Sa tapos sang Baha, nagdamo ang kabataan sang mga bata ni Noe kag sang ila mga asawa. Nagdaku ang ila pamilya, kag nag-istar sila sa lainlain nga lugar, kay amo ini ang ginsugo ni Jehova sa ila.

Pero ang pila ka pamilya wala nagtuman kay Jehova. Nagsiling sila: ‘Matukod kita sang siudad kag diri kita maistar. Mahimo kita sing mataas nga torre nga ang kataason makalab-ot sa langit, para mangin kilala kita.’

 Wala nalipay si Jehova sa ginhimo sina nga mga tawo, gani nagdesisyon sia nga punggan sila. Kabalo ka bala kon ano ang iya ginhimo? Ginhimo niya nga lainlain ang ila lenguahe. Bangod indi na sila mag-intiendihanay, gin-untatan nila ang pagpatindog. Ang siudad nga ila ginhimo nakilala nga Babel, nga buot silingon “Kagumon.” Naghalin ang mga tawo didto kag nag-istar sa iban nga lugar. Pero nagahimo gihapon sila sing malain sa mga lugar nga ila gin-istaran. May mga tawo pa bala nga nagapalangga kay Jehova? Tan-awon naton sa masunod nga istorya.