Kapitulo 38

Dayawa si Jah Tungod Sang Iya mga Paghukom!

1. Ano nga mga pulong ang nabatian ni Juan “subong sang isa ka mabaskog nga tingog sang isa ka daku nga kadam-an sa langit”?

 WALA na ang Babilonia nga Daku! Makalilipay gid ini nga balita. Indi katingalahan nga si Juan nakabati sing malipayon nga pagtuaw sang pagdayaw sa langit! “Sa tapos sini nabatian ko ang subong sang isa ka mabaskog nga tingog sang isa ka daku nga kadam-an sa langit. Nagsiling sila: ‘Hallelujah! Ang kaluwasan kag himaya kag gahom iya sang aton Dios bangod ang iya mga paghukom matuod kag matarong. Kay ginhukman niya ang dakung makihilawason nga babayi nga nagpalain sang duta bangod sang iya pagpakighilawas, kag gintimalos niya ang dugo sang mga ulipon niya gikan sa iya kamot.’ Kag sa gilayon sa ikaduha nga tion nagsiling sila: ‘Hallelujah! Kag ang aso gikan sa iya padayon nga nagatub-ok tubtob sa walay katubtuban.’”—Bugna 19:1-3.

2. (a) Ano ang kahulugan sang tinaga nga “Hallelujah,” kag ano ang ginapakita nga nabatian ini ni Juan sing makaduha tubtob sa sini nga punto? (b) Sin-o ang magabaton sing himaya sa paglaglag sa Babilonia nga Daku? Ipaathag.

² Hallelujah sa pagkamatuod! Nagakahulugan ini nga tinaga sing “Dayawa ninyo si Jah,” kay ang “Jah” amo ang pinalip-ot nga porma sang balaan nga ngalan nga Jehova. Ginapahanumdom kita sini sang laygay sang salmista: “Ang tagsa ka butang nga may ginhawa—magdayaw kay Jah. Dayawa ninyo si Jah!” (Salmo 150:6) Ang pagkabati ni Juan sa malipayon nga koro sa langit nga nagaamba sing “Hallelujah!” sing makaduha tubtob sa sini nga punto sa Bugna nagapakita nga padayon nga ginabugna ang kamatuoran gikan sa Dios. Ang Dios sang Cristiano nga Griegong Kasulatan amo man ang Dios sang nauna nga Hebreong Kasulatan, kag si Jehova ang iya ngalan. Ginhukman na karon kag ginlaglag sang Dios nga nagpahanabo sang pagkapukan sang dumaan nga Babilonia ang Babilonia nga Daku. Dapat ipadungog sa iya ang tanan nga himaya bangod sining daku nga hinimuan! Sa iya naghalin ang gahom nga nagmaniobra sang pagkapukan sang Babilonia nga Daku, indi sa mga pungsod nga iya gingamit subong instrumento sa paghapay sa sini. Kay Jehova lamang dapat ipadungog ang pagluwas.— Isaias 12:2; Bugna 4:11; 7:10, 12.

3. Ngaa takus gid ang dakung makihilawason nga babayi sa ginhukom sa iya?

³ Ngaa takus gid ang dakung makihilawason nga babayi sa sining paghukom? Suno sa kasuguan nga ginhatag ni Jehova kay Noe—kag paagi kay Noe sa tanan nga katawhan—kamatayon ang dapat ipamatbat sa mapintas nga pagpaagay sing dugo. Ginsambit ini liwat sa Kasuguan sang Dios sa Israel. (Genesis 9:6; Numeros 35:20, 21) Dugang pa, sa idalom sang Mosaiko nga Kasuguan, kamatayon ang nagakadapat nga silot sa pisikal kag espirituwal nga panghilahi. (Levitico 20:10; Deuteronomio 13:1-5) Sa sulod sang linibo ka tuig, ang Babilonia nga Daku nakasala sa dugo, kag isa sia ka malaut nga makihilawason. Halimbawa, bangod sang pagsulundan sang Iglesia Katolika Romana nga nagadumili sa iya mga pari sa pagpangasawa, madamo sa ila ang nakakomiter sing imoralidad, kag madamo man sa ila ang nalatnan karon sing AIDS. (1 Corinto 6:9, 10; 1 Timoteo 4:1-3) Apang ang iya daku nga mga sala, nga “nagtangkas na tubtob sa langit,” amo ang iya makangilil-ad nga mga buhat sang espirituwal nga pagpakighilawas—paagi sa pagtudlo sing kabutigan kag pagsuporta sa malaut nga mga politiko. (Bugna 18:5) Bangod napadapat na sa iya ang silot, ang langitnon nga kadam-an nagapalanog karon sing ikaduha nga Hallelujah.

