1, 2. Ano nga proyekto ang imo ginapangabudlayan, kag ngaa importante gid ang kalidad sang imo trabaho?

NAGAPANGABUDLAY ka sa isa ka proyekto nga imo ginapatindog. Madugaydugay na ini nga nasugdan kag kinahanglan pa ang malawig nga tion. Mabudlay ini nga proyekto apang makalilipay. Bisan ano man ang matabo, determinado ka nga padayunon ini kag indi gid mag-uyaya, bangod ang kalidad sang imo trabaho may epekto sa imo kabuhi kag sa imo palaabuton. Ngaa? Bangod ang ginapatindog mo nga proyekto amo ang imo kaugalingon!

² Ginpadaku ni disipulo Judas nga ang proyekto naton amo ang pagpalig-on sang aton kaugalingon. Sang ginpalig-on niya ang mga Cristiano nga ‘magpabilin sa gugma sang Dios,’ ginsiling man niya sa sini nga teksto ang panguna nga paagi agod mahimo ini: “Palig-una ang inyo kaugalingon sa inyo labing balaan nga pagtuo.” (Judas 20, 21) Ano ang pila ka paagi nga mapalig-on mo ang imo kaugalingon kag mapabakod pa ang imo pagtuo agod makapabilin ka sa gugma sang Dios? Binagbinagon naton ang tatlo ka bahin sang imo proyekto sa pagpalig-on sang imo pagtuo.

3-5. (a) Ano ang luyag ni Satanas nga mangin pagtamod mo sa mga ginapatuman ni Jehova agod mapatalang ka? (b) Ano dapat ang aton pagtamod sa mga ginapatuman sang Dios, kag ano ang epekto sini sa aton? Iilustrar.

³ Una sa tanan, dapat naton pabakuron ang aton pagtuo sa kasuguan sang Dios. Sa imo pagtuon sa sini nga libro, natun-an mo  ang matarong nga mga ginapatuman ni Jehova tuhoy sa paggawi. Ano ang imo pagtamod sa sini? Luyag ka patalangon ni Satanas sa pagpati nga ang mga kasuguan, mga prinsipio, kag mga talaksan ni Jehova estrikto kag mapiguson pa gani. Ini nga pamaagi nangin epektibo sa Eden, kag amo ini pirme ang ginagamit ni Satanas. (Genesis 3:1-6) Epektibo man bala ang iya pamaagi sa imo? Depende gid ini sa imo pagtamod.

⁴ Sa pag-ilustrar: Samtang nagalagawlagaw ka sa isa ka matahom nga parke, nakita mo ang isa ka bahin sini nga indi masulod kay may mabakod kag mataas nga kudal. Katahom gid sang talan-awon sa sulod sang kudal. Sang primero, mahimo nagabatyag ka nga daw indi man kinahanglan ang kudal kay ginaupangan lang sini ang imo paglagawlagaw. Apang, samtang ginatan-aw mo ini, nakita mo ang isa ka mabangis nga leon sa sulod nga nagatiid sang iya tulukbon! Nahangpan mo karon kon ngaa may kudal—proteksion gali ini. May makatalagam bala nga manunukob nga nagatiid sa imo karon? Ang Pulong sang Dios nagapaandam: “Hupti ang inyo ikasarang sa paghunahuna sing maayo, mangin mabinantayon! Ang inyo kaaway, ang Yawa, nagaluyong subong sang nagangurob nga leon, nga nagapangita sing tulukbon.”—1 Pedro 5:8.

