Pamangkot sang mga Pamatan-on . . .

Paano ko Malandas ang mga Problema Subong Isa ka Adoptibo?

“Wala gid ako sing nahibaluan tuhoy sa akon kinaugali nga mga ginikanan, kag ginasubuan gid ako bangod sini.”​—⁠Barbara, 16 anyos.

“Wala ako sing bisan diutay lang nga ideya kon sa diin gid ako natawo ukon kon sin-o ang akon mga ginikanan. Kon kaisa ginahunahuna ko ini sa kagab-ihon.”​—⁠Matt, 9 anyos.

“Kon magbaisay kami sang mga ginikanan nga nag-adoptar sa akon, nagapamensar ako nga mangin mas mahinangpanon pa siguro ang akon ‘matuod’ nga mga ginikanan. Indi gid ako dapat nga magpamensar sing subong sini, kag wala ko gid ini ginsambit sa ila.”​—⁠Quintana, 16 anyos.

WALA gid sing duhaduha​​—⁠ang pagkabuhi subong isa ka adoptibo nga bata may mga problema. Madamo nga mga pamatan-on ang nagabatyag kaangay sang mga ginhinambitan. Madamo ang nagapalibog kon bala makilala pa nila ang ila matuod nga mga ginikanan, ukon kon bala mangin mas malipayon sila upod sa ila. Kag indi lamang ini ang mga problema.

Sang nagligad nga artikulo sa sini nga serye, ginbinagbinag naton ang pila ka negatibo nga paghaumhaum sang pila ka adoptibo nga pamatan-on tuhoy sa ila kaugalingon.⁠ * Ang paglandas sa sining makapaluya sing buot nga mga panghunahuna kinahanglanon agod mangin malipayon sa kabuhi ang isa ka adoptibo. Apang, ano ang pila ka problema nga mahimo mag-utwas, kag ano nga praktikal nga mga tikang ang imo himuon agod malandas ini?

Sila Bala ang Akon “Matuod” nga mga Ginikanan?

Ang 13-anyos nga si Jake nagsiling nga pirme niya ginapamensar ang iya kinaugali nga iloy. Nagtuga ini sing mga problema sa ulot niya kag sang nag-adoptar sa iya. Naghinumdom sia: “Kon akig ako dayon ko siling nga, ‘Ti, indi man ikaw ang matuod  ko nga iloy​​—⁠gani indi mo ako pagsilutan kaangay sina!’ ”

Subong sang nakita mo, dapat mahangpan kag masabat ni Jake ining importante nga pamangkot: Sin-o ang “matuod” niya nga iloy? Kon adoptibo ka, mahimo nga nagapakigbato ka man sa kaangay sini nga problema, ilabi na kon nagahunahuna ka nga mas maayo pa siguro magtratar ang imo kinaugali nga mga ginikanan sangsa mga nag-adoptar sa imo. Apang ang biolohiya​​—⁠ang proseso sang pagbun-ag⁠—​amo lamang bala ang makahimo sa mga tawo nga mangin “matuod” nga mga ginikanan?

Indi amo sini ang pagtamod sang nag-adoptar nga iloy ni Jake. Si Jake nagsiling: “Ang akon iloy nagasiling, ‘Huo, ako ang imo matuod nga iloy. Bisan pa nga may iloy ka nga nagbun-ag sa imo, ako na karon ang imo matuod nga iloy.’ ” Kon adoptahon sang mga hamtong ang isa ka bata sa ila puluy-an kag nagsugot nga mag-aman sing ilistaran, kalan-on, kag padakuon ang bata, nga nagaatipan sa mga kinahanglanon sang bata, nangin “matuod” gid sila nga mga ginikanan. (1 Timoteo 5:⁠8) Mahimo nga ginatamod man sila sang legal nga mga awtoridad sa inyo lugar subong imo matuod nga mga ginikanan. Kamusta naman sa pagtamod sang Dios?

Binagbinaga ang ayhan labing bantog nga pagpaadoptar sa maragtas​​—⁠ang kay Jesucristo. Si Jesus indi kinaugali nga anak sang panday nga si Jose, apang gin-adoptar sia ni Jose subong iya kaugalingon nga bata. (Mateo 1:​24, 25) Sang nagdaku si Jesus, nagrebelde bala sia sa awtoridad ni Jose? Wala gid, nahangpan ni Jesus nga kabubut-on sang Dios nga tumanon niya ang iya nag-adoptar nga amay. Pamilyar gid si Jesus sa sugo nga ginhatag ni Jehova sa mga kabataan sa Israel. Ano ini nga sugo?

