1. Ano ang dapat naton himuon para pat-uron nga ang aton pagsimba makapahamuot kay Jehova, kag ngaa?

NAGSILING si Jesus: “Ang matuod nga mga sumilimba magsimba sa Amay sa espiritu kag kamatuoran, kay amo ini nga sahi sang mga sumilimba ang ginapangita sang Amay nga magasimba sa iya.” (Juan 4:23; 6:44) Kada isa sa aton dapat ‘magpat-od kon ano ang kalahamut-an sa Ginuo.’ (Efeso 5:10) Indi ini pirme mahapos. Ginatinguhaan ni Satanas nga patalangon kita para makahimo kita sang butang nga indi makapahamuot kay Jehova.—Bugna 12:9.

2. Ano ang natabo malapit sa Bukid Sinai.

² Paano ginatinguhaan ni Satanas nga patalangon kita? Ang isa ka paagi amo ang pagpaburon sang husto kag sala. Talupangda kon ano ang natabo sa pungsod sang Israel sang nagkampo sila malapit sa Bukid Sinai. Nagtaklad si Moises sa bukid, kag ginahulat sia sang mga tawo nga magbalik sa kampo. Sang ulihi, natak-an sila kag ginpangabay nila si Aaron nga himuan sila sang dios. Ginhimuan niya sila sing idolo nga tinday nga baka nga human sa bulawan. Dayon nagselebrar ang katawhan. Nagsaot sila sa palibot sang tinday nga baka kag nagyaub sa sini. Nagpati sila nga ang pagyaub nila sa tinday  nga baka pagsimba kay Jehova. Pero bisan ginkabig sang katawhan ang selebrasyon nga “kapiestahan para kay Jehova” sala gihapon ini. Para kay Jehova pagsimba ini sa idolo, kag madamo ang napatay sa ila. (Exodo 32:1-6, 10, 28) Ano ang leksion sini sa aton? Indi magpatalang. ‘Indi magtandog sang bisan ano nga mahigko,’ kag tuguti nga si Jehova ang magtudlo sa imo sang husto kag sala.—Isaias 52:11; Ezequiel 44:23; Galacia 5:9.

3, 4. Ngaa maayo nga usisaon naton ang ginhalinan sang pila ka popular nga selebrasyon?

³ Sang si Jesus yari sa duta, ginhanas niya ang iya mga apostoles nga magpakita sing halimbawa sang matinlo nga pagsimba. Pagkatapos sang iya kamatayon, ginpadayon sang mga apostoles ang pagtudlo sang mga prinsipio ni Jehova sa bag-o nga mga sumulunod. Pero sang napatay ang mga apostoles, gintudlo sang butig nga mga manunudlo ang sala nga mga ideya kag pagano nga mga kustombre kag selebrasyon sa kongregasyon. Gin-islan nila ang tawag sa pila sining pagano nga mga selebrasyon para daw Cristiano pamatian. (2 Tesalonica 2:7, 10; 2 Juan 6, 7) Madamo pa sa sini nga mga selebrasyon ang popular subong, kag ginatudlo gihapon sini ang butig nga mga pagpati, pati ang demonismo. *—Bugna 18:2-4, 23.

⁴ Sa bug-os nga kalibutan subong, ang mga selebrasyon kag mga holiday nangin importante nga bahin sang kabuhi sang mga tawo. Pero, samtang padayon mo nga ginatun-an ang pagtamod ni Jehova, makita mo nga kinahanglan mo bag-uhon ang imo panghunahuna sa  pila ka selebrasyon. Indi ini mahapos, pero makasalig ka nga buligan ka ni Jehova. Usisaon naton ang ginhalinan sang pila ka popular nga selebrasyon para mahangpan naton ang ginabatyag ni Jehova parte sa sini.