⁵ Si Satanas isa ka mabangis nga manunukob. Indi luyag ni Jehova nga matukob kita ni Satanas, gani naghatag Sia sing mga kasuguan nga magaamlig sa aton gikan sa madamo nga “tuso nga mga pahito” sinang isa nga malaut. (Efeso 6:11) Gani kon ginapamalandungan naton ang mga kasuguan sang Dios, dapat tamdon naton ini subong pamatuod sang gugma sang aton langitnon nga Amay. Kon amo sini ang aton pagtamod, ang mga kasuguan sang Dios makahatag sa aton sing kalig-unan kag kalipay. Si disipulo Santiago nagsulat: “Ang isa nga nagatulok sing maayo sa himpit nga kasuguan nga nagadala sang kahilwayan kag nagapadayon sa sini . . . mangin malipayon sia sa iya ginahimo.”—Santiago 1:25.

6. Ano ang labing maayo nga paagi agod mapabakod naton ang aton pagtuo sa matarong nga mga kasuguan kag mga prinsipio sang Dios? Maghatag sing halimbawa.

⁶ Ang pagkabuhi suno sa mga sugo sang Dios amo ang labing maayo nga paagi agod mapabakod naton ang aton pagtuo  sa Manughatag sing Kasuguan kag ang pagsalig nga maalamon ang pagtuman sa iya mga kasuguan. Halimbawa, nalakip sa “kasuguan sang Cristo” ang sugo ni Jesus nga tudluan ang iban sang “tanan nga ginsugo [niya].” (Galacia 6:2; Mateo 28:19, 20) Ginatuman man sang mga Cristiano ang sugo nga padayon nga magtipon sa pagsimba kag sa pagpalig-unay. (Hebreo 10:24, 25) Nalakip man sa mga sugo sang Dios ang pagpalig-on nga regular kag masunson nga magpangamuyo kay Jehova sing tinagipusuon. (Mateo 6:5-8; 1 Tesalonica 5:17) Samtang ginatuman naton ini nga mga sugo, labi naton nga mahangpan nga mahigugmaon gid ini nga mga panuytoy. Ang pagtuman sa sini makahatag sa aton sing kalipay kag pagkakontento nga indi gid mahatag sining magamo nga kalibutan. Samtang ginapamalandungan mo ang mga kaayuhan nga natigayon mo sa pagtuman sa mga kasuguan sang Dios, indi bala nga labi nga nagabakod ang imo pagtuo sa sini?

7, 8. Ano ang pasalig sang Pulong sang Dios sa mga nagakabalaka nga basi indi sila makapabilin sa matarong nga dalanon pagligad sang panahon?

⁷ Kon kaisa, may mga nagakabalaka nga sa pagligad sang panahon, basi mabudlay na ang pagtuman sa mga kasuguan ni Jehova. Nahadlok sila nga basi indi nila ini matuman. Kon magbatyag ka gid man sini, dumduma ini nga mga pinamulong: “Ako si Jehova nga imo Dios, ang nagatudlo sa imo para sa imo kaayuhan,  ang nagatuytoy sa imo sa dalanon nga dapat mo laktan. Luyag ko nga magpamati ka sa akon mga sugo! Kon himuon mo ini, ang imo paghidait mangin kaangay sang suba kag ang imo pagkamatarong mangin kaangay sang mga balod sang dagat.” (Isaias 48:17, 18) Napamalandungan mo na bala kon daw ano ka makapalig-on ini nga mga pulong?

⁸ Ginapahanumdom kita ni Jehova nga para sa aton kaayuhan ang pagtuman sa iya. Kon himuon naton ini, nagsaad sia sing duha ka pagpakamaayo. Una, ang aton paghidait mangin kaangay sang suba—matawhay, bugana, kag nagapadayon. Ikaduha, ang aton pagkamatarong mangin kaangay sang mga balod sang dagat. Kon magkadto ka sa baybayon kag tan-awon ang nagabalulon nga mga balod, makita mo nga daw wala ini nagauntat. Nahibaluan mo nga tubtob san-o, ang mga balod padayon nga magahampas sa baybayon. Nagsiling si Jehova nga mangin subong sini ang imo pagkamatarong—ang imo paghimo sing husto. Samtang ginatinguhaan mo nga magpabilin nga matutom sa iya, indi gid sia magtugot nga mapukan ka! (Basaha ang Salmo 55:22.) Indi bala nga ining makalilipay nga mga saad nagapabakod sang imo pagtuo kay Jehova kag sa iya matarong nga mga ginapatuman?