4. Ano ang ginasimbulo sang katunayan nga ang aso gikan sa Babilonia nga Daku “nagatub-ok tubtob sa walay katubtuban”?

⁴ Ang Babilonia nga Daku ginasunog kaangay  sang isa ka nalutos nga siudad, kag ang aso gikan sa iya “nagatub-ok tubtob sa walay katubtuban.” Kon ang literal nga siudad ginasunog sang nagabihag nga mga kasuldadusan, ang aso padayon nga nagatub-ok tubtob mainit pa ang mga abo. Ang bisan sin-o nga magatinguha sa pagpatindog sini liwat samtang nagaaso pa ini pat-od nga mapaso sang nagabaga pa nga kagulub-an. Sanglit ang aso gikan sa Babilonia nga Daku magatub-ok “tubtob sa walay katubtuban” subong palatandaan nga ang paghukom sa iya amo na ang katapusan, wala sing bisan sin-o ang makapasag-uli sa sining malaut nga siudad. Madula na sing dayon ang butig nga relihion. Hallelujah, sa pagkamatuod!—Ipaanggid ang Isaias 34:5, 9, 10.

5. (a) Ano ang ginahimo kag ginasiling sang 24 ka gulang kag sang apat ka buhi nga tinuga? (b) Ngaa mas malulot ang koro sang Hallelujah sangsa mga koro sang Hallelujah nga ginaamba sa mga simbahan sang Cristiandad?

⁵ Sa nauna nga palanan-awon, nakita ni Juan sa  palibot sang trono ang apat ka buhi nga tinuga, upod sa 24 ka gulang nga nagalaragway sa mga manunubli sang Ginharian sa ila mahimayaon nga posisyon sa langit. (Bugna 4:8-11) Nakita niya sila liwat karon samtang ginapaguob nila ang ikatlo nga Hallelujah bangod sa kalaglagan sang Babilonia nga Daku: “Kag ang duha ka pulo kag apat ka gulang kag ang apat ka buhi nga tinuga nagluhod kag nagsimba sa Dios nga nagalingkod sa trono, kag nagsiling: ‘Kabay pa! Hallelujah!’” (Bugna 19:4) Kon amo, ining daku nga pagkoro sing Hallelujah isa ka dugang, sa “bag-o nga ambahanon” sang pagdayaw sa Kordero. (Bugna 5:8, 9) Ginaamba nila karon ang halangdon nga ambahanon sang kadalag-an, nga ginapatuhoy ang tanan nga himaya sa Soberano nga Ginuong Jehova bangod sang iya bug-os nga kadalag-an batok sa dakung makihilawason nga babayi, ang Babilonia nga Daku. Mas malulot gid ini nga pag-amba sing Hallelujah sangsa bisan ano nga pag-amba sang koro sing Hallelujah sa mga simbahan sang Cristiandad, diin ginapakahuy-an ukon ginatamay si Jehova, ukon si Jah. Ining salimpapaw nga pag-amba nga nagapakahuya sa ngalan ni Jehova pahipuson na karon sing dayon!

6. Kay sin-o “tingog” ang nabatian, ano ang ginasugo sini, kag sin-o ang nagaambit sa pagsabat?

⁶ Sang 1918, ginsugdan ni Jehova ang pagpadya sa ‘mga nagakahadlok sa iya ngalan, ang mga kubos kag ang mga kadalagkuan’—ang una sa sini amo ang hinaplas nga mga Cristiano nga napatay sing matutom, nga ginbanhaw na niya kag ginpapuesto sa langitnon nga mga posisyon sang 24 ka gulang. (Bugna 11:18) May iban pa nga nagbuylog sa ila sa pag-amba sing Hallelujah, kay nagsugid si Juan: “May tingog man nga naggikan sa trono kag nagsiling: ‘Dayawa ninyo ang aton Dios, tanan kamo nga mga ulipon niya, nga nagakahadlok sa iya, ang mga kubos kag ang mga kadalagkuan.’” (Bugna 19:5) “Tingog” ini sang Humalambal ni Jehova, ang iya mismo Anak, si Jesucristo, nga nagatindog “sa tunga malapit sa trono.” (Bugna 5:6) Indi lamang sa langit kundi diri man sa duta, “tanan kamo nga mga ulipon niya” nagabuylog sa pag-amba, nga ginapangunahan sa duta sang hinaplas nga Juan nga klase. Malipayon gid sila nga nagabuylog sa pagtuman sa sugo nga: “Dayawa ninyo ang aton Dios”!