5. Ano ang ebidensia nga nagapakita nga wala matawo si Jesus sang Disiembre 25?

⁵ Sa madamo nga pungsod, ginaselebrar ang Krismas kada Disiembre 25, kag madamo ang nagapati nga amo ini ang petsa sang pagkatawo kay Jesus. Wala ginsugid sang Biblia sa aton kon ano nga adlaw ukon bulan si Jesus natawo, pero may ginsiling ini parte sa tion sang tuig nga gintawo sia. Nagsulat si Lucas nga sang natawo si Jesus sa Betlehem, ang ‘mga manugbantay sang karnero yara sa latagon,’ kag nagaatipan sang ila mga panong. (Lucas 2:8-11) Matugnaw ang bulan sang Disiembre sa Betlehem kag pirme nagaulan kag nagayelo, gani indi puede nga ang mga manugbantay kag ang mga karnero yara sa gua kon gab-i. Ano ang matun-an naton? Kay maayo ang panahon sang gintawo si Jesus, indi ini sa bulan sang Disiembre. Ginapakita sang Biblia kag sang ebidensia sang maragtas nga natawo sia sa mga bulan nga ginatawag naton subong nga Septiembre kag Oktubre.

6, 7. (a) Paano nagsugod ang popular nga mga kustombre sang Krismas? (b) Ano dapat ang rason naton sa paghatag sing mga regalo?

⁶ Gani paano nagsugod ang Krismas? Naghalin ini sa pagano nga kapiestahan, pareho sang Romanong Saturnalia nga isa ka selebrasyon para sa dios sang panguma nga si Saturn. Ang The Encyclopedia Americana nagsiling: “Ang Saturnalia, isa ka Romanong kapiestahan nga ginaselebrar sa tungatunga sang Disiembre, nangin sulundan sang kinasadya sang madamo nga kustombre sang  Krismas. Halimbawa, ang magarbo nga paghanda, paghatag sing mga regalo, kag pagsindi sing mga kandila.” Ang kaadlawan sang dios sang Adlaw sang mga taga-Persia nga si Mithra ginaselebrar man kada Disiembre 25.

⁷ Pero, kalabanan sang nagaselebrar subong sang Krismas nagapensar nga indi importante ang pagano nga ginhalinan sini. Para sa ila ang Krismas isa lang ka tion nga makaupod ang pamilya, magkaon sang manamit nga pagkaon, kag paghatag sing mga regalo. Siempre, palangga  naton ang aton pamilya kag mga abyan, kag luyag ni Jehova nga maghinatagay ang iya mga alagad. Pareho sa ginasiling sa aton sang 2 Corinto 9:7, “Ginahigugma sang Dios ang nagahatag sing malipayon.” Indi luyag ni Jehova nga maghatag lang kita kon may okasyon. Ang katawhan ni Jehova nalipay maghatag sing mga regalo kag makig-upod sa mga abyan kag pamilya bisan ano nga tion sang tuig, kag wala sila nagapaabot sing balos. Nagahatag sila bangod palangga nila ang iban.—Lucas 14:12-14.

8. Naghatag bala sing mga regalo ang mga astrologo kay Jesus sang lapsag pa sia? Ipaathag.

⁸ Para suportahan ang ideya sang paghatag sing mga regalo sa Krismas, ang kalabanan nagasiling nga ang tatlo ka maalam nga lalaki naghatag man sing mga regalo kay Jesus sang bag-o lang sia natawo sa kuadra. Matuod nga may grupo sang mga lalaki nga nagbisita kay Jesus kag nagdala sing mga regalo. Sang panahon sang Biblia, kinaandan na nga ginadal-an sing mga regalo ang isa ka importante nga tawo. (1 Hari 10:1, 2, 10, 13) Pero nahibaluan mo bala nga nagasiling ang Biblia nga ini nga mga lalaki mga astrologo, mga tawo nga nagahimo sing madyik kag wala nagasimba kay Jehova? Wala man sila nagbisita kay Jesus sang natawo sia sa kuadra. Sang ulihi na lang sila nagbisita sa iya, sang isa na sia ka “bata” sa iya ginaistaran nga balay.—Mateo 2:1, 2, 11.

9. Kanday sin-o birthday ang ginsambit nga ginselebrar sa Biblia?

⁹ Ang adlaw sang pagkatawo ukon birthday sang lapsag makalilipay gid. (Salmo 127:3) Pero indi buot silingon nga dapat naton saulugon ang birthday. Hunahunaa ini: Duha lang ka selebrasyon sang birthday ang ginsambit  sa Biblia. Ang isa amo ang birthday sang Paraon sang Egipto, kag ang isa pa amo ang kay Hari Herodes Antipas. (Basaha ang Genesis 40:20-22; Marcos 6:21-29.) Ining duha ka manuggahom wala nagaalagad kay Jehova. Ang matuod, wala gid kita sing mabasa sa Biblia nga ang isa ka sumilimba ni Jehova nagselebrar sang birthday.

