Kapitulo 29

Pag-amba Sing Bag-o nga Ambahanon Sang Kadalag-an

 Palanan-awon 9​—Bugna 14:1-20

Tema: Ang 144,000 kaupod sang Kordero sa Bukid Sion; ang mga ginapahayag sang anghel naglanog sa bug-os nga duta; gingapas ang alanihon

Tion sang katumanan: 1914 tubtob sa dakung kapipit-an

1. Ano na ang natun-an naton tuhoy sa Bugna kapitulo 7, 12, kag 13, kag ano karon ang matun-an pa naton?

 MAKAPAUMPAW gid nga iliso naton ang aton igtalupangod sa masunod nga palanan-awon ni Juan! Tuhay sa katingalahan nga tulad-sapat nga mga organisasyon sang dragon, makita naton karon ang matutom nga mga alagad ni Jehova kag ang ila ginahimo sa tion sang adlaw sang Ginuo. (Bugna 1:10) Nasugid na sa aton sang Bugna 7:1, 3 nga ang apat ka hangin sang kalaglagan ginapunggan tubtob mapat-inan ang tanan nga 144,000 sining hinaplas nga mga ulipon. Ginsugid sang Bugna 12:17 nga ining ‘mga nabilin sang binhi’ sang babayi nangin pinasahi nga puntariya ni Satanas, ang dragon, sadto nga tion. Kag maathag nga ginalaragway sang Bugna kapitulo 13 ang politikal nga mga organisasyon nga gintukod ni Satanas sa duta agod piguson kag mapintas nga hingabuton ang matutom nga mga alagad ni Jehova. Apang ang katuyuan sang Dios indi mabalabagan sina nga panguna nga kaaway! Matun-an naton karon nga walay sapayan sang mahaliton nga hilikuton ni Satanas, ang tanan nga 144,000 madinalag-on nga ginatipon.

2. Ano nga pauna nga laragway sang makalilipay nga resulta ang ginahatag sa aton ni Juan sa Bugna 14:1, kag sin-o ang Kordero?

² Si Juan, kag upod sa iya ang Juan nga klase karon, ginhatagan sing pauna nga laragway sinang makalilipay nga resulta: “Kag nakita ko, kag, yari karon! ang Kordero nagatindog sa Bukid Sion, kag kaupod niya ang isa ka gatos kag kap-atan kag apat ka libo nga may ngalan niya kag ngalan sang iya Amay nga nasulat sa ila agtang.” (Bugna 14:1) Subong sang nakita naton, ini nga Kordero amo man si Miguel nga nagtinlo sang kalangitan paagi sa pagtagbong sa Yawa kag sa iya mga demonyo. Sia ang Miguel nga ginlaragway ni Daniel nga ‘nagatindog para sa mga anak sang katawhan sang Dios’ samtang nagahanda sia sa “pagtindog” agod himuon ang matarong nga mga paghukom ni Jehova. (Daniel 12:1; Bugna 12:7, 9) Sugod sang 1914 ining nagasakripisyo sang kaugalingon nga Kordero sang Dios nagatindog sa Bukid Sion subong ang Mesianiko nga Hari.

