ANG iban nga mga tawo nagasiling nga nagapati lamang sila sa kon ano ang ila makita. Apang binuang ina. Madamo sing butang nga wala gid naton makita. Makasambit ka bala sing isa?—

Kamusta ang hangin nga ginahaklo naton? Mabatyagan bala naton ini?— Huypi ang imo kamot. May nabatyagan ka bala?— May nabatyagan ka, apang indi mo makita ang hangin, indi bala?—

Nahambalan na naton ang tuhoy sa espiritu nga mga persona, nga indi naton makita. Natun-an naton nga ang iban sa ila maayo apang ang iban naman malain. Hingadli ang pila ka maayong espiritu nga persona nga indi naton makita.— Husto, si Jehova nga Dios, si Jesus, kag ang maayong mga anghel. May yara man bala malain nga mga anghel?— Ang Biblia nagasiling nga may yara. Sugiri ako kon ano ang imo natun-an tuhoy sa ila.—

Ang isa ka butang nga nahibaluan naton amo nga ang maayo kag malain nga mga anghel mas makusog sangsa aton. Madamo sing nahibaluan ang Daku nga Manunudlo tuhoy sa mga anghel. Amo sini bangod isa sia anay ka anghel antes sia matawo sa duta. Nagpuyo sia sa langit upod sa iban nga mga anghel. Kilala niya ang minilyon sa ila. May ngalan bala ining tanan nga anghel?—

Bueno, natun-an naton nga ginhatagan sang Dios sing ngalan ang mga bituon. Gani mapat-od naton nga may ngalan man ang tanan nga anghel. Kag nahibaluan naton nga makahambalanay sila bangod ginasugiran kita sang Biblia tuhoy sa ‘hambal sang mga anghel.’ (1 Corinto 13:1) Ano sa banta mo ang ginahambalan sang mga anghel? Ginahambalan bala nila kita nga tagaduta?—

 Nahibaluan naton nga ginatinguhaan sang mga anghel ni Satanas, nga mga demonyo, nga hayluhon kita sa paglalis kay Jehova. Gani pat-od nga ginahambalan nila kon paano nila himuon ini. Luyag nila nga mangin subong kita sa ila agod nga indi man kita maluyagan ni Jehova. Apang kamusta naman ang matutom nga mga anghel sang Dios? Sa banta mo ayhan ginahambalan man kita nila?— Huo. Luyag nila kita buligan. Istoryahan ko ikaw kon paano anay ginbuligan sang pila ka anghel sang Dios ang mga tawo nga nagahigugma kay Jehova kag nagaalagad sa iya.

Ang isa ka halimbawa amo si Daniel nga nagapuyo anay sa Babilonia. Madamo didto ang wala nagahigugma kay Jehova. Naghimo pa gani ang mga tawo sing sugo nga silutan ang bisan sin-o nga mangamuyo kay Jehova nga Dios. Apang wala mag-untat si Daniel sa pagpangamuyo kay Jehova. Nahibaluan mo bala kon ano ang ginhimo nila kay Daniel?—

Huo, ginpahaboy sang malain nga mga tawo si Daniel sa lungib sang mga leon. Nagaisahanon lang didto si Daniel upod sa gutom nga mga leon.  Nahibaluan mo bala kon ano ang masunod nga natabo?— ‘Ginpadala sang Dios ang iya anghel kag gintakop ang baba sang mga leon,’ siling ni Daniel. Wala gid sia maano! Ang mga anghel makahimo sing dalayawon nga mga butang para sa mga nagaalagad kay Jehova.—Daniel 6:18-22.