10. Paano ginatamod sang nahauna nga mga Cristiano ang pagselebrar sang birthday?

¹⁰ Ang The World Book Encyclopedia nagasiling nga ang nahauna nga mga Cristiano “nagkabig sa pagselebrar sang birthday nga isa ka pagano nga kustombre.” Ini nga mga kustombre nabase sa butig nga mga pagpati. Halimbawa, ang dumaan nga mga Griego nagapati nga ang tagsa ka tawo ginaamligan sang isa ka espiritu nga yara sang gintawo sia. Kag nagapati sila nga ini nga espiritu konektado sa dios nga natawo sa adlaw sang pagkatawo sinang isa. Dugang pa, ang mga birthday konektado man sa astrolohiya kag mga horoscope.

11. Ano ang ginabatyag ni Jehova sa aton pagpakita sing kaalwan?

¹¹ Madamo ang nagabatyag nga ang ila birthday espesyal nga adlaw kag dapat pakitaan sila sing apresasyon kag pagpalangga sa sina nga adlaw. Pero makapakita kita sing pagpalangga sa aton pamilya kag mga abyan sa bug-os nga tuig, indi lamang sa isa ka espesipiko nga adlaw. Luyag ni Jehova nga magpakita kita sing kaayo kag kaalwan sa tanan nga tion. (Basaha ang Binuhatan 20:35.) Mapinasalamaton kita sa iya kada adlaw bangod sa hamili nga regalo nga kabuhi, indi lamang sa aton birthday.—Salmo 8:3, 4; 36:9.

12. Paano ang adlaw sang aton kamatayon mas maayo pa sangsa adlaw sang aton pagkatawo?

¹² Ang Manugwali 7:1 nagsiling: “Ang maayo nga ngalan mas maayo pa sangsa malahalon nga lana, kag  ang adlaw sang kamatayon sangsa adlaw sang pagkatawo.” Paano ang adlaw sang aton kamatayon mas maayo pa sangsa adlaw sang aton pagkatawo? Kon matawo kita, wala pa kita sing nahimo, maayo man ukon malain. Pero kon gamiton naton ang aton kabuhi sa pag-alagad kay Jehova kag maghimo sang maayo sa iban, nagahimo kita sang “maayo nga ngalan,” ukon reputasyon, kag dumdumon  kita ni Jehova bisan patay na kita. (Job 14:14, 15) Wala ginaselebrar sang katawhan ni Jehova ang ila birthday ukon ang kay Jesus. Ang matuod, isa lang ka selebrasyon ang ginsugo ni Jesus sa aton nga selebrahon, ina amo ang Memoryal sang iya kamatayon.—Lucas 22:17-20; Hebreo 1:3, 4.

13, 14. Diin konektado ang pagselebrar sang Easter?

¹³ Madamo ang nagapati nga ginaselebrar nila ang pagkabanhaw ni Jesus sa tion nga ginaselebrar nila ang Easter. Pero ang matuod, ang pagselebrar sang Easter konektado kay Eostre, ang pagano nga diosa sang pamanagbanag kag tigpamulak sang mga Anglo-Saxon. Ang The Dictionary of Mythology nagapaathag nga isa man sia ka diosa sang pertilidad. Ang pila ka kustombre sang Easter konektado sa sini. Halimbawa, ang mga itlog “nangin kilala nga mga simbulo sang bag-o nga kabuhi kag pagkabanhaw,” siling sang Encyclopædia Britannica. Amo man ang mga kuneho nga madugay na nga ginagamit nga mga simbulo sang pertilidad sa pagano nga pagsimba. Maathag gid nga ang Easter wala sing koneksion sa pagkabanhaw ni Jesus.

¹⁴ Malipay bala si Jehova kon ginasamo sang mga tawo ang mga kustombre sang butig nga pagsimba sa pagkabanhaw sang iya Anak? Sigurado nga indi gid. (2 Corinto 6:17, 18) Ang matuod, wala gid ginsiling ni Jehova nga selebrahon naton ang pagkabanhaw ni Jesus.

