Kapitulo 16

Ang Pangulohan sang Dios Nagasugod sa Paggahom

1. (a) Ano ang ginpaabot sang mga tawo nga may pagtuo? (b) Ngaa gintawag ang ginharian sang Dios nga isa ka “siudad”?

 SA SULOD SANG LINIBO ka tuig ang mga tawo nga may pagtuo sa pangulohan sang Dios nagpaabot sa paggahom sini. Halimbawa, ang Biblia nagasiling nga ang matutom nga si Abraham “naghulat sa siudad nga may mga sadsaran, ang manunukod kag manugbuhat sini amo ang Dios.” (Hebreo 11:​10) Inang “siudad” amo ang ginharian sang Dios. Apang ngaa gintawag ini nga “siudad”? Bangod kinaandan sadto anay nga ang hari nagagahom sa isa ka siudad. Gani ginakabig sadto sang mga tawo ang siudad subong isa ka ginharian.

2. (a) Ano ang nagapakita nga ang Ginharian matuod para sa unang mga disipulo ni Cristo? (b) Ano ang luyag nila mahibaloan tuhoy sini?

 ² Matuod gid ang ginharian sang Dios para sa unang mga sumulunod ni Cristo. Ginpakita ini sang ila daku nga interes sa paggahom sini. (Mateo 20:​20-23) Ang pamangkot sa ila hunahuna amo: San-o magagahom si Cristo kag ang iya mga disipulo? Sang magpakita si Jesus isa ka bes sa iya mga disipulo sa tapos sang iya pagkabanhaw, namangkot sila: “Ginuo, ipasag-uli mo bala ang ginharian sa Israel sa sining tion?” (Binuhatan 1:6) Gani, nalangkag ka bala nga mahibaloan kon san-o magagahom si Cristo subong Hari sa pangulohan sang Dios, subong sang kalangkag anay sang mga disipulo ni Cristo?

ANG PANGULOHAN NGA GINAPANGAMUYO SANG MGA CRISTIANO

3, 4. (a) Ano ang nagapakita nga ang Dios pirme nga nagagahom subong Hari? (b) Gani ngaa gintudloan ni Cristo ang iya mga sumulunod nga ipangamuyo ang pagkari sang ginharian sang Dios?

³ Gintudloan ni Cristo ang iya mga sumulunod nga mangamuyo sa Dios: “Magkari ang imo ginharian. Paghimuon ang imo kabubut-on, kon paano sa langit, amo man sa duta.” (Mateo 6:​9, 10) Apang basi may mamangkot: ‘Indi bala pirme nagagahom si Jehova nga Dios subong hari? Kag kon amo, ngaa ipangamuyo pa ang pagkari sang iya ginharian?’

⁴ Matuod, ginatawag sang Biblia si Jehova nga “Hari nga wala sing katapusan.” (1 Timoteo 1:​17) Kag ini nagasiling: “Ginpalig-on ni Jehova ang iya trono sa kalangitan; kag ang iya ginharian nagagahom sa tanan.” (Salmo 103:​19) Gani si Jehova ang pirme nga Supremo nga Manuggahom sa tanan niya nga tinuga. (Jeremias 10:​10) Apang, bangod sang pagrebelde sa iya paggahom sa katamnan sang Eden, naghanda ang Dios sing isa ka pinasahi nga paggahom. Amo ini ang pangulohan nga sang ulihi gintudlo ni Jesucristo sa iya mga sumulunod nga ipangamuyo. Katuyoan sini nga dulaon ang tanan nga palaligban nga nagresulta sang si Satanas nga Yawa kag ang iban pa nagpalayo gikan sa paggahom sang Dios.

5. Kon ginharian ini sang Dios, ngaa ginatawag man ini nga ginharian ni Cristo kag ginharian sang 144,000?

⁵ Ining bag-ong Ginharian nga pangulohan nagabaton sing gahom kag kinamatarong sa paggahom gikan sa Dakung Hari, si Jehova nga Dios. Ginharian niya ini. Sa liwat kag liwat, ginatawag ini sang Biblia nga “ginharian sang Dios.” (Lucas 9:​2, 11, 60, 62; 1 Corinto 6:​9, 10; 15:​50) Apang, sanglit gintangdo ni Jehova ang iya Anak nga mangin Puno nga Manuggahom, ginatawag man ini nga ginharian ni Cristo.  (2 Pedro 1:​11) Subong naton-an naton sa nauna nga kapitulo, 144,000 gikan sa katawhan ang magagahom upod kay Cristo sa sining ginharian. (Bugna 14:​1-4; 20:6) Gani ginatawag man ini sang Biblia nga “ila ginharian.”​—⁠Daniel 7:27.

