1, 2. (a) Ano ang indi normal nga mga butang nga ginapanghimo ni Ezequiel? (Tan-awa ang piktyur sa umpisa sini nga kapitulo.) (b) Ang ginapanghimo ni Ezequiel tagna parte sa ano?

 ANG balita parte sa indi normal nga mga butang nga ginapanghimo ni Ezequiel madasig nga naglapta sa tinapok nga mga Judiyo sa Babilonia. Isa na ka semana nga nagapungko lang sia, nagakaurungan, kag wala nagapakig-istorya sa mga tinapok. Pero hinali lang, nagtindog sia, nagsulod sa iya balay, kag nagpanirado. Natingala gid ang iya mga kaingod. Dugaydugay, naggua ang propeta sa iya balay, nagkuha sing tisa kag ginbutang ini sa iya atubangan, kag gintigiban. Dayon, ginhimuan niya sing pader ukon kudal ang palibot sini pero wala sia gihapon nagahambal.—Ezeq. 3:10, 11, 15, 24-26; 4:1, 2.

² Nagadamo ang nagatan-aw kay Ezequiel, kag mahimo nagapamensar sila, ‘Ano ang buot silingon sang iya ginahimo?’ Sa ulihi, maintiendihan sang tinapok nga mga Judiyo nga ang ginapanghimo ni propeta Ezequiel tagna parte sa makahaladlok pero matarong nga kaakig ni Jehova nga Dios nga malapit na lang matabo. Ano ini? Ano ang epekto sini sa dumaan nga pungsod sang Israel? Ano ang epekto sini sa putli nga mga sumilimba subong?

3, 4. (a) Ano ang tatlo ka bahin sang paghukom sang Dios nga gin-akto ni Ezequiel? (b) Paano gin-akto ni Ezequiel ang pagkibon sa Jerusalem?

³ Sang mga 613 B.C.E., ginsugo ni Jehova si Ezequiel nga iakto ang nagahilapit nga paghukom sang Dios batok sa Jerusalem. May tatlo ini ka bahin: ang pagkibon sa siudad, ang pag-antos sang mga pumuluyo sini, kag ang paglaglag sa siudad kag sa katawhan sini. a Isaisa nga binagbinagon naton ining tatlo ka bahin.

⁴ Ang pagkibon sa Jerusalem. Ginsugo ni Jehova si Ezequiel: “Magkuha ka sing tisa. Ibutang mo ini sa imo atubangan. . . . Kibunon mo ang siudad.” (Basaha ang Ezequiel 4:1-3.) Ang tisa nagarepresentar sa siudad sang Jerusalem, kag si Ezequiel nagarepresentar sa mga soldado sang Babilonia nga gingamit ni Jehova. Ginsugo man si Ezequiel nga maghimo sing pader ukon kudal, sing bungyod sa kilid sang pader, kag sing mga inugbungkol sa pagguba sa pader. Dayon, ibutang niya ini sa palibot sang tisa. Nagarepresentar ini sa mga armas sang kaaway sang Jerusalem nga gamiton nila sa pagkibon kag pagsalakay sa siudad. Para ipakita ang daw salsalon nga kabakod sang mga kaaway, mabutang si Ezequiel sing “isa ka panid nga plantsa,” ukon malapad nga salsalon sa tunga niya kag sang siudad. Dayon ‘maatubang’ sia sa siudad. Ining ginapanghimo ni Ezequiel ‘mangin tanda sa panimalay sang Israel’ parte sa nagahilapit nga hitabo nga wala nila ginapaabot. Gamiton ni Jehova ang mga soldado sang kaaway sa pagkibon sa Jerusalem, ang pinakaimportante nga siudad sang katawhan sang Dios, diin nahamtang ang templo sang Dios!

5. Paano gin-akto ni Ezequiel ang matabo sa mga pumuluyo sang Jerusalem?

⁵ Ang pag-antos sang mga pumuluyo sang Jerusalem. Ginsugo ni Jehova si Ezequiel: “Magkuha ka sing trigo, sebada, balatong, lentehas, mijo, kag iban pa nga uyas . . . kag himuon nga tinapay,” kag “takson mo nga 20 ka siklo lang ang imo kaunon kada adlaw.” Dayon nagsiling si Jehova: “Untaton ko ang pagsuplay sing pagkaon.” (Ezeq. 4:9-16) Sa sini nga eksena, ginarepresentar ni Ezequiel indi na ang mga soldado sang Babilonia kundi ang mga pumuluyo sang Jerusalem. Ginatagna sang ginhimo ni Ezequiel ang nagahilapit nga pagkibon sa siudad nga magaresulta sa pagdiutay sang suplay sang pagkaon. Sa sina nga tion, magahimo ang mga tawo sing tinapay halin sa bisan ano lang nga ingrediente, buot silingon kaunon nila ang bisan ano. Daw ano ka grabe ang matabo nga gutom? Ginpatuhuyan ni Ezequiel ang mga pumuluyo sang Jerusalem sang nagsiling sia: “Kaunon sang mga amay ang ila kabataan, kag kaunon sang kabataan ang ila amay.” Sa ulihi, madamo ang magaantos bangod sang “makamamatay nga mga baslay sang tiggulutom” kag ang katawhan “magapalangluya.”—Ezeq. 4:17; 5:10, 16.

