiensia. Kon kaisa, antes kita magdesisyon kon bala magapanumpa kita ukon indi, dapat naton anay binagbinagon  sing maayo ang sugo ni Jesus nga “ihatag ninyo sa Cesar ang mga butang nga iya sang Cesar, apang sa Dios ang mga butang nga iya sang Dios.”—Luc. 20:25.

Halimbawa, ibutang ta nga naga-apply ang isa ka Cristiano para mangin citizen sia sang isa ka pungsod ukon para makakuha sia sang passport. Para mahimo ini, dapat sia magpanumpa sang ginatawag nga oath of allegiance. Kon nalakip sa sini nga panumpa ang paghimo sang isa ka butang nga nagalapas sa kasuguan sang Dios, indi paghimuon sang isa ka Cristiano ini nga panumpa bangod sang iya konsiensia nga ginagiyahan sang mga prinsipio sa Biblia. Pero, posible nga pasugtan sia sang gobierno nga islan ang pila ka tinaga sa oath of allegiance para puede niya ini ipanumpa base sa iya konsiensia.

Base sa prinsipio nga mabasa sa Roma 13:1, posible magdesisyon ang isa ka Cristiano nga magpanumpa sang oath of allegiance nga gin-islan ang pila ka tinaga. Ini nga teksto nagasiling: “Ang tagsa ka tawo dapat magpasakop sa mas mataas nga mga awtoridad.” Gani bangod gusto ni Jehova nga tumanon naton ang mga awtoridad basta wala lang kita sing malapas sa iya mga kasuguan, posible hunahunaon sang isa ka Cristiano nga wala sing malain kon magpanumpa sia sini.

Ano abi kon may ipahimo sa imo, pareho sang pagbayaw sang kamot ukon pag-uyat sang isa ka butang samtang nagapanumpa ka? Importante man nga sundon mo ang imo konsiensia nga ginagiyahan sang mga prinsipio sa Biblia. Sang una, ginagamit sang mga Romano kag mga Escita ang ila espada kon nagapanumpa sila. Ginagamit nila ang espada, nga amo ang simbulo sang ila dios sang inaway, para ipakita nga masaligan sila. Ginabayaw naman sang mga Griego ang ila kamot kon nagapanumpa sila. Paagi sa sini, ginapakita nila nga nahangpan nila nga may ara gamhanan nga persona nga nakahibalo sang ginasiling kag ginahimo sang mga nagapanumpa, kag manabat sila sa iya.

Indi gid magpanumpa ang isa ka alagad ni Jehova sa bisan ano nga simbulo sang pungsod nga may labot sa butig nga pagsimba. Pero ano abi kon hambalan ka sang korte nga itungtong ang imo kamot sa Biblia kag manumpa ka nga isugid mo ang matuod? Sa sini nga sitwasyon, posible nga himuon mo ini, kay mabasa sa Biblia nga may ginhimo man ang pila ka matutom nga alagad sang Dios sang nagpanumpa sila. Halimbawa, ginbutang nila ang ila kamot sa idalom sang paa sang ila ginpanumpaan. (Gen. 24:2, 3, 9; 47:29-31) Importante nga tandaan mo nga kon himuon mo ini nga panumpa sa korte, nagapanumpa ka sa atubangan sang Dios nga isugid mo ang matuod. Dapat handa ka nga sabton sing matuod ang bisan ano nga ipamangkot sa imo.

Bangod ginapabaloran naton ang aton kaangtanan kay Jehova, dapat naton ipangamuyo kag hunahunaon sing maayo ang bisan ano nga panumpa nga ipahimo sa aton. Dapat naton siguraduhon nga ginatugot ini sang aton konsiensia kag wala ini nagalapas sa mga prinsipio sa Biblia. Kon nagpanumpa ka, dapat mo ini tumanon.—1 Ped. 2:12.