Mas Maayo Pa sa “Ekselente nga mga Balod”

Panugiron ni Karl Heinz Schwoerer

Natawo ako sang 1952 sa Pittsburgh, Pennsylvania, E.U.A., apang nagdaku ako sa New Smyrna Beach, sa Florida. Sang tin-edyer pa ako, nanamian gid ako mag-surfing. Ang matuod, nangin pinakaimportante ini sa akon kabuhi.

SANG 1970, nag-eskwela ako sa Embry-Riddle Aeronautical University sa Daytona Beach, Florida, bangod luyag ko sa ulihi mangin piloto sang pangkomersial nga eroplano. Apang, nadismaya gid ako sa gobierno, nga sadto nagapakig-away sa Vietnam kag nagapati ako nga indi yadto makatarunganon nga inaway. Subong sang iban nga pamatan-on sadto, indi ako komporme sa mga nagakatabo sa palibot, kag bangod sini, wala na ako mag-eskwela kag nangin hippie ako. Ginpalaba ko ang akon buhok kag nagdroga ako.

Nian, nakilala ko si Susan, nga isa ka mapasimpalaron nga babayi kag sampaton sa pagpinta sing mga laragway kag sa pagpangretrato. Nabinagbinag ko nga kon pasimplehon lang namon ang amon kabuhi, makaobra ako sing anom tubtob walo ka bulan sa Florida, kag pagkatapos sini, ma-camping kami sa mga baybayon sang Pacific Coast sa Mexico kag sa Central America tubtob matapos ang tuig.

Paghunahuna sa Espirituwal nga Kinahanglanon

Matawhay ang amon pagkabuhi sa matahom nga mga baybayon sa tropiko. Naga-surfing ako samtang si Susan naman nagapinta sing mga laragway kag nagapangretrato. Apang, pagligad sang mga tinuig, nabatyagan namon nga wala sing direksion kag daw may kulang sa amon kabuhi. Gani, sang tunga-tunga sang 1975, samtang yara kami sa Pacific Coast sang Costa Rica, nagsugod ako sa pagpangita sing espirituwal nga kasanagan. Nagbasa ako sing mga libro may kaangtanan sa mga relihion kag mga pilosopiya sa Asia, nga bantog sadto nga tion.

Nangatarungan ako sa akon kaugalingon nga kon ang Biblia pirme ginakutlo sang mga libro agod pamatud-an nga husto ang ila mga panudlo, ang Biblia amo gid ang sadsaran sang kamatuoran. Gani, ginbaylo ko ang akon pila ka makapabangag nga uhong sa isa ka daan nga King James Version sang Biblia. Kada hapon, pagkatapos ko mag-surfing sa bug-os nga aga, ginabasa ko ini. Apang, walay sapayan sang akon daku nga kakunyag sa Biblia, diutay lang ang akon mahangpan sa sini.

“May Pamangkot Ka Bala sa Biblia?”

Sang Agosto 1975, sang nagapakadto kami sa Estados Unidos, halin sa Costa Rica, naghapit kami anay ni Susan sa isa ka botika sa El Salvador agod magbakal sing bulong. Bangod indi kami mag-intiendihanay sang nagabantay sang botika, ginbuligan kami sang 16 anyos nga kostumer nga si Jenny. Taga-Amerika sia apang talunsay mag-Espanyol. Ginsugiran niya kami nga Saksi ni Jehova sia kag ang iya mga ginikanan kag nagsaylo sila sa El Salvador agod tudluan ang mga tawo tuhoy sa Biblia.

Ginpamangkot ako ni Jenny, “May pamangkot ka bala sa Biblia?”

“Huo, may ara gid!” sabat ko. Bisan nga hippie ang amon hitsura, wala nagpangalag-ag si Jenny nga agdahon kami sa ila puluy-an agod makilala namon ang iya mga ginikanan nga si Joe kag si  Nancy Trembley. Ginbaton namon ang iya pangagda. Sa bug-os nga hapon, madamo kami sing pamangkot tuhoy sa Biblia kag nagdayaw gid kami kon paano ginsabat ni Joe kag ni Nancy ang amon mga pamangkot. Pirme nila ginasiling, “Basaha bala ini nga teksto sa imo Biblia.”