7. Kon malaglag na ang Babilonia nga Daku, sin-o ang magadayaw kay Jehova?

⁷ Huo, lakip man sa sini nga mga ulipon ang dakung kadam-an. Halin sang 1935 nagsugod sila sa paggua gikan sa Babilonia nga Daku kag naeksperiensiahan nila ang katumanan sang saad sang Dios: “Pakamaayuhon niya ang mga nagakahadlok kay Jehova, ang mga magagmay kag ang mga dalagku man.” (Salmo 115:13) Kon malaglag na ang tulad-makihilawason nga Babilonia, minilyon sa ila ang magabuylog sa ‘pagdayaw sa aton Dios’—upod sa Juan nga klase kag sa tanan nga langitnon nga hubon. Sa ulihi, ang mga banhawon sa duta, prominente man ukon indi sang una, walay duhaduha nga magaamba sing dugang pa nga Hallelujah kon mahibal-an na nila nga ang Babilonia nga Daku wala na sing dayon. (Bugna 20:12, 15) Ang tanan nga kadayawan dapat ipatuhoy kay Jehova bangod sang iya daku gid nga kadalag-an batok sa madugay na nga makihilawason nga babayi!

8. Ano nga pagpalig-on ang ginahatag karon sa aton sang langitnon nga mga koro sang pagdayaw nga nasaksihan ni Juan, antes laglagon ang Babilonia nga Daku?

⁸ Nagapalig-on gid ini sa aton tanan nga magpakigbahin sing bug-os sa hilikuton nga ginapahimo karon sang Dios sa aton! Kabay nga ihugod sang tanan nga alagad ni Jah ang ila tagipusuon kag kalag nga ipahayag karon ang mga paghukom sang Dios, kag ang daku nga paglaum sa Ginharian, antes pukanon kag laglagon sing bug-os ang Babilonia nga Daku.—Isaias 61:1-3; 1 Corinto 15:58.

‘Hallelujah—Si Jehova Hari!’

9. Ngaa kabaskog gid kag katahom sang tunog sang katapusan nga Hallelujah?

⁹ May dugang pa nga mga rason sa pagkasadya, subong sang ginasugid sa aton ni Juan: “Kag nabatian ko ang subong sang tingog sang isa ka daku nga kadam-an kag subong sang daganas sang madamo nga tubig kag subong sang tunog sang mabaskog nga mga daguob. Nagsiling sila: ‘Hallelujah, bangod si Jehova nga aton Dios, ang Labing Gamhanan, nagsugod sa paggahom subong hari.’” (Bugna 19:6) Ining katapusan nga Hallelujah amo ang nagahimo sa proklamasyon nga kuadrado, ukon proporsion. Isa ini ka daku nga langitnon nga tunog, nga labi kahalangdon sangsa bisan ano nga koro sang tawo, labi ka makatilingala sangsa bisan ano nga busay sa duta, kag labi ka makapulunaw sangsa bisan ano nga dinaguob sa duta. Ang linaksa ka tingog sa langit nagahugyaw  sa kamatuoran nga “si Jehova nga aton Dios, ang Labing Gamhanan, nagsugod sa paggahom subong hari.”

10. Sa ano nga kahulugan masiling nga si Jehova nagasugod sa paggahom subong hari sa tapos mahapay ang Babilonia nga Daku?

