Pagbantay sa Kalibutan

“Halos seis milyones ka kabataan kada tuig—isa sa kada lima ka segundo—ang nagakapatay bangod wala sila sing kalan-on.”—JAMES T. MORRIS, EHEKUTIBO NGA DIREKTOR SANG WORLD FOOD PROGRAMME

▪ Kapin sa 1,300 ang ginkompirmar nga napatay sa Bagyo Katrina, nga naglambas sa nabagatnan nga Estados Unidos sang Agosto 2005.—THE WASHINGTON POST, E.U.A.

▪ Ang linog sa naaminhan nga Pakistan kag India sang Oktubre 2005 nagpatay sa kapin sa 74,000 ka tawo.—BBC NEWS, BRITANYA.

▪ Suno sa isa ka report “halos 1.2 milyones ka tawo ang nagakapatay sa aksidente sa dalan sa bug-os nga kalibutan kada tuig.”—SOUTH AFRICAN MEDICAL JOURNAL, BAGATNAN NGA APRIKA.

Ginaproblema nga mga Bahandi

Ang mga opisyales sang Iglesia Katolika Romana nabudlayan sa pagdesisyon kon paano amligan ang antigo nga mga taliambong nga nagapuni sa mga simbahan sa Peru. Sa sulod sang kapin sa anom ka tuig, 200 ka simbahan ang ginkawatan. Sang nagligad nga 15 ka tuig, sa Cuzco lamang, mga 5,000 ka taliambong, ang kalabanan malahalon nga mga oil painting, ang ginkawat. Wala sing nakahibalo kon pila gid ang nagkaladula sa bug-os nga pungsod. Agod indi ini makawat, gintago sang iban nga mga simbahan ang ila mga taliambong sa di-nagakaigo nga talaguan. Sa isa ka parokya, gin-it-it sang mga ilaga ang pila nila ka koleksion sang mga oil painting.

Ang Kinahanglanon Gid nga mga Trabahador sang Finland

Ang mga industriya kag mga ahensia nga nagaaman sing serbisyo sa Finland nagakinahanglan gid sing lantip nga mga trabahador nga nakatapos sing bokasyonal nga paghanas, kaangay sang mga panday, tubero, manugwilding, kantero, mekaniko, makinista, kag nars. Ngaa? Bangod mas ginapabaloran ang mataas nga edukasyon, paathag sang pamantalaan nga Helsingin Sanomat. “Indi gid makatarunganon nga himuon ang bug-os nga henerasyon nga mga doktor kag mga nagmaster sa taliambong kag siensia,” siling ni Heikki Ropponen sang Federation of Finnish Retailers. “Dapat kapin nga pabaloran ang bokasyonal nga paghanas.”

Paborable nga Desisyon sang Korte sa Pransia

Sang Disiembre 1, 2005, nagmando ang Court of Appeal sang Pransia sa interior minister nga ipakita sa mga Saksi ni Jehova ang mga rekord sang pulis sang 1996 nga nagalakip sa ila sa listahan sang mga “kulto.” Ang listahan ginhimo paagi sa pribado nga mga bista, kag ang kaundan sini ginsekreto para sa ‘seguridad sang Estado kag sang publiko.’ Apang, nakita sang korte nga ang ila “desisyon tuhoy sa mga epekto” sang hilikuton sang mga Saksi nga mabasa sa mga report “indi salapakon.” Bisan pa sa sini, pila ka beses nga gingamit ining listahan agod pakamatarungon ang ila pag-ihig-ihig sa mga Saksi ni Jehova.

Ang “Green Great Wall”

Mahimo nga mamangag kag magbagyo sing yab-ok sa malapad nga bahin sang China bangod sang sobra nga pagpahalab, pagpamangag, pagkalbo sa kagulangan, kag sobra nga paggamit sa mga tuburan. Gani, ginsugdan sang gobierno sang China ang “pinakadaku nga proyekto sa ekolohiya sa bug-os nga kalibutan,” siling sang New Scientist. “Sa idalom sining programa, nga ginatawag nga ‘green great wall,’ tuman kadamo nga kahoy ang gintanom agod magsagang sa nagadapya nga mga yab-ok.” May mga hilamon man kag mga puongpuong nga gintanom agod indi matiphag ang balasbalason nga mga duta. Ginsugdan sang 1978, halos natunga na sang proyekto ang tulumuron sini nga tamnan ang 35 milyones ektaryas nga duta sing mga kahoy kag mga tanom nga mabuhi sa diutay nga tubig.