Si Jesus kag ang mga apostoles nagalakat sa Nalupyakan sang Kidron pakadto sa Bukid sang mga Olibo. Kaagahon na, kag bilog ang bulan. Sang nag-abot sila sa hardin sang Getsemane, si Jesus nagsiling sa ila: “Pabilin kamo diri kag padayon nga magbantay.” Dayon nagkadto si Jesus sa uluunhan pasulod sa hardin kag nagluhod. Grabe gid ang iya kasubo, gani nangamuyo sia kay Jehova: “Ang imo kabubut-on amo ang matuman.” Dayon nagpadala si Jehova sing anghel para pabakuron si Jesus. Sang nagbalik si Jesus sa mga apostoles, nakita niya nga nagakatulog sila nga tatlo. Sia nagsiling: ‘Magbugtaw kamo! Indi ini tion sa pagtulog! Nag-abot na ang oras nga ihatag ako sa akon mga kaaway.’

Wala madugay, nag-abot si Judas upod sa madamo nga tawo nga may mga espada kag mga inuglampos. Nakahibalo sia kon diin makita si Jesus kay pirme sila nagakadto sa sini nga hardin. Ginsilingan ni Judas ang mga soldado nga ipakilala niya sa ila kon sin-o si Jesus. Nagpalapit sia dayon kay Jesus kag nagsiling: ‘Maayong gab-i Manunudlo,’ kag dayon ginhalukan niya sia. Si Jesus nagsiling: ‘Judas, ginatraidoran mo bala ako paagi sa isa ka halok?’

Ginpamangkot ni Jesus ang mga soldado: “Sin-o ang ginapangita ninyo?” Nagsabat sila: “Si Jesus nga Nazaretnon.” Nagsiling sia: “Ako si Jesus,” dayon nag-isol sila kag nagkalatumba. Ginpamangkot sila liwat ni Jesus: “Sin-o ang ginapangita ninyo?” Nagsabat sila liwat: “Si Jesus nga Nazaretnon.” Si Jesus nagsiling: ‘Ginsilingan ko na kamo nga ako si Jesus. Pabay-i ninyo sila.’

Sang narealisar ni Pedro ang nagakatabo, gingabot niya ang isa ka espada kag ginlabo ang dulunggan ni Malco, ang ulipon sang mataas nga saserdote. Pero gintandog ni Jesus ang iya dulunggan kag gin-ayo ini. Dayon nagsiling sia kay Pedro: ‘Itagob ang imo espada. Kon makig-away ka paagi sa  espada, mapatay ka sa espada.’ Gindakop sang mga soldado si Jesus kag gingapos ang iya mga kamot, kag ang mga apostoles nalagyo. Dayon gindala sia sang mga soldado kay Anas, ang puno nga saserdote. Gin-usisa ni Anas si Jesus kag ginpadala sia sa balay sang mataas nga saserdote nga si Caifas. Pero ano ang natabo sa mga apostoles?