9, 10. (a) Ngaa ang pagkahamtong maayo gid nga tulumuron para sa mga Cristiano? (b) Paano nagahatag sing kalipay ang espirituwal nga pagtamod?

⁹ Ang ikaduha nga bahin sang imo proyekto nga pagpalig-on sang imo pagtuo, amo ang ginapakita sa sini nga mga pinamulong: “Magpanikasog kita padulong sa pagkahamtong.” (Hebreo 6:1) Ang pagkahamtong maayo gid nga tulumuron para sa isa ka Cristiano. Indi pareho sang kahimpitan nga indi gid naton matigayon subong, ang pagkahamtong sarang naton matigayon. Isa pa, samtang nagahamtong ang mga Cristiano, mas malipayon man sila sa ila pag-alagad kay Jehova. Ngaa?

¹⁰ Ang hamtong nga Cristiano isa ka espirituwal nga tawo. Ginatamod niya ang mga butang suno sa pagtamod ni Jehova. (Juan 4:23) Si Pablo nagsulat: “Ang mga tawo nga nagakabuhi suno sa unod nagahunahuna sang mga butang sang unod,  apang ang mga tawo nga nagakabuhi suno sa espiritu, nagahunahuna sang mga butang sang espiritu.” (Roma 8:5) Ang undanon nga pagtamod nagadala sing diutay nga kalipay, bangod maiyaiyahon ini, wala nagapensar sang palaabuton, kag nakapokus sa materyal nga mga butang. Samtang ang espirituwal nga pagtamod naman makalilipay, bangod nakapokus ini kay Jehova, ang “malipayon nga Dios.” (1 Timoteo 1:11) Ang espirituwal nga tawo nagatinguha gid nga pahamut-an si Jehova, kag malipayon bisan sa tion sang pagtilaw. Ngaa? Bangod nagahatag ini sa aton sing kahigayunan nga pamatud-an nga butigon si Satanas kag palig-unon ang aton integridad, nga nagapahalipay sa aton langitnon nga Amay.—Hulubaton 27:11; basaha ang Santiago 1:2, 3.

11, 12. (a) Ano ang ginsiling ni Pablo tuhoy sa “ikasarang sa paghangop” sang isa ka Cristiano, kag ano ang kahulugan sang tinaga nga ginbadbad nga “nahanas”? (b) Ano nga paghanas ang dapat himuon sa lawas agod mangin sagad ini kag maghamtong?

¹¹ Ang espirituwalidad kag ang pagkahamtong mapalambo paagi sa paghanas. Binagbinaga ini nga bersikulo: “Ang matig-a nga pagkaon para sa hamtong nga mga tawo, nga paagi sa paggamit sang ila mga ikasarang sa paghangop nahanas ini nga makilala ang maayo kag malain.” (Hebreo 5:14) Sang nagsiling si Pablo nga ang aton ikasarang sa paghantop “nahanas,” gingamit niya ang Griego nga tinaga nga mahimo kinaandan nga mabatian sa mga gymnasium sa Gresya sang unang siglo, kay puede ini badbaron nga ‘ginhanas subong sang gymnast.’ Binagbinaga ang nadalahig sa sini nga paghanas.

