SA SULOD sang madamo nga tinuig, nagpuyo ang mga anak ni Israel sa Egipto, nag-umwad ang ila pangabuhi kag nagdamo sila. Pero, naggahom ang bag-o nga Paraon. Indi niya kilala si Jose. Isa sia ka mapintas nga diktador nga nahadlok sa pagdamo sang mga Israelinhon. Gin-ulipon niya sila kag nagsugo sia nga ihaboy ang tanan nga bag-ong bun-ag nga lapsag nga lalaki sa Suba Nilo. Pero ginproteksionan sang isa ka maisog nga nanay ang iya lapsag. Gintago niya ang iya lapsag sa takupis kag ginbutang ini sa katabun-akan. Nakita sang bata nga babayi ni Paraon ang lapsag, ginhingalanan sia nga Moises, kag ginpadaku sia sa palasyo sang mga Egiptohanon.

Sang 40 anyos na si Moises, napatay niya ang isa ka Egiptohanon kay gin-apinan niya ang isa ka Israelinhon nga ulipon. Nalagyo si Moises sa malayo nga lugar kag didto nag-istar. Sang 80 anyos na si Moises, ginpabalik sia ni Jehova sa Egipto agod makigkita kay Paraon kag mangabay nga hilwayon ang katawhan sang Dios.

Matigdas nga namalibad si Paraon. Gani, ginpahanabo sang Dios ang napulo ka kalalat-an sa Egipto. Kada kadto ni Moises kay Paraon, ginahatagan sia ni Moises sing kahigayunan nga malikawan ang masunod nga kalalat-an, pero nagpatig-a si Paraon. Wala sia namati sa pangabay ni Moises kag sang iya Dios nga si Jehova. Sang ulihi, napatay ang mga subang sang mga Egiptohanon sa ikanapulo nga kalalat-an. Naluwas ang mga subang sang mga pamilya nga nagtuman kay Jehova paagi sa pagmarka sing dugo sang ginhalad nga kordero sa ila bakalan. Ginlikawan sang nagapamatay nga anghel ang ila panimalay. Gindumdom sang mga Israelinhon ining dalayawon nga pagluwas paagi sa pagselebrar sing Paskua kada tuig.

Bangod napatay ang subang ni Paraon, ginsugo niya si Moises kag ang tanan nga Israelinhon nga magbiya sa Egipto. Gilayon nila nga gintipon ang daku nga kadam-an kag nagbiya sila sa Egipto. Pero nagbag-o ang pensar ni Paraon. Ginlagas niya sila upod sa madamo nga soldado kag kangga. Nakibon ang mga Israelinhon sa baybayon sang Pula nga Dagat. Ginpahawa ni Jehova ang Pula nga Dagat, amo nga nakaagi ang nga Israelinhon sa mamala nga dalan, nga natung-an sang pader nga tubig! Sang ginsundan sila sang mga Egiptohanon, ginpabalik sang Dios ang tubig amo nga nalumos si Paraon kag ang iya mga soldado.

Sang ulihi, sang nagakampo ang mga Israelinhon sa Bukid Sinai, nakigkatipan si Jehova sa ila. Gingamit sang Dios si Moises agod hatagan sing kasuguan ang Israel nga magatuytoy kag magaproteksion sa halos tanan nga bahin sang ila kabuhi. Kon magpabilin nga matutom ang Israel sa paggahom sang Dios, magaupod si Jehova sa ila kag pakamaayuhon ang iban paagi sa sini nga pungsod.

Apang ang kalabanan nga Israelinhon wala magtuo sa Dios. Gani, ginpadalangdalang sila ni Jehova sa desyerto sa sulod sang 40 ka tuig. Nian, gintangdo ni Moises ang matarong nga si Josue agod magbulos sa iya. Sa katapusan, handa na ang Israel sa pagsulod sa duta nga ginsaad sang Dios kay Abraham.

—Base sa Exodo; Levitico; Numeros; Deuteronomio; Salmo 136:10-15; Binuhatan 7:17-36.