Mangin Kontento sa Imo Kolor

● Para sa pila ka tawo sa Aprika, Bagatnan nga Asia, Caribbean, kag Middle East, daw manggaranon ka kag sosyal tan-awon kon maputi ka. Gani, madamo nga lalaki kag babayi sa sini nga mga lugar ang nagagamit sing mga produkto nga pangpaputi bisan pa nga makahalit ini sa ila ikaayong lawas.

Ang iban sining mga pangpaputi may hydroquinone, isa ka kemikal nga nagapauntat sang pagpatubas sang melanin. Bilang resulta, ginabuhinan sini ang natural nga pangamlig sang imo panit batok sa makahalalit nga silak sang adlaw. Ang hydroquinone nagasalupsop man sa panit kag mahimo gub-on sini ang mga tisyu sang lawas kag bangdan sang temprano nga pagtigulang kag kanser. Ang iban sining mga produkto may mercury, nga isa man ka hilo.

Dugang pa, ang padayon nga paggamit sining mga produkto nagaresulta sing gurosguros, pikas, kag pagnipis sang panit amo nga indi na ini matahi kon masamad. Kon magkadto sa dugo ang mga kemikal sang pila sining mga kosmetiko, mahimo gub-on sini ang atay, batobato, ukon utok.

Kon gusto sang mga maitom nga magputi, ginahimo naman sang mga maputi ang tanan nga paagi para mag-itom sila. Matuod, ang haganhagan nga pagpainit maayo sa panglawas kay nagabulig ini sa pagpatubas sing bitamina D. Pero ang sobra nga pagpainit, labi na gid kon mataas na ang adlaw, makahalalit. Ang pag-itom sang panit pamatuod nga nahalitan na ini kag nagtinguha ini nga batuan ang silak sang adlaw. Pero limitado lang nga proteksion ang mahatag sini. Bisan pa makabulig ang regular nga paggamit sang mga kosmetiko nga may sunscreen, indi ini makahatag sing bug-os nga proteksion batok sa pagkaguba sang panit kag pila ka sahi sang kanser, lakip ang melanoma.

Gani, ginarekomendar sang World Health Organization nga “suportahan ang mensahe nga ang tanan nga tawo dapat mangin kontento sa ila kolor,” nga “amo ang importante nga paagi para amligan ang ila kaugalingon batok sa silak sang adlaw.” Pero, ang matuod nga maalamon nagahatag sing labi nga atension sa ginasiling sang Biblia nga “tinago nga pagkatawo sa tagipusuon.” Indi pareho sa nagatigulang nga panit, nagauswag ini samtang nagaligad ang tion!—1 Pedro 3:3, 4; Hulubaton 16:31.