¹² Sang matawo kita, ang aton lawas wala pa mahanas. Halimbawa, indi pa kontrolado sang lapsag ang iya mga kamot kag mga tiil. Sige lang niya waras ang iya mga kamot, amo nga kon kaisa maigo niya ang iya guya kag nagakakibot sia ukon nagahibi. Apang paagi sa padayon nga paghulaghulag, amat-amat nga mahanas ang iya lawas. Ang lapsag nagatuon magkamang, dayon maglakat, kag sa ulihi magdalagan. * Ti, ano naman ang parte  sa gymnast? Kon makakita ka sing isa ka gymnast nga kasagad maglumpatlumpat kag magsirkusirko sa hangin, pat-od nga pensaron mo nga ang mga maskulo sang iya lawas malawig na nga nahanas sa paghimo sini. Ang abilidad sang gymnast wala lang natabuan—kinahanglan ang malawig nga paghanas. Apang, suno sa Biblia, ining pisikal nga paghanas, “may diutay nga kapuslanan.” Daku gid ang kapuslanan sang paghanas sa aton ikasarang sa paghangop sa espirituwal!—1 Timoteo 4:8.

13. Paano naton mahanas ang aton ikasarang sa paghangop?

¹³ Sa sini nga libro, madamo kita sing natun-an nga makabulig sa imo sa paghanas sang imo ikasarang sa paghangop agod makapabilin ka nga matutom kay Jehova subong isa ka espirituwal nga tawo. Kon nagadesisyon ka sa adlaw-adlaw nga pagkabuhi, binagbinaga kag ipangamuyo ang mga prinsipio kag mga kasuguan sang Dios. Sa tagsa ka desisyon nga himuon mo, pamangkuta ang imo kaugalingon: ‘Ano nga mga kasuguan ukon mga prinsipio sa Biblia ang nadalahig sa sini? Paano ko ini maaplikar? Ano nga desisyon ang makapahamuot sa akon langitnon nga Amay?’ (Basaha ang Hulubaton 3:5, 6; Santiago 1:5.) Ang tagsa ka desisyon nga ginahimo mo suno sa mga kasuguan ukon mga prinsipio sang Biblia magahanas pa gid sang imo ikasarang sa paghangop. Ini nga paghanas makabulig sa imo nga mangin espirituwal nga tawo, kag makapabilin sa sini.

14. Ano nga handum ang aton palambuon agod magtubo kita sa espirituwal, apang ano ang dapat naton halungan?

¹⁴ Bisan pa maghamtong na ang isa, mahimo gihapon sia magtubo sa espirituwal. Ang pagtubo nasandig sa pagkaon. Gani, si Pablo nagsiling: “Ang matig-a nga pagkaon para sa hamtong nga mga tawo.” Ang isa ka paagi agod mapabakod mo ang imo pagtuo amo ang pagkaon sing matig-a nga espirituwal nga pagkaon.  Kon ginaaplikar mo sing nagakaigo ang imo natun-an, ginapakita mo ang kaalam, kag ang Biblia nagasiling: “Ang kaalam amo ang pinakaimportante sa tanan.” Gani dapat naton palambuon ang handum sa hamili nga mga kamatuoran nga ginaaman sang aton Amay. (Hulubaton 4:5-7; 1 Pedro 2:2) Siempre pa, ang pagtigayon sing ihibalo kag diosnon nga kaalam indi rason nga magpabugal kita. Dapat naton usisaon sing regular ang aton kaugalingon kay basi nanggamot na kag nagtubo sa aton tagipusuon ang bugal ukon ang iban pa nga kaluyahon. Si Pablo nagsulat: “Padayon nga usisaa kon malig-on ang inyo pagtuo; padayon nga pamatud-i kon ano kamo.”—2 Corinto 13:5.

15. Ngaa kinahanglan ang gugma sa aton espirituwal nga pagtubo?

¹⁵ Mahimo nga natapos na ang pagpatindog sang isa ka balay, apang padayon gihapon ang mga hilikuton. Importante nga mentinahon ini kag kay-uhon, ukon mahimo mag-abot ang tion nga dapat ini padakuan. Sing kaanggid, ano ang kinahanglan naton agod maghamtong kag mamentinar ang aton espirituwalidad? Kinahanglan gid naton ang gugma. Dapat padayon nga magtubo ang aton gugma kay Jehova kag sa aton mga masigkatumuluo. Kon wala kita sing gugma, ang tanan naton nga ihibalo kag binuhatan mangin wala sing pulos—kaangay sang makairitar nga gahod. (1 Corinto 13:1-3) Apang kon may gugma kita, mangin hamtong kita nga mga Cristiano kag padayon nga magatubo sa espirituwal.