Sang nagob na ang kagab-ihon, gin-agda nila kami nga didto na lang anay sa balay nila magtulog. Apang, indi kuno kami puede ni Susan mag-updanay sa isa ka kuarto, kay indi pa kami mag-asawa. Sadto nga gab-i, madugay pa nga naghambalanay si Susan kag si Jenny tuhoy sa madamo nga topiko sa Biblia​—halin kay Adan tubtob sa Armagedon.

Ang Berde nga Biblia

Pagkadason nga adlaw, antes kami maglakat, ginhatagan kami ni Joe kag ni Nancy sing madamo nga kopya sang magasin nga Lalantawan kag Magmata!, pila ka libro, kag isa ka Biblia. Kag ini amo ang Biblia nga New World Translation of the Holy Scriptures, nga sadto may berde kag matig-a nga panghapin. Gindala man kami ni Joe sa Kingdom Hall. Isa ini ka simple kag gamay nga bilding nga ginatipunan sang mga Saksi ni Jehova agod tun-an ang Biblia. ‘Tuhay gid ini,’ himulong ko sa akon kaugalingon, ‘sa daku nga mga simbahan sang Cristiandad, diin halos wala sing matun-an ang mga tawo sa Biblia!’

Sang ulihi sina man nga adlaw, antes kami magtabok sa dulunan sang Guatemala, nagdulog kami anay sa isa ka checkpoint, kag didto natingala ang mga opisyal sa dala namon nga berde nga Biblia. Naglibog ang ila ulo kay nahibaluan nila nga mga Saksi ni Jehova lang ang nagagamit sini. Apang, ang hitsura namon indi gid mga Saksi. Walay sapayan sini, ginpalakat kami sang mga opisyal pagligad sang pila ka minuto. Kami naman ang natingala bangod masami nga ginausisa nila kon may dala kami nga mga droga kag gin-ismagol nga mga butang sa amon salakyan. Gani, gintamod namon ang berde nga Biblia nga isa ka anting-anting.

Samtang padayon namon nga ginabasa ang Biblia kag ginatun-an ang pasad sa Biblia nga mga publikasyon, kumbinsido kami nga nasapwan na namon ang kamatuoran tuhoy sa Dios. Sang nagalakbay kami sa Mexico, napensaran ko nga mag-surfing sing duha ka semana sa paborito ko nga duog nga Puerto Escondido, dayon mabalik ako sa Florida kag mangin isa sa mga alagad ni Jehova.

Pagkatapos sini, duha ka semana nga nag-surfing ako kada aga. Kag sa baybayon kada hapon, ginabasa ko ang Biblia kag ang bulig nga mga publikasyon sa pagtuon sing Biblia. Ang isa ka walo ka tuig nga bata nga babayi nakatalupangod sang berde nga Biblia, kag nag-insister nga dalhon niya kami sa isa ka lugar pagkagab-i. Wala kami makahibalo kon diin gid niya kami dalhon apang napat-od namon nga may kaangtanan ini sa berde nga Biblia. Nagpamalibad kami, apang nagpamilit gid sia. Pagligad sang pila ka adlaw, nagdesisyon kami nga mag-upod sa iya. Gindala niya kami sa Kingdom Hall sang mga Saksi ni Jehova, nga isa ka gamay nga tinukod nga human sa kawayan kag may atop nga kugon. Ang kada isa nagtamyaw sa amon nga may mga hakos kag pangamusta nga daw subong nga madugay na nila kami nga mga abyan.

Nagdayaw gid kami sa pagkamatinahuron sang mga nagtambong. Ang pila ka kabataan naghimutad gid sa amon sa tion sang miting, ayhan bangod  ini sa amon malaba kag bukay nga buhok nga amo pa lang nila nakita. Pirme sila ginabadlong sang ila mga ginikanan nga magpamati sa programa. Apang, gingamit ni Jehova ang isa ka bata kaangay nila agod makatambong kami sa una nga tion sa Kingdom Hall.

