LEKSION 16
Ano ang Ginhimo ni Jesus sang Diri Sia sa Duta?
Para sa madamo, si Jesus isa lang ka lapsag, maalam nga propeta, ukon nagatagumatayon nga tawo. Pero mas makilala bala naton sia kon usisaon naton ang iya kabuhi diri sa duta? Sa sini nga leksion, tun-an naton ang pila sa pinakaimportante nga ginhimo ni Jesus kag kon ano ang epekto sini sa imo.
1. Ano ang pinakaimportante nga ginhimo ni Jesus?
Ang pinakaimportante nga ginhimo ni Jesus amo ang ‘pagbantala sang maayong balita sang Ginharian sang Dios.’ (Basaha ang Lucas 4:43.) Ginbantala niya ang maayong balita nga ang Dios magatukod sang ginharian ukon gobierno nga magasolbar sang tanan nga problema sang tawo. a Sa sulod sang tatlo ka tuig kag tunga, mapisan gid nga ginsugid ni Jesus ini nga mensahe.—Mateo 9:35.
2. Ngaa naghimo si Jesus sang mga milagro?
Mabasa sa Biblia ang ‘gamhanan nga mga buhat kag makatilingala nga mga butang kag mga tanda nga ginhimo sang Dios paagi kay Jesus.’ (Binuhatan 2:22) Ginhatagan sang Dios si Jesus sing gahom para mapauntat ang bagyo, mapakaon ang linibo, maayo ang mga nagamasakit, kag mabanhaw ang mga patay. (Mateo 8:23-27; 14:15-21; Marcos 6:56; Lucas 7:11-17) Ang mga milagro nga ginhimo ni Jesus ebidensia nga ginpadala sia sang Dios. Ginapakita man sini nga may gahom si Jehova nga solbaron ang tanan naton nga problema.
3. Ano ang matun-an naton sa pagkabuhi ni Jesus?
Pirme gid ginatuman ni Jesus si Jehova. (Basaha ang Juan 8:29.) Bisan pa madamo ang nagakontra sa iya, ginhimo gid ni Jesus ang tanan nga sugo sang iya Amay asta sa iya kamatayon. Ginpakita niya nga puede gid maalagad sang mga tawo ang Dios, bisan pa mabudlay ang sitwasyon. Gani si Jesus nagpakita sing halimbawa para ‘masunod naton sing maayo ang iya mga tikang.’—1 Pedro 2:21.
USISAA PA GID
Usisaon naton kon paano ni Jesus ginsugid ang maayong balita kag kon ano nga mga milagro ang ginhimo niya.
4. Ginsugid ni Jesus ang maayong balita
Naglakat si Jesus sing ginatos ka kilometro sa mayab-ok nga mga dalan, para isugid ang maayong balita sa madamo nga tawo. Basaha ang Lucas 8:1, dayon binagbinaga ini nga mga pamangkot:
-
Ang mga tawo lang bala nga nagpalapit kay Jesus ang iya ginbantalaan?
-
Ano ang ginhimo ni Jesus para madamo ang iya mabantalaan?
Gintagna sang Dios nga ang Mesias magasugid sang maayong balita. Basaha ang Isaias 61:1, 2, dayon binagbinaga ini nga mga pamangkot:
-
Paano natuman kay Jesus ini nga tagna?
-
Sa banta mo, kinahanglan bala sang mga tawo subong ining maayong balita?
5. Nagtudlo si Jesus sing importante nga mga leksion
Magluwas sa pagbantala sang maayong balita parte sa Ginharian sang Dios, nagtudlo man si Jesus sang mga leksion nga makabulig sa aton. Binagbinaga ang pila ka halimbawa sang iya Sermon sa Bukid. Basaha ang Mateo 6:14, 34 kag 7:12, dayon binagbinaga ini nga mga pamangkot:
-
Sa sini nga mga bersikulo, ano ang laygay ni Jesus?
-
Sa banta mo, makabulig pa bala ini sa aton subong?
6. Naghimo si Jesus sing mga milagro
Ginhatagan ni Jehova si Jesus sing gahom para makahimo sang madamo nga milagro. Para mabal-an mo ang isa sini, basaha ang Marcos 5:25-34 ukon tan-awa ang VIDEO, dayon binagbinaga ang masunod nga mga pamangkot.
-
Sa video, ano ang ginapatihan gid sang nagamasakit nga babayi?
-
Ano ang nanamian mo gid sa sini nga milagro?
Basaha ang Juan 5:36, dayon binagbinaga ini nga pamangkot:
-
Ano ang ginapamatud-an sang mga milagro ni Jesus parte sa iya?
Kabalo ka bala?
Ang kalabanan nga impormasyon parte kay Jesus, mabasa naton sa apat ka libro sang Biblia nga ginatawag nga Ebanghelyo—ang Mateo, Marcos, Lucas, kag Juan. Ang kada manunulat sang Ebanghelyo may ginrekord nga wala sa iban, pero kon tingbon ang tanan nga ginsulat nila nagasugid ini parte sa kabuhi ni Jesus.
-
MATEO
Sia ang nagsulat sang una nga Ebanghelyo. Ang kalabanan niya nga ginsulat parte sa mga panudlo ni Jesus, ilabi na ang parte sa Ginharian sang Dios.
-
MARCOS
Sia ang nagsulat sang pinakalip-ot nga Ebanghelyo. Mabasa naton diri ang makahalawathawat nga hitabo sa kabuhi ni Jesus.
-
LUCAS
Ginsugid niya sa aton ang parte sa pangamuyo kag kon paano ginpakitaan ni Jesus sing kaayo ang mga babayi.
-
JUAN
Ginsugid niya sa aton ang mga kinaiya ni Jesus paagi sa pagsaysay sang pagpakig-istorya ni Jesus sa iya mga abyan kag sa iban.
KON MAGSILING ANG IBAN: “Si Jesus isa lang ka maayo nga tawo.”
-
Ano ang isabat mo?
SUMARYO
Si Jesus nagbantala parte sa Ginharian sang Dios, naghimo sing mga milagro, kag pirme gid niya ginatuman si Jehova.
Rebyu
-
Ano ang pinakaimportante nga ginhimo ni Jesus sang diri sia sa duta?
-
Ano ang ginapamatud-an sang mga milagro ni Jesus?
-
Ano nga mga leksion ang gintudlo ni Jesus?
DUGANG NGA IMPORMASYON
Ano nga topiko ang pirme ginaistorya ni Jesus?
“Ginharian sang Dios—Ngaa Importante Ini kay Jesus?” (Ang Lalantawan, Oktubre 1, 2014)
Basaha kon ngaa makasalig kita nga natabo gid ang mga milagro ni Jesus.
“Mga Milagro ni Jesus—Ano ang Matun-an Mo?” (Ang Lalantawan, Hulyo 15, 2004)
Basaha kon ano ang epekto sa isa ka tawo sang natun-an niya ang pag-ulikid ni Jesus sa iban.
“Kaugalingon Ko Lang ang Akon Ginapensar” (Ang Lalantawan, Oktubre 1, 2014)
Tan-awa ang pagministeryo ni Jesus suno sa petsa nga natabo ini.
a Tun-an sing dugang pa sa leksion 31-33 ang parte sa Ginharian sang Dios.
Manamian Ka Man Sini
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