¹⁰ Apang, ngaa magasugod si Jehova sa paggahom subong hari? Sang nagligad nga mga milenyo, nagsiling ang salmista: “Ang Dios ang akon Hari halin pa sang dumaan nga panahon.” (Salmo 74:12) Ang pagkahari ni Jehova dumaan na bisan sadto, gani ngaa nga ang bug-os uniberso nga koro nag-amba nga “si Jehova . . . nagsugod sa paggahom subong hari”? Bangod kon malaglag na ang Babilonia nga Daku, wala na si Jehova sing matinaastaason nga karibal nga magaagaw sang pagtuman sa iya bilang ang Bug-os Uniberso nga Soberano. Wala na sing butig nga relihion nga magabuyok sa mga manuggahom sang duta sa pagpamatok sa iya. Sang mapukan ang dumaan nga Babilonia gikan sa paggahom sa bug-os nga kalibutan, nabatian sang Sion ang madaugon nga proklamasyon: “Ang imo Dios nangin hari!” (Isaias 52:7) Sa tapos mabun-ag ang Ginharian sang 1914, nagsiling ang 24 ka gulang: “Nagapasalamat kami sa imo, Jehova nga Dios . . . bangod gingamit mo ang imo daku nga gahom kag nagsugod ka sa paggahom subong hari.” (Bugna 11:17) Karon, sa tapos mahapay ang Babilonia nga Daku, ang singgit ginabungat liwat: “Si Jehova . . . nagsugod sa paggahom subong hari.” Wala na sing hinimo sang tawo nga diosdios nga mabilin nga magapamatok sa pagkasoberano sang matuod nga Dios nga si Jehova!

 Malapit Na ang Kasal Sang Kordero!

11, 12. (a) Paano gintawag sang dumaan nga Jerusalem ang dumaan nga Babilonia, nga nagahatag sing ano nga sulundan tuhoy sa Bag-ong Jerusalem kag sa Babilonia nga Daku? (b) Sa pagdaug batok sa Babilonia nga Daku, ano ang ginaamba kag ginapahibalo sang langitnon nga panong?

¹¹ “Ikaw nga babayi nga kaaway ko”! Amo sini ang pagtawag sang Jerusalem, ang duog nga nahamtangan anay sang templo para sa pagsimba kay Jehova, sa idolatroso nga Babilonia. (Miqueas 7:8) May rason man, “ang balaan nga siudad, ang Bag-ong Jerusalem,” nga nahuman sang nobya nga may 144,000 ka katapo, nga tawgon ang Babilonia nga Daku subong iya kaaway. (Bugna 21:2) Apang sa katapusan napahamak, nalaglag kag nahapay ang dakung makihilawason nga babayi. Ang iya mga espiritista kag mga astrologo wala makaluwas sa iya. (Ipaanggid ang Isaias 47:1, 11-13.) Isa gid ini ka daku nga kadalag-an para sa matuod nga pagsimba!

¹² Bangod wala na ang makangilil-ad nga makihilawason nga babayi, ang Babilonia nga Daku, sarang na karon masentro ang igtalupangod sa ulay kag putli nga nobya sang Kordero! Busa, malipayon nga nagaamba ang langitnon nga panong bilang pagdayaw kay Jehova: “Magkasadya kita kag magkalipay sing daku, kag maghimaya sa iya, bangod nag-abot na ang kasal sang Kordero kag nakahanda na ang iya asawa. Huo, gintugutan sia nga mapanaptan sang masilaw, matinlo kag pino nga lino, kay ginalaragway sang pino nga lino ang matarong nga mga binuhatan sang mga balaan.”—Bugna 19:7, 8.

13. Ano nga paghanda para sa kasal sang Kordero ang nagakatabo sa sulod sang mga siglo?

¹³ Sa sulod sang mga siglo, mahigugmaon nga ginhandaan ni Jesus ini nga kasal sa langit. (Mateo 28:20; 2 Corinto 11:2) Ginatinluan niya ang 144,000 sang espirituwal nga Israel agod nga “mapaatubang niya sa iya kaugalingon ang kongregasyon nga may katahom, nga wala sing higko ukon kurinot ukon bisan anong butang nga kaangay sini, kundi agod mangin balaan ini kag wala sing depekto.” (Efeso 5:25-27) Sa katuyuan nga matigayon ang “padya nga langitnon nga pagtawag sang Dios,” dapat ubahon sang tagsa ka hinaplas nga Cristiano ang daan nga personalidad upod ang mga buhat sini, isuklob ang bag-o nga Cristiano nga personalidad, kag maghimo sing matarong nga mga buhat sing “bug-os kalag subong nga kay Jehova.”—Filipos 3:8, 13, 14; Colosas 3:9, 10, 23.