Padunggi ang Imo Amay kag Iloy

Ang Kasulatan nagasiling sa mga kabataan: “Padunggi ang imo amay kag ang imo iloy.” (Deuteronomio 5:16) Ang tinaga nga ‘pagpadungog’ masami nga ginagamit sa Biblia sa pagpakita sing pagtaha, pagtahod, kag pasunaid. Ginapadunggan mo ang imo nag-adoptar nga mga ginikanan paagi sa pagpakita sing kabuot sa ila, pagrespeto sa ila dignidad, pagpamati sa ila pagtamod, kag handa sa pagtuman sang ila makatarunganon nga mga pangabay sa imo.

Apang, kamusta naman ang mga tinion nga daw indi na rasonable ang imo nag-adoptar nga mga ginikanan? Ibutang ta nga nagakatabo ini. Ang tanan nga mga ginikanan di-himpit, nag-adoptar man ukon kinaugali. Bangod sang ila mga kaluyahon, isa gid ka hangkat ang pagtuman sa ila. Kag indi makapakibot nga mahimo padakuon mo kon kaisa ang imo pagkaadoptibo kag himuon nga balibad agod buhinan ang imo obligasyon sa pagtuman sa ila. Apang amo gid bala?

Makabulig sa imo ang pagbinagbinag sa kahimtangan ni Jesus. Dumduma, himpit sia. (Hebreo 4:​15; 1 Pedro 2:22) Apang di-himpit ang iya nag-adoptar nga amay; ukon ang nagbun-ag sa iya nga iloy. Busa, may mga tion nga nahibaluan ni Jesus nga sayop ang iya mga ginikanan. Nagrebelde bala sia sa di-himpit nga pagkaulo ni Jose ukon sa masinalaypon nga mga panuytoy ni Maria? Wala. Ginasugiran kita sang Biblia nga samtang nagadaku si Jesus, “padayon sia nga nagpasakop” sa iya mga ginikanan.​​—⁠Lucas 2:⁠51.

Busa sa tion nga indi maghisantuanay ang inyo mga pagtamod sang imo nag-adoptar nga mga ginikanan, mahimo ka makumbinsi nga nagsayop sila. Apang, dapat mo batunon nga ikaw di-himpit man. Gani may posibilidad pirme nga magsayop man ikaw. Walay sapayan sini, indi bala maayo nga sundon ang halimbawa ni Jesus? (1 Pedro 2:21) Ang paghimo sini magabulig sa imo nga magmatinumanon. Apang may daku pa nga rason kon ngaa dapat mo tumanon ang imo mga ginikanan.

Ang Biblia nagasiling: “Kamo nga mga anak, mangin matinumanon kamo sa inyo mga ginikanan sa tanan nga butang, kay kalahamut-an ini sa Ginuo.” (Colosas 3:20) Huo, ang imo pagkamatinumanon nagapahalipay sa imo langitnon nga Amay. (Hulubaton 27:11) Kag luyag niya nga magmatinumanon ka bangod luyag niya nga magmalipayon ka. Ginapalig-on sang iya Pulong ang mga kabataan nga magmatinumanon, nga nagadugang, “agod nga magmaayo ka kag magkabuhi ka sing malawig sa duta.”​​—⁠Efeso 6:⁠3.

Pagpabakod sang Kaangtanan Upod sa Imo Nag-adoptar nga mga Ginikanan

Ang maayo nga kaangtanan sa imo nag-adoptar nga mga ginikanan nagalakip sing kapin pa sa pagpadungog kag pagkamatinumanon lamang. Mahimo gid nga luyag mo ang kahimtangan sa puluy-an nga mapinalanggaon. Responsabilidad sang imo nag-adoptar nga mga ginikanan ang pagpaluntad sini nga kahimtangan. Apang makahimo ka man sang importante nga papel. Paano?

Una, magpangita sing mga paagi nga mangin suod ka sa imo mga ginikanan. Pamangkuta sila tuhoy sa ila gindak-an, sa ila pagkabuhi, kag sa ila mga luyag.  Pangabaya ang ila laygay sa pila ka problema nga nagatublag sa imo, nagapili sang tion nga relaks sila kag handa sa pagpamati. (Hulubaton 20:5) Ikaduha, mangita sing mga paagi nga makabulig sa pagpauswag sang pagpanghikot sa panimalay, subong sang pagmatumato sa pagbulig sa mga hilikuton sa balay kag iban pa nga trabaho.