Determinado nga Alagaron si Jehova

Pagkatapos ko mag-surfing sing duha ka semana, ginbaligya ko ang akon mga surfboard kag naglakbay kami dayon pakadto sa Florida. Didto namon ginsuguran ang pagtuon sa Biblia upod sa mga Saksi ni Jehova kag nagtambong sa mga miting sang kongregasyon. Bangod determinado kami nga alagaron si Jehova, gin-untatan namon ang pagpuyopuyo kag ang pagpakigsuod sa mga abyan namon anay. Nagpamarbas ako kag nagpautod sing buhok, kag nagpamakal si Susan sing pila ka bayo. Apat ka bulan sang ulihi, nagpakasal kami ni Susan, kag sang Abril 1976, ginbawtismuhan kami subong simbulo sang amon dedikasyon nga alagaron ang Dios.

May katuyuan na karon ang amon kabuhi. Ginapasalamatan gid namon si Jehova sa tanan niya nga pagpakamaayo, kag bangod sini, nalangkag kami magbalik sa nagahambal sing Espanyol nga pungsod agod ibantala ang maayong balita sang Ginharian sang Dios. Apang ginlaygayan kami sang Cristianong mga gulang sa amon kongregasyon: “Indi anay kamo maglakat. Pabakura anay ang inyo espirituwalidad agod nga makabulig kamo sa ila didto.” Ginsunod namon ang ila laygay, kag pagkatapos sadto, tulumuron namon nga mangin payunir nga amo ang tawag sa bug-os tion nga mga ministro sang mga Saksi ni Jehova.

Nagpayunir si Susan sang Enero 1978. Luyag ko man magpayunir, apang daku pa ang utang ko sa matrikula sa unibersidad. May napensaran ako nga mahapos nga solusyon. Isiling ko nga naputo ako kag pagkatapos sini hilway na ako nga makapayunir.

Apang, ginpaathagan ako sang mga gulang nga ini nga plano wala nagahisanto sa mga prinsipio sang Biblia, nga nagasugo sa aton nga mangin “bunayag sa tanan nga butang.” (Hebreo 13:18, NW) Gani, padayon ako nga nag-obra tubtob nabayaran ko ang akon mga utang. Sang ulihi, sang Septiembre 1979, nalab-ot ko ang akon tulumuron nga magpayunir upod kay Susan. Pagkatapos sini, agod mahuptan nga simple ang amon kabuhi, nagtrabaho lang ako sing duha ka adlaw kada semana agod matigayon ang amon panguna nga kinahanglanon.

Pag-alagad sa Bethel sa Brooklyn

Ang Bethel, ang ulong talatapan sang mga Saksi ni Jehova sa Brooklyn, New York nag-agda sa maluyag magboluntaryo sa konstruksion. Gani, nagpadala kami sing aplikasyon agod mag-alagad didto. Sang Abril 1980, sang wala pa mag-isa ka tuig nga nagpayunir kami, nakabaton kami sing daku nga sorpresa. Sa sulod sang 30 ka adlaw, dapat makareport na kami sa Brookyn! Nalipay gid kami nga daw nasubuan man, kay naluyagan na gid namon nga magpayunir. Bangod indi kami makadesisyon, ginhambalan namon ini nga butang upod sa duha ka gulang, nga amo ang nagbulig sa amon nga maapresyar kon daw ano ka pinasahi nga pribilehiyo ang ginatanyag sa amon. “Sige, tilawi ninyo nga mag-alagad sa Bethel bisan isa lang ka tuig,” laygay nila. Gani, ginbaligya namon ang tanan namon nga pagkabutang kag nagkadto sa Brooklyn.

Pagkatapos sang duha ka tuig sa konstruksion, gin-agda ako nga magtrabaho sa Construction Engineering Office, diin ginhanas ako sa pagdesinyo sing mga bilding. Si Susan nagtrabaho sa Bindery sing isa ka tuig, kag pagkatapos sini, gin-agda sia sa Graphics Department. Kada anibersaryo sang amon kasal, ginabinagbinag namon ang nagligad nga tuig kag ginausisa ang amon kahimtangan kag handum. Ang desisyon namon amo gihapon ang mag-alagad sa Bethel.