3. Ano ang “Bukid Sion” nga ‘ginatindugan’ sang Kordero kag sang 144,000?

³ Subong gid ini sang gintagna ni Jehova: “Ako, ako mismo, ang nagpahamtang sang akon hari sa Sion, ang akon balaan nga bukid.” (Salmo 2:6; 110:2) Wala na ini nagapatuhoy sa dutan-on nga Bukid Sion, nga nahamtangan sang dutan-on nga Jerusalem, ang siudad diin naghari anay ang tawhanon nga mga hari sa kaliwat ni David. (1 Cronica 11:4-7; 2 Cronica 5:2) Bangod sang mapatay kag mabanhaw si Jesus sang 33 C.E., ginpahamtang sia subong ang sadsaran nga bato sa langitnon nga Bukid Sion, ang langitnon nga duog diin ginpamat-od ni Jehova nga ipahamtang ang “siudad sang buhi nga Dios, ang langitnon nga Jerusalem.” Busa, ang “Bukid Sion” diri nagalaragway sa nabayaw nga posisyon ni Jesus kag sang iya kaupod nga mga manunubli, nga nagahuman sa langitnon nga Jerusalem, nga amo ang Ginharian. (Hebreo 12:22, 28; Efeso 3:6) Amo ini ang mahimayaon kag harianon nga kahimtangan nga sa amo ginabayaw sila ni Jehova sa tion sang adlaw sang Ginuo. Sa sulod sang mga siglo, ang hinaplas nga mga Cristiano, subong “buhi nga mga bato,” hanuot nga nagpaabot sa pagtindog sa sinang langitnon nga Bukid Sion, nga nahiusa upod sa ginhimaya nga Ginuong Jesucristo sa iya halangdon nga Ginharian.—1 Pedro 2:4-6; Lucas 22:28-30; Juan 14:2, 3.

4. Paano masiling nga ang tanan nga 144,000 nagatindog sa Bukid Sion?

⁴ Nakita ni Juan indi lamang si Jesus kundi ang kompleto nga hubon sang 144,000 ka kaupod nga mga manunubli sang langitnon nga Ginharian nga nagatindog sa Bukid Sion. Sa tion nga ginlaragway ini sang palanan-awon, madamo na, apang indi pa tanan, sang 144,000 ang ato na sa langit. Sang ulihi sa amo gihapon nga palanan-awon, nahibal-an ni Juan nga ang iban sang mga balaan magabatas pa kag mapatay nga matutom. (Bugna 14:12, 13) Maathag, kon amo, nga ang iban sang 144,000 yari pa sa duta. Gani paano nga nakita sila tanan ni Juan nga nagatindog upod kay Jesus sa Bukid Sion? * Bangod, subong mga katapo sang kongregasyon sang hinaplas nga mga Cristiano, ini sila ‘nakapalapit [na karon] sa Bukid Sion kag sa siudad sang Dios nga buhi, ang langitnon nga Jerusalem.’ (Hebreo 12:22) Kaangay ni Pablo sang yari pa sia sa duta, sila—sa espirituwal nga kahulugan—nabanhaw na agod mahiusa kay Cristo Jesus sa langitnon nga mga duog. (Efeso 2:5, 6) Dugang pa, sang 1919 nagsabat sila sa imbitasyon nga, “Saka kamo diri,” kag sa malaragwayon nga paagi “nagsaka sila sa langit sa panganod.” (Bugna 11:12) Bangod sini nga mga teksto, makita naton nga ang bug-os nga 144,000—sa espirituwal nga paghambal—yara sa Bukid Sion upod kay Jesucristo.

5. Kay sin-o mga ngalan ang nasulat sa mga agtang sang 144,000, kag ano ang kahulugan sang tagsa ka ngalan?

⁵ Ang 144,000 indi kaupod sang mga sumilimba sa sapat nga mapintas, nga namarkahan sing simbuliko nga numero nga 666. (Bugna 13:15-18) Sa baylo, ining mga matutom may ngalan sang  Dios kag sang Kordero nga nasulat sa ila mga agtang. Walay duhaduha nga subong isa ka Judiyo, nakita ni Juan ang ngalan sang Dios sa Hebreo nga letra, יהוה. * Paagi sa simbuliko nga pagkasulat sang ngalan sang Amay ni Jesus sa ila agtang, ginapahibalo sining mga pinat-inan sa tanan nga sila mga saksi ni Jehova, mga ulipon Niya. (Bugna 3:12) Ang pagkasulat man sang ngalan ni Jesus sa ila agtang nagapakita nga ginakilala nila nga sia ang nagapanag-iya sa ila. Sia ang ila pakaslan nga “bana,” kag sila ang iya palaabuton nga “nobya,” ‘isa ka bag-o nga tinuga’ nga nagaalagad sa Dios nga may paglaum sa langitnon nga kabuhi. (Efeso 5:22-24; Bugna 21:2, 9; 2 Corinto 5:17) Ang ila suod nga kaangtanan kay Jehova kag kay Jesucristo nagaapektar sa ila tanan nga panghunahuna kag mga buhat.