6. (a) Ano ang duha ka papel nga dungan nga gintungdan ni Ezequiel? (b) Ano ang ginapakita sang sugo sang Dios nga ‘timbanga kag partidaha’ ang buhok?

 ⁶ Ang paglaglag sa Jerusalem kag sa katawhan sini. Sa sini nga bahin sang tagna, duha ka papel ang dungan nga gintungdan ni Ezequiel. Una, gin-akto ni Ezequiel ang himuon ni Jehova. Ginsugo sia ni Jehova: “Magkuha ka sing matalom nga espada. Gamita ini kaangay sang labaha sang barbero.” (Basaha ang Ezequiel 5:1, 2.) Ang kamot ni Ezequiel nga nagauyat sang espada nagarepresentar sa kamot ni Jehova, sa iya paghukom, paagi sa mga soldado sang Babilonia. Ikaduha, gin-akto ni Ezequiel ang maeksperiensiahan sang mga Judiyo. Ginsugo sia ni Jehova: “Kiskisi ang imo ulo kag ang imo burangos.” Ginarepresentar sang pagkiskis sang ulo ni Ezequiel kon paano salakayon kag papason ang mga Judiyo. Ang sugo naman nga “timbanga ini kag partidaha” nagapakita nga ang paghukom ni Jehova sa Jerusalem indi lang palagpat kundi gintuyo gid kag maid-id.

7. Ano ang buot silingon sang sugo ni Jehova kay Ezequiel nga partidahon sa tatlo ka bahin ang iya buhok kag sarisari ang himuon sa kada bahin?

 ⁷ Ano ang buot silingon sang sugo ni Jehova kay Ezequiel nga partidahon sa tatlo ka bahin ang iya buhok kag sarisari ang himuon sa kada bahin? (Basaha ang Ezequiel 5:7-12.) Ginsunog ni Ezequiel ang isa ka bahin sang buhok sa “tunga sang siudad” para ipakita sa mga nagatan-aw nga may mga pumuluyo sang Jerusalem nga mapatay sa siudad. Ginlabo niya ang isa pa ka bahin sang buhok sa “palibot sang siudad” para ipakita nga may mga pumuluyo nga mapatay sa gua sang siudad. Ginsabwag niya sa hangin ang katapusan nga bahin sang buhok para ipakita nga may mga pumuluyo nga magaalaplaag sa mga pungsod, pero ‘panglagson sila sang espada.’ Gani bisan diin man ang mga makaluwas, wala sila sing kalinong.

8. (a) Ano nga paglaum ang ginahatag sang gin-akto ni Ezequiel? (b) Paano natuman ang tagna parte sa “pila ka nahot”?

⁸ Pero, ang tagna nga gin-akto ni Ezequiel nagahatag man sing paglaum. Parte sa buhok nga ginkiskis ni Ezequiel, si Jehova nagsugo sa iya: “Magkuha [ka] sing pila ka nahot . . . kag putsa ini sa sidsid sang imo bayo.” (Ezeq. 5:3) Ginapakita sini nga sugo nga maluwas ang pila sa mga Judiyo nga magaalaplaag sa mga pungsod. Ang iban sa sining “pila ka nahot” upod sa mga tinapok nga magabalik sa Jerusalem pagkatapos sang 70 ka tuig nga pagkabihag sa Babilonia. (Ezeq. 6:8, 9; 11:17) Natuman bala ini nga tagna? Huo. Pila ka tuig sa tapos sang pagkabihag sa Babilonia, si propeta Hageo nagsiling nga ang pila sa mga Judiyo nga nag-alaplaag nakabalik sa Jerusalem. Sila ang “mga pangulo sang panimalay nga nakakita sang nahauna nga balay,” nga amo ang templo ni Solomon. (Esd. 3:12; Hag. 2:1-3) Ginpat-od ni Jehova nga mapasag-uli ang putli nga pagsimba, suno sa iya ginpromisa. Ang dugang nga detalye parte sa pagpasag-uli binagbinagon sa Kapitulo 9 sini nga publikasyon.—Ezeq. 11:17-20.

