ISA ka bes, namangkot ang Daku nga Manunudlo sing isa ka makapakibot nga pamangkot: “Sin-o ang akon iloy, kag sin-o ang akon mga utod?” (Mateo 12:48) Masabat mo bala ini nga pamangkot?— Ayhan nahibaluan mo nga ang iloy ni Jesus amo si Maria. Apang nahibaluan mo bala kon sin-o ang iya mga utod nga lalaki?— May mga utod man bala sia nga babayi?—

Ginasiling sang Biblia nga ang mga utod nga lalaki ni Jesus amo sanday “Santiago kag Jose kag Simon kag Judas.” Kag may mga utod nga babayi si Jesus nga nagakabuhi sang nagabantala sia. Bangod si Jesus amo ang panganay, mas bata sila tanan sangsa iya.—Mateo 13:55, 56; Lucas 1:34, 35.

Mga disipulo man bala ni Jesus ang iya mga utod?— Ginasiling sang Biblia nga sang primero ‘wala sila nagatuo sa iya.’ (Juan 7:5) Apang, sang ulihi, si Santiago kag si Judas nangin mga disipulo niya, kag nagsulat pa gani sila sing mga tulun-an sa Biblia. Nahibaluan mo bala kon ano nga mga tulun-an ang ginsulat nila?— Huo, amo ang Santiago kag Judas.

Bisan pa wala ginahingadlan sa Biblia ang mga utod nga babayi ni Jesus, nahibaluan naton nga sa di-magkubos may duha sia ka utod nga babayi. Apang, mahimo nga indi lamang duha ang iya mga utod nga babayi. Nangin mga sumulunod bala niya ang iya mga utod nga babayi?— Wala ini ginasugid sang Biblia, gani wala kita makahibalo. Apang nahibaluan mo bala kon ngaa ginpamangkot ni Jesus ang pamangkot nga, “Sin-o ang akon iloy, kag sin-o ang akon mga utod?”— Hibaluon naton.

Ginatudluan ni Jesus ang iya mga disipulo sang may nagsiling sa iya: “Ang imo iloy kag ang imo mga utod nagatindog sa guwa, nga luyag makighambal  sa imo.” Gani gingamit ni Jesus ang kahigayunan nga magtudlo sing isa ka importante nga leksion paagi sa pagpamangkot sadtong makapakibot nga pamangkot: “Sin-o ang akon iloy, kag sin-o ang akon mga utod?” Gin-untay niya ang iya kamot sa iya mga disipulo kag ginsabat ini, nga nagatuaw: “Tan-awa! Ang akon iloy kag ang akon mga utod!”

Nian ginpaathag ni Jesus kon ano ang iya buot silingon, nga nagasiling: “Ang bisan sin-o nga maghimo sang kabubut-on sang akon Amay nga yara sa langit, sia amo ang akon utod nga lalaki, kag utod nga babayi, kag iloy.” (Mateo 12:47-50) Ginapakita sini kon daw ano ka suod si Jesus sa iya mga disipulo. Ginatudluan niya kita nga ginakabig niya ang iya mga disipulo subong iya matuod nga mga utod kag mga iloy.

Sadto nga tion ang mga utod mismo ni Jesus—sanday Santiago, Jose, Simon, kag Judas—wala magtuo nga si Jesus Anak sang Dios. Mahimo gid nga wala sila magpati sa ginsiling sang anghel nga si Gabriel sa ila iloy. (Lucas 1:30-33) Gani  mahimo gid nga indi sila mabuot kay Jesus. Ang bisan sin-o nga nagahimo sini indi matuod nga utod. May kilala ka bala nga indi mabuot sa iya utod?—

Ang Biblia nagasugid tuhoy kay Esau kag kay Jacob kag kon paano naakig gid si Esau amo nga nagsiling sia: “Patyon ko si Jacob nga akon utod.” Hinadlukan gid si Rebeca, nga ila iloy, gani ginpalakat niya si Jacob agod indi sia mapatay ni Esau. (Genesis 27:41-46) Apang, pagligad sang madamo nga mga tuig nagbag-o si Esau, kag ginhakos niya kag ginhalukan si Jacob.—Genesis 33:4.