Nagaamba Sing Daw Isa ka Bag-o nga Ambahanon

6. Ano nga pag-amba ang nabatian ni Juan, kag paano niya ginlaragway ini?

⁶ Nahisanto sa sini, nagsugid si Juan: “Kag nabatian ko ang isa ka tunog gikan sa langit subong sang daganas sang madamo nga tubig kag subong sang tunog sang mabaskog nga daguob; kag ang tunog nga akon nabatian subong sang mga manug-amba nga nagadungan sa lanton sang arpa kag nagatokar sang ila mga arpa. Kag nagaamba sila sing daw isa ka bag-o nga ambahanon sa atubangan sang trono kag sa atubangan sang apat ka buhi nga tinuga kag sang mga gulang; kag wala sing makahibalo gid sini nga ambahanon kundi ang isa ka gatos kag kap-atan kag apat ka libo, nga ginbakal gikan sa duta.” (Bugna 14:2, 3) Indi katingalahan nga si Juan, sang mabatian ang 144,000 ka tingog nga naghiusa sa isa ka matahom nga koro, ginpahanumdom sia sang nagadaganas nga busay kag sang nagadaguhob nga daguob. Katahom gid sang maathag nga pag-akompanyar sang mga arpa! (Salmo 81:2) May koro ayhan sa duta nga makatupong sa pagkahalangdon sining dalayawon nga koro?

7. (a) Ano ang bag-o nga ambahanon sa Bugna 14:3? (b) Ngaa masiling nga ang ambahanon sa Salmo 149:1 bag-o sa aton adlaw?

⁷ Kag ano ining “bag-o nga ambahanon”? Subong sang nakita na naton sa pagpaathag sang Bugna 5:9, 10, may kaangtanan ang ambahanon sa mga katuyuan sang Ginharian ni Jehova kag sa iya dalayawon nga aman, paagi kay Jesucristo, sa paghimo sa espirituwal nga Israel nga “isa ka ginharian kag mga saserdote sa aton Dios.” Isa ini ka ambahanon sang pagdayaw kay Jehova nga nagapahayag sang bag-o nga mga butang nga iya ginahimo paagi sa Israel sang Dios kag para sa sini. (Galacia 6:16) Ang mga katapo sining espirituwal nga Israel nagasabat sa imbitasyon sang salmista: “Dayawa ninyo si Jah! Amba kamo kay Jehova sing bag-o nga ambahanon, sing pagdayaw sa iya sa kongregasyon sang mga balaan. Magkalipay ang Israel sa iya daku nga Magbubuhat, ang mga anak sang Sion—magkalipay sila sa ila Hari.” (Salmo 149:1, 2) Matuod, ginsulat ini nga mga pulong mga siglo na ang nagligad, apang sa aton adlaw, ginaamba ini upod ang bag-o nga paghangop. Ang Mesianiko nga Ginharian nabun-ag sang 1914. (Bugna 12:10) Sang 1919 ginsugdan sang katawhan ni Jehova sa duta ang pagbantala sing “pulong sang ginharian” upod ang bag-o nga kakugi. (Mateo 13:19) Napahulag sang tuigan nga teksto sang 1919 (Isaias 54:17) kag napalig-on sang pagpasag-uli sa ila sa espirituwal nga paraiso, nagsugod sila sadto nga tuig sa ‘pag-amba kay Jehova sing musika sa ila tagipusuon.’—Efeso 5:19.