9, 10. Ang mga gin-akto ni Ezequiel nagapahanumdom sa aton sang importante nga mga hitabo sa palaabuton. Ano ini nga mga hitabo?

⁹ Ang mga hitabo nga gin-akto ni Ezequiel nagapahanumdom sa aton sang importante nga mga hitabo sa palaabuton nga gintagna sa Pulong sang Dios. Ano ang pila sini? Pareho sa natabo sa dumaan nga siudad sang Jerusalem, gamiton man ni Jehova ang pulitikal nga mga puersa para himuon ang wala ginapaabot—ang pagsalakay sa tanan nga butig nga relihion sa duta. (Bug. 17:16-18) Ang paglaglag sa Jerusalem “isa ka pinasahi nga kalaglagan.” Pareho sini, ang “dakung kapipit-an” kag ang inaway sini nga Armageddon, isa man ka hitabo “nga wala pa gid matabo.”—Ezeq. 5:9; 7:5; Mat. 24:21.

¹⁰ Ginapakita sang Pulong sang Dios nga ang mga indibiduwal nga nagasuporta sa butig nga relihion makaluwas sa nagahilapit nga kalaglagan sang relihioso nga mga organisasyon. Sa kahadlok, ining makaluwas magaupod sa kay bisan sin-o nga nagapangita sing panaguan. (Zac. 13:4-6; Bug. 6:15-17) Ang ila sitwasyon magapahanumdom sa aton sa mga pumuluyo sang dumaan nga Jerusalem nga nakaluwas sa kalaglagan kag nag-alaplaag “sa hangin.” Nabinagbinag naton sa  parapo 7 nga bisan pa nakaluwas sila sa sina nga tion, si Jehova nagkuha sing espada kag ‘ginlagas sila.’ (Ezeq. 5:2) Pareho sini, bisan diin man malagyo ang mga makaluwas sa pagsalakay sa relihion, indi sila makaluwas sa espada ni Jehova. Sa Armageddon, laglagon sila, pati ang tanan nga tulad-kanding nga mga tawo.—Ezeq. 7:4; Mat. 25:33, 41, 46; Bug. 19:15, 18.

11, 12. (a) Paano ang aton pag-intiende sa tagna ni Ezequiel parte sa pagkibon sa Jerusalem makaapektar sa aton pagtamod sa ministeryo subong? (b) Ano nga mga pagbag-o ang mahimo matabo sa aton pagbantala kag sa mensahe sini?

¹¹ Paano ang aton pag-intiende sa sini nga tagna makaapektar sa aton pagtamod sa ministeryo kag sa pagkahilingagawon sini? Ginapalig-on kita sini nga himuon ang tanan naton nga masarangan para buligan ang mga tawo nga mangin alagad ni Jehova. Ngaa? Kay diutay na lang ang nabilin nga tion para ‘tudluan ang mga tawo sa tanan nga pungsod agod mangin disipulo.’ (Mat. 28:19, 20; Ezeq. 33:14-16) Kon magsugod na ang pagsalakay sang “bilugon” (ang pulitikal nga mga puersa) sa mga relihion, indi na kita magbantala sing mensahe sang kaluwasan. (Ezeq. 7:10) Kon parte sa pagsugid sing maayong balita, “magaapa” kita pareho nga si Ezequiel nangin apa, ukon nag-untat sa pagpahayag sang iya mensahe, sa isa ka bahin sang iya ministeryo. (Ezeq. 3:26, 27; 33:21, 22) Matuod, sa tapos sang kalaglagan sang butig nga relihion, ang mga tawo gusto gid ‘magpangayo sing palanan-awon sa manalagna,’ pero wala sila sing mabaton nga mga instruksion nga magaluwas sa ila. (Ezeq. 7:26) Ang paghatag sing instruksion kag kahigayunan nga mangin disipulo sang Cristo natapos na.

¹² Pero ang aton hilikuton bilang mga manugbantala magapadayon. Ngaa? Sa tion sang dakung kapipit-an, mahimo ipahayag naton ang mensahe sang paghukom, nga daw pareho sang kalalat-an  nga yelo. Ina nga mensahe magatanda nga malapit na ang kalaglagan sang katawhan sining malauton nga kalibutan.—Bug. 16:21.

