Ini bala nga handum wala sing basihan? Indi gid! Ang Kasulatan nagasugid sa aton nga ang Dios amo ang naghatag sa aton sina nga handum. (Manugwali 3:11) Nagasiling man ini nga “ang Dios gugma.” (1 Juan 4:8) Sa banta mo hatagan bala kita sang isa ka mahigugmaon nga Dios sing handum nga magkabuhi sing wala katapusan dayon imposible man lang gali ini matuman?

Maathag nga ang kamatayon indi isa ka abyan. Ang matuod, ginatawag ini sang Biblia nga isa ka “kaaway.” (1 Corinto 15:26) Kon kaisa temprano ini nagaabot; kon kaisa madugay man. Pero nagaabot gid ini. Madamo ang wala nanamian mamensar parte sa sini, kag ang iban nahadlok gid. Pero puede bala mapierde ini nga kaaway?

Makibot ka bala kon mabal-an mo nga indi gali tuyo sang Dios nga mapatay ang tawo? Ang libro sang Genesis sa Biblia nagahatag sing basihan nga katuyuan gid sang Dios nga ang mga tawo mabuhi sing wala katapusan diri sa duta. Ginhanda gid sing maayo ni Jehova nga Dios ang duta antes pa niya ini paistaran sa tawo. Dayon gintuga niya ang una nga tawo, si Adan, kag ginbutang sia sa isa ka paraiso, ang hardin sang Eden. Pagkatapos sina, “gintan-aw sang Dios ang tanan nga ginhimo niya, kag nakita niya nga maayo gid ini.”—Genesis 1:26, 31.

Si Adan gintuga nga perpekto, suno sa larawan sang Dios. (Deuteronomio 32:4) Ang asawa ni Adan  nga si Eva wala sing depekto kag ang iya hunahuna kag lawas perpekto man. Ginsilingan sila ni Jehova: “Magpanganak kamo kag magdamo, pun-a ninyo ang duta kag dumalahan ini, kag gamhan ninyo ang mga isda sa dagat kag ang mga pispis kag ang tanan nga buhi nga mga sapat nga nagakamang sa duta.”—Genesis 1:28.

Kinahanglan sing tion para mapuno sang ila kaanakan ang bilog nga duta. Si Eva magapanganak, dayon ang iya mga bata magapanganak man asta ang duta mapuno sang mga tawo suno sa tuyo sang Dios. (Isaias 45:18) Sa banta mo rasonable bala nga pangakuan ni Jehova si Adan kag si Eva sini nga paglaum pero ang ila lang makita amo ang ila kabataan kag ayhan mga apo, kag indi nila mabal-an kon ano ang matabo sa ulihi?

Hunahunaa man ang sugo nga gamhan nila ang mga sapat. Ginsugo si Adan nga pangalanan ang mga sapat, kag indi ini madalidali. (Genesis 2:19) Para magamhan nila ang mga sapat dapat nila ini tun-an kag dapat man nila ini intiendihon para mabal-an nila kon paano ini atipanon. Nagakinahanglan ini sing mas malawig nga tion.

Gani ang sugo sang Dios nga pun-on ang duta kag gamhan ang mga sapat nagapakita nga ang una nga mag-asawa gindesinyo gid nga magkabuhi sing malawig katama. Ang matuod, malawig gid man ang kabuhi ni Adan.

Ginapakita sang Biblia nga mas malawig ang kabuhi sang mga tawo sadto kon ikumparar sa aton subong. Nagasiling ini: “Nagkabuhi si Adan sing 930 ka tuig.” Dayon ginsambit sini ang anom pa ka lalaki nga nagkabuhi sing sobra sa 900 ka tuig! Sila amo si Set, si Enos, si Kenan, si Jared, si Metusela, kag si Noe. Tanan sila nagkabuhi antes sang Baha sang panahon ni Noe, kag si Noe nagkabuhi na sing 600 ka tuig antes nag-abot ang Baha. (Genesis 5:5-27; 7:6; 9:29) Ngaa kalawig gid sang ila kabuhi?

Ini nga mga tawo nagkabuhi sa tion nga ang mga tawo malapit pa sa pagkaperpekto. Amo sina kon ngaa malawig ang ila kabuhi. Pero ano ang koneksion sang pagkaperpekto sa malawig nga kabuhi? Paano mapierde ang kamatayon? Para masabat ini, dapat maintiendihan anay naton kon ngaa nagatigulang kita kag nagakapatay.