16. Ano nga panghunahuna ang ginapasanyog ni Satanas, kag ano nga pangamlig ang ginahatag ni Jehova?

¹⁶ Binagbinagon naton karon ang isa pa ka bahin sang imo proyekto. Agod mapalig-on ang imo kaugalingon subong matuod nga sumulunod sang Cristo, dapat mo bantayan ang imo panghunahuna. Ang manuggahom sini nga kalibutan nga si Satanas eksperto gid magpahito agod ang mga tawo maluyahan sing buot, mangin negatibo, madulaan sing salig sa iban, kag mangin desperado. (Efeso 2:2) Makatalagam ini nga panghunahuna sa isa ka Cristiano, pareho sang bukbok nga makahalit sa isa ka tinukod nga kahoy. Makalilipay kay ginahatagan kita ni Jehova sing importante nga pangamlig—ang paglaum.

17. Paano ginailustrar sang Pulong sang Dios ang importansia sang paglaum?

 ¹⁷ Ginasambit sang Biblia ang nanuhaytuhay nga bahin sang espirituwal nga hinganib nga kinahanglan naton agod mabatuan naton si Satanas kag ini nga kalibutan. Ang isa ka importante nga bahin sang aton hinganib amo ang helmet, ukon “ang paglaum nga kaluwasan.” (1 Tesalonica 5:8) Sang panahon sang Biblia, nahibaluan sang isa ka soldado nga indi gid sia makaluwas sa inaway kon wala sia sing helmet. Masami nga ang helmet human sa metal kag may layning nga tela ukon panit. Makabulig ini agod ang mga igo sa ulo nagadaplis lang kag wala sing grabe nga halit. Subong nga ang helmet nagaamlig sa ulo, ang paglaum nagaamlig man sa imo hunahuna.

18, 19. Ano nga halimbawa ang ginpakita ni Jesus sa paghupot sing paglaum, kag paano naton sia mailog?

¹⁸ Si Jesus amo ang panguna nga halimbawa sa paghupot sing paglaum. Dumduma ang ginbatas niya sang katapusan nga gab-i sang iya kabuhi sa duta. Ginluiban sia sang iya suod nga abyan kabaylo sang kuarta. Ang isa pa gid nagpanghiwala nga kilala sia. Ang iban naman nagbiya sa iya kag nagpalagyo. Ang iya mga kasimanwa nagsikway sa iya, nga nagasinggit nga paantuson sia kag patyon sang Romano nga mga soldado. Masiling naton nga mas mabudlay ang mga pagtilaw nga naagihan ni Jesus sangsa maagihan naton. Ano ang nakabulig sa iya? Ang Hebreo 12:2 nagasabat: “Tungod sa kalipay nga ginbutang sa iya atubangan ginbatas niya ang usok sang pag-antos, ginbalewala ang kahuluy-an, kag nagpungko sa tuo sang trono sang Dios.” Ginhuptan gid ni Jesus ang “kalipay nga ginbutang sa iya atubangan.”