15. Paano nagsugod ang Halloween?

¹⁵ Ang Halloween, nga ginatawag man nga All Hallows’ Eve ukon ang bisperas sang Todos Los Santos (All  Saints’ Day) konektado sa mga manughiwit, duwende, kag murto. Madugay na ini nga selebrasyon. Ang pinakamalapit nga ugsad sa Nobiembre 1 ginaselebrar sang dumaan nga mga Celts sang Britain kag Ireland ang kapiestahan sang Samhain. Nagapati sila nga sa sini nga kapiestahan ang espiritu sang mga patay nagabalik sa duta. Nagahanda ang mga tawo sing pagkaon kag ilimnon para indi sila paghalitan sang mga espiritu. Subong, kon nagakostyum kag nagapamalaybalay ang kabataan nga nagasiling “Trick or treat,” wala sila kahibalo nga ginailog na gali nila ining dumaan nga demonyohanon nga kustombre.

16, 17. Ano dapat ang aton pamensaron kon nagaplano sang kasal?

¹⁶ Ang kasal isa ka malipayon nga okasyon. Lainlain ang paagi sa paghiwat sang kasal sa bug-os nga kalibutan. Kinaandan na nga wala ginapamensar sang mga tawo ang ginhalinan sang pila ka kustombre sa kasal, amo nga wala nila mahibaluan nga ang pila sini naghalin sa relihioso nga pagpati sang mga pagano. Pero dapat pat-uron sang Cristiano nga nagaplano sang ila kasal nga kalahamut-an ini kay Jehova. Kon nahibaluan nila ang ginhalinan sang mga kustombre sa kasal, makahimo sila sing maayo nga desisyon.—Marcos 10:6-9.

¹⁷ Ang pila ka kustombre sa kasal ginapatihan nga nagadala sing ‘suerte’ sa bag-o lang kasal. (Isaias 65:11) Halimbawa, sa pila ka lugar ang mga tawo nagasabwag sing bugas ukon sing iban pa sa nobya kag nobyo. Nagapati sila nga makahatag ini sa mag-asawa sing kabataan, kalipay, kag malawig nga kabuhi kag makaamlig sa ila sa malain. Pero ginalikawan sang mga Cristiano ang bisan  ano nga kustombre nga konektado sa butig nga relihion.—Basaha ang 2 Corinto 6:14-18.

18. Ano pa nga mga prinsipio sa Biblia ang maaplikar sa mga kasal?

¹⁸ Luyag sang kalaslon nga Cristiano nga mangin malipayon kag may dignidad ang ila kasal kag mangin makalilipay ini sa tanan nga tumalambong. Ang mga bisita sa sini nga kasal indi dapat maghambal sing makasalaklaw, binastos, ukon wala sing pagtahod sa bag-o lang kasal ukon sa iban nga nagatambong. (Hulubaton 26:18, 19; Lucas 6:31; 10:27) Wala ginapadaku sang kasal sang Cristiano ang “pagpadayawdayaw sang palangabuhian sang isa.” (1 Juan 2:16) Gani, kon nagaplano sang kasal, siguraduha nga mangin makalilipay ini kag takus gid dumdumon.—Tan-awa ang Endnote 28.

19, 20. Ano ang ginsuguran sang pag-toast?

¹⁹ Kinaandan na ang pag-toast sa mga kasal kag sa iban pa nga okasyon. Sa tion sang pag-toast, ginabayaw sang mga tumalambong ang ila mga baso kag may isa nga nagapangabay sing pagpakamaayo. Paano ginatamod sang mga Cristiano ang pag-toast?

²⁰ Ang International Handbook on Alcohol and Culture nagasiling nga ang pag-toast posible isa ka dumaan nga kustombre sang mga pagano sa “diin ang sagrado nga likido ginahalad sa mga dios.” Ginahimo ini “kabaylo sang isa ka pangabay, isa ka pangamuyo nga ginsumaryo nga ‘para sa malawig nga kabuhi!’ ukon ‘para sa imo ikaayong lawas!’” Sadto, ginabayaw sang mga tawo ang ila mga kopa para pangabayon ang pagpakamaayo sang ila mga dios. Pero indi ini ang paagi para ihatag ni Jehova ang iya mga pagpakamaayo.—Juan 14:6; 16:23.