Apang, kamusta naman kon tuhoy sa imo kinaugali nga mga ginikanan? Kon magdesisyon ka nga pangitaon sila, ukon magdesisyon sila nga pangitaon ka, magapahuyang bala ini sang imo kaangtanan sa imo nag-adoptar nga mga ginikanan? Sang una, ang mga ahensia sa pagpaadoptar masami wala nagahatag sing impormasyon agod buligan ang kinaugali nga mga ginikanan nga makita ang ila bata nga ginpaadoptar ukon ang bata man sa ila mga ginikanan. Sa karon, ang mga pagsulundan sa pila ka kadutaan indi na tanto ka estrikto, kag madamo sang adoptibo nga kabataan ang ginpakilala sa ila kinaugali nga mga ginikanan nga indi na nila madumduman. Siempre, ang mga pagsulundan sa pag-adoptar mahimo tuhay sa inyo lugar.

Walay sapayan sini, personal mo nga desisyon kon bala pangitaon mo ang imo kinaugali nga mga ginikanan ukon indi, kag mahimo mabudlay ini. Ang adoptibo nga mga pamatan-on may lainlain nga balatyagon tuhoy sa sini. Ang iban nalangkag nga pangitaon ang ila kinaugali nga mga ginikanan; ang iban naman wala. Apang, makasalig ka nga madamo sang adoptibo nga mga pamatan-on ang nagpakigkita sa ila kinaugali nga mga ginikanan nga wala maapektuhan ang ila mabakod nga kaangtanan sa ila nag-adoptar nga mga ginikanan.

Magpangayo sing laygay sa imo nag-adoptar nga mga ginikanan kag ayhan sa imo hamtong nga mga abyan sa Cristianong kongregasyon. (Hulubaton 15:22) Timbangtimbanga sing maayo ang imo mga pililian, kag hatagi sing tion ang serioso nga pagbinagbinag sini nga butang antes ka maghimo sang bisan ano nga tikang. Subong sang ginsiling sang Hulubaton 14:​15, “ang isa nga maalam nagabinagbinag sang iya mga tikang.”

Kon magdesisyon ka nga makig-angot sa imo kinaugali nga mga ginikanan, pasaliga ang imo nag-adoptar nga mga ginikanan sang imo mapinadayunon nga gugma kag pagtahod. Paagi sini, samtang amat-amat mo nga makilala ang imo kinaugali nga mga ginikanan nga nagpaadoptar sa imo sadto, mahuptan mo ang malig-on nga kaangtanan upod sa mga ginikanan nga nagpadaku kag naghanas sa imo.

Palig-una ang Imo Kaangtanan sa Imo Langitnon nga Amay

Madamo nga adoptibo nga mga pamatan-on ang nahadlok nga bayaan. Nahangawa sila nga basi madula man ang ila nag-adoptar nga pamilya subong sang pagkadula sang ila kinaugali nga pamilya. Halangpunon ini nga mga kahangawa. Apang, dumduma ining maalamon nga pinamulong: “Walay kahadlok sa gugma, kundi ang himpit nga gugma nagasubol sang kahadlok.” (1 Juan 4:18) Indi pagtuguti nga mangibabaw ang makahalalit nga kahangawa nga madula mo ang imo mga hinigugma. Sa baylo, palig-una ang imo gugma sa iban, lakip ang yara sa imo pamilya. Apang, labaw sa tanan, palig-una ang imo gugma sa imo langitnon nga Amay, si Jehova nga Dios. Masaligan gid sia, kag indi gid niya pagbayaan ang iya matutom nga kabataan. Mapakanay niya ang imo kahangawa.​​—⁠Filipos 4:​6, 7.

Si Catrina, nga gin-adoptar sang bata pa sia, nagsiling nga nakabulig gid ang iya pagbasa sing Biblia sa pagpakigsuod sa Dios kag naagom niya ang malipayon, mabungahon nga kabuhi. Sia nagsiling nga ang suod nga kaangtanan kay Jehova “importante gid bangod ang aton langitnon nga Amay nakahibalo sang aton ginabatyag.” Ang paborito nga kasulatan ni Catrina amo ang Salmo 27:​10, nga nagasiling: “Kon magbiya sa akon ang akon amay kag akon iloy, nian si Jehova magasapupo sa akon.”

[Nota]

[Retrato sa pahina 20]

Magpangita sing mga paagi agod mangin suod ka sa imo nag-adoptar nga mga ginikanan