1, 2. Ngaa importante nga pabakuron naton subong ang aton pagtuo? Iilustrar.

PAGTUO. Matahom ini nga tinaga, nga nagarepresentar sa tuman ka makagalanyat nga kinaiya. Pero kon makita naton ini ukon mabatian, dapat hunahunaon man naton ang isa pa ka tinaga: “Gilayon!” Kay man, kon wala kita sing pagtuo, dapat tigayunon naton ini sa gilayon. Kag kon may pagtuo na kita, dapat amligan naton ini gilayon kag palambuon. Ngaa?

² Handurawa nga nagalakbay ka sa isa ka malapad nga desyerto. Kinahanglan mo gid ang tubig. Kon may makita ka, dapat indi mo ini pagpainitan. Dayon, dapat indi ka maubusan sini asta makalab-ot ka sa imo kaladtuan. Subong, nagakabuhi kita sa isa ka espirituwal nga desyerto, isa ka kalibutan diin ang matuod nga pagtuo—kaangay sina nga tubig—diutay lang kag madali maubos kon indi pag-amligan. Kinahanglan gid naton ini; pareho nga indi kita mabuhi kon wala sing tubig, indi man kita mabuhi sa espirituwal kon wala sing pagtuo.—Roma 1:17.

3. Ano ang gin-aman ni Jehova para buligan kita nga mapabakod ang aton pagtuo, kag ano ang duha ka butang nga dapat naton dumdumon?

³ Nahibaluan ni Jehova nga kinahanglan gid naton gilayon ang pagtuo, kag nahibaluan man niya kon daw ano kabudlay subong nga pabakuron ini kag huptan. Amo kon ngaa ginhatagan niya kita sing mga halimbawa para aton ilugon. Gingiyahan ni Jehova si apostol Pablo sa pagsulat: “Mangin mga manug-ilog sang mga nagapanubli sang mga saad paagi sa pagtuo kag pagpailob.” (Heb. 6:12) Bangod sini, ginapalig-on kita sang organisasyon ni Jehova nga manikasog gid sa pag-ilog sa halimbawa sang mga matutom, pareho sa mga ginbinagbinag na naton sa sini nga publikasyon. Pero ano ang dapat naton himuon subong? Dumdumon naton ang duha ka butang: (1) Dapat padayon naton nga pabakuron ang aton pagtuo; (2) dapat padayon naton nga huptan nga maathag sa aton hunahuna ang aton paglaum.

4. Paano nangin kaaway sang pagtuo si Satanas, pero ngaa indi kita dapat maluyahan sing buot?

⁴ Padayon nga pabakura ang imo pagtuo. Ang pagtuo may daku nga kaaway—si Satanas. Ang manuggahom sang kalibutan naghimo sining sistema sang mga butang nga isa ka duog nga mabudlay huptan ang aton pagtuo. Mas gamhanan sia sangsa aton. Dapat bala kita maluyahan sing buot sa pagpalambo kag pagpabakod sang aton pagtuo? Indi gid! Si Jehova isa ka daku nga Abyan sang tanan nga nagapangita sang matuod nga pagtuo. Ginapasalig Niya kita nga kon dampig kita sa iya, mapakigbatuan naton ang Yawa kag mahimo malagyo pa ini sa aton! (Sant. 4:7) Ginasumpong naton sia paagi sa pagpabakod kag pagpalambo sang aton pagtuo kada adlaw. Paano?

5. Paano natigayon sang matutom nga mga lalaki kag babayi sa Biblia ang ila pagtuo? Ipaathag.

 ⁵ Subong sang nahibaluan na naton, ang matutom nga mga lalaki kag babayi sa Biblia wala natawo nga may pagtuo na nga daan. Ginpamatud-an sang ila pagkabuhi nga ang pagtuo isa ka kinaiya nga ginapatubas sang balaan nga espiritu ni Jehova. (Gal. 5:22, 23) Nangamuyo sila sang bulig, kag padayon nga ginpalig-on ni Jehova ang ila pagtuo. Kabay nga amo man sini ang aton himuon, nga wala nagakalipat nga si Jehova bugana nga nagahatag sang iya espiritu sa mga nagapangayo sini kag sa mga nagapanghikot suno sa ila mga pangamuyo. (Luc. 11:13) May mas labaw pa bala kita nga mahimo sangsa sini?

6. Paano kita makabenepisyo sing maayo sa aton pagtuon sa mga sugilanon sa Biblia?

⁶ Sa sini nga libro, ginbinagbinag naton ang pila lang ka halimbawa sang may tumalagsahon nga pagtuo. Kag may madamo pa! (Basaha ang Hebreo 11:32.) Madamo gid kita sang matun-an sa kada isa sa ila. Kon pahapyaw lang ang aton pagbasa sang mga sugilanon sa Biblia, indi gid maglig-on ang aton pagtuo. Agod makabenepisyo kita sing bug-os sa aton pagbasa, dapat maghinguyang kita sing tion sa paghibalo sang mga konteksto kag sang dugang nga detalye sa mga sugilanon sa Biblia. Kon dumdumon naton pirme nga ining indi himpit nga mga lalaki kag babayi may “balatyagon kaangay sang aton,” mangin matuod sa aton ang ila mga halimbawa. (Sant. 5:17) Mahimo naton handurawon kon ano ang ila ginbatyag sang nag-atubang sila sang mga kabudlayan kag problema nga pareho man sa ginaatubang naton.

