NAKAWATAN ka na bala?— Ano ang ginbatyag mo?— Kon sin-o man ang nangawat sa imo, kawatan sia, kag ang kawatan ginakaugtan sang tanan. Paano sa banta mo ang isa ka tawo nangin kawatan? Natawo bala sia nga kawatan?—

Bag-o lang naton matun-an nga ang mga tawo nabun-ag nga makasasala. Gani kita tanan indi himpit. Apang wala sing tawo nga nabun-ag nga isa ka kawatan. Ang isa ka kawatan mahimo nga maghalin sa isa ka maayo nga pamilya. Ang iya mga ginikanan kag mga utod mahimo nga bunayag. Apang ang paghandum sang isa ka tawo sa mga butang subong sang kuwarta kag sang kon ano ang mabakal sang kuwarta mahimo nga magtiklod sa iya nga mangin kawatan.

Sin-o sa banta mo ang una nga kawatan?— Binagbinagon naton ini. Kilala sang Daku nga Manunudlo ini nga persona sang didto sia sa langit. Ini nga kawatan isa ka anghel anay. Apang sanglit gintuga sang Dios ang tanan nga anghel nga himpit, paano nangin kawatan ini nga anghel?— Bueno, subong sang natun-an naton sa Kapitulo 8 sini nga libro, ginhandum niya ang isa ka butang nga indi iya. Madumduman mo bala kon ano ini?—

Sa tapos matuga sang Dios ang una nga lalaki kag babayi, ginhandum sini nga anghel ang ila pagsimba. Wala sia sing kinamatarong sa ila pagsimba. Ang Dios lamang ang ila dapat simbahon. Apang ginkawat niya ini! Paagi sa paghaylo kay Adan kag kay Eva nga simbahon sia, ini nga anghel nangin isa ka kawatan. Sia nangin si Satanas nga Yawa.

Ano ang nagahimo sa isa ka tawo nga mangin kawatan?— Amo ang paghandum sa butang nga indi iya. Ini nga handum mahimo mangin tuman kabaskog amo nga mahimo ini magtiklod bisan sa maayo nga mga  tawo sa paghimo sing malain nga mga butang. Kon kaisa, ang mga tawo nga nangin kawatan wala na nagabag-o. Ang isa sini amo ang isa ka apostol anay ni Jesus. Ang iya ngalan amo si Judas Iscariote.

Nahibaluan ni Judas nga malain ang magpangawat bangod gintudluan sia sing Kasuguan sang Dios sang gamay pa sia. Nahibaluan niya nga sang isa ka bes naghambal pa gani ang Dios gikan sa langit kag nagsiling sa iya katawhan: “Dili ka magpangawat.” (Exodo 20:15) Sang magdaku si Judas, nakilala niya ang Daku nga Manunudlo kag nangin isa sia sang iya mga disipulo. Sang ulihi, ginpili pa gani ni Jesus si Judas nga mangin isa sang iya 12 ka apostoles.

Si Jesus kag ang iya mga apostoles magkaupod nga nagapanglakaton. Dungan sila nga nagakaon. Kag ang tanan nga kuwarta sang grupo ginatago sa isa ka kahon. Gintugyan ni Jesus ini nga kahon kay Judas. Sa pagkamatuod, indi si Judas ang tag-iya sang kuwarta. Apang nahibaluan mo bala kon ano ang ginhimo ni Judas pagligad sang pila ka tion?—

Ginsugdan ni Judas nga kuhaon ang kuwarta gikan sa kahon—butang nga indi niya dapat himuon. Ginakuha niya ini kon wala sing nagatan-aw, kag nangita pa gani sia sing mga paagi agod makakuha sia sing kapin pa. Kuwarta lamang ang ginahunahuna niya sa tanan nga tion. Tan-awon naton kon sa ano nagdul-ong ining sayop nga handum mga pila ka adlaw lamang antes ginpatay ang Daku nga Manunudlo.

Si Maria, nga utod sang abyan ni Jesus nga si Lazaro, nagkuha sing maayo nga klase sang lana kag ginbubo ini sa tiil ni Jesus. Apang nagreklamo si Judas. Nahibaluan mo bala kon ngaa?— Nagsiling sia nga dapat ibaligya ang lana kag ang kuwarta ihatag sa mga imol. Apang ang matuod luyag niya nga madamo pa nga kuwarta ang isulod sa kahon agod kawaton niya ini.—Juan 12:1-6.

Ginsingganan ni Jesus si Judas nga indi paggamuhon si Maria, nga tuman ka mainayuhon. Wala maluyagi ni Judas ang ginsiling ni Jesus, gani nagkadto sia sa puno nga mga saserdote, nga mga kaaway ni Jesus. Luyag  nila dakpon si Jesus, apang luyag nila himuon ini sa gab-i agod wala sing mga tawo nga makakita sa ila.

