1, 2. (a) Paano mo masiling nga daku ang balor sang isa ka regalo? (b) Masiling mo bala nga ang gawad amo ang pinakabilidhon nga regalo nga mabaton mo? Ngaa?

 ANO ang pinakabilidhon nga regalo nga nabaton mo? Ang regalo indi kinahanglan nga mahal para mangin importante. Kay man, ang matuod nga balor sang regalo wala nagadepende sa presyo. Sa baylo, ginapabaloran mo kon ang regalo kinahanglan mo gid kag makahatag sa imo sing kalipay.

² Mahimo nga makabaton ka pa sing madamo nga regalo, pero may isa ka regalo nga bilidhon gid sa tanan. Amo ini ang regalo sang Dios para sa mga tawo. Ginhatagan kita ni Jehova sing madamo nga butang, pero ang pinakabilidhon niya nga regalo amo ang halad-gawad sang iya Anak, si Jesucristo. (Basaha ang Mateo 20:28.) Sa sini nga kapitulo, matun-an naton nga ang gawad amo ang pinakabilidhon nga regalo nga mabaton mo, kay makahatag ini sa imo sing daku nga kalipay kag amo gid ini ang kinahanglan mo. Gani ang gawad amo gid ang pinakadaku nga ebidensia sang gugma ni Jehova sa imo.

3. Ano ang gawad, kag ano ang dapat naton maintiendihan para maapresyar naton ining bilidhon nga regalo?

³ Sa simple nga hambal, ang gawad amo ang paagi ni Jehova para luwason ang katawhan sa sala kag kamatayon. (Efeso 1:7) Para maintiendihan ini nga panudlo sang Biblia, dapat naton tun-an liwat ang natabo sa hardin sang Eden. Kon maintiendihan na naton ang nadula ni Adan sang nagpakasala sia, maapresyar naton nga ang gawad bilidhon gid nga regalo para sa aton.

4. Ano ang buot silingon sang perpekto nga kabuhi para kay Adan?

⁴ Sang gintuga ni Jehova si Adan, ginhatagan niya sia sing butang nga bilidhon gid—ang perpekto nga kabuhi. Ano ang buot silingon sini para kay Adan? Bangod perpekto ang iya lawas kag hunahuna, indi gid sia magmasakit, magtigulang, ukon mapatay. Bilang perpekto nga tawo, may espesyal sia nga kaangtanan kay Jehova. Ang Biblia nagsiling nga si Adan “anak sang Dios.” (Lucas 3:38) Gani suod ukon malapit gid si Adan kay Jehova nga Dios, pareho sang bata nga malapit gid sa iya mapinalanggaon nga amay. Ginaistorya ni Jehova ang iya anak sa duta para hatagan sia sing makalilipay nga mga hilikuton kag pahibal-on sang dapat niya himuon.—Genesis 1:28-30; 2:16, 17.

5. Naghambal ang Biblia nga si Adan ginhimo “sa larawan sang Dios.” Ano ang buot silingon sini?

⁵ Si Adan ginhimo “sa larawan sang Dios.” (Genesis 1:27) Indi buot silingon sini nga ang hitsura ni Adan pareho sa Dios. Sa Kapitulo 1 sini nga libro, natun-an naton nga si Jehova indi makita nga Espiritu. (Juan 4:24) Gani si Jehova wala sing lawas nga human sa unod kag dugo. Ginhimo si Adan sa larawan sang Dios bangod gintuga sia nga may mga kinaiya pareho sang Dios, lakip ang  gugma, kaalam, katarungan, kag gahom. Ang isa pa ka importante nga punto kon ngaa si Adan pareho sa iya Amay amo nga hilway sia sa pagbuot ukon pagdesisyon. Gani si Adan indi daw robot nga nagahulag lamang base sa desinyo ukon gin-program nga himuon sini. Kundi, makadesisyon sia. Makapili sia kon ano ang husto kag sala. Kon ginpili lang niya nga tumanon ang Dios, nagkabuhi sia kuntani asta san-o sa Paraiso sa duta.

6. (a) Sang wala gintuman ni Adan ang Dios, ano ang nadula niya? (b) Paano sini naapektuhan ang iya kaanakan?