8. Ngaa 144,000 lamang ang makatuon sang bag-o nga ambahanon sa Bugna 14:3?

⁸ Apang, ngaa ang 144,000 lamang ang makatuon sang ambahanon nga ginasambit sa Bugna 14:3? Bangod may kahilabtanan ini sa ila mga naeksperiensiahan subong pinili nga mga manunubli sang Ginharian sang Dios. Sila lamang ang gin-adoptar subong mga anak sang Dios kag ginhaplasan sing balaan nga espiritu. Sila lamang ang ginbakal gikan sa duta agod mangin bahin sang langitnon nga Ginharian, kag sila lamang ang “mangin mga saserdote . . . kag magagahom subong mga hari” upod kay Jesucristo sa isa ka libo ka tuig agod buligan ang katawhan nga mangin himpit. Sila lamang ang nakita nga “nagaamba sing daw isa ka bag-o nga ambahanon” sa atubangan mismo ni Jehova. * Bangod sining  tumalagsahon nga mga eksperiensia kag paglaum, pinasahi gid ang ila apresasyon sa Ginharian, amo nga maamba nila ini sa isa ka paagi nga indi mahimo sang iban.—Bugna 20:6; Colosas 1:13; 1 Tesalonica 2:11, 12.

9. Paano nagsabat ang dakung kadam-an sa pag-amba sang mga hinaplas, kag gani ano nga laygay ang gintuman nila?

⁹ Apang, may iban nga nagapamati kag nagasabat sa ila pag-amba. Sugod sang 1935 isa ka nagadamo nga dakung kadam-an sang iban nga mga karnero ang nakabati sa ila ambahanon sang kadalag-an kag napahulag sa pagbuylog sa ila sa pagbantala sang Ginharian sang Dios. (Juan 10:16; Bugna 7:9) Matuod, indi matun-an sing eksakto gid sini nga mga bag-uhan ang bag-o nga ambahanon nga ginaamba sang palaabuton nga mga manuggahom sang Ginharian sang Dios. Apang nagapalanog man sila sing matahom nga koro sang pagdayaw kay Jehova nga isa ka ambahanon nga nagadayaw kay Jehova bangod sa bag-o nga mga butang nga iya ginahimo. Sa amo ginatuman nila ang laygay sang salmista: “Mag-amba kamo kay Jehova sing isa ka bag-o nga ambahanon. Mag-amba kay Jehova, kamo tanan nga tawo sa duta. Mag-amba kamo kay Jehova, pakamaayuha ang iya ngalan. Sa adlaw-adlaw ibantala ninyo ang maayong balita sang iya pagluwas. Ipahayag ang iya himaya sa tunga sang mga pungsod, ang iya makatilingala nga binuhatan sa tanan nga tawo. Ipahanungod kay Jehova, O kamo nga mga pamilya sang katawhan, ipahanungod kay Jehova ang himaya kag kusog. Isiling sa mga pungsod: ‘Si Jehova nangin hari.’”—Salmo 96:1-3, 7, 10; 98:1-9.

10. Paano makaamba ang 144,000 “sa atubangan” sang simbuliko nga 24 ka gulang?

¹⁰ Paano ang 144,000 makaamba “sa atubangan” sang mga gulang, samtang ang 24 ka gulang amo man ang 144,000 sa ila mahimayaon nga posisyon sa langit? Sang maaga nga bahin sang adlaw sang Ginuo, ang mga “patay na nga nahiusa kay Cristo” ginbanhaw subong espiritu nga mga tinuga. Sa amo, ang matutom nga hinaplas nga mga Cristiano nga nagdaug na ato na karon sa langit, nga nagatuman sa simbuliko nga paagi sang mga hilikuton nga kaanggid sa ginahimo sang 24 ka dibisyon sang saserdotenhon nga mga gulang. Nalakip sila sa palanan-awon tuhoy sa langitnon nga organisasyon ni Jehova. (1 Tesalonica 4:15, 16; 1 Cronica 24:1-18; Bugna 4:4; 6:11) Busa, ang nagkalabilin sang 144,000 nga yari pa sa duta nagaamba sing bag-o nga ambahanon sa atubangan, ukon sa itululok sang, ila nabanhaw na nga mga kauturan sa langit.

