“Isa ka Mapuslanon nga Amot sa Medisina”

SUNO SA MANUNULAT SANG MAGMATA! SA MEXICO

Kilala ang mga Saksi ni Jehova sa bug-os nga kalibutan nga wala nagapatughong sing dugo. Ining pasad-sa-Biblia nila nga panindugan ginapakalain sang pila ka mga tawo. Apang, sa kilala nga pamantalaan nga Reforma sang Mexico City, ang pangulo nga manug-opera sa National Institute of Oncology nga si Dr. Ángel Herrera nagsiling: “Ang mga Saksi indi mga ignorante. Indi man sila mga panatiko. . . . Daku ang nabulig [nila] sa medisina agod marealisar sang mga doktor nga dapat kontrolon ang pagdugo.”

Sang nagligad nga 15 ka tuig, gin-organisar ni Dr. Herrera ang isa ka grupo sang manug-anestisya kag manug-opera nga mga doktor sa pag-opera nga wala nagagamit sing dugo. Si Dr. Isidro Martínez, ang manug-anestisya sa grupo nagsiling: “Posible gid nga mapahaganhagan ang pagdugo kon husto ang paagi sang pag-anestisya. Gani, mabuligan gid naton ang mga Saksi ni Jehova sa ila relihioso nga panindugan.”

Suno sa pamantalaan nga Reforma sang Oktubre 2006, may kapin sa 30 ka tal-us sa pagpatughong sa dugo. Lakip sa sini amo: ginapaso ang mga ugat agod magkipot ini, ginaputos ang mga organo sing isa ka pinasahi nga gasa nga may mga kemikal nga nagapatugon sang pagdugo, kag ang paggamit sing mga bulong nga nagapadamo sang dugo. *

Si Dr. Moisés Calderón, ang pangulo nga manug-opera sang tagipusuon sa La Raza General Hospital sa Mexico City, masunson nga nagaopera nga wala nagagamit sing dugo. Sia nagsiling sa Reforma: “Makatalagam ang pagpatughong sing dugo kay puede malatnan ang isa sing kagaw, bakterya, ukon parasito. Mahimo man ini tunaan sing alerdyi kag maapektuhan ang pagpanghikot sang batubato kag baga.” Bangod sini nga mga katalagman, si Dr. Calderón nagsiling: “Ang tanan nga pasyente ginakabig namon nga mga Saksi ni Jehova. Kon nagaopera kami ginatinguhaan gid namon nga diutay lang ang mawasi nga dugo, masalbar ang nawasi nga dugo, kag maggamit sing mga bulong nga nagapatugon sang pagdugo.”

Ginkutlo sang pamantalaan ang Binuhatan 15:28, 29 nga amo ang teksto nga ginabasehan sang mga Saksi ni Jehova sang ila pagpati. Sa sini nga teksto ang mga apostoles ginsugo: “Ginpakamaayo sang Espiritu Santo kag namon nga indi na kamo paglulanan pa luwas sining mga butang nga kinahanglan: nga maglihi kamo sa mga butang nga ginhalad sa mga diosdios kag sa dugo kag sa nakuga kag sa pagkamakihilawason.”

Ang Hospital Information Desk sa sanga talatapan sang mga Saksi ni Jehova sa Mexico nagreport nga kapin sa 75 ka Hospital Liaison Committee ang yara sa sini nga pungsod nga may 950 ka boluntaryo nga nagaduaw sa mga doktor kag nagahatag sing impormasyon tuhoy sa mga tal-us sa pagpatughong sing dugo. Mga 2,000 ka doktor sa Mexico ang handa sa pagbulong sa mga Saksi ni Jehova nga wala nagagamit sing dugo. Ginapasalamatan gid sang mga Saksi ang bulig sining mga doktor, nga bangod sini, labi pa sila nga nangin hanas man sa pagbulig bisan sa mga pasyente nga indi Saksi.

[Nota]

[Retrato sa pahina 30]

Dr. Ángel Herrera

[Retrato sa pahina 30]

Dr. Isidro Martínez

[Retrato sa pahina 30]

Dr. Moisés Calderón