LEKSION 46
Ngaa Dapat Ka Magdedikar kag Magpabawtismo?
Ginadedikar mo ang imo kaugalingon kay Jehova paagi sa pagpromisa sa iya sa pangamuyo nga sia lang ang imo simbahon kag unahon mo ang iya kabubut-on. (Salmo 40:8) Sa tapos sini, bawtismuhan ka. Sa paghimo sini, ginapakita mo sa iban nga nakadedikar ka na. Ang pagdedikar mo sang imo kaugalingon kay Jehova amo ang pinakaimportante nga desisyon nga mahimo mo. Ano ang makapahulag sa imo nga himuon ining importante nga desisyon?
1. Ano ang magapahulag sa isa nga magdedikar?
Ang aton pagpalangga kay Jehova amo ang nagapahulag sa aton nga magdedikar sa iya. (1 Juan 4:10, 19) Ang Biblia nagsugo sa aton: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:30) Mapakita naton nga palangga naton ang Dios indi lang paagi sa aton ginahambal, kundi sa aton man ginahimo. Pareho sa lalaki kag babayi nga nagapalanggaanay kag nagpakasal, ang aton pagpalangga kay Jehova amo man ang magapahulag sa aton nga idedikar ang aton kaugalingon sa iya kag magpabawtismo.
2. Ano nga mga pagpakamaayo ang ihatag ni Jehova sa iya bawtismado nga mga Saksi?
Kon mabawtismuhan ka na, bahin ka na sang malipayon nga pamilya ni Jehova. Mabatyagan mo ang iya pagpalangga sa madamo nga paagi, kag mangin malapit ka pa gid sa iya. (Basaha ang Malaquias 3:16-18.) Luwas nga mangin Amay mo si Jehova, may ara ka pa sang mga kauturan sa bilog nga kalibutan nga nagapalangga kay Jehova kag sa imo. (Basaha ang Marcos 10:29, 30.) Siempre, may mga dapat ka anay himuon antes ka mabawtismuhan. Dapat mo tun-an ang parte kay Jehova, palanggaon sia, kag magtuo sa iya Anak. Dayon, dapat mo idedikar ang imo kabuhi kay Jehova. Kon himuon mo ini kag magpabawtismo, nagalakat ka na sa dalan padulong sa kabuhi nga wala sing katapusan. Ang Pulong sang Dios nagasiling: ‘Ang bawtismo nagaluwas man karon sa imo.’—1 Pedro 3:21.
USISAA PA GID
Usisaon naton kon ngaa importante nga magdedikar ka kay Jehova kag magpabawtismo.
3. Dapat kita magpili kon sin-o ang aton alagaron
Sa Israel sang una, ang pila nagahunahuna nga puede nila masimba si Jehova kag ang butig nga dios nga si Baal. Pero ginpadala ni Jehova ang iya propeta nga si Elias para tadlungon sila. Basaha ang 1 Hari 18:21, dayon binagbinaga ini nga pamangkot:
-
Ano nga desisyon ang dapat himuon sang mga Israelinhon?
Pareho sa mga Israelinhon, dapat man kita magpili kon sin-o ang aton alagaron. Basaha ang Lucas 16:13, dayon binagbinaga ini nga mga pamangkot:
-
Ngaa indi puede nga ginasimba naton si Jehova kag may ginasimba pa kita nga iban?
-
Paano naton mapakita kay Jehova nga sia ang ginpili naton nga simbahon?
4. Pamensara ang pagpalangga ni Jehova sa imo
Ginhatagan kita ni Jehova sang madamo nga regalo. Pero ano ang mahatag naton sa iya? Tan-awa ang VIDEO.
Ano ang pila ka paagi nga ginapakita ni Jehova nga palangga ka niya? Basaha ang Salmo 104:14, 15 kag 1 Juan 4:9, 10, dayon binagbinaga ini nga mga pamangkot:
-
Ano nga mga regalo ni Jehova ang ginapasalamatan mo gid?
-
Ano ang ginabatyag mo kay Jehova kay ginhatag niya ini nga mga regalo?
Kon nakabaton kita sang regalo nga nanamian gid naton, gusto naton pasalamatan ang naghatag sini. Basaha ang Deuteronomio 16:17, dayon binagbinaga ini nga pamangkot:
-
Kon pamensaron mo ang tanan nga ginhimo ni Jehova para sa imo, ano ang gusto mo ihatag sa iya?
5. Ang pagdedikar nagaresulta sa madamo nga pagpakamaayo
Madamo nga tawo ang nagapati nga kon kilala ka, may maayo nga obra, ukon madamo sing kuarta malipayon ka. Matuod bala ina? Tan-awa ang VIDEO, dayon binagbinaga ang masunod nga mga pamangkot.
-
Sa video, bisan pa hilig gid sang isa ka atleta ang paghampang sang soccer, ngaa ginbiyaan niya ini?
-
Gindedikar niya ang iya kaugalingon, indi sa soccer, kundi kay Jehova. Sa banta mo, husto bala ang iya desisyon? Ngaa?
Antes nangin Cristiano si apostol Pablo, may maayo sia nga propesyon kag nakatuon sia sang kasuguan sang mga Judiyo sa kilala nga manunudlo. Pero ginbiyaan niya ini tanan para mangin Cristiano. Naghinulsol bala si Pablo? Basaha ang Filipos 3:8, dayon binagbinaga ini nga mga pamangkot:
-
Ngaa ginkabig ni Pablo nga “basura” ang iya mga ginhimo antes sia nangin Cristiano?
-
Pero ano ang iya nabaton?
-
Ano ang kinalain sang kabuhi nga nagaalagad kay Jehova sangsa wala nagaalagad sa iya?
Sang nangin Cristiano si Pablo, sobra pa ang nabaton niya sangsa iya ginbiyaan
KON MAGSILING ANG IBAN: “Indi man kinahanglan nga idedikar mo ang imo kabuhi sa Dios.”
-
Sa banta mo, ngaa maayo gid nga idedikar mo ang imo kaugalingon kay Jehova?
SUMARYO
Ang pagpalangga kay Jehova amo ang magapahulag sa aton nga idedikar ang aton kaugalingon sa iya kag magpabawtismo.
Rebyu
-
Ngaa nagakabagay gid nga palanggaon kag simbahon naton si Jehova sing bug-os tagipusuon?
-
Paano ginapakamaayo ni Jehova ang iya bawtismado nga mga Saksi?
-
Gusto mo bala idedikar ang imo kaugalingon kay Jehova?
DUGANG NGA IMPORMASYON
Tan-awa kon ngaa gindedikar sang isa ka singer kag atleta ang ila kabuhi kay Jehova.
Pamangkot sang mga Pamatan-on—Ano ang Himuon Ko sa Akon Kabuhi?—Pagdumdom sang Nagligad (6:52)
Hibalua ang iban pa nga rason kon ngaa dapat ka magdedikar.
“Ngaa Dapat Mo Idedikar ang Imo Kaugalingon kay Jehova?” (Ang Lalantawan, Enero 15, 2010)
Sa sini nga music video, tan-awa ang kalipay sang mga nagdedikar sang ila kabuhi kay Jehova.
Sa eksperiensia nga “Madugay Ko Na nga Ginapaligban, ‘Ngaa Nagaluntad Kita?’” basaha kon ngaa ginbag-o sang isa ka babayi ang iya mga prioridad.
“Ang Biblia Nagapabag-o sang Kabuhi” (Ang Lalantawan, Nobiembre 1, 2012)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