Ginsingganan ni Judas ang mga saserdote: ‘Sugiran ko kamo kon paano ninyo madakop si Jesus, kon hatagan ninyo ako sing kuwarta. Pila ang ihatag ninyo sa akon?’

‘Hatagan namon ikaw sing katluan ka bilog nga pilak,’ sabat sang mga saserdote.—Mateo 26:14-16.

Ginbaton ni Judas ang kuwarta. Daw ginbaligya niya ang Daku nga Manunudlo sa sini nga mga tawo! Makapati ka bala nga mahimo sang isa ka tawo ining malaut gid nga butang?— Ti, amo sini ang matabo kon ang isa ka tawo mangin kawatan kag mangawat sia sing kuwarta. Mas daku ang gugma niya sa kuwarta sangsa iban nga mga tawo ukon sangsa Dios pa gani.

Mahimo magasiling ka, ‘Wala gid sing makalabaw sa akon gugma kay Jehova nga Dios.’ Maayo ini. Sang ginpili ni Jesus si Judas subong isa ka apostol, mahimo nga amo sini ang ginsiling ni Judas. Mahimo nga amo man sini ang ginsiling sang iban pa nga nangin kawatan. Hambalan naton ang pila sa ila.

Ang isa amo si Acan nga isa ka alagad sang Dios, nga nabuhi sing madugay na antes matawo ang Daku nga Manunudlo. Nakakita si Acan sing isa ka  matahom nga kunop, isa ka barita sang bulawan, kag pila ka bilog nga pilak. Indi ini iya. Ang Biblia nagasiling nga kay Jehova ini bangod ginkuha ini gikan sa mga kaaway sang katawhan sang Dios. Apang naluyagan gid ini ni Acan amo nga ginkawat niya ini.—Josue 6:19; 7:11, 20-22.

Yari ang isa pa ka halimbawa. Sang madugay na nga tion, ginpili ni Jehova si David nga maghari sa katawhan sang Israel. Isa ka adlaw, nakita ni David si Bat-seba nga isa ka matahom nga babayi. Ginsali niya tan-aw si Bat-seba kag ginpamensar nga pangasaw-on sia. Apang, asawa sia ni Urias. Ano kuntani ang ginhimo ni David?—

Dapat kuntani gin-untatan ni David ang paghunahuna kay Bat-seba. Apang wala niya ginhimo ini. Gani ginpakuha ni David si Bat-seba. Kag ginpapatay niya si Urias. Ngaa ginhimo ni David ining malaut nga mga  butang?— Bangod padayon nga ginhandum niya ang isa ka babayi nga iya sang iban.—2 Samuel 11:2-27.

Bangod naghinulsol si David, gintugutan sia ni Jehova nga mabuhi pa. Apang madamo nga problema ang nag-abot kay David. Ginhandum ni Absalom nga anak ni David nga agawon ang pagkahari sa iya. Gani ginaagbayan kag ginahalukan ni Absalom ang mga tawo nga nagakadto kay David. Ang Biblia nagasiling: “Padayon nga ginkawat ni Absalom ang tagipusuon sang mga tawo sang Israel.” Nakumbinsi niya ang mga tawo nga sia ang himuon nga hari sa baylo ni David.—2 Samuel 15:1-12.

May ginahandum ka bala nga isa ka butang, kaangay ni Acan, ni David, kag ni Absalom?— Kon ini nga butang ginapanag-iyahan sang iban, isa ka pagpangawat kon kuhaon mo ini nga wala sing pahanugot. Nadumduman mo bala kon ano ang ginhandum sang una nga kawatan nga si Satanas?— Ginhandum niya nga simbahon sia sang katawhan sa baylo nga ang Dios. Gani nangawat si Satanas sang mahaylo niya si Adan kag si Eva nga tumanon sia.

Kon ang isa ka tawo nagapanag-iya sing isa ka butang, may kinamatarong sia sa pagsiling kon sin-o ang mahimo maggamit sini. Halimbawa, mahimo ka makighampang upod sa iban nga mga bata sa ila balay. Husto bala nga kuhaon mo ang isa ka butang gikan sa ila balay kag dalhon ini sa inyo balay?— Indi, luwas lamang kon tugutan ka sang ila amay ukon iloy. Kon dalhon mo sa inyo balay ang isa ka butang nga indi ka maglisensia, pagpangawat ini.

Ngaa mahimo ka masulay nga mangawat?— Bangod ginahandum mo ang isa ka butang nga indi imo. Bisan pa wala sing makakita sa imo nga ginkuha mo ini, sin-o ang nakakita?— Si Jehova nga Dios. Kag dapat naton dumdumon nga ginadumtan sang Dios ang pagpangawat. Gani ang gugma sa Dios kag sa imo isigkatawo magabulig sa imo nga indi gid magpangawat.