7-9. (a) Ano ayhan ang mangin reaksion sang matutom nga mga lalaki kag babayi sang panahon sang Biblia kon magsimba sila kay Jehova pareho sa ginahimo naton subong? (b) Ngaa dapat naton pabakuron ang aton pagtuo paagi sa aton mga ginahimo?

⁷ Mapalig-on man naton ang aton pagtuo paagi sa aton mga ginahimo. Kay man, “ang pagtuo nga wala sing mga buhat patay.” (Sant. 2:26) Sigurado nga malipay gid ining matutom nga mga lalaki kag babayi nga ginbinagbinag naton kon hatagan sila sang hilikuton pareho sa ginapahimo sa aton ni Jehova subong!

⁸ Halimbawa, ano abi kon ginsilingan si Abraham nga masimba niya si Jehova indi sa altar nga bato nga ginpatindog sa kamingawan kundi sa organisado nga grupo sang masigkasumilimba sa matahom nga mga Kingdom Hall kag sa dalagku nga mga kombension, diin ginabinagbinag kag ginapaathag sing detalyado ang mga saad nga iya nakita “gikan sa malayo”? (Basaha ang Hebreo 11:13.) Kag ano abi kon ginsilingan si Elias nga ang iya hilikuton indi lamang ang pagpatay sa malaut nga mga manalagna ni Baal samtang nagaalagad kay Jehova sa idalom sang paggahom sang malaut kag apostata nga hari, kundi matawhay nga makaduaw sia sa mga tawo para sugiran sila sang mensahe nga makapaumpaw kag nagahatag sing paglaum? Pat-od gid nga batunon dayon sang matutom nga mga lalaki kag babayi sa Biblia ang ila asaynment nga simbahon si Jehova pareho sa ginahimo naton subong.

⁹ Gani padayon naton nga pabakuron ang  aton pagtuo paagi sa aton mga ginahimo. Samtang ginabuhat naton ini, mailog naton ang halimbawa sang mga matutom nga narekord sa Pulong sang Dios. Subong sang ginsambit sa Introduksion, mangin suod kita sa ila bilang abyan. Pero, ining pag-abyanay mangin matuod sa indi madugay.

10. Ano nga kalipay ang aton mabatyagan sa Paraiso?

¹⁰ Padayon nga hupti sing maathag sa imo hunahuna ang imo paglaum. Ang matutom nga mga lalaki kag babayi pirme nagakuha sing kusog sa ginhatag sang Dios sa ila nga paglaum. Ikaw man bala? Halimbawa, handurawa ang imo kalipay nga makita ining matutom nga mga alagad sang Dios kon mabuhi sila sa “pagkabanhaw sang mga matarong.” (Basaha ang Binuhatan 24:15.) Ano ang gusto mo ipamangkot sa ila?

11, 12. Sa bag-o nga kalibutan, ano ang gusto mo ipamangkot kay (a) Abel? (b) Noe? (c) Abraham? (d) Rut? (e) Abigail? (f) Ester?

¹¹ Kon makita mo si Abel, pamangkuton mo bala sia parte sa iya mga ginikanan? Ukon mahimo mamangkot ka: “Nakighambal ka bala sa mga kerubin nga nagabantay sa Eden? Nagsabat man bala sila?” Mahimo mamangkot ka man kay Noe: “Nahadlok ka bala sa mga Nefilim? Paano ninyo naatipan ang tanan nga sapat sa sulod sang arka?” Kon makita mo si Abraham, mahimo mamangkot ka: “Nasugilanon mo bala si Sem? Sin-o ang nagtudlo sa imo parte kay Jehova? Mabudlay bala magbiya sa Ur?”

¹² Binagbinaga man kon ano ang ipamangkot mo sa matutom nga mga babayi nga banhawon. “Rut, ano ang nagpahulag sa imo nga simbahon si Jehova?” “Abigail, nahadlok ka man bala nga isugid kay Nabal kon paano mo ginbuligan si David?” “Ester, ano ang natabo sa imo kag kay Mardoqueo sang natapos na ang sugilanon sa Biblia parte sa inyo?”

13. (a) Ano ang mahimo nga ipamangkot sa imo sang mga banhawon? (b) Ano ang ginabatyag mo sa posibilidad nga makita ang matutom nga mga lalaki kag babayi sang una?

¹³ Siempre, mahimo madamo man sing ipamangkot sa imo ining matutom nga mga lalaki kag babayi. Makalilipay gid nga isugid sa ila ang parte sa katapusan nga mga adlaw kag kon paano ginpakamaayo ni Jehova ang iya katawhan sa sining mabudlay nga mga tion! Pat-od nga malipay gid sila kon mahibaluan nila kon paano gintuman ni Jehova ang tanan niya nga mga saad. Sa bag-ong kalibutan, indi na kinahanglan nga handurawon pa naton ang matutom nga mga alagad sang Dios nga ginsambit sa Biblia. Mangin kaupod naton sila sa Paraiso! Gani himua ang bug-os mo nga masarangan subong para mangin matuod sila sa imo. Padayon nga iluga ang ila pagtuo. Kabay nga malipay ka sa pag-alagad kay Jehova upod sa ila bilang imo suod nga mga abyan asta san-o!