13. Ngaa ginsugo ni Jehova si Ezequiel nga maghigda nga nagatakilid sa iya wala, dayon sa iya tuo?

¹³ Wala lang gintagna ni Ezequiel kon paano malaglag ang Jerusalem, kundi gin-akto man niya kon san-o ini matabo. Ginsugo ni Jehova si Ezequiel nga maghigda nga nagatakilid sa iya wala sa sulod sang 390 ka adlaw kag sa iya tuo sa sulod sang 40 ka adlaw. Ang kada adlaw nagarepresentar sang isa ka tuig. (Basaha ang Ezequiel 4:4-6; Num. 14:34) Ini nga pag-akto, nga posible ginahimo ni Ezequiel sa sulod sang pila ka oras kada adlaw, nagapakita sang eksakto nga tuig nga malaglag ang Jerusalem. Ang 390 ka tuig nga pagpakasala sang Israel nagsugod sang 997 B.C.E., sang gintunga sa duha ka bahin ang 12 ka tribo nga ginharian. (1 Hari 12:12-20) Ang 40 ka tuig nga pagpakasala sang Juda mahimo nagsugod sang 647 B.C.E., sang ginhimo si Jeremias nga propeta sa paghatag sing maathag nga paandam sa ginharian sang Juda parte sa nagahilapit  nga kalaglagan sini. (Jer. 1:1, 2, 17-19; 19:3, 4) Ining duha ka magkatuhay nga tuig matapos sa 607 B.C.E., ang tuig nga ginlaglag ang Jerusalem, suno sa gintagna ni Jehova. b

14. (a) Paano ginpakita ni Ezequiel nga kumbinsido sia nga si Jehova magahulag sa eksakto nga tion? (b) Ano anay ang matabo antes malaglag ang Jerusalem?

¹⁴ Sang nabaton ni Ezequiel ang tagna parte sa 390 ka adlaw kag 40 ka adlaw, mahimo wala pa niya mabal-an kon san-o gid malaglag ang Jerusalem. Pero samtang nagaligad ang panahon, sulitsulit sia nga nagpaandam sa mga Judiyo parte sa nagahilapit nga paghukom ni Jehova. Nagsiling si Ezequiel: ‘Amo na ini ang katapusan ninyo.’ (Basaha ang Ezequiel 7:3, 5-10.) Kumbinsido gid si Ezequiel nga si Jehova magahulag sa eksakto nga tion. (Isa. 46:10) Gintagna man sang propeta ang mga hitabo antes malaglag ang Jerusalem: “Magaabot ang nagainasud-asod nga mga kalisdanan.” Magaresulta ini sa pagkabungkag sang katilingban, relihion, kag panguluhan sang tawo.—Ezeq. 7:11-13, 25-27.

15. Ano nga mga bahin sang tagna ni Ezequiel ang nagsugod nga matuman halin sang 609 B.C.E?

¹⁵ Pila ka tuig sa tapos ginpahayag ni Ezequiel ang kalaglagan sang Jerusalem, nagsugod nga matuman ang tagna. Sang 609 B.C.E., nabalitaan ni Ezequiel nga nagsugod ang pagsalakay sa Jerusalem. Sa sina nga tion, nabatian ang tunog sang trumpeta nga nagapanawagan sa mga pumuluyo nga pangapinan ang ila siudad, pero suno sa gintagna ni Ezequiel, “wala sing isa nga magakadto sa inaway.” (Ezeq. 7:14) Ang mga pumuluyo sang Jerusalem wala nagtipon para pangapinan ang siudad batok sa nagasalakay nga Babilonianhon. Basi nagpensar ang iban nga Judiyo nga luwason sila ni Jehova kay sang ginpahog sila sang mga Asirianhon nga sakupon ang Jerusalem, nagpadala si Jehova sing isa ka anghel kag ginpamatay ang kalabanan nga soldado sang kaaway. (2 Hari 19:32) Pero wala sing anghel nga nagbulig sa ila sa sini nga tion. Wala madugay, ang ginlikupan nga siudad daw “kaldero” nga ginbutang sa “kalayo,” kag ang mga pumuluyo sini daw mga “hiwa sang karne” sa sulod sang kaldero. (Ezeq. 24:1-10) Pagligad sang 18 ka bulan nga pagkibon sa siudad, nalaglag ang Jerusalem.

