Pagbantay sa Kalibutan

Sa Republic of Georgia, sa bagatnan-sidlangan sang Europa, “ang kadamuon sang mga nagadiborsio halos nagdoble sang nagligad nga napulo ka tuig.” Ang kalabanan sa ila wala pa mag-20 anyos.—FINANCIAL, GEORGIA.

Sa Ireland, 17 porsiento sang 11-16 anyos “ang naghatag sang ila kompleto nga ngalan sa Internet sa tawo nga wala pa gid nila makilala sa personal.” Dies porsiento ang naghatag man sang ila “email address, numero sang cell phone ukon piktyur.”—THE IRISH SOCIETY FOR THE PREVENTION OF CRUELTY TO CHILDREN.

Mga 4 porsiento lang sang sunog sa kagulangan sa bilog nga kalibutan ang may natural nga kabangdanan. Ang iban, bangod sa kahimuan sang tawo—hungod man ukon indi.—PRESSEPORTAL, GERMANY.

“Halos isa sa kada 10 ka Amerikano [12 anyos pataas] ang ginreport nga regular nga nagagamit sing ilegal nga droga, lakip ang marijuana, cocaine, heroin, hallucinogen, inhalant, ukon ginareseta nga mga bulong.”—USA TODAY, U.S.A.

Ang Pagpugong sa Kaugalingon Isa ka Sekreto sa Maayo nga Kabuhi

“Ginapakita sang mga pagtuon nga ang mga pamatan-on nga wala sing pagpugong sa kaugalingon posible nga may problema sa panglawas kag kuarta, kag makahimo sing krimen pagdaku nila,” siling sang Time. Sobra sa 1,000 ka tawo ang gintun-an sugod sang natawo sila asta nag-32 anyos. Sang nagdaku sila, “ang mga padasudaso kag madali maakig kag matinalak-on ukon indi makahulat sang ila turno [sang bata pa sila]” mga tatlo ka pilo ang posibilidad nga mangin maluya ang panglawas, diutay ang kita, nagasolo nga ginikanan, ukon makahimo sing krimen. Pero, “ang pagpugong sa kaugalingon mahimo matun-an,” siling sang magasin, kag nagdugang ini: “Mahimo mangin mas mapagros kag maayo ang kabuhi sang mga adulto nga gintudluan sang ila mga eskwelahan kag pamilya nga magpugong sa kaugalingon sang bata pa sila.”

Pagdisiplina sa Salawayon nga mga Drayber

Ginatilawan sang mga awtoridad sa India ang bag-o nga paagi sa pagdisiplina sa pinakasalawayon nga mga drayber paagi sa pag-asayn sa ila bilang mga traffic police. Sa sini nga paagi, maintiendihan sang mga drayber kon ano ang epekto sang ila paglapas sa kasuguan sang trapiko. Magluwas nga dakpon sila kag multahan, ginapatuman man sang mga pulis sa Gurgaon, sa aminhan-katundan sang India, nga dapat magbulig sila sa pagbantay sang trapiko sa sulod sang tunga sa oras ukon sobra pa. Ang iban nga drayber nagsiling nga nagpabag-o ini sang ila batasan. ‘Mga isa ka libo ang ginamultahan sa Gurgaon kada adlaw bangod sa paglapas sa trapiko,’ siling ni Bharti Arora, ang deputy commissioner sa sini nga lugar. “May 1,000 kami ka dugang nga mga ‘pulis’ kada adlaw.”