⁶ Gani maathag nga sang si Adan wala nagtuman sa Dios kag ginsilutan sing kamatayon, nagbayad sia sing daku nga bili. Bangod sang iya sala, nadula niya ang iya perpekto nga kabuhi pati ang tanan nga benepisyo sini. (Genesis 3:17-19) Makapasubo nga sang nadula ni Adan ining bilidhon nga kabuhi, nadalahig man ang mangin kaanakan niya. Ang Pulong sang Dios nagasiling: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag naglapnag ang kamatayon sa tanan nga tawo bangod sila tanan nakasala.” (Roma 5:12) Huo, tanan kita nakapanubli sang sala halin kay Adan. Ang Biblia nagasiling nga “ginbaligya” niya ang iya kaugalingon kag ang iya kaanakan sa pagkaulipon sa sala kag kamatayon. (Roma 7:14) Wala sing paglaum para kanday Adan kag Eva bangod hungod sila nga wala nagtuman sa Dios. Pero ano ang matabo sa ila kaanakan, pati kita?

7, 8. Ano ang duha ka butang nga nadalahig sa gawad?

⁷ Ginluwas ni Jehova ang mga tawo paagi sa gawad. Ano ang gawad? May duha ka butang nga nadalahig sa gawad. Una, ang gawad amo ang bili nga ginabayad para mahilway ukon mabawi ang isa ka butang. Puede ini makumparar sa bili nga ginabayad para sa bata nga  ginkidnap. Ikaduha, ang gawad amo ang bili nga ginatabon, ukon ginabayad, para sa isa ka butang. Pareho ini sa bili nga ginabayad sa nahimo nga halit ukon perwisyo. Halimbawa, kon ang isa nakaaksidente, dapat niya bayaran ang kabilugan nga bili nga katumbas sang naguba.

⁸ Paano mabayaran ang daku nga halit nga ginhimo ni Adan sa aton tanan kag mahilway kita sa pagkaulipon sa sala kag kamatayon? Tun-an naton ang parte sa gawad nga gin-aman ni Jehova kag kon ano ang mga benepisyo sini para sa imo.

9. Ano nga klase sang gawad ang kinahanglan?

⁹ Himpit ukon perpekto nga kabuhi sang tawo ang nadula, gani indi ini magawad sang indi perpekto nga tawo. (Salmo 49:7, 8) Nagakinahanglan ini sang gawad nga katumbas sa balor sang nadula. Nagasantu ini sa prinsipio sang perpekto nga hustisya nga mabasa sa Pulong sang Dios, nga nagasiling: “Kabuhi sa kabuhi.” (Deuteronomio 19:21) Gani, ano ang makatabon sang balor sang perpekto nga kalag, ukon kabuhi, nga nadula ni Adan? Kinahanglan ang isa pa ka perpekto nga kabuhi sang tawo subong “katumbas nga gawad.”—1 Timoteo 2:6.

10. Paano gin-aman ni Jehova ang gawad?

¹⁰ Paano gin-aman ni Jehova ang gawad? Ginpadala niya sa duta ang isa sa iya perpekto nga espiritu nga mga anak. Pero wala ginpadala ni Jehova ang bisan sin-o lang nga espiritu nga tinuga. Ginpadala niya ang pinakabilidhon sa iya, ang iya bugtong nga Anak. (Basaha ang 1 Juan 4:9, 10.) Kinabubut-on nga ginbiyaan sini nga Anak ang iya puluy-an sa langit. (Filipos 2:7) Subong sang natun-an naton sa nagligad nga kapitulo sini nga  libro, naghimo si Jehova sing milagro sang ginsaylo niya ang kabuhi sang iya Anak sa tiyan ni Maria. Paagi sa balaan nga espiritu sang Dios, natawo si Jesus nga perpekto kag hilway sa silot sang sala.—Lucas 1:35.

11. Paano ang isa ka tawo nangin gawad para sa madamo?

¹¹ Paano ang isa ka tawo nangin gawad para sa madamo, ukon minilyon ka tawo pa gani? Antes naton ini sabton, dumduma kon paano nangin makasasala ang minilyon ka tawo. Sang nagpakasala si Adan, nadula niya ang bilidhon nga perpekto nga kabuhi. Gani, indi na niya ini mapapanubli sa iya kaanakan. Sa baylo, ang iya lang mapapanubli amo ang sala kag kamatayon. Pero si Jesus, nga gintawag sang Biblia nga “katapusan nga Adan,” may perpekto nga kabuhi bilang tawo, kag wala gid nakasala. (1 Corinto 15:45) Buot silingon, ginbuslan ni Jesus ang lugar ni Adan para luwason kita. Paagi sa pagsakripisyo, ukon paghatag, sang iya perpekto nga kabuhi para tumanon sing bug-os ang Dios, ginbayaran ni Jesus ang sala ni Adan. Gani, nagdala si Jesus sing paglaum sa kaanakan ni Adan.—Roma 5:19; 1 Corinto 15:21, 22.