14. Paano nagtinguha si Satanas nga dagtaan ang palaabuton nga mga katapo sang asawa sang Kordero?

¹⁴ Halin sang Pentecostes 33 C.E., ginagamit ni Satanas ang Babilonia nga Daku subong iya kasangkapan sa pagdagta sa palaabuton nga mga katapo sang asawa sang Kordero. Sang nagahingapos ang nahauna nga siglo, nagsab-ug sia sing mga binhi sang Babiloniko nga relihion sa kongregasyon. (1 Corinto 15:12; 2 Timoteo 2:18; Bugna 2:6, 14, 20) Ginlaragway ni apostol Pablo ang mga nagalaglag sang pagtuo paagi sa sini nga mga pulong: “Kay ini nga mga tawo butig nga mga apostoles, madaya nga mga manugpangabudlay, nga ginahimo ang ila kaugalingon nga mga apostoles ni Cristo. Kag indi ini katingalahan, kay si Satanas mismo padayon nga nagahimo sang iya kaugalingon nga anghel sang kapawa.” (2 Corinto 11:13, 14) Sang nagsunod nga mga siglo, ang apostata nga Cristiandad, kaangay sang nabilin nga bahin sang Babilonia nga Daku, daw subong nga nagpanapot sing manggad kag pribilehiyo, “purpura kag eskarlata, . . . bulawan kag malahalon nga bato kag mga perlas.” (Bugna 17:4) Ang iya klero kag mga papa nakig-upod sa uhaw sa dugo nga mga emperador, subong ni Constantino kag ni Carlomagno. Wala gid sia mapanaptan sing “matarong nga mga binuhatan sang mga balaan.” Subong huwad nga nobya, isa gid sia ka obra-maestra sang paglimbong ni Satanas. Sa katapusan, madula na sia sing dayon!

Nakahanda Na ang Asawa Sang Kordero

15. Paano ginahimo ang pagpat-in, kag ano ang ginakinahanglan sa isa ka hinaplas nga Cristiano?

¹⁵ Gani karon, pagligad sang halos 2,000 ka tuig, nakahanda na ang tanan nga 144,000 sang nobya nga klase. Apang sa ano nga punto sang tion masiling nga ‘nakahanda na ang asawa sang Kordero’? Sing dalayon, kutob sang Pentecostes 33 C.E. padayon, ang nagatuo nga mga hinaplas ‘ginpat-inan sing ginsaad nga balaan nga espiritu,’ para sa nagapakari nga “adlaw sang paghilway paagi sa gawad.” Subong sang ginpabutyag ni apostol Pablo, ang Dios ‘nagbutang sang iya pat-in sa amon kag ginhatagan kami sing kalig-unan sang kon ano ang magaabot, nga amo, ang espiritu, sa amon tagipusuon.’ (Efeso 1:13; 4:30; 2 Corinto 1:22) Ang tagsa ka hinaplas  nga Cristiano “gintawag kag pinili,” kag napamatud-an niya ang iya kaugalingon nga “matutom.”—Bugna 17:14.

16. (a) San-o natapos ang pagpat-in kay apostol Pablo, kag paano naton nahibal-an? (b) San-o ang asawa sang Kordero “nakahanda na” sing bug-os?

¹⁶ Pagligad sang mga dekada nga pagtilaw kay Pablo, nakasiling sia: “Nakapakig-away na ako sang maayo nga pag-away, nadalagan ko na ang dalaganon tubtob sa katapusan, natuman ko na ang pagtuo. Kutob karon natigana sa akon ang purongpurong sang pagkamatarong, nga ihatag sa akon sang Ginuo, ang hukom nga matarong, subong padya sa sina nga adlaw, apang indi lamang sa akon kundi sa tanan man nga nagahigugma sang iya pagpahayag.” (2 Timoteo 4:7, 8) Daw natapos na ang pagpat-in kay apostol Pablo, bisan pa undanon pa sia kag magaatubang pa sa kamatayon subong isa ka martir. Sing kaanggid man, magaabot ang tion nga ang tanan nga nagkalabilin sa duta sang 144,000 mapat-inan na sing indibiduwal subong iya ni Jehova. (2 Timoteo 2:19) Sa amo sini nga tion masiling nga ang asawa sang Kordero nakahanda na sing bug-os—kay ang kalabanan sang 144,000 nakabaton na sang ila langitnon nga padya kag ang mga nabilin pa sa duta naaprobahan na kag napat-inan subong mga matutom.

