SIN-O ang pinakamaayo nga alagad sang Dios nga nabuhi?⁠— Husto ka, amo si Jesucristo. Sa banta mo ayhan mailog naton sia?⁠— Bueno, ang Biblia nagasiling nga naghatag sia sing halimbawa agod sundon naton. Kag ginaagda niya kita nga mangin mga disipulo niya.

Nahibaluan mo bala kon ano ang kahulugan sang mangin disipulo ni Jesus?⁠— Nagakahulugan ini sing pila ka butang. Una, dapat kita magtuon sa iya. Apang indi lamang ini. Dapat man naton patihan ang iya ginasiling. Kon amo sini ang himuon naton, sundon naton ang ginasugo niya sa aton.

Madamo ang nagasiling nga nagapati sila kay Jesus. Sa banta mo ayhan mga disipulo niya sila tanan?⁠— Indi, ang kalabanan sa ila indi. Mahimo nga nagasimba sila. Apang madamo sa ila ang wala magtuon sang gintudlo ni Jesus. Sa pagkamatuod, ang mga disipulo ni Jesus amo lamang ang nagasunod sa iya halimbawa.

Hambalan naton ang pila ka disipulo ni Jesus sang nangin tawo sia sa duta. Ang isa sang una nga nangin disipulo ni Jesus amo si Felipe. Ginpangita ni Felipe ang iya abyan nga si Natanael (nga gintawag man Bartolome), nga makita mo nga nagapungko sa idalom sang isa ka kahoy. Sang magpalapit si Natanael kay Jesus, nagsiling si Jesus: ‘Tan-awa, yari ang isa ka tawo nga bunayag, isa ka matuod nga Israelinhon.’ Nakibot si Natanael kag namangkot: ‘Paano mo ako nakilala?’

 “Sa wala pa si Felipe magtawag sa imo, sang ikaw didto sa idalom sang kahoy nga higuera, nakita ko ikaw,” siling ni Jesus. Nakibot si Natanael nga nahibaluan gid ni Jesus kon diin sia, gani nagsiling si Natanael: “Ikaw ang Anak sang Dios, ikaw ang Hari sang Israel.”​—⁠Juan 1:⁠49.

Ang iban nangin mga disipulo ni Jesus nga una kay Felipe kag kay Natanael. Sila amo sanday Andres kag ang iya magulang nga si Pedro subong man si Juan kag ayhan ang utod ni Juan nga si Santiago. (Juan 1:⁠35-⁠51) Apang, pagligad sang pila ka tion, nagbalik sila sa pagpangisda. Nian isa ka adlaw sang nagalakat si Jesus sa higad sang Dagat sang Galilea, nakita niya sanday Pedro kag Andres nga nagaladlad sing pukot sa dagat. Gintawag sila ni Jesus: “Sunod kamo sa akon.”

Sang nagapadayon pa sia sa paglakat, nakita ni Jesus sanday Santiago kag Juan. Yara sila sa sakayan upod sa ila amay, nga nagapamuna sang ila  mga pukot. Gintawag man sila ni Jesus nga magsunod sa iya. Ano ang himuon mo kon gintawag ka ni Jesus? Maupod ka bala dayon sa iya?⁠— Kilala sini nga mga tawo kon sin-o si Jesus. Nahibaluan nila nga ginpadala sia sang Dios. Gani sa gilayon ginbiyaan nila ang ila pagpangisda kag nagsunod kay Jesus.​—⁠Mateo 4:​18-​22.

Sang mangin sumulunod ni Jesus ini nga mga tawo, nagkahulugan bala ini nga pirme na husto ang ila ginhimo?⁠— Wala. Mahimo madumduman mo nga nagbaisay pa gani sila kon sin-o ang labing daku sa ila. Apang namati sila kay Jesus, kag handa sila nga magbag-⁠o. Kon handa kita nga magbag-o, mahimo man kita mangin mga disipulo ni Jesus.

Gin-agda ni Jesus ang tanan nga sahi sang tawo nga mangin mga disipulo niya. Isa ka bes, nagpalapit kay Jesus ang isa ka manggaranon nga pamatan-on nga manuggahom kag namangkot kon paano sia makatigayon sing kabuhi nga walay katapusan. Sang magsiling ang manggaranon nga manuggahom nga ginatuman na niya ang mga sugo sang Dios halin pa sa pagkabata, gin-agda sia ni Jesus: “Kari ka mangin sumulunod ko.” Nahibaluan mo bala kon ano ang natabo?⁠—

Bueno, sang ginsingganan ang pamatan-on nga kon mangin disipulo sia ni Jesus kabigon niya ini nga mas importante sangsa iya manggad, nagkasubo gid sia. Wala sia mangin disipulo ni Jesus bangod ginhigugma niya ang iya kuwarta sing labaw pa sa Dios.​—⁠Lucas 18:18-⁠25.

Sa tapos si Jesus makabantala sing halos isa ka tuig kag tunga, ginpili ni Jesus ang 12 sang iya mga disipulo nga mangin mga apostoles niya. Ang mga apostoles amo ang mga tawo nga iya ginpadala para sa isa ka pinasahi nga hilikuton. Nahibaluan mo bala ang ila ngalan?⁠— Tan-awon naton kon mahibal-an naton ini. Tan-awa ang ila mga laragway diri, kag tan-awa kon mabasa mo ang ila ngalan. Pagkatapos, tilawi kon matandaan mo ang ila ngalan.

Sang ulihi, ang isa sa 12 ka apostoles nangin malain. Sia amo si Judas Iscariote. Gani, isa pa ka disipulo ang ginpili agod mangin apostol.  Kilala mo bala kon sin-o sia?⁠— Amo si Matias. Sang ulihi, sanday Pablo kag Bernabe nangin mga apostoles man, apang indi sila bahin sang 12.​—⁠Binuhatan 1:​23-​26; 14:14.

Subong sang natun-an naton sa Kapitulo 1 sini nga libro, nagpakita si Jesus sing interes sa mga bata. Ngaa ginhimo niya ini?⁠— Bangod nahibaluan niya nga sila man mahimo mangin mga disipulo niya. Sa katunayan, masami nga ang panghambal sang mga bata makaganyat pa gani sa mga adulto nga mamati kag magtuon sing dugang pa tuhoy sa Daku nga Manunudlo.

Madamo man nga babayi ang nangin mga disipulo ni Jesus. Ang iban sa ila naglakbay upod sa iya  sang nagbantala sia sa iban nga mga siudad. Ginhimo ini ni Maria Magdalena, ni Juana, kag ni Susana. Mahimo nga nagbulig man sila sa pagluto sang iya pagkaon kag sa paglaba sang iya mga panapton.​—⁠Lucas 8:​1-3.

Luyag mo bala mangin disipulo ni Jesus?⁠— Dumduma, ang pagsiling lamang nga disipulo niya kita wala nagahimo sa aton nga isa ka disipulo. Dapat kita maghulag nga subong sang isa sang iya mga disipulo bisan diin man kita, indi lamang kon nagakadto kita sa Cristianong mga miting. May mahunahuna ka bala nga pila ka duog diin importante nga maghulag kita subong sang isa ka disipulo ni Jesus?⁠—

Huo, dapat kita mangin subong sini sa puluy-an. Apang ang isa pa ka duog amo ang eskwelahan. Indi gid naton pagkalipatan nga agod mangin matuod nga disipulo ni Jesus, dapat kita maghulag kaangay niya sa bug-os nga adlaw, sa tagsa ka adlaw, bisan diin man kita.