Nagsaylo si Tatay sa Australia halin sa Germany sang 1949. Nagpangita sia sing obra sa mga minahan kag mga planta sang koryente, kag nag-istar sa Victoria. Didto niya napangasawa si Nanay, kag natawo ako sang 1953.

Pagligad sang pila ka tuig, nagtuon si Nanay sing Biblia upod sa mga Saksi ni Jehova, gani bata pa ako ginatudluan na ako sa Biblia. Pero si Tatay indi interesado sa relihion. Mapintas sia, nagapamahog, kag nahadlok sa iya si Nanay. Pero, sekreto nga ginpadayon ni Nanay ang pagtuon sa Biblia kag nanamian gid sia sa panudlo sini. Kon wala si Tatay, ginasugid niya sa akon kag sa akon manghod nga babayi ang iya natun-an. Ginaistorya niya sa amon ang parte sa paraiso nga duta sa palaabuton kag kon paano kami mangin malipayon kon sundon namon ang ginatudlo sang Biblia.—Salmo 37:10, 29; Isaias 48:17.

Sang 18 anyos ako, napilitan ako nga maghalin sa balay bangod sa kapintas ni Tatay. Bisan pa nagapati ako sa gintudlo ni Nanay halin sa Biblia, balewala lang ini sa akon. Gani wala ko ini ginsunod. Nag-obra ako subong electrician sa minahan sang karbon. Sang 20 anyos ako, nagpangasawa ako. Pagligad sang tatlo ka tuig, natawo ang amon kamagulangan nga bata nga babayi, kag ginpamensaran ko liwat kon ano gid ang importante sa akon kabuhi. Bal-an ko nga makabulig ang Biblia sa amon pamilya, gani nagtuon ako upod sa isa ka Saksi ni Jehova. Pero ang akon asawa nagapamatok gid sa mga Saksi. Sang magtambong ako sa miting sang mga Saksi, ginpapili ako sang akon asawa—untatan ko ang pagtuon ukon biyaan ko ang akon pamilya. Daw wala gid ako sing mahimo, gani gintuman ko ang akon asawa kag wala na nakig-upod sa mga Saksi. Ginhinulsulan ko gid sang ulihi nga gin-untatan ko ang paghimo sang nabal-an ko nga husto.

Isa ka bes, ginpatan-aw ako sing pornograpiya sang akon mga upod sa obra. Nanamian ako magtan-aw sini pero nangil-aran man, kag ginkonsiensia ako pagkatapos. Nadumduman ko ang akon natun-an sa Biblia kag nagapati ako nga silutan gid ako sang Dios. Pero bangod pirme na ako makakita sing binastos, nagbag-o ang akon pagtan-aw sa pornograpiya. Sang ulihi, naadik ako sa sini.

Sa sulod sang nagsunod nga 20 ka tuig, naglayo na gid ako sa mga prinsipio nga gintudlo sa akon ni Nanay. Makita sa akon pamatasan ang ginapasulod ko sa akon hunahuna. Bastos na ako  maghambal kag maglahog. Nagtiko man ang akon pagtan-aw sa sekso. Bisan nagaupod pa kami sang akon asawa, may iban ako nga mga babayi. Isa ka adlaw, nagpangespiho ako kag nagsiling, ‘Naugot ako sa imo.’ Ang akon respeto sa kaugalingon ginbuslan na sang kangil-ad.

Nagbulagay kami sang akon asawa, kag guba na ang akon kabuhi. Gani, nagpangamuyo ako sing hugot kay Jehova. Nagtuon ako liwat sa Biblia, bisan pa 20 ka tuig na ang nagligad sang ulihi ako nga nagtuon. Sina nga tion, patay na si Tatay, kag si Nanay nabawtismuhan na bilang isa sa mga Saksi ni Jehova.

