ANG mga abyan amo ang mga tawo nga luyag naton masugilanon kag makaupod. Apang importante nga maayo ang aton mga abyan. Sin-o sa banta mo ang pinakamaayo nga mangin abyan naton?— Huo, amo si Jehova nga Dios.

Mahimo gid bala kita mangin abyan sang Dios?— Bueno, ang Biblia nagasiling nga si Abraham, nga nagkabuhi sang una, nangin “abyan ni Jehova.” (Santiago 2:23) Nahibaluan mo bala kon ngaa nangin abyan sia sang Dios?— Ang Biblia nagasabat nga gintuman ni Abraham ang Dios. Nagtuman sia bisan pa mabudlay ang ginpahimo sa iya. Gani agod mangin abyan kita ni Jehova, dapat naton himuon ang nagapahamuot sa iya, subong sang ginhimo ni Abraham kag subong sang pirme ginhimo sang Daku nga Manunudlo.—Genesis 22:1-14; Juan 8:28, 29; Hebreo 11:8, 17-19.

 Si Jesus nagsiling sa iya mga apostoles: “Kamo mga abyan ko kon ginahimo ninyo ang ginsugo ko sa inyo.” (Juan 15:14) Sanglit ang tanan nga ginsugid ni Jesus sa katawhan naghalin kay Jehova, ginapahangop ni Jesus nga ang iya mga abyan amo ang mga tawo nga nagahimo sang ginasugo sa ila sang Dios. Huo, ang tanan niya nga mga abyan nagahigugma sa Dios.

Ang pila sang pinakasuod nga mga abyan sang Daku nga Manunudlo amo ang iya mga apostoles, nga ang ila laragway makita mo sa pahina 75 sini nga libro. Naglakbay sila upod sa iya kag ginbuligan nila sia sa pagbantala. Pirme sila kaupod ni Jesus. Dungan sila nga nagakaon. Nagahambalanay sila tuhoy sa Dios. Kag magkaupod sila nga nagapangabudlay. Apang madamo pa sing mga abyan si Jesus. Nagadayon sia sa ila, kag masadya sila kon magkaupod sila.

Ang isa ka pamilya nga ginadayunan ni Jesus nagapuyo sa gamay nga banwa sang Betania, sa guwa lamang sang daku nga siudad sang Jerusalem. Nadumduman mo bala sila?— Amo sila sanday Maria kag Marta kag ang ila utod nga si Lazaro. Gintawag ni Jesus si Lazaro nga abyan  niya. (Juan 11:1, 5, 11) Ang isa ka rason kon ngaa ginhigugma ni Jesus ini nga pamilya kag nasadyahan sia nga makaupod sila amo nga ginhigugma nila si Jehova kag nag-alagad sa Iya.

Wala ini nagakahulugan nga indi maayo si Jesus sa mga tawo nga wala nagaalagad sa Dios. Mainayuhon man sia sa ila. Nagduaw pa gani sia sa ila balay kag nagkaon upod sa ila. Amo sini kon ngaa ang iban nagsiling nga si Jesus “abyan sang mga manugsukot sing buhis kag sang mga makasasala.” (Mateo 11:19) Ang matuod, wala magkadto si Jesus sa balay sini nga mga tawo bangod naluyagan niya ang ila pagkabuhi. Ginduaw niya sila agod nga mahambal sila tuhoy kay Jehova. Nagtinguha sia nga buligan sila nga bag-uhon ang ila malain nga pagkabuhi kag mag-alagad sa Dios.

Natabo ini isa ka adlaw sa siudad sang Jerico. Nag-agi diri si Jesus sang nagapakadto sia sa Jerusalem. May isa ka kadam-an sang mga tawo, kag sa tunga sang kadam-an amo ang tawo nga si Zaqueo. Luyag niya makita si Jesus. Apang manubo si Zaqueo, kag indi niya makita si Jesus bangod sang kadam-an. Gani nagdalagan sia kag nagsaka sa isa ka kahoy agod makita niya sing maayo si Jesus kon maglabay sia.