Si Pedro ginbilanggo man anay. Madumduman mo nga si Pedro abyan sang Daku nga Manunudlo, nga si Jesucristo. Wala maluyagi sang iban nga mga tawo sang magsiling si Pedro nga si Jesus Anak sang Dios. Gani ginpabilanggo nila si Pedro. Ginguardiahan si Pedro sang mga soldado agod nga indi sia makapalagyo. May makabulig bala sa iya?—

Nagakatulog si Pedro sa tunga sang duha ka guardia, kag nakadenahan ang iya mga kamot. Apang ang Biblia nagasiling: ‘Yari karon! Nag-abot  ang anghel ni Jehova, kag may kapawa nga nagsilak sa sulod sang bilangguan. Gintandog sang anghel si Pedro sa kilid kag ginpukaw sia nga nagasiling, “Bangon ka sing dalidali!” ’

Nian, nahukas ang mga kadena sa mga kamot ni Pedro! Kag ang anghel nagsiling: ‘Isuksok ang imo panapton kag sandalyas, kag magsunod ka sa akon.’ Indi sila mapunggan sang mga guardia bangod ginabuligan si Pedro sang anghel. Pag-abot nila sa salsalon nga gawang, isa ka makatilingala nga butang ang natabo didto. Nag-abre ang gawang! Ginhilway sang anghel si Pedro agod padayon sia nga makabantala.—Binuhatan 12:3-11.

Mabuligan man bala kita sang mga anghel sang Dios?— Huo. Nagakahulugan bala ini nga indi gid sila magtugot nga mahalitan kita?— Indi, indi ini pagpunggan sang mga anghel kon maghimo kita sing binuang nga mga butang. Apang bisan pa indi kita maghimo sing binuang nga mga butang, mahimo gihapon nga mahalitan kita. Wala gintulinan ang mga anghel nga punggan ini. Sa baylo, ginhatagan sila sang Dios sing pinasahi nga hilikuton.

Ang Biblia nagasugid tuhoy sa isa ka anghel nga nagasiling sa tanan nga tawo bisan diin nga simbahon ang Dios. (Bugna 14:6, 7) Paano ini ginasiling sa ila sang anghel? Nagasinggit bala sia gikan sa langit agod mabatian sia sang tanan?— Indi, sa baylo, ang mga sumulunod ni Jesus sa duta nagapakighambal sa iban tuhoy sa Dios, kag ginatuytuyan sila sang mga anghel sa ila hilikuton. Ginapat-od sang mga anghel nga ang bisan sin-o nga luyag makahibalo tuhoy sa Dios may kahigayunan nga makabati. Makapakigbahin kita sa sining pagbantala nga hilikuton, kag buligan kita sang mga anghel.

Apang ano kon gamuhon kita sang mga tawo nga wala nagahigugma sa Dios? Ano kon bilangguon nila kita? Hilwayon bala kita sang mga anghel?— Sarang nila mahimo ini. Apang indi amo sini pirme ang ginahimo nila.

Si Pablo nga sumulunod ni Jesus isa anay ka bilanggo. Nagasakay sia sa isa ka barko sa tion sang isa ka mabaskog nga bagyo. Apang wala sia gilayon ginhilway sang mga anghel. Amo sini bangod may iban pa nga mga  tawo nga dapat makabati tuhoy sa Dios. Ang anghel nagsiling: “Dili ka mahadlok, Pablo. Kinahanglan ka mag-atubang kay Cesar.” Huo, dalhon si Pablo kay Cesar nga manuggahom sang kalibutan agod nga makabantala si Pablo sa iya. Nahibaluan pirme sang mga anghel kon diin si Pablo, kag ginbuligan nila sia. Buligan man nila kita kon nagaalagad gid kita sa Dios.—Binuhatan 27:23-25.

May isa pa ka importante nga hilikuton ang mga anghel, kag himuon nila ini sa indi madugay. Malapit na gid ang tion sang Dios nga laglagon ang mga malauton. Ang tanan nga wala nagasimba sa matuod nga Dios pagalaglagon. Marealisar sang mga tawo nga nagasiling nga wala sila nagapati sa mga anghel bangod indi nila makita ang mga anghel nga sayop gid gali sila.—2 Tesalonica 1:6-8.

Ano ang mangin kahulugan sini sa aton?— Kon dampig kita sa mga anghel sang Dios, buligan nila kita. Apang dampig bala kita sa ila?— Amo gid kon nagaalagad kita kay Jehova. Kag kon nagaalagad kita kay Jehova, silingan naton ang iban nga mga tawo nga mag-alagad man sa iya.