“Ang mga tawo sa kalibutan nagapangayo sing sabat sa ila mga lider. Nagapaabot sila sing solusyon, indi sing hapaw nga panikasog ukon balibad.”—UNITED NATIONS SECRETARY-GENERAL BAN KI-MOON.

NAGAKABUHI kita sa ginatawag sang Biblia nga “makahalanguyos nga mga tion nga mabudlay atubangon.” (2 Timoteo 3:1) Halos tanan nga balita subong parte sa inaway, terorismo, pag-usmod sang ekonomiya, kag pagkaguba sang palibot.

Magaayo pa ayhan ang aton kahimtangan? Masolbar bala sang gobierno sang tawo ang mga problema sang kalibutan? Ukon dapat bala kita mangita sing iban nga solusyon?

Ano ang Ginapangangkon sang Madamo nga Pungsod?

Madamo nga pungsod ang nagapangangkon nga ginasuportahan sila sang Dios. Halimbawa, ang Pledge of Allegiance sang Estados Unidos sang Amerika nagasiling nga “isa [ini] ka pungsod sa idalom sang Dios,” kag may nasulat sa ila kuarta nga “In God We Trust.”

Pero madamo nga taga-Estados Unidos ang wala gani nagapati nga may Dios. Amo man sini sa iban nga pungsod nga nagapangangkon nga ginasuportahan sila sang Dios. Bisan ang mga tawo nga nagapati sa Dios lainlain ang opinyon kon asta diin sia nagapasilabot sa ginahimo sang tawo.

● May pila nga nagasiling nga ang Dios wala nagapasilabot kag ginapabay-an Niya ang tawo nga maggahom sa iya kaugalingon.

● Ang iban nagasiling nga ang Dios nagagahom paagi sa mga gobierno sang tawo kag mahimo niya pakamaayuhon ang ila panikasog nga bag-uhon ang kalibutan.

Diin sa sini ang imo ginapatihan?

Binagbinaga: Kon matuod ang una nga punto, makaluluoy gid ang aton kahimtangan. Kon ang ikaduha naman nga punto ang matuod, pamangkuton naton ang aton kaugalingon: ‘May pungsod bala nga ginapaboran ang Dios? Kon mag-inaway ang duha ka pungsod kag pareho sila nga mangamuyo nga magdaug, sin-o ang dampigan sang Dios?’ Posible ayhan nga wala sia sing dampigan?

Ang Ginatudlo sang Biblia

1. Ang tawo wala gintuga nga maggahom sa iya kaugalingon. Ang Biblia nagasiling: “Wala sa tawo nga nagalakat sa pagmando sang iya mga tikang.” (Jeremias 10:23) Ginpakita sang kasaysayan nga matuod gid ini. Ang gobierno sang tawo wala nakapaluntad sang mas maayo nga kalibutan, bisan pa maayo ang intension kag tulumuron sang mga gumalahom. Sa baylo, “ginagamhan sang tawo ang iya isigkatawo sa iya kahalitan.”—Manugwali 8:9, NW.

2. Ang Dios nagaulikid sa aton. Indi matuod nga ang Dios wala nagasapak ukon wala sing labot sa nagakatabo sa aton. Kundi, magahulag sia agod buligan kita. Paano? Paagi sa iya Ginharian, “nga dili gid malaglag.”—Daniel 2:44.

3. Ang Ginharian sang Dios isa ka matuod nga gobierno. Amo ini ang Ginharian nga ginapangamuyo sang minilyon ka sinsero nga tawo  sa saulado nga pangamuyo nga Amay Namon, ukon Pangamuyo sang Ginuo. Sa sini nga pangamuyo, ang mga tawo nagapangabay sa Dios: “Magkari ang imo ginharian. Matuman ang imo kabubut-on sa duta, subong sang sa langit.” (Mateo 6:10) Talupangda nga ang Ginharian sang Dios indi lamang sa langit magapanghikot; tumanon man sini ang kabubut-on sang Dios sa duta.

4. Paagi sa iya Ginharian, mabag-o sang Dios ang aton kalibutan—kag himuon gid niya ini. Kon nagaduhaduha ka, binagbinaga ang ginatudlo sang Biblia.

● Sang ginhimo sang Dios ang una nga tawo, ginbutang niya sila sa matahom nga palibot.—Genesis 1:27-31.

● Bisan madamo kita karon sing makita nga problema, wala nagbag-o ang katuyuan sang Dios sa aton duta.—Salmo 37:11, 29.

● Naghimo na sing mga tikang ang Dios para ang aton duta—kag ang mga tawo—mabalik sa orihinal nga kahimtangan sini.—Juan 3:16.

Luyag mo bala makatuon sing dugang pa parte sa Ginharian sang Dios kag kon paano sini bag-uhon ang aton kalibutan? Ang mga Saksi ni Jehova, ang naghimo sini nga magasin, malipay gid sa pagbulig sa imo. Puede mo mapamangkot sa ila ang masunod kon magbisita sila sa inyo balay.

● Ano ang Ginharian sang Dios?

● Ano nga mga pagbag-o ang himuon sini?

● San-o kag paano himuon sang Ginharian sang Dios ini nga mga pagbag-o?

NAMANGKOT KA BALA?

● Ngaa limitado lang ang mahimo sang mga gobierno sang tawo? —Jeremias 10:23.

● Paano ginpakita sang Dios nga nagaulikid sia sa aton?—Juan 3:16.

● Ano ang himuon sang Ginharian sang Dios sa aton duta kag sa mga nagaistar sa sini?—Salmo 37:11, 29.

[Blurb sa pahina 27]

Masolbar bala sang gobierno sang tawo ang mga problema sang kalibutan? Ukon dapat kita mangita sing iban nga solusyon?