Pag-abot ni Jesus sa sini nga kahoy, nagtangla sia kag nagsiling: ‘Dalidali ka kag magpanaug, kay makadto ako sa imo balay karon nga adlaw.’ Apang  si Zaqueo isa ka manggaranon nga tawo nga nakahimo sing malain nga mga butang. Ngaa luyag ni Jesus magkadto sa balay sini nga sahi sang tawo?—

Indi bangod naluyagan ni Jesus ang pagkabuhi sini nga tawo. Nagkadto sia didto agod hambalon si Zaqueo tuhoy sa Dios. Nakita niya kon paano nagtinguha gid ini nga tawo nga makita sia. Gani nahibaluan niya nga mahimo mamati si Zaqueo. Isa ini ka nagakaigo nga tion agod hambalon sia tuhoy sa pagkabuhi nga nahamut-an sang Dios.

Gani, ano ang nangin resulta?— Naluyagan ni Zaqueo ang gintudlo ni Jesus. Naghinulsol gid sia nga gindayaan niya ang mga tawo, kag nangako sia nga iuli ang kuwarta nga indi niya dapat ginkuha. Nian nangin sumulunod sia ni Jesus. Amo lamang sadto kag nangin mag-abyan sila ni Jesus.—Lucas 19:1-10.

Kon sundon naton ang halimbawa sang Daku nga Manunudlo, duawon bala naton ang mga tawo nga indi naton mga abyan?— Huo. Apang indi kita magkadto sa ila balay bangod naluyagan naton ang ila pagkabuhi. Kag indi kita maghimo sing malain nga mga butang upod sa ila. Duawon naton sila agod hambalon sila tuhoy sa Dios.

 Apang ang luyag gid naton makaupod amo ang aton suod nga mga abyan. Agod mangin maayo sila nga mga abyan, dapat naluyagan man sila sang Dios. Mahimo nga indi gani kilala sang iban kon sin-o si Jehova. Apang kon luyag nila makilala sia, mabuligan naton sila. Kag kon mag-abot ang tion nga higugmaon man nila si Jehova, nian mahimo nga mangin suod nga abyan na naton sila.

May isa pa ka paagi agod mahibaluan kon bala ang isa ka tawo mangin maayo nga abyan. Panilagi ang mga butang nga ginahimo niya. Ginatinontohan bala niya ang iban nga tawo kag pagkatapos kadlawan sila? Indi ini husto, indi bala?— Pirme lang bala sia nagakaulamid sa gamo? Indi naton luyag nga maulamid man kita sa gamo bangod sa iya, indi bala?— Ukon hungod bala nga nagatinonto sia kag pagkatapos nagapabugal nga maayo sia bangod wala sia madakpi? Bisan pa indi sia madakpan, nakita sang Dios ang ginhimo niya, indi bala?— Sa banta mo bala mangin maayo nga mga abyan ini nga sahi sang mga tawo?—

Kuhaa palihug ang imo Biblia. Tan-awon naton kon ano ang ginasiling sini tuhoy sa epekto sang aton mga kaupod sa aton kabuhi. Ang teksto amo ang 1 Corinto kapitulo 15, bersikulo 33. Nakita mo na bala ang teksto?— Ini nagasiling: “Indi kamo magtalang. Ang malain nga kaupdanan nagadunot sang mapuslanon nga mga batasan.” Nagakahulugan ini nga kon mag-upod kita sa malain nga mga tawo, mahimo nga magalain man kita. Kag matuod man nga ang maayong mga kaupod nagabulig sa aton sa pagpalambo sing maayong mga batasan.

Indi gid naton pagkalimtan nga ang labing importante nga Persona sa aton kabuhi amo si Jehova. Indi naton luyag nga gub-on ang aton pagpakig-abyan sa iya, indi bala?— Gani dapat kita maghalong nga magpakig-abyan lamang sa mga nagahigugma sa Dios.