6. Suno sa iban, san-o nagsugod sa paggahom ang ginharian sang Dios?

⁶ Nagasiling ang iban nga ang Ginharian naggahom sang tuig nga nagbalik si Jesus sa langit. Nagasiling sila nga si Cristo naggahom sang ginbubo niya ang balaan nga espiritu sa iya mga sumulunod sang adlaw sang Judiyong piesta sang Pentecostes sang tuig 33 C.⁠E. (Binuhatan 2:​1-4) Apang ang Ginharian nga pangulohan nga ginhanda ni Jehova sa pagtapos sang tanan nga palaligban nga gintuga sang pagrebelde ni Satanas wala magsugod sa paggahom sadto. Wala sing pamatuod nga ang ‘bata nga lalaki,’ nga amo ang pangulohan sang Dios kag sa sini si Cristo ang manuggahom, nabun-ag sadto kag nagsugod sa paggahom. (Bugna 12:​1-10) Apang, nakatigayon bala si Jesus sing ginharian sadtong tuig 33 C.⁠E.?

7. Sa ibabaw nanday sin-o naggahom si Cristo kutob sang 33 C.⁠E.?

⁷ Huo, nagsugod sadto si Jesus sa paggahom sa ibabaw sang kongregasyon sang iya mga sumulunod nga, sang ulihi, nagbuylog sa iya sa langit. Sa amo ang Biblia nagahambal sa ila, samtang yari pa sila sa duta, subong gindala sa “ginharian sang hinigugma nga Anak [sang Dios].” (Colosas 1:​13) Apang ining paggahom, ukon “ginharian,” sa ibabaw sang mga Cristiano nga may paglaum sa langitnon nga kabuhi indi amo ang Ginharian nga pangulohan nga gintudlo ni Jesus sa iya mga sumulunod nga ipangamuyo. Ginharian lamang ini sang 144,000 ka tawo nga magagahom upod sa iya sa langit. Sa sulod sang mga siglo sila lamang ang nangin mga sakop sini. Sa amo ining paggahom, ukon ‘ginharian sang hinigugma nga Anak sang Dios,’ matapos kon ang pinakaulihi sining mga sakop nga may langitnon nga paglaum mapatay kag magbuylog kay Cristo sa langit. Indi na sila mangin mga sakop ni Cristo, kundi magahari sila kaupod niya sa madugay na ginsaad sang Dios nga Ginharian nga pangulohan.

PAGSUGOD SANG PAGGAHOM SA TUNGA SANG MGA KAAWAY

8. (a) Ano ang nagapakita nga sa tapos mabanhaw si Cristo may yara tion sa paghulat antes sia maggahom? (b) Ano ang ginsiling sang Dios kay Cristo sang tion na para sa iya nga maggahom?

⁸ Sang magbalik si Cristo sa langit sa tapos sang iya pagkabanhaw, wala sia magsugod sadto sa paggahom subong Hari sa pangulohan sang Dios. Sa baylo, may tion sa paghulat, subong ginapaathag ni apostol Pablo: “Ining tawo [si Jesucristo] naghalad sing isa ka halad  para sa mga sala sing dayon kag naglingkod sa tuo sang Dios, naghulat kutob sadto tubtob nga ang iya mga kaaway himuon nga tulungtungan sang iya mga tiil.” (Hebreo 10:​12, 13) Sang mag-abot ang tion nga si Cristo nagsugod sa paggahom, si Jehova nagsiling sa iya: “Maggahom [ukon, manakop] ka sa tunga sang imo mga kaaway.”​—⁠Salmo 110:​1, 2, 5, 6.

9. (a) Ngaa indi tanan maluyag sa ginharian sang Dios? (b) Kon maggahom na ang pangulohan sang Dios, ano ang ginahimu sang mga pungsod?

⁹ Makatilingala bala nga ang pangulohan sang Dios may mga kaaway? Apang indi tanan maluyag magpuyo sa idalom sang pangulohan nga nagakinahanglan sa iya mga sakop sa paghimu sing matarong. Gani sa tapos masugid kon paano kuhaon ni Jehova kag sang iya Anak ang paggahom sa kalibutan, ang Biblia nagasiling, “naakig ang kapungsoran.” (Bugna 11:​15, 17, 18) Wala ginabaton sang mga pungsod ang ginharian sang Dios bangod ginapatalang sila ni Satanas sa pagpamatok sa sini.

10, 11. (a) Sang maggahom ang pangulohan sang Dios, ano ang natabo sa langit? (b) Ano ang natabo sa duta? (c) Gani ano ang importante nga dumdumon naton?

¹⁰ Sang magsugod sa paggahom ang pangulohan sang Dios, didto pa sa langit si Satanas kag ang iya mga anghel. Sanglit ginapamatokan nila ang paggahom sang Ginharian, natabo ang inaway. Subong resulta, si Satanas kag ang iya mga anghel gintabog sa langit. Sa sini, ang isa ka mabaskog nga tingog nagsiling: “Karon nag-abot ang kaluwasan kag ang gahom kag ang ginharian sang aton Dios kag ang awtoridad sang iya Cristo.” Huo, nagsugod na ang paggahom sang pangulohan sang Dios! Kag bangod wala na sa langit si Satanas kag ang iya mga anghel, may kinasadya didto. “Bangod sini magkalipay kamo, mga langit kag kamo nga nagapuyo sa sini!” siling sang Biblia.​—⁠Bugna 12:​7-12.

¹¹ Tion man bala ini sang pagkalipay para sa duta? Indi! Sa baylo, tion ini sang pinakadaku nga gamu sa duta. Ang Biblia nagasiling sa aton: “Kailo sa duta kag sa dagat, kay ang yawa nagpanaug sa inyo sa dakung kasingkal, bangod nahibaloan niya nga malip-ot na lamang ang iya tion.” (Bugna 12:​12) Gani importante ini dumdumon: Ang pagsugod sa paggahom sang ginharian sang Dios wala nagakahulugan sing gilayon nga paghidait kag kalig-onan sa duta. Ang matuod nga paghidait magaabot sa ulihi kon ang ginharian sang Dios bug-os nga magagahom sa duta. Matabo ini sa katapusan sang “malip-ot na lamang nga tion,” kon si Satanas kag ang iya mga anghel bilangguon agod nga indi na nila magamu ang bisan sin-o.

12. Ngaa mapaabot naton nga isugid sa aton sang Biblia kon san-o magasugod sa paggahom ang ginharian sang Dios?

 ¹² Apang san-o gintagbong si Satanas gikan sa langit, sa amo nagtuga sing kagamu sa duta sa “malip-ot na lamang nga tion”? San-o nagsugod sa paggahom ang pangulohan sang Dios? Ginahatag bala sang Biblia ang sabat? Dapat amo sini ang aton paabuton. Ngaa? Bangod madugay na sa wala pa gintagna sang Biblia kon san-o ang Anak sang Dios magalutaw una subong isa ka tawo sa duta agod mangin Mesias. Sa kamatuoran, gintudlo sini ang tuig gid nga sia nangin Mesias. Ano naman kon tuhoy sa labaw ka importante nga pag-abot sang Mesias, ukon Cristo, agod magsugod sa paggahom sa Ginharian? Paabuton gid naton nga isugid man sa aton sang Biblia kon san-o ini matabo!

13. Paano ginatagna sang Biblia ang tuig gid sang pag-abot sang Mesias sa duta?

¹³ Apang mahimu mamangkot ang isa: ‘Sa diin ginatagna sang Biblia ang tuig gid sang pag-abot sang Mesias sa duta?’ Ang tolon-an ni Daniel nagasiling: “Kutob sa pagguwa sang sugo nga ipasag-uli kag ipatindog ang Jerusalem tubtob sa pagkari sang Mesias nga Pangulo, mangin pito ka semana, kag kan-uman kag duha ka semana,” ukon 69 ka semana tanan. (Daniel 9:​25) Apang indi ini literal nga 69 ka semana, nga mangin 483 ka adlaw lamang, ukon kapin sa isa ka tuig. Kundi 69 ka semana sang mga tuig ini, ukon 483 ka tuig. (Ipaanggid ang Numeros 14:​34.) Ang sugo nga ipasag-uli kag ipatindog ang pader sang Jerusalem ginhatag sang 455 B.⁠C.⁠E.⁠ * (Nehemias 2:​1-8) Gani natapos ang 69 ka semana sang mga tuig pagligad sang 483 ka tuig, sang 29 C.⁠E. Kag amo gid ina ang tuig nga nagkadto si Jesus kay Juan agod magpabawtismo! Sadtong okasyon ginhaplasan sia sing balaan nga espiritu kag nangin Mesias, ukon Cristo.​—⁠Lucas 3:​1, 2, 21-23.

KON MAGSUGOD NA SA PAGGAHOM ANG PANGULOHAN SANG DIOS

14. Ano ang ginalaragway sang “kahoy” sa Daniel kapitulo kuatro?

¹⁴ Sa diin ginatagna sang Biblia ang tuig nga si Cristo magasugod sa paghari sa pangulohan sang Dios? Sa tolon-an gihapon ni Daniel. (Daniel 4:​10-37) Didto ang isa ka daku, lab-ot sa langit nga kahoy gingamit sa paglaragway kay Hari Nabokodonosor sang Babilonia. Sia ang pinakamataas nga manuggahom sadto. Apang, napilitan si Hari Nabokodonosor sa pagkilala nga may mataas pa sa iya. Amo sia “ang  Labing Mataas,” ukon “ang Hari sang mga langit,” si Jehova nga Dios. (Daniel 4:​34, 37) Gani, sa kapin ka importante nga paagi, ining lab-ot sa langit nga kahoy, naglaragway sa supremo nga paggahom sang Dios, labi na sa kaangtanan sini sa aton duta. Ang paggahom ni Jehova ginpabutyag sa sulod sang pila ka tion paagi sa ginharian nga iya ginpatindog sa pungsod sang Israel. Sa amo ang mga hari sang tribu ni Juda nga naghari sa mga Israelinhon ginsiling nga “nagalingkod sa trono ni Jehova.”​—⁠1 Cronica 29:23.

15. San-o ginpulod ang “kahoy,” ngaa ginbutangan ini sing pikit?

¹⁵ Suno sa rekord sang Biblia sa Daniel kapitulo kuatro, ang lab-ot sa langit nga kahoy ginpulod. Apang, ginbilin ang tuod, kag ginbutangan ini sing pikit nga salsalon kag saway. Punggan sini ang pagtubo sang tuod tubtob tion na sang Dios sa pagkuha sa pikit kag patubuon ini liwat. Apang paano kag san-o ginpulod ang paggahom sang Dios?

16. (a) Paano kag san-o ginpulod ang paggahom sang Dios? (b) Ano ang ginsiling sa katapusan nga hari sang Juda nga naglingkod sa “trono ni Jehova”?

¹⁶ Sang ulihi, ang ginharian sang Juda nga ginpatindog ni Jehova nangin malaut gid amo kon ngaa gintugutan niya si Hari Nabokodonosor nga laglagon ini, pudlon ini. Natabo ini sang tuig 607 B.⁠C.⁠E. Sadto si Sedequias, ang katapusan nga hari sang Juda nga naglingkod sa trono ni Jehova, ginsilingan: “Huksa ang korona. . . . wala sing bisan sin-o nga magapanag-iya sini tubtob mag-abot ang isa nga may kinamatarong  sa sini, kag ihatag ko ini sa iya.”​—⁠Ezequiel 21:​25-27.

17. Ano nga hut-ong sang tion ang nagsugod sang 607 B.⁠C.⁠E.?

¹⁷ Gani ang paggahom sang Dios, nga ginlaragway sang “kahoy,” ginpulod sang 607 B.⁠C.⁠E. Wala na sadto sing pangulohan nga nagatiglawas sa paggahom sang Dios sa duta. Sa amo, sang 607 B.⁠C.⁠E. nagsugod ang isa ka hut-ong sang tion nga sang ulihi gintawag ni Jesus nga “ang gintalana nga panag-on sang mga pungsod,” ukon “ang panag-on sang mga Gentil.” (Lucas 21:​24, ­King ­James Ver­sion) Sa sulod sining “gintalana nga panag-on” ang Dios wala sing pangulohan nga nagatiglawas sang iya paggahom sa duta.

18. Ano ang matabo sa katapusan sang “gintalana nga panag-on sang mga pungsod”?

¹⁸ Ano ang matabo sa katapusan sining “gintalana nga panag-on sang mga pungsod”? Ihatag ni Jehova ang paggahom sa Isa “nga may kinamatarong sa sini.” Ining Isa amo si Jesucristo. Gani kon mahibaloan naton kon san-o matapos “ang gintalana nga panag-on sang mga pungsod,” mahibaloan naton kon san-o si Cristo nagsugod sa paggahom subong hari.

19. Sa pila ka “mga tion” mautod ang paggahom sang Dios sa duta?

¹⁹ Suno sa Daniel kapitulo kuatro, ining “gintalana nga panag-on” mangin “pito ka tion.” Ginapakita ni Daniel nga may yara “pito ka tion” nga sa tion sini ang paggahom sang Dios, nga ginalaragway sang “kahoy,” wala nagapanghikot sa duta. (Daniel 4:​16, 23) Daw ano kalawig ang “pito ka tion”?

20. (a) Daw ano kalawig ang isa ka “tion”? (b) Daw ano kalawig ang “pito ka tion”? (c) Ngaa ginaisip naton ang isa ka adlaw nga isa ka tuig?

 ²⁰ Sa Bugna kapitulo 12, bersikulo 6 kag 14, maton-an naton nga ang 1,260 ka adlaw katumbas sa “isa ka tion [kon sayoron, 1 ka tion] kag mga tion [kon sayoron, 2 ka tion] kag tunga sa tion.” Kabug-osan ina sang 3¹⁄₂ ka tion. Gani ang “isa ka tion” katumbas sa 360 ka adlaw. Busa, ang “pito ka tion” mangin 7 ipamuad sa 360, ukon 2,520 ka adlaw. Karon kon isipon naton ang isa ka adlaw nga isa ka tuig, suno sa talaksan sang Biblia, ang “pito ka tion” katumbas sa 2,520 ka tuig.​—⁠Numeros 14:​34; Ezequiel 4:6.

21. (a) San-o “ang gintalana nga panag-on sang mga pungsod” nagsugod kag natapos? (b) San-o nagsugod sa paggahom ang pangulohan sang Dios? (c) Ngaa nagakaigo gihapon nga ipangamuyo ang pagkari sang ginharian sang Dios?

²¹ Naton-an na naton nga “ang gintalana nga panag-on sang mga pungsod” nagsugod sang tuig 607 B.⁠C.⁠E. Gani sa pag-isip sing 2,520 ka tuig kutob sa amo nga petsa, magadangat kita sa 1914 C.⁠E. Amo ina ang tuig nga natapos ining “gintalana nga panag-on.” Minilyon nga buhi pa ang makadumdom sang nagkalatabo sang 1914. Sadtong tuig, ginsugdan sang Inaway Kalibutanon I ang tion sang kagamu nga nagpadayon tubtob karon. Nagakahulugan ini nga si Jesucristo nagsugod sa paggahom subong hari sa langitnon nga pangulohan sang Dios sang 1914. Kag bangod naggahom na ang Ginharian, sibu gid sa tion nga ipangamuyo naton ang “pagkari” sini kag laglagon ang malaut nga sistema sang mga butang ni Satanas gikan sa duta!​—⁠Mateo 6:​10; Daniel 2:44.

22. Anong pamangkot ang mahimu ipamangkot sang iban?

²² Apang mahimu mamangkot ang isa: ‘Kon si Cristo nakabalik na agod maggahom sa ginharian sang iya Amay, ngaa indi naton sia makita?’

[Mga footnote]

[Mga Pamangkot sa Pagtinuon]

[Tsart sa pahina 140, 141]

Sang 607 B.⁠C.⁠E. ang ginharian sang Dios sa Juda napukan.

Sang 1914 C.⁠E. si Jesucristo nagsugod sa paghari sa langitnon nga pangulohan sang Dios

607 B.C.E.—1914 C.E.

Oktubre, 607 B.C.E.—Oktubre, 1 B.C.E. = 606 KA TUIG

Oktubre, 1 B.C.E.—Oktubre, 1914 C.E. = 1,914 KA TUIG

PITO KA PANAG-ON SANG MGA GENTIL = 2,520 KA TUIG

[Piktyur sa pahina 134]

“Ipasag-uli mo bala ang ginharian sa Israel sa sining tion?”

[Piktyur sa pahina 139]

Ang mataas nga kahoy sa Daniel kapitulo 4 nagalaragway sa paggahom sang Dios. Sa isa ka tion paagi ini sa ginharian sang Juda

[Piktyur sa pahina 140, 141]

Ginpulod ang kahoy sang ginlaglag ang ginharian sang Juda