Samtang nagaligad ang mga tinuig, nakatigayon kami sing suod kag maayo gid nga mga abyan. Dugang pa, bangod may kahigayunan kami sa Bethel nga maalagad sing mapuslanon si Jehova kag ang amon mga kauturan sa bug-os kalibutan, determinado kami nga magpabilin diri. Sang 1989, nagtuon kami sing Espanyol, sa amo gin-asayn kami sa nagahambal sing Espanyol nga kongregasyon sa Brooklyn. Subong resulta, nabatyagan namon ang daku nga kalipay sa duha ka hilikuton, nga amo ang pag-alagad sa Bethel kag sa dumuluong sing lenguahe nga kongregasyon.

Isa ka bes, si Jenny nga ginsambit kaina nagduaw sa amon sa Bethel, kag natandog gid kami sang ginsaysay niya sa amon ang natabo sa iya antes kami magkilalahay sa El Salvador. Nagahiwat sia sadto sing pagtuon sa Biblia kag nabatyagan niya nga daw indi maayo ang iya pamatyag. Sang nagapauli  na sia, napensaran niya nga magbakal anay sing bulong. Bangod sa pila ka rason, wala sia magkadto sa iya suki nga botika kundi didto gid sa botika nga amon ginkadtuan.

Pag-alagad sa Iban nga mga Pungsod

Isa ka adlaw sadto sang 1999, ginsorpresa ako sang akon manugtatap sa Bethel sing isa ka pamangkot, “Luyag mo bala magsaylo sa sanga talatapan sa Australia kag magtrabaho sa Regional Engineering Office sing tatlo ka bulan?”

“Huo,” ang sabat ko dayon. Wala madugay, nagkadto kami sa Australia, kag nag-alagad kami didto sing tatlo ka tuig. Nalipay gid ako sa pagbulig sa pagdesinyo sing mga pasilidad sang mga sanga para sa pila ka pungsod sa Sidlangan kag sa Bagatnan nga Pasipiko. Sang nagpauli kami sa Brooklyn sang 2003, may isa pa gid ka sorpresa nga nagahulat sa amon. Ginaagda kami sa isa pa ka asaynment sa iban nga pungsod​—ang pag-alagad sa Regional Kingdom Hall Office sa sanga sang Brazil nga malapitlapit sa daku nga siudad sang São Paulo.

Diri gihapon ang amon asaynment tubtob karon. Ginadumalahan sini nga talatapan ang pagpatindog sing mga Kingdom Hall sa kalabanan nga pungsod sa Bagatnan nga Amerika. Lakip sa akon asaynment amo ang pagkadto sa mga duog nga may mga konstruksion kag palig-unon ang mga utod nga nagatrabaho sa sining madamo nga proyekto kag kaupod ko si Susan sa sini.

Pag-una Gihapon sa Amon mga Prioridad

Sa pagkamatuod, nanamian ako gihapon mag-surfing, apang nakasapo ako sing mas maayo pa sa “ekselente nga mga balod.” Gani, ginatamod ko ang surfing subong isa na lang ka porma sang paglingawlingaw. Upod sa pagsakdag ni Susan, nagkonsentrar ako sa mas importante nga butang, nga amo ang pag-alagad sa aton mahigugmaon nga Dios, si Jehova.

Ang amon prioridad karon amo ang paggamit sang amon kabuhi kag ikasarang sa pagpauswag sang hilikuton sang Ginharian kag sang putli nga pagsimba kay Jehova nga Dios. Natun-an namon nga sa aton pag-alagad kay Jehova, indi ang lugar ang labing importante kundi ang bug-os kalag nga pag-alagad sa iya bisan diin man kita.​—Colosas 3:23.

[Blurb sa pahina 25]

“Nanamian ako gihapon mag-surfing, apang nakasapo ako sing mas maayo pa sa ‘ekselente nga mga balod’”

[Retrato sa pahina 22, 23]

Ang akon retrato samtang naga-surfing, nga nangin poster sa Summer Surf Festival

[Retrato sa pahina 23]

Sang 13 anyos ako

[Retrato sa pahina 23]

Nabatyagan ko nga daw wala sing direksion ang akon pagkabuhi subong isa ka hippie

[Mga retrato sa pahina 25]

Sa ibabaw: Pagbulig sa pagtukod sing Kingdom Hall

Sa tuo: Upod kay Susan karon