12. Sa mga pag-antos ni Jesus, ano ang iya ginpamatud-an?

¹² Maathag nga ginasugid sang Biblia ang pag-antos nga ginbatas ni Jesus antes sia napatay. Ginlatigo sia kag ginlansang sa usok, kag nag-antos sang masakit katama nga kamatayon. (Juan 19:1, 16-18, 30; Artikulo sa Apendise nga “Dapat Bala Maggamit ang mga Cristiano sing Krus sa Ila Pagsimba?”) Ngaa kinahanglan maagyan ni Jesus ining grabe nga pag-antos? Sa isa pa ka kapitulo sini nga libro, matun-an naton nga ginduhaduhaan ni Satanas kon bala may mga tawo nga alagad si Jehova nga magapabilin nga matutom bisan pa may mga pagtilaw. Paagi sa matutom nga pagbatas bisan pa sang grabe nga pag-antos, ginhatag ni Jesus ang pinakamaayo nga sabat sa  hangkat ni Satanas. Ginpamatud-an ni Jesus nga ang perpekto nga tawo nga hilway sa pagbuot makapabilin nga matutom sa Dios bisan ano pa ang himuon sang Yawa. Sigurado nga nalipay gid si Jehova sa katutom sang iya pinalangga nga Anak!—Hulubaton 27:11.

13. Paano ginbayad ang gawad?

¹³ Paano ginbayad ang gawad? Sang ika-14 nga adlaw sang bulan nga Nisan sang mga Judiyo, sang 33 C.E., nagpasugot ang Dios nga mapatay ang iya perpekto kag wala sing sala nga Anak. Gani ginhalad ni Jesus ang iya perpekto nga kabuhi bilang tawo sing “makaisa gid lang.” (Hebreo 10:10) Sang ikatlo nga adlaw nga napatay si Jesus, ginbanhaw sia ni Jehova kag nangin espiritu liwat. Sa langit, ginpresentar ni Jesus sa Dios ang balor sang iya perpekto nga kabuhi subong tawo bilang gawad nga kabaylo sang kaanakan ni Adan. (Hebreo 9:24) Ginbaton ni Jehova ang balor sang halad ni Jesus bilang gawad para mahilway ang mga tawo sa pagkaulipon sa sala kag kamatayon.—Basaha ang Roma 3:23, 24.

14, 15. Para matigayon ang “kapatawaran sang aton mga sala,” ano ang dapat naton himuon?

¹⁴ Bisan pa makasasala kita, mabaton naton ang bilidhon nga mga pagpakamaayo bangod sa gawad. Binagbinagon naton ang pila ka pagpakamaayo subong kag sa palaabuton bangod sining pinakabilidhon nga regalo sang Dios.

¹⁵ Kapatawaran sang mga sala. Bangod sa indi perpekto nga kahimtangan nga napanubli naton, nabudlayan gid kita sa paghimo sing husto. Tanan kita makasala sa aton ginahambal ukon ginahimo. Apang paagi sa  halad-gawad ni Jesus, matigayon naton ang “kapatawaran sang aton mga sala.” (Colosas 1:13, 14) Pero para mapatawad kita, dapat matuod ang aton paghinulsol. Dapat man nga magpaubos kita kag makitluoy kay Jehova nga patawaron kita base sa aton pagtuo sa halad-gawad sang iya Anak.—Basaha ang 1 Juan 1:8, 9.

16. Paano naton masimba ang Dios nga may matinlo nga konsiensia, kag ano ang kapuslanan sang matinlo nga konsiensia?

¹⁶ Matinlo nga konsiensia sa atubangan sang Dios. Kon ginakonsiensia kita, mahimo nga madulaan kita dayon sing paglaum kag magbatyag nga wala sing pulos. Pero paagi sa kapatawaran nga mahatag sang gawad, ginabuligan kita ni Jehova nga masimba sia nga may matinlo nga konsiensia bisan pa indi kita perpekto. (Hebreo 9:13, 14) Bangod sini, hilway na kita nga makaistorya kay Jehova kag makapalapit sa iya paagi sa pangamuyo. (Hebreo 4:14-16) Kon matinlo pirme ang aton konsiensia, mangin malinong ang aton hunahuna, may respeto kita sa aton kaugalingon, kag mangin mas malipayon kita.

17. Bangod napatay si Jesus para sa aton, ano nga mga pagpakamaayo ang nangin posible?

¹⁷ Paglaum nga kabuhi nga wala sing katapusan sa paraiso nga duta. “Ang bayad sa sala amo ang kamatayon,” siling sang Roma 6:23. Ini nga bersikulo nagsiling pa: “Apang ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.” Sa Kapitulo 3 sini nga libro, natun-an naton ang mga pagpakamaayo sa Paraiso nga duta nga malapit na mag-abot. (Bugna 21:3, 4) Ining tanan nga pagpakamaayo, pati ang kabuhi nga wala sing katapusan nga may perpekto nga panglawas nangin posible bangod napatay si Jesus para sa aton. Para mabaton ini nga mga  pagpakamaayo, dapat naton ipakita nga ginaapresyar naton ang regalo nga gawad.