Ang akon pagkabuhi malayo gid sa mga prinsipio sang Biblia. Pero, determinado gid ako nga mabatyagan ang kalinong sa hunahuna nga ginapromisa sang Biblia. Desidido ako nga bag-uhon ang akon panghambal kag mangin kalmado. Nagdesisyon man ako nga untatan ang akon imoral nga pagkabuhi, pagsugal, pag-inom, kag pagpangawat sa akon amo.

Indi maintiendihan sang akon mga upod sa obra kon ngaa ginahimo ko ining daku nga pagbag-o. Sa sulod sang tatlo ka tuig, pirme nila ako ginaengganyo nga magbalik sa akon daan nga batasan. Kon may tion gani nga makapangakig ako ukon makapamuyayaw, nalipay gid sila nga nagasiling: “Aha! Nagbalik na si Joe.” Nasakitan gid ako sa ila ginahambal. Pamatyag ko, pirme lang ako nagakapaslawan.

Sa amon ulubrahan, may pornograpiya bisan diin—electronic man ukon printed. Ang akon mga upod sa obra pirme nagapadala sa kompyuter sing binastos nga mga laragway, kay ginatipon ko ini sadto sa akon kompyuter. Gusto ko gid nga makapalos sa akon bisyo, pero daw gusto gid nila nga mapaslawan ako. Nagpangayo ako sing bulig kag pagpabakod sa nagatudlo sa akon sing Biblia. Ginpamatian gid niya ako samtang ginasugid ko sa iya ang akon ginabatyag. Paagi sa mga bersikulo sang Biblia, ginpakita niya sa akon kon paano pakigbatuan ang akon bisyo, kag ginpalig-on niya ako nga mangayo sing bulig kay Jehova sa padayon nga pagpangamuyo.—Salmo 119:37.

Isa ka adlaw, ginmiting ko ang akon mga upod sa obra. Sang magtipon sila, ginhambalan ko sila nga hatagan sing beer ang duha namon ka upod nga kilala nga alcoholic. Nagsiling sila: “Indi puede! Kabalo ka na gid nga gusto nila untatan ang ila bisyo!” Nagsabat ako: “Husto, kag gusto ko man untatan ang akon bisyo.” Sugod sina nga adlaw, nakita sang akon mga upod ang akon pagpakigbato sa pornograpiya kag wala na nila ako gin-engganyo nga magbalik sa akon bisyo.

Sang ulihi, sa bulig ni Jehova, nadaug ko ang akon pagkaadik sa pornograpiya. Sang 1999, nabawtismuhan ako bilang isa sa mga Saksi ni Jehova, kag nagapasalamat gid nga ginhatagan ako liwat sing tsansa nga magkabuhi sing disente kag malipayon.

Naintiendihan ko na kon ngaa ginakaugtan ni Jehova ang mga butang nga nanamian ko sa sulod sang malawig nga tion. Bilang mapinalanggaon nga Amay, gusto niya nga proteksionan ako sa halit sang pornograpiya. Matuod gid ang Hulubaton 3:5, 6! Ini nagasiling: “Magsalig ka kay Jehova sa bug-os mo nga tagipusuon, kag indi ka magsalig sa imo kaugalingon nga paghangop. Hunahunaa sia sa tanan mo nga dalanon, kag tadlungon niya ang imo mga banas.” Ang mga prinsipio sa Biblia indi lamang proteksion kundi garantiya para sa kadalag-an.—Salmo 1:1-3.

Sang una, nangil-ad ako sa akon kaugalingon, pero subong may respeto na ako sa kaugalingon kag kalinong. Matinlo na ang akon kabuhi kag nabatyagan ko ang pagpatawad kag pagsuporta ni Jehova. Sang tuig 2000, ginpangasawa ko si Karolin, nga isa ka matahom nga Cristiano nga nagahigugma gid kay Jehova pareho ko. Malinong ang amon pag-updanay. Pribilehiyo gid namon nga mangin bahin sang matinlo kag mahigugmaon nga Cristianong paghiliutod sa bilog nga kalibutan.