16. Paano naton mapakita nga kumbinsido kita nga si Jehova magahulag sa eksakto nga tion?

¹⁶ Ano ang matun-an naton sa sini nga bahin sang tagna ni Ezequiel? May labot bala ini sa mensahe nga aton ginasugid sa ministeryo kag sa reaksion sang mga tawo nga aton ginabantalaan? Ginpat-od na ni Jehova kon san-o malaglag ang butig nga mga relihion, kag sa liwat magahulag sia sa eksakto nga tion. (2 Ped. 3:9, 10; Bug. 7:1-3) Wala kita kabalo kon san-o inang eksakto nga tion. Pero pareho kay Ezequiel, padayon naton nga ginatuman ang sugo ni Jehova nga sulitsulit nga paandaman ang mga tawo: ‘Amo na ini ang katapusan ninyo.’ Ngaa kinahanglan naton nga sulitsuliton ini nga mensahe? Sang panahon ni Ezequiel,  ang kalabanan sa iya ginbantalaan indi magpati sa tagna sang Dios nga malaglag ang Jerusalem. c (Ezeq. 12:27, 28) Pero sang ulihi, ang pila ka tinapok nga Judiyo sa Babilonia nagpakita sing matarong nga tagipusuon kag nagbalik sa ila lugar. (Isa. 49:8) Madamo man subong ang indi magpati nga may kalaglagan nga magaabot. (2 Ped. 3:3, 4) Pero, antes pa matapos ang tion sa pagsugid sa mensahe sang Dios, gusto naton buligan ang mga nagapangita gid sang dalan nga nagapadulong sa kabuhi.—Mat. 7:13, 14; 2 Cor. 6:2.

17. Ano nga sitwasyon kag mga hitabo ang aton masaksihan sa tion sang dakung kapipit-an?

¹⁷ Ang tagna ni Ezequiel nagapahanumdom man sa aton nga kon salakayon na ang relihioso nga organisasyon, ang mga miembro sini indi ‘magkadto sa inaway’ para pangapinan ang relihion. Sa baylo, kon marealisar nila nga ang ila pagpanawag sing bulig nga “Ginuo, Ginuo,” wala ginapamatian, ang “ila mga kamot magahuyhoy” kag ‘magakurog’ sila. (Ezeq. 7:3, 14, 17, 18; Mat. 7:21-23) Ano pa ang ila himuon? (Basaha ang Ezequiel 7:19-21.) Si Jehova  nagsiling: “Ihaboy nila ang ila mga pilak sa mga dalan.” Amo ini ang ginhimo sang mga pumuluyo sang dumaan nga Jerusalem, kag amo man sini ang matabo sa tion sang dakung kapipit-an. Sa sina nga tion, marealisar sang mga tawo nga ang kuarta indi gid makaluwas sa ila sa nagahilapit nga kalaglagan.

18. Ano ang matun-an naton sa tagna ni Ezequiel parte sa paghimo sing husto nga prioridad?

¹⁸ Nakita mo bala kon ano ang matun-an naton sa sini nga bahin sang tagna ni Ezequiel? Parte ini sa paghimo sang husto nga prioridad. Binagbinaga ini: Nagbag-o lang sing prioridad ang mga pumuluyo sang Jerusalem pagkatapos nila narealisar nga laglagon ang ila siudad kag ara sa katalagman ang ila kabuhi kag indi sila maluwas sang materyal nga pagkabutang. Ginpanghaboy nila dayon ang ila pagkabutang kag ‘nagpangayo sing palanan-awon sa manalagna,’ pero ulihi na ang tanan. (Ezeq. 7:26) Sa aton bahin, nabal-an gid naton nga malapit na laglagon ining malauton nga kalibutan. Ang aton pagtuo sa promisa sang Dios nagpahulag sa aton nga maghimo sing husto nga prioridad. Gani, masako kita sa pagpangita sang espirituwal nga manggad, nga may dayon nga balor kag indi pag-ihaboy “sa mga dalan.”—Basaha ang Mateo 6:19-21, 24.

19. Ano dapat ang mangin epekto sa aton sang tagna ni Ezequiel?

¹⁹ Bilang repaso, ano ang epekto sa aton subong sang mga tagna ni Ezequiel parte sa pagkalaglag sang Jerusalem? Nagapahanumdom ini sa aton nga diutay na lang ang tion para buligan ang mga tawo nga mangin alagad sang Dios. Gani wala kita nagapabuyanbuyan sa paghimo sing disipulo. Nalipay gid kita kon may sinsero nga mga tawo nga magsimba sa aton Amay, si Jehova. Pero bisan ang mga wala nagaalagad kay Jehova padayon naton nga ginapaandam pareho sang ginhimo ni Ezequiel sang panahon niya: ‘Amo na ini ang katapusan ninyo.’ (Ezeq. 3:19, 21; 7:3) Samtang ginahimo naton ini, determinado kita nga padayon nga magsalig kay Jehova kag unahon sa aton kabuhi ang iya putli nga pagsimba.—Sal. 52:7, 8; Hulu. 11:28; Mat. 6:33.