11. Ngaa ang hinaplas nga mga dumalaug ginapatuhuyan nga amo ang 24 ka gulang kag amo man ang 144,000?

¹¹ Sa sini nga punto mahimo mamangkot man kita: Ngaa nga ining hinaplas nga mga dumalaug ginapatuhuyan nga amo ang 24 ka gulang kag amo man ang 144,000? Ini tungod ginatamod sang Bugna ining isa ka grupo gikan sa duha ka magkatuhay nga pagtamod. Ang 24 ka gulang pirme ginapakita sa ila pinakamataas nga posisyon sa palibot sang trono ni Jehova, nga nagalingkod subong mga hari kag mga saserdote sa langit. Ginasimbulo nila ang bug-os nga grupo sang 144,000 sa ila langitnon nga posisyon, bisan pa nga sa karon ang diutay nga nabilin sini yari pa sa duta. (Bugna 4:4, 10; 5:5-14; 7:11-13; 11:16-18) Apang, ang Bugna kapitulo 7, nagapadaku sang punto nga ang 144,000 ginbakal gikan sa katawhan, kag sang halangdon nga katuyuan ni Jehova nga pat-inan ang kompleto nga kadamuon sang indibiduwal nga espirituwal nga mga Israelinhon kag hatagan sing kaluwasan ang di-maisip nga dakung kadam-an. Ang Bugna kapitulo 14 nagahatag sing laragway nga nagapabakod sang punto nga ang kompleto nga hubon para sa Ginharian sang 144,000 ka indibiduwal nga dumalaug pagatipunon upod sa Kordero sa Bukid Sion. Ang mga kalipikasyon nga lab-uton agod maisip upod sa 144,000 ginasugid man, subong makita naton karon. *

Mga Sumulunod Sang Kordero

12. (a) Paano ginpadayon ni Juan ang iya paglaragway sa 144,000? (b) Sa ano nga kahulugan ang 144,000 ginapatuhuyan subong mga ulay?

¹² Sa pagpadayon sang iya paglaragway sa 144,000 nga “ginbakal gikan sa duta,” ginsugiran kita ni Juan: “Sila amo ang wala magdagta sang ila kaugalingon paagi sa mga babayi; sa katunayan, mga ulay sila. Sila  amo ang padayon nga nagasunod sa Kordero bisan diin sia magkadto. Ginbakal sila gikan sa katawhan subong una nga mga bunga sa Dios kag sa Kordero, kag wala sing kabutigan nga nasapwan sa ila baba; kay wala sila sing dagta.” (Bugna 14:4, 5) Ang katunayan nga ang 144,000 “mga ulay” wala nagakahulugan nga ang mga katapo sini nga hubon indi minyo subong tawo. Nagsulat si apostol Pablo sa mga Cristiano nga gintawag sa langit nga, bisan pa may mga bentaha ang Cristiano nga wala sing tiayon, ang pagminyo ginapasulabi sa idalom sang pila ka mga kahimtangan. (1 Corinto 7:1, 2, 36, 37) Ang nagapatuhay sini nga hubon amo ang espirituwal nga pagkaulay. Ginlikawan nila ang espirituwal nga panghilahi upod sa kalibutanon nga politika kag upod sa butig nga relihion. (Santiago 4:4; Bugna 17:5) Subong nakagon nga nobya ni Cristo, gintipigan nila ang ila kaugalingon nga putli, “walay dagta sa tunga sang kaliwatan nga tiko kag balingag.”—Filipos 2:15.

13. Ngaa ang 144,000 isa ka nagakabagay nga nobya para kay Jesucristo, kag paano sila “padayon nga nagasunod sa Kordero bisan diin sia magkadto”?

¹³ Dugang pa, “wala sing kabutigan nga nasapwan sa ila baba.” Sa sini, kaangay sila sang ila Hari, si Jesucristo. Subong himpit nga tawo, “wala sia sing nahimo nga sala, ukon may nasapwan nga limbong sa iya baba.” (1 Pedro 2:21, 22) Subong walay dagta kag wala nagabutig, nakahanda ang 144,000 subong putli nga nobya para sa daku nga Mataas nga Saserdote ni Jehova. Sang si Jesus yari sa duta, gin-agda niya ang mga may matarong nga tagipusuon nga magsunod sa iya. (Marcos 8:34; 10:21; Juan 1:43) Ang mga nagsabat nag-ilog sa iya dalanon sang pagkabuhi kag nagtuman sa iya mga panudlo. Sa amo, sa tion sang ila dutan-on nga dalanon, sila “padayon nga nagasunod sa Kordero bisan diin sia magkadto” samtang ginatuytuyan niya sila sa paglakat sa kalibutan ni Satanas.