18. Ngaa dapat gid naton pasalamatan si Jehova sa pag-aman niya sang gawad?

¹⁸ Ngaa dapat gid naton pasalamatan si Jehova bangod sa gawad? Ang regalo bilidhon gid kon ginhatagan ini sing tion, ginpangabudlayan, ukon gingastuhan sang naghatag. Nalipay gid kita sang nabal-an naton nga ginregaluhan kita bangod palangga gid kita sang naghatag. Ang gawad amo ang pinakabilidhon sa tanan nga regalo, kay ginhimo sang Dios ang pinakadaku nga sakripisyo para mahatag ini. “Ginhigugma gid sang Dios ang kalibutan amo nga ginhatag niya ang iya bugtong nga Anak,” siling sang Juan 3:16. Ang gawad amo ang pinakadaku nga ebidensia sang gugma ni Jehova sa aton. Ebidensia man ini sang gugma ni Jesus, kay handa sia nga isakripisyo ang iya kabuhi para sa aton. (Basaha ang Juan 15:13.) Gani, ang regalo nga gawad dapat magkumbinsi sa aton nga ginahigugma ni Jehova kag sang iya Anak ang kada isa sa aton.—Galacia 2:20.

19, 20. Sa ano nga mga paagi mo mapakita nga ginaapresyar mo ang regalo sang Dios nga gawad?

 ¹⁹ Paano mo mapakita nga ginaapresyar mo ang regalo sang Dios nga gawad? Una, kilalaha ang Daku nga Manughatag, si Jehova. (Juan 17:3) Mabuligan ka nga mahimo ini kon tun-an mo ang Biblia sa bulig sini nga libro. Samtang ginakilala mo si Jehova, magadugang pa gid ang imo gugma sa iya. Ina nga gugma magapahulag sa imo nga himuon ang mga butang nga makapalipay sa iya.—1 Juan 5:3.

²⁰ Magpakita sing pagtuo sa halad-gawad ni Jesus. Parte kay Jesus, aton mabasa: “Ang isa nga nagatuo sa Anak makatigayon sang kabuhi nga wala sing katapusan.” (Juan 3:36) Paano naton mapakita ang pagtuo kay Jesus? Ini nga pagtuo indi lang sa hambal. “Ang pagtuo nga wala sing mga buhat patay,” siling sang Santiago 2:26. Huo, ang matuod nga pagtuo mapamatud-an sa “mga buhat,” ukon sa aton ginahimo. Ang isa ka paagi nga mapakita naton nga nagatuo kita kay Jesus amo ang paghimo sang aton masarangan para ilugon ukon sundon sia indi lang sa aton ginahambal kundi sa aton man ginahimo.—Juan 13:15.

21, 22. (a) Ngaa dapat kita magtambong sa selebrasyon sang Panihapon sang Ginuo kada tuig? (b) Ano ang ipaathag sa Kapitulo 6 kag 7?

²¹ Magtambong sa selebrasyon sang Panihapon sang Ginuo kada tuig. Sang gab-i sang Nisan 14, 33 C.E., ginsugdan ni Jesus ang espesyal nga selebrasyon nga ginatawag sang Biblia nga “Panihapon sang Ginuo.” (1 Corinto 11:20; Mateo 26:26-28) Ini nga selebrasyon ginatawag man nga Memoryal sang kamatayon sang Cristo. Ginsugdan ini ni Jesus para buligan ang iya mga apostoles kag ang tanan nga matuod nga Cristiano sa  ulihi sa pagdumdom nga paagi sa iya kamatayon bilang perpekto nga tawo, ginhatag niya ang iya kabuhi, ukon kalag, bilang gawad. Parte sini nga selebrasyon, si Jesus nagsugo: “Padayon ninyo nga himua ini sa pagdumdom sa akon.” (Lucas 22:19) Ang pagselebrar sang Memoryal nagapahanumdom sa aton sang daku nga gugma ni Jehova kag ni Jesus paagi sa gawad. Mapakita naton ang apresasyon sa gawad kon magtambong kita sa selebrasyon sang Memoryal sang kamatayon ni Jesus kada tuig. a

²² Ang pag-aman ni Jehova sang gawad bilidhon gid nga regalo. (2 Corinto 9:14, 15) Ipaathag pa gid sang Kapitulo 6 kag 7 kon ngaa bisan ang mga patay makabenepisyo sa sining bilidhon nga regalo.