Sang ulihi, nakatigayon si Jacob sing 12 ka anak nga lalaki. Apang wala ginhigugma sang mas magulang nga mga anak ni Jacob ang ila manghod nga si Jose. Nahisa sila sa iya bangod sia ang paborito nga anak sang ila amay. Gani ginbaligya nila sia sa mga manugbaligya sing ulipon nga manugpakadto sa Egipto. Nian ginsugiran nila ang ila amay nga ginpatay si Jose sang isa ka mabangis nga sapat. (Genesis 37:23-36) Indi bala makasiligni ini?—

Sang ulihi naghinulsol ang mga utod ni Jose sa ila ginhimo. Gani ginpatawad  sila ni Jose. Nahangpan mo bala kon paano si Jose kaangay ni Jesus?— Ginbiyaan si Jesus sang iya mga apostoles sang gindakop sia, kag ginpanghiwala pa gani sia ni Pedro. Apang, kaangay ni Jose, ginpatawad sila tanan ni Jesus.

Binagbinaga man ang duha ka mag-utod nga si Cain kag si Abel. Makatuon man kita sing leksion gikan sa ila. Nakita sang Dios sa tagipusuon ni Cain nga wala gid niya ginahigugma ang iya utod. Gani ginsingganan sang Dios si Cain nga dapat niya bag-uhon ang iya panimuot. Kon ginahigugma gid ni Cain ang Dios, dapat kuntani nga namati sia. Apang wala niya ginahigugma ang Dios. Isa ka adlaw nagsiling si Cain kay Abel: “Makadto kita sa latagon.” Nag-upod si Abel kay Cain. Samtang sila lamang ang didto sa latagon, ginlampusan kag ginpatay ni Cain ang iya utod.—Genesis 4:2-8.

Ginasugiran kita sang Biblia nga dapat naton matun-an ang isa ka pinasahi nga leksion gikan sa sini. Nahibaluan mo bala kon ano ini?— ‘Amo ini ang mensahe nga nabatian ninyo kutob sa ginsuguran: Dapat kita maghigugmaanay; indi kaangay ni Cain, nga naghalin sa isa nga malauton.’ Gani dapat maghigugmaanay ang mga mag-ulutod. Indi nila dapat pag-ilugon si Cain.—1 Juan 3:11, 12.

Ngaa indi dapat ilugon si Cain?— Bangod nagasiling ang Biblia nga ‘naghalin sia sa isa nga malauton,’ si Satanas nga Yawa. Gin-ilog ni Cain ang ginhimo sang Yawa, gani sarang masiling nga amay niya ang Yawa.

Nahangpan mo bala kon ngaa importante nga higugmaon mo ang imo mga utod?— Kon wala mo sila ginahigugma, kay sin-o mga anak ang ginailog mo?— Ang mga anak sang Yawa. Indi mo luyag mangin subong sina, indi bala?— Gani paano mo mapamatud-an nga luyag mo mangin anak sang Dios?— Paagi sa paghigugma sa imo mga utod.

Apang ano ang gugma?— Ang gugma isa ka tudok nga balatyagon nga nagapahulag sa aton sa paghimo sing maayong mga butang para sa iban nga mga tawo. Ginahigugma naton ang iban kon mainayuhon kita sa ila kag kon nagahimo kita sing maayong mga butang para sa ila. Kag sin-o  ang aton mga utod nga dapat naton higugmaon?— Dumduma, gintudlo ni Jesus nga sila amo ang mga katapo sang daku nga Cristianong pamilya.

Daw ano ka importante nga higugmaon naton ining Cristianong mga kauturan?— Ang Biblia nagasiling: “Sia nga wala nagahigugma sang iya utod, nga makita niya, indi makahigugma sa Dios, nga indi niya makita.” (1 Juan 4:20) Gani indi mahimo nga pila lamang sa sulod sang Cristianong pamilya ang higugmaon naton. Dapat naton higugmaon sila tanan. Si Jesus nagsiling: “Sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Ginahigugma mo bala ang tanan nga mga utod?— Dumduma, kon wala mo ginahigugma ang mga utod, indi mahimo nga ginahigugma mo ang Dios.

Paano naton mapakita nga ginahigugma gid naton ang aton mga utod?— Bueno, kon ginahigugma naton sila, indi naton sila paglikawan bangod indi naton luyag makighambal sa ila. Mangin mainabyanon kita sa ila tanan. Magahimo kita pirme sing maayo sa ila kag handa nga magpaambit sa ila. Kon may problema sila, buligan naton sila bangod isa kita ka daku nga pamilya.

Kon ginahigugma gid naton ang aton tanan nga kauturan, ano ang ginapamatud-an sini?— Ginapamatud-an sini nga mga disipulo kita ni Jesus, ang Daku nga Manunudlo. Kag indi bala nga amo sini ang luyag naton?—