Mga Rason Kon Ngaa Masaligan ang Biblia
4. Sibu sa Siensia
Daku ang gin-uswag sang siensia karon. Amo kon ngaa, ginbuslan sang bag-o ang daan na nga mga teoriya. Ang ginbaton nga kamatuoran sang una mahimo nga ginatamod karon subong isa ka mito lamang. Ang tulun-an nga mga libro tuhoy sa siensia masami nga kinahanglan bag-uhon.
ANG Biblia indi isa ka tulun-an nga libro tuhoy sa siensia. Apang, kon tuhoy sa sientipiko nga mga butang, talalupangdon gid ang Biblia indi lamang bangod sang ginasiling sini kundi bangod man sang wala ginasiling sini.
Wala nagaunod sing batok sa siensia nga mga pagtamod.
Madamo nga sayop nga mga pagpati ang lapnag sang una. Ginapatihan sadto nga ang duta matapan ukon nagatungtong sa literal nga mga butang. Madugay pa antes matukiban sang siensia ang paglapnag kag ang pagtapna sa balatian, naggamit ang mga doktor sing mga pamaagi nga indi epektibo kag delikado pa gani. Apang, sa kapin sa 1,100 ka kapitulo sang Biblia, wala gid sini ginasakdag ang bisan ano nga mga pagtamod nga nagasumpakil sa siensia ukon makahalalit nga mga buhat.
Nagahisanto sa siensia nga mga impormasyon.
Mga 3,500 ka tuig na ang nagligad, nagsiling ang Biblia nga ang duta nagabitay “sa ibabaw sang wala.” (Job 26:7) Sang ikawalo nga siglo B.C.E., maathag nga ginpatuhuyan ni Isaias ang “natipolonan sang duta.” (Isaias 40:22) Isa ka tipulon nga duta nga nahamtang sa kahawaan nga wala sing ginatungtungan nga kitaon ukon pisikal nga butang—indi bala nagahisanto gid ina nga paglaragway sa siensia karon?
Bisan pa ginsulat sang mga 1500 B.C.E., ang Mosaikong Kasuguan (nga masapwan sa nahauna nga lima ka tulun-an sang Biblia) nagaunod sing husto nga mga kasuguan tuhoy sa pagkuarentina sa nagabalatian, kag kon ano ang himuon may kaangtanan sa mga bangkay kag sa higko sang tawo.—Levitico 13:1-5; Numeros 19:1-13; Deuteronomio 23:13, 14.
Subong resulta man sang paggamit sing mga teleskopyo sa pagtan-aw sa kahawaan, naghinakop ang mga sientista nga ang uniberso may hinali nga “ginsuguran.” Indi tanan nga sientista nalipay sa buot ipahangop sini nga paathag. Ang isa ka propesor nagsiling: “Daw may ginhalinan gid ang isa ka uniberso nga nagluntad; kay paano matabo ang subong sini nga epekto kon wala ini sing bastante nga kabangdanan?” Apang, madugay na antes maimbento ang teleskopyo, ang nahauna gid nga bersikulo sang Biblia maathag nga nagasiling: “Sa ginsuguran gintuga sang Dios ang mga langit kag ang duta.”—Genesis 1:1.
Madugay na nga husto ang Biblia sa pagsiling nga tipulon ang duta kag nagabitay “sa ibabaw sang wala”
Bisan isa ini ka dumaan na nga libro kag nagabinagbinag sing madamo nga topiko, wala gid nagaunod ang Biblia sing impormasyon nga wala nagasibu sa siensia. Indi bala nga dapat lang binagbinagon ang subong sini nga libro? *
^ par. 9 Para sa dugang pa nga mga halimbawa tuhoy sa pagsibu sang Biblia sa siensia, tan-awa ang pahina 18-21 sang brosyur nga Isa ka Libro Para sa Tanan nga Tawo, nga ginabalhag sang mga Saksi ni Jehova.
