May pila ka tawo nga nagahunahuna kon bala may nabag-o sa nasulat nga Pulong sang Dios. Ang propeta nga si Isaias nagsiling nga ang pulong sang Dios “nagapadayon sa wala sing katubtuban.” (Isaias 40:8) Paano kita makasiguro nga wala gin-islan ang mga promisa sang Dios nga nasulat sa iya Pulong?

Ang Dios may gahom kag masarangan niya nga proteksionan ang iya Pulong para indi maislan ang mensahe sini. Sang una nga panahon, sang manomano pa nga ginakopya ang balaan nga sinulatan, ginaisip sang maid-id nga mga manugkopya ang kada letra para siguraduhon nga wala sing may nadugang, nabag-o, ukon nadula. Pero bangod indi sila perpekto, ang iban sa ila may nahimo nga diutay nga mga sala sa ila pagkopya.

May linibo ka kopya sang dumaan nga mga manuskrito sang Balaan nga Kasulatan. Kon ang isa ka kopya may gamay nga kinalain, puede ini makumparar sa iban nga kopya para makita kon ano gid ang insakto.—Para sa dugang nga impormasyon, tan-awa ang artikulo nga “Gin-islan Bala Ukon Ginbag-o ang Biblia?” sa jw.org/hil.

Halimbawa, binagbinaga ang dumaan nga mga dokumento nga ginatawag Dead Sea Scrolls, nga nadiskobrehan sa mga kueba malapit sa Dead Sea sang 1947. Makita sa sining dumaan nga mga sinulatan ang pila ka bahin sang Balaan nga Kasulatan nga ginsulat sobra 2,000 ka tuig na ang nagligad. Ginkumparar sang mga iskolar ining dumaan nga mga manuskrito sa ginagamit naton nga Balaan nga Kasulatan subong. Ano ang ila nakita?

Nakita sang mga iskolar nga ang unod sang Pulong sang Dios nga ginagamit naton subong pareho sa orihinal nga mga sinulatan. * Napamatud-an sa ila maid-id nga pag-usisa sa mas daan nga mga manuskrito nga ang aton mabasa sa Balaan nga Kasulatan amo gid ang orihinal nga mensahe sang Dios. Gani makasiguro gid kita nga ginproteksionan sang Dios ang iya Balaan nga Sinulatan para insakto gid nga mensahe ang makalab-ot sa aton subong.

Gani, samtang ginabasa naton ang Pulong sang Dios, makasalig kita nga insakto gid ini. Usisaon naman naton sa masunod nga artikulo kon ano ang matun-an naton parte sa Dios paagi sa iya mga propeta.