Pagbantay sa Kalibutan

Gin-islan na sang International Agency for Research on Cancer ang kategoriya sang mga kagamitan nga nagagamit sing ultraviolet light para magpaitom halin sa “mahimo makapakanser sa tawo” pakadto sa “makapakanser sa tawo.”—THE LANCET ONCOLOGY, BRITANYA.

Sa Argentina, 9 sa kada 10 nga nagabusong ang indi gusto magbusong.—CLARÍN, ARGENTINA.

“Madamo gihapon nga espesyi ang nadiskobrehan sang mga sientipiko. Mga 50 ka espesyi ang makilala sang mga biologist kada adlaw. Halos 17,000 ka bag-o nga tanom kag sapat ang nakilal-an sang 2006 lamang—mga 1% ini sang 1.8 milyones ka espesyi nga nangalanan na.”—TIME, U.S.A.

Makadepensa Bala ang mga Pusil?

Madepensahan bala sang pusil ang tag-iya sini sa tion sang katalagman? Ang isa ka pagtuon sa University of Pennsylvania School of Medicine, U.S.A., nagsiling nga sa masami indi ini makadepensa. Luwas sa mga sitwasyon nga pulis ang nagtiro, pagtiro sa kaugalingon, kag indi hungod nga paglupok, nasapwan sang mga researcher nga ang nagadala sing pusil “4.5 ka pilo ang posibilidad nga matiruhan kon may mag-atake sa iya sangsa wala sing pusil.” Ginapakita sini nga pagtuon nga madepensahan gid man sang iban ang ila kaugalingon kon may pusil sila, pero talagsa lang ini nagakatabo. Gani, ang pagpati nga kon may pusil ka “madepensahan mo ang imo kaugalingon sa delikado nga palibot dapat hambalan kag binagbinagon liwat sing maayo,” siling sang report.

Nagapanglipstik nga mga Monghe

Ang bag-o nga mga monghe sa Thailand “nagaguba sang reputasyon sang Budhismo nga pagtuluuhan” paagi sa pagpanglipstik, pagpapikit sang ila malaba nga bayo, “sobra nga pagpakiaykiay kag pagdala sang pangbabayi nga bag,” siling sang isa ka balita sa Bangkok. Bangod sa paggawi sining agi nga mga monghe, ang mga opisyal sang relihion nagsiling nga dapat tudluan ang mga monghe kon ano ang husto nga paggawi. Pero ang kilala nga manunudlo sang Budhismo nagpaathag nga wala ginadilian ang agi nga mga monghe, “kay kon dilian ini, sobra sa katunga sa ila ang mapahalin.”

Mga Tren nga Para Lang sa mga Babayi

Sa tinuig na nga pagsakay sang mga babayi sa gutok nga mga tren sa India, ginaagwanta nila ang pag-insulto, pagtsansing, pagkusi, pagtulok, kag pagbastos sa ila sang lalaki nga mga pasahero. Bangod nagadamo ang mga reklamo, nagdesisyon ang gobierno nga painon ang mga lalaki sa pila ka biyahe, report sang pamantalaan sa Calcutta nga The Telegraph. Gani, sa apat ka pinakadaku nga siudad sa India—ang New Delhi, Mumbai, Chennai, kag Calcutta—may pila ka tren nga “Ladies’ Specials” nga para lamang sa mga babayi. Nalipay gid sa sini ang mga pasahero.