‘Dapat nga mga manunudlo kamo.’ (Heb. 5:12) Hunahunaa nga si Jehova mismo, ang pinakamaayo nga Manunudlo sa uniberso, nagaagda sa aton nga tudluan ang iban parte sa iya! Hamili gid nga pribilehiyo kag serioso nga responsibilidad ang asaynment nga itudlo ang kamatuoran parte kay Jehova—sa pamilya, sa kongregasyon, ukon sa ministeryo. Paano naton mahimo ini?

Ang sabat makita sa ginsulat ni apostol Pablo kay Timoteo: “Mag-ukod ka sa pagbasa sing dayag, sa paglaygay, kag sa pagpanudlo.” Nagsiling pa si Pablo: “Sa paghimo sini maluwas mo ang imo kaugalingon kag ang mga nagapamati sa imo.” (1 Tim. 4:13, 16) Ang mensahe nga imo ipaambit makaluwas sing kabuhi. Gani importante nga pauswagon mo ang imo pagbasa kag pagpanudlo. Ini nga brosyur gindesinyo para mabuligan ka nga himuon ini. Binagbinaga ang pila bahin sini.

Si Jehova ang “Daku nga Instruktor.” (Isa. 30:20) Bisan pa ini nga brosyur makapauswag sang imo mga ikasarang sa pagbasa kag pagpanudlo, indi pagkalimti nga si Jehova amo ang Ginahalinan sang aton mensahe kag sia ang nagabuyok sa mga tawo. (Juan 6:44) Gani, mangamuyo pirme nga hatagan ka sang balaan nga espiritu. Gamita pirme ang Pulong sang Dios. Ipatuhoy ang atension sang imo tagpalamati indi sa imo kundi kay Jehova. Palambua sa ila tagipusuon ang tudok nga gugma para sa iya.

Ginaagda ka nga itudlo ang pinakaimportante nga mensahe nga ginhatag sa mga tawo. Nagapati kami nga mahimo mo ini kon magsalig ka “sa kusog nga ginahatag sang Dios.”—1 Ped. 4:11.

Ang imo kaupod nga mga manunudlo,

Nagadumala nga Hubon sang mga Saksi ni Jehova