14. (a) Paano masiling nga ang 144,000 “una nga mga bunga sa Dios kag sa Kordero”? (b) Sa ano nga kahulugan ang dakung kadam-an una man nga mga bunga?

¹⁴ Ang 144,000 “ginbakal gikan sa duta,” “ginbakal gikan sa katawhan.” Ginaadoptar sila subong mga anak sang Dios, kag sa tapos sang ila pagkabanhaw, indi na sila mangin unod-kag-dugo nga mga tawo lamang. Subong sang ginsambit sa bersikulo 4, sila mangin “una nga mga bunga sa Dios kag sa Kordero.” Matuod, sang nahauna nga siglo, si Jesus amo “ang nahauna nga bunga sa mga nagtulog sa kamatayon.” (1 Corinto 15:20, 23) Apang ang 144,000 amo ang “sahi sang nahauna nga mga bunga” sa di-himpit nga katawhan, nga ginbakal paagi sa halad ni Jesus. (Santiago 1:18) Apang, ang pagtipon sa mga bunga gikan sa katawhan indi matapos sa ila. Ginpakita na sang tulun-an sang Bugna ang pagtipon sa di-maisip nga dakung kadam-an nga nagasinggit sa mabaskog nga tingog: “Ang kaluwasan  utang namon sa amon Dios, nga nagalingkod sa trono, kag sa Kordero.” Ining dakung kadam-an makalampuwas sa dakung kapipit-an, kag samtang padayon sila nga narepreskuhan sang “tuburan sang mga tubig sang kabuhi,” mangin himpit sila sa duta. Pagkatapos sang dakung kapipit-an, pagahaw-asan ang Hades, kag di-maisip nga minilyon ka iban pa nga mga tawo ang banhawon kag makatigayon sing kahigayunan sa pag-inom gikan sa sina gihapon nga mga tubig sang kabuhi. Ginahunahuna ini, husto nga tawgon ang dakung kadam-an nga una nga mga bunga sa iban nga mga karnero—sila ang una nga ‘naglaba sang ila malaba nga mga panapton kag ginpaputi ini sa dugo sang Kordero’ nga may paglaum nga mabuhi sing dayon sa duta.—Bugna 7:9, 10, 14, 17; 20:12, 13.

15. Ano ang pag-anggid sang tatlo ka magkatuhay nga una nga mga bunga kag sang mga kapiestahan nga ginsaulog anay sa idalom sang Mosaiko nga Kasuguan?

¹⁵ Ining tatlo ka una nga mga bunga (si Jesucristo, ang 144,000, kag ang dakung kadam-an) talalupangdon nga nagaanggid sa mga kapiestahan nga ginsaulog anay suno sa dumaan nga Mosaiko nga Kasuguan. Kon Nisan 16, sa tion sang Piesta Sang Tinapay nga Walay Lebadura, isa ka binugkos sang una nga mga bunga sang inani nga sebada ang ginahalad kay Jehova. (Levitico 23:6-14) Ginbanhaw si Jesus gikan sa minatay sang Nisan 16. Sa ika-50 nga adlaw halin sa Nisan 16, sa ikatlo nga bulan, ginasaulog sang mga Israelinhon ang piesta sang pag-ani sa una nga gulang nga mga bunga sang trigo. (Exodo 23:16; Levitico 23:15, 16) Gintawag ini nga kapiestahan nga Pentecostes (gikan sa Griego nga tinaga nga nagakahulugan “ikakalim-an”), kag ang una nga mga katapo sang 144,000 ginhaplasan sing balaan nga espiritu sang Pentecostes 33 C.E. Sa katapusan, sa ikapito nga bulan sa tapos matipon ang tanan nga inani, ginasaulog ang Piesta Sang mga Payagpayag, isa ka tion sang malipayon nga pagpasalamat nga sa amo nga tion ang mga Israelinhon isa ka semana nga nagapuyo sa mga payagpayag nga nahuman, lakip sa iban nga mga butang, sang mga paklang sang palma. (Levitico 23:33-43) Sing kaanggid man, ang dakung kadam-an, nga bahin sang daku nga pagtipon, nagapasalamat sa atubangan sang trono nga may “mga paklang sang palma sa ila mga kamot.”—Bugna 7:9.