¹⁹ Ano nga kalipay ang ginbutang sa atubangan ni Jesus? Nahibaluan niya nga paagi sa iya pagbatas, makapakigbahin sia sa pagpakabalaan sa ngalan ni Jehova. Mahatag niya ang pinakamabakod nga pamatuod nga butigon si Satanas. Wala na sing iban pa nga paglaum nga makahatag sing mas daku nga kalipay kay Jesus! Nahibaluan man niya nga padyaan gid ni Jehova ang iya katutom, nga sa indi madugay, makaupod na niya liwat ang iya Amay. Nagpokus si Jesus sa sining makalilipay nga paglaum sa mabudlay nga mga tion. Amo man sini ang dapat naton  himuon. May kalipay man nga ginbutang sa atubangan naton. Ginapadunggan ni Jehova ang kada isa sa aton paagi sa pribilehiyo nga makapakigbahin sa pagpakabalaan sa iya halangdon nga ngalan. Mapamatud-an naton nga butigon si Satanas kon pilion naton si Jehova subong aton Soberano kag magpabilin kita sa gugma sang aton Amay bisan ano man nga mga pagtilaw kag mga pagsulay ang aton maatubang.

20. Ano ang makabulig sa imo agod mangin positibo kag indi madulaan sing paglaum?

²⁰ Magluwas nga handa si Jehova nga padyaan ang iya matutom nga mga alagad, nalangkag man sia nga himuon ini. (Isaias 30:18; basaha ang Malaquias 3:10.) Nalipay sia nga ihatag sa iya mga alagad ang matarong nga mga handum sang ila tagipusuon. (Salmo 37:4) Gani ipokus ang imo hunahuna sa paglaum nga yara sa imo atubangan. Indi gid magpadala sa negatibo, malain, kag tiko nga panghunahuna sang daan nga kalibutan ni Satanas. Kon matalupangdan mo nga daw nagasulod na sa imo hunahuna ukon tagipusuon ang espiritu sini nga kalibutan, hanuot nga mangamuyo kay Jehova para sa “paghidait sang Dios nga labaw sa tanan nga paghangop.” Ining paghidait nga halin sa Dios magabantay sang imo tagipusuon kag sang imo ikasarang sa paghunahuna.—Filipos 4:6, 7.

21, 22. (a) Ano ang makalilipay nga paglaum sang “daku nga kadam-an”? (b) Ano nga paglaum sang mga Cristiano ang importante gid para sa imo, kag ano ang determinado mo nga himuon?

²¹ Makalilipay gid hunahunaon ini nga paglaum! Kon bahin  ka sang “daku nga kadam-an,” nga “naggua halin sa dakung kapipit-an,” hunahunaa ang kabuhi nga madali mo na lang matigayon. (Bugna 7: 9, 14) Sa sina nga tion, wala na si Satanas kag ang iya mga demonyo, gani mabatyagan mo ang kaumpawan nga indi mo pa gid mahangpan subong. Kay man, sin-o bala sa aton ang nakaeksperiensia sing kabuhi nga wala sing pag-ipit sang malaut nga impluwensia ni Satanas? Kon wala na ini nga impluwensia, mangin makalilipay gid ang pagpangabudlay agod himuon ang duta nga paraiso sa idalom sang panuytoy ni Jesus kag sang 144,000 ka kaupod niya nga manuggahom sa langit! Ginakalangkagan gid naton ang paglaum nga wala na ang mga balatian kag mga kasablagan sa lawas, abiabihon ang aton mga hinigugma nga yara sa lulubngan, kag magkabuhi suno sa katuyuan sang Dios sa aton! Samtang nagahilapit kita sa kahimpitan, may nagahulat nga mas daku nga padya, ang saad nga ginsiling sa Roma 8:21—“ang mahimayaon nga kahilwayan sang mga anak sang Dios.”

²² Luyag ni Jehova nga matigayon mo ang kahilwayan nga labaw pa sangsa mahanduraw mo. Ini nga kahilwayan nagadepende sa imo pagtuman. Indi bala nga takus gid ang tanan mo nga panikasog nga tumanon si Jehova sa imo matag-adlaw nga pagkabuhi karon? Kon amo, padayon nga pabakura ang imo kaugalingon sa imo labing balaan nga pagtuo, agod nga makapabilin ka sa gugma sang Dios tubtob sa walay katubtuban!