21. Ano pa nga mga selebrasyon ang indi dapat pagpakigbahinan sang mga Cristiano?

²¹ Kon nagadesisyon nga matambong ukon indi sa bisan ano nga selebrasyon, pamensara ang ginapadaku sini nga paggawi kag pamatasan. Halimbawa, ang pila ka selebrasyon kag mga kapiestahan para sa publiko nagalakip sang binastos nga mga sinaot, pagpahubog, kag imoralidad. Ginapadaku man sini nga mga selebrasyon ang homoseksuwalidad ukon nasyonalismo. Kon makigbahin kita sa sini nga sahi sang mga selebrasyon, ginakaugtan gid bala naton ang ginakaugtan ni Jehova?—Salmo 1:1, 2; 97:10; 119:37.

22. Ano ang makabulig kon nagadesisyon sa pagpakigbahin sa isa ka selebrasyon?

²² Dapat indi gid makigbahin ang mga Cristiano sa bisan ano nga selebrasyon nga wala nagapadungog sa Dios. Si apostol Pablo nagsulat: “Bisan nagakaon kamo ukon nagainom ukon bisan ano ang inyo ginahimo, himua ang tanan para sa himaya sang Dios.” (1 Corinto 10:31; tan-awa ang Endnote 29.) Siempre pa, indi tanan nga selebrasyon konektado sa imoralidad, butig nga relihion, ukon nasyonalismo. Kon ang isa ka selebrasyon wala nagalapas sang mga prinsipio sa Biblia, dapat personal kita nga magdesisyon kon bala makigbahin ukon indi. Dapat man naton pamensaron ang epekto sang aton desisyon sa iban.

23, 24. Paano naton ipaathag ang aton desisyon parte sa pila ka selebrasyon sa aton indi Saksi nga pamilya?

²³ Posible wala ka na nagapakigbahin sa mga selebrasyon nga nagapakahuya kay Jehova. Pero basi pamensaron sang pila mo ka indi Saksi nga pamilya nga indi ka na  sa ila ukon indi mo na sila luyag nga makaupod. Basi nagabatyag sila nga ang mga holiday amo lamang ang tion sang tuig nga makatipon ang pamilya. Ano ang puede mo himuon? Madamo sing paagi nga pabatyagon mo sila nga palangga mo sila kag importante sila para sa imo. (Hulubaton 11:25; Manugwali 3:12, 13) Puede mo sila imbitahon sa iban nga okasyon.

²⁴ Kon gusto mahibaluan sang imo mga paryente kon ngaa indi ka magselebrar sang isa ka holiday, puede ka makakuha sing impormasyon sa aton mga publikasyon kag sa jw.org/hil para mapaathag sa ila ang imo mga rason. Indi sila pagpabatyaga nga luyag mo makigbais ukon puersahon sila nga patihan ang imo ginapatihan. Buligi sila nga maintiendihan nga madamo ka sang gin-usisa nga rason antes ka nagdesisyon. Magpabilin nga kalmado, kag ‘maghambal pirme sing mainayuhon, nga daw gintimplahan sing asin.’—Colosas 4:6.

25, 26. Paano mabuligan sang mga ginikanan ang ila kabataan nga higugmaon ang mga talaksan ni Jehova?

²⁵ Importante nga naintiendihan naton tanan ang rason kon ngaa indi kita makigbahin sa isa ka selebrasyon. (Hebreo 5:14) Ang aton tulumuron mapahamut-an si Jehova. Kag kon kita mga ginikanan, dapat maghatag kita sing tion para buligan ang aton kabataan nga mahangpan kag higugmaon ang mga prinsipio sa Biblia. Kon mangin matuod si Jehova sa ila, luyag man nila sia pahamut-an.—Isaias 48:17, 18; 1 Pedro 3:15.

²⁶ Nalipay si Jehova nga makita nga ginahimo naton ang tanan para masimba sia sa matinlo kag bunayag ukon honest nga paagi. (Juan 4:23) Pero madamo ang nagapensar nga imposible nga mangin bunayag sa kalibutan nga indi bunayag. Matuod bala ina? Binagbinagon naton ina sa masunod nga kapitulo.