IMADYINA nga nagalakat ka sa madulom nga kagab-ihon. Bisan pa madugay na nga nagtunod ang adlaw, wala ka nabalaka kay may dala ka nga masanag nga flashlight. Kon ituon mo ini sa idalom, makita mo sing maathag kon ano ang ara sa imo atubangan. Kon ituon mo ini sa unahan, masanagan sini ang imo alagyan asta sa malayo.

Sa pila ka bahin, ang Biblia daw pareho man sa flashlight. Pareho sang ginbinagbinag sa nagligad nga mga artikulo, ang Pulong sang Dios makabulig sa aton nga masarangan ang mga problema nga ara mismo sa aton atubangan—ang matag-adlaw nga mga problema nga ginaatubang naton sa sining wala sing kasiguruhan nga kalibutan. Pero indi lang amo sina. Maathag man nga ginapakita sang Biblia ang palaabuton, para masunod naton ang dalan nga nagapadulong sa dayon nga kalipay kag pagkakontento. (Salmo 119:105) Paano?

Binagbinagon naton ang duha ka paagi nga nagahatag ang Biblia sa aton sing paglaum sa palaabuton: 1 Nagabulig ini sa aton nga mahibaluan ang katuyuan sang kabuhi, kag 2 nagatudlo ini kon paano naton matigayon ang dayon kag suod nga kaangtanan sa aton Manunuga.

Ang Biblia nagahatag sing masaligan nga laygay sa pag-atubang sa mga problema, pero indi lang amo sini ang mahimo sang Biblia. Ginatudluan man kita sini nga indi magpokus sa aton mga ginakabalak-an, kag ginabuligan kita sini nga mahangpan kon ano gid ang nagakatabo. Paagi sini, mangin matuod gid kita nga malipayon.

Halimbawa, binagbinaga ini nga prinsipio sa Biblia: “Mas malipayon ang nagahatag sangsa nagabaton.” (Binuhatan 20:35) Nadumduman mo bala sang naghatag ka sing materyal nga bulig sa iban? Ukon mahimo sang naghatag ka sing tion nga pamatian  ang imo abyan nga nagapautwas sang iya balatyagon? Indi bala nabatyagan mo ang kalipay kay nakabulig ka?

Mangin malipayon gid kita kon nagahatag kita nga wala nagapaabot sing balos. Ang isa ka awtor nagsiling: “Daw imposible gid nga kon maghatag ka indi ka makabaton sing sobra pa sa imo nahatag—basta nagahatag ka nga wala nagapaabot sing padya.” Pero, kon nagabulig kita sa iban—ilabi na gid sa mga wala sing ikasarang nga magbalos—makabaton gid kita sing padya. Nagapangabudlay kita upod sa aton mismo Manunuga, nga para sa iya ang aton ginahimo daw pareho lang nga nagapahulam kita sa iya. (Hulubaton 19:17) Ginapabaloran gid niya ang aton mga ginahimo para sa mga kubos, kag nagpromisa sia nga padyaan niya kita sing kabuhi nga wala sing katapusan sa paraiso nga duta—isa gid ka matahom nga paglaum sa palaabuton!—Salmo 37:29; Lucas 14:12-14. *

Labaw sa tanan, ginatudluan kita sang Biblia nga makita ang matuod nga katuyuan sang kabuhi paagi sa pagsimba sa matuod nga Dios, si Jehova. Ang iya Pulong nagapalig-on sa aton nga dayawon sia, padunggan, kag tumanon. (Manugwali 12:13; Bugna 4:11) Kon sundon naton ini, may nahimo kita nga maayo gid pamalandungan: May ginhimo kita nga nakapahalipay sa aton Manunuga. Kay man, nagsiling sia: “Magmaalam ka . . . kag pasadyaha ang akon tagipusuon.” (Hulubaton 27:11) Pamensari ini—kon maalamon kita nga nagadesisyon base sa mga prinsipio sa Biblia, ginapahalipay naton ang tagipusuon sang aton Amay sa langit. Ngaa? Kay nagaulikid sia sa aton kag gusto niya nga makabenepisyo kita sa pagsunod sa iya mga giya. (Isaias 48:17, 18) Gani, may mas importante pa bala sangsa pagsimba sa Soberano sang uniberso kag magkabuhi sa paagi nga nagapahalipay sa iya?

Ginatudluan man kita sang Biblia nga makig-abyan sa aton Manunuga. “Magpalapit kamo sa Dios,” siling sang Biblia, “kag magapalapit sia sa inyo.” (Santiago 4:8) Kon kaisa nagaduhaduha kita kon posible gid ayhan ang pagpakig-abyan sa labing gamhanan nga Manunuga. Pero ginapasalig kita sang Biblia nga kon ‘pangitaon naton ang Dios, makita naton sia,’ kay man “indi sia malayo sa tagsa sa aton.” (Binuhatan 17:27) Ang laygay sang Biblia nga makig-abyan sa Dios makabulig gid sa aton palaabuton. Paano?

Binagbinaga ini: Bisan ano pa ang himuon naton, wala gid sa aton ang makalikaw sa panguna nga kaaway—ang kamatayon. (1 Corinto 15:26) Pero, ang Dios wala sing katapusan. Indi gid sia mapatay, kag gusto niya nga mabuhi man sing dayon ang iya mga abyan. Paagi sa sining simple pero matahom nga mga pulong, ginapakita sang Biblia kon ano ang gusto ni Jehova sa mga nagapangita sa iya: “Kabay nga magkabuhi kamo sing wala sing katubtuban.”—Salmo 22:26.

Paano mo matigayon ang dayon nga pagpakig-abyan sa Dios? Padayuna ang pagtuon parte sa iya paagi sa iya Pulong, ang Biblia. (Juan 17:3; 2 Timoteo 3:16) Mangayo sa iya sing bulig para mahangpan mo ini. Ang Biblia nagapasalig sa aton nga kon ‘padayon kita nga magpangayo sa Dios’ sing kaalam, hatagan niya kita sini. * (Santiago 1:5) Dayon, tinguhai nga iaplikar ang imo natun-an, kag tuguti ang Pulong sang Dios nga mangin “suga sa [imo] tiil” kag “kapawa sa [imo] dalanon”—subong kag sing dayon.—Salmo 119:105.