17. San-o mahimo matabo ang kasal sang Kordero?

¹⁷ Sa sini nga punto sa orasan ni Jehova, kon matapos na ang pagpat-in sa 144,000, buy-an sang mga anghel ang apat ka hangin sang dakung kapipit-an. (Bugna 7:1-3) Una, laglagon ang tulad-makihilawason nga babayi nga Babilonia nga Daku. Nian gilayon nga pahanabuon sang madaugon nga si Cristo ang Armagedon agod laglagon ang nabilin nga bahin sang organisasyon ni Satanas sa duta kag, subong katapusan, itagbong sa kadadalman si Satanas kag ang iya mga demonyo. (Bugna 19:11–20:3) Kon may hinaplas pa nga nabilin sa duta, walay duhaduha nga mabaton man nila ang ila langitnon nga padya kon matapos na ni Cristo ang iya pagdaug kag magabuylog sila sa ila mga kaupod sa nobya nga klase. Nian, sa tion nga gintalana sang Dios, hiwaton na ang kasal sang Kordero!

18. Paano ang Salmo 45 nagapamatuod sa paagisod nga matabo may kaangtanan sa kasal sang Kordero?

¹⁸ Ginalaragway sang matagnaon nga rekord sa Salmo 45 kon ano ang paagisod nga matabo. Una, magasalakay ang nagalingkod sa trono nga Hari agod daugon ang iya mga kaaway. (Bersikulo 1-7) Pagkatapos, hiwaton ang kasal, samtang ang langitnon nga nobya ginaserbehan sa duta sang iya kaupod nga mga dalaga, ang dakung kadam-an. (Bersikulo 8-15) Masunod ang kasal mangin mabungahon, kon ang ginbanhaw nga katawhan mangin himpit na sa idalom sang pag-atipan sang “mga prinsipe sa bug-os nga duta.” (Bersikulo 16, 17) Matahom gid nga mga pagpakamaayo ang mangin resulta sang kasal sang Kordero!

 Malipayon ang mga Gin-agda

19. Ano ang ikap-at sa pito ka kalipay nga ginasambit sa Bugna, kag sin-o ang nagapakigbahin sa sining partikular nga kalipay?

¹⁹ Ginsulat karon ni Juan ang ikap-at sa pito ka kalipay sa Bugna: “Kag nagsiling sia [ang anghel nga nagabugna sini nga mga butang kay Juan] sa akon: ‘Isulat mo: Malipayon ang mga gin-agda sa panihapon sang kasal sang Kordero.’ Nagsiling man sia sa akon: ‘Amo ini ang matuod nga pinamulong sang Dios.’” (Bugna 19:9) Ang mga inagda sa “panihapon sang kasal sang Kordero” amo ang mga katapo sang nobya nga klase. (Ipaanggid ang Mateo 22:1-14.) Nagakalipay ang tanan nga katapo sang hinaplas nga nobya nga gin-agda sila. Ang kalabanan sang inagda nakakayab na sa langit, ang duog nga hiwatan sang panihapon sang kasal. Malipayon man ang mga nabilin pa sa duta nga gin-agda sila. Sigurado na ang ila duog sa panihapon sang kasal. (Juan 14:1-3; 1 Pedro 1:3-9) Kon mabanhaw na sila padulong sa langit, ang bug-os kag nahiusa nga nobya magapakigbahin kaupod sang Kordero sa sinang labing makalilipay nga kasal.

20. (a) Ano ang kahulugan sang mga pulong: “Amo ini ang matuod nga pinamulong sang Dios”? (b) Paano naapektuhan si Juan sang ginhambal sang anghel, kag ano ang ginhimo sang anghel?

²⁰ Nagdugang pa ang anghel nga “amo ini ang matuod nga pinamulong sang Dios.” Ining tinaga nga “matuod” ginbadbad gikan sa Griego nga tinaga nga a·le·thi·nosʹ kag nagakahulugan sing “tunay” ukon “masaligan.” Bangod si Jehova gid ang ginhalinan sini nga mga pulong, matuod ini kag masaligan. (Ipaanggid ang 1 Juan 4:1-3; Bugna 21:5; 22:6.) Subong isa nga inagda sa sinalusalo sang kasal, pat-od gid nga nalipay si Juan sang mabatian niya ini kag samtang ginabinagbinag niya ang mga pagpakamaayo nga nagahulat sa nobya nga klase. Ang matuod, natandog gid sia, amo kon ngaa ginlaygayan sia sang anghel, subong sang ginasugid ni Juan: “Nian nagluhod ako sa iya tiilan sa pagsimba sa iya. Apang nagsiling sia sa akon: ‘Maghalong ka! Indi ina paghimua! Masigkaulipon mo ako kag sang imo mga kauturan nga may hilