Ang Tubig nga Nagahatag sing Kabuhi

Nagapanglakaton si Jesus sa Samaria, sa aminhan sang Jerusalem. Ginkapoy sia kag gin-uhaw. Samtang nagapungko sia sa kilid sang bubon, ginpangabay niya ang Samaritana nga hatagan sia sing tubig. Nakibot ang Samaritana nga ang isa ka Judiyo nangayo sa iya sing tubig, kay man sang unang siglo, indi maayo ang kaangtanan sang mga Judiyo kag mga Samaritano.

Namangkot ang nakibot nga babayi: “Ngaa nagapangayo ka sa akon sang mainom, nga ikaw isa ka Judiyo kag ako isa ka Samaritana?”

Si Jesus nagsabat: “Kon nahibaluan mo ang wala bayad nga dulot sang Dios kag kon sin-o sia nga nagasiling sa imo, ‘Hatagi ako sing mainom,’ nagpangayo ka kuntani sa iya, kag hatagan niya ikaw sing tubig nga buhi.”

Ginpaathag pa gid ni Jesus sa iya: “Ang tagsatagsa nga nagainom sini nga tubig uhawon liwat. Ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sang tubig sa iya nga nagaibwal agod maghatag sang kabuhi nga walay katapusan.”​—Juan 4:1-15.

Ano nga tubig ang ginpatuhuyan ni Jesus?

GINATAWAG sang Biblia ang Manunuga, si Jehova nga Dios, nga “tuburan sang mga tubig nga buhi.” (Jeremias 2:13) Ang kabuhi isa ka regalo halin sa Dios, kag ang aton pagluntad nagadepende sa pagtigayon sing tubig nga iya ginaaman, sa literal man nga tubig ukon sa tubig nga ginpatuhuyan ni Jesus.

Mas kinahanglan naton karon ang panuytoy sang Dios. Sa pagkamatuod, masiling naton nga nabalaka ang mga tawo bangod halos wala na sila sing makuhaan sing maayo nga panuytoy sa importante nga mga butang. Ginauhaw ang mga tawo sa sabat sa mga pamangkot kaangay sang: Diin ang mga patay? May paglaum pa bala nga makaupod naton sila liwat? Ngaa gintugutan sang Dios ang pag-antos? Madula bala sa palaabuton ang inaway, krimen, gutom, kag balatian? Nagapati ang mga Saksi ni Jehova nga ang mga sabat sa sini nga mga pamangkot masapwan sa makapaumpaw nga “tubig” sang Pulong sang Dios, ang Biblia.

 Sang nagpakig-istorya si Jesus sa Samaritana sa bubon, ginpatuhuyan niya ang kamatuoran subong tubig nga nagahatag sing kabuhi nga naghalin sa Pulong sang Dios. Ginaagda kamo sang mga Saksi ni Jehova nga tilawan ang matinlo nga tubig sang kamatuoran. Ini nga pangagda ginsambit sa katapusan nga tulun-an sang Biblia: “Ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.”​—Bugna 22:17.

Agod madugangan ang imo ihibalo sa kon paano kita makabenepisyo sa Ginharian sang Dios, kontaka ang mga Saksi ni Jehova sa pinakamalapit nga Kingdom Hall sa inyo lugar ukon magsulat sa nagakaigo nga adres nga nalista sa pahina 5 sini nga magasin. Mahimo mo man buksan ang Web site nga www.watchtower.org.

[Kahon sa pahina 8]

NAPAUMPAWAN BALA SANG RELIHION ANG KAUHAW SANG MGA TAWO?

Indi mo matigayon ang makapaumpaw nga tubig sang kamatuoran paagi lamang sa pagsimba ukon pagpangangkon nga relihioso ka nga tawo. Sa pagkamatuod, gindugangan pa gani subong sang dalagku nga mga relihion ang problema sang mga tawo imbes nga solbaron ini. Binagbinaga ang isa ka halimbawa: Sa panahon sang inaway, ginapatay sang mga Katoliko ang pareho nila nga Katoliko, ginapatay sang mga Protestante ang pareho nila nga Protestante, kag pareho man nila nga ginapangabay ang bulig sang Dios agod magdaug!

Dugang pa sa sini, madamo man sing ginareport nga mga iskandalo sa simbahan, sa diin ang mga pari, mga pastor, ukon mga ministro naggamit sing pundo sang simbahan ukon nag-abuso sa mga menor-de-edad. Matuod gid nga mahigko ang tubig nga ginapainom sang kalabanan nga mga relihion. (Bugna 17:4-6; 18:1-5) Ini nga kahimtangan ginalaragway sang Biblia sa Tito 1:16: “Ginapahayag nila sing dayag nga nakilala nila ang Dios, apang ginapanghiwala nila sia paagi sa ila mga buhat.” Sa kalabanan nga kahimtangan, wala sing nabulig ang relihion sa pagpaumpaw sa kauhaw sang mga tawo sa sabat sa sining importante nga mga pamangkot.

[Kahon/​Retrato sa pahina 9]

Ginapaathag sa 19 ka kapitulo sang 224 ka pahina nga libro nga Ano Gid ang Ginatudlo Sang Biblia? ang mga sabat sang Biblia sa panguna nga mga pamangkot subong sang:

“Ano ang katuyuan sang Dios para sa duta?”

“Diin ang mga patay?”

“Nagakabuhi bala kita sa ‘katapusan nga mga adlaw’?”

“Ngaa ginatugutan sang Dios ang pag-antos?”

[Retrato sa pahina 9]

Masapwan mo ang ‘tubig sang kamatuoran’ sa Kingdom Hall sa inyo lugar