 Nagabantala Sing Walay Katapusan nga Maayong Balita

16, 17. (a) Nakita ni Juan ang isa ka anghel nga nagalupad sa diin, kag ano ang ginbantala sang anghel? (b) Sin-o ang nadalahig sa pagbantala sang Ginharian nga hilikuton, kag ano nga mga eksperiensia ang nagapakita sini?

¹⁶ Amo sini ang masunod nga ginsulat ni Juan: “Kag nakita ko ang isa pa ka anghel nga nagalupad sa tunga sang kalangitan, kag may yara sia walay katapusan nga maayong balita nga ipahayag subong makalilipay nga balita sa mga nagapuyo sa duta, kag sa tagsa ka pungsod kag tribo kag hambal kag katawhan, nga nagasiling sa mabaskog nga tingog: ‘Kahadluki ninyo ang Dios kag hatagi sia sing himaya, bangod nag-abot na ang oras sang iya paghukom, gani simbaha ninyo ang Isa nga naghimo sang langit kag sang duta kag dagat kag mga tuburan sang tubig.’” (Bugna 14:6, 7) Nagalupad ang anghel “sa tunga  sang kalangitan,” diin nagalupad ang mga pispis. (Ipaanggid ang Bugna 19:17.) Amo kon ngaa, mabatian ang iya tingog sa bug-os nga kalibutan. Daug pa sang bug-os kalibutan nga pagbantala sining anghel ang pinakamalayo nga malab-utan sang bisan ano nga balita sa telebisyon!

¹⁷ Ginapalig-on ang tanan nga kahadlukan, indi ang mapintas nga sapat kag ang larawan sini, kundi si Jehova, nga ang iya gahom walay kaanggid sa bisan anong simbuliko nga sapat nga ginakontrol ni Satanas. Si Jehova ang nagtuga sang langit kag duta, kag tion na karon nga hukman niya ang duta! (Ipaanggid ang Genesis 1:1; Bugna 11:18.) Sang yari si Jesus sa duta, nagtagna sia tuhoy sa aton adlaw: “Kag ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 24:14) Ginatuman sang kongregasyon sang hinaplas nga mga Cristiano ini nga sugo. (1 Corinto 9:16; Efeso 6:15) Ginapakita diri sang Bugna nga nadalahig man ang di-kitaon nga mga anghel sa sining pagbantala nga hilikuton. Pirme nagakatabo nga daw maathag gid nga ginatuytuyan sang anghel ang isa sa mga Saksi ni Jehova nga duawon ang puluy-an sang isa ka may problema nga tawo nga nagakalangkag kag nagapangamuyo pa gani nga hatagan sia sing espirituwal nga bulig!

18. Suno sa anghel nga nagalupad sa tunga sang kalangitan, nag-abot ang oras para sa ano, kag sin-o ang magahimo sing dugang pa nga mga pahibalo?

¹⁸ Subong sang ginbantala sang anghel nga nagalupad sa tunga sang kalangitan, nag-abot na ang oras sa paghukom. Ano ang ihukom sang Dios karon? Makibot gid ang makabati sa mga pahibalo nga himuon karon sang ikaduha, ikatlo, ikap-at, kag ikalima nga anghel.—Jeremias 19:3.

[Mga nota]

[Mga Pamangkot sa Pagtinuon]

[Mga Retrato sa pahina 202, 203]

144,000

24 ka gulang

Mga kaupod nga manunubli sang Kordero, nga si Cristo Jesus, nga ginatamod gikan sa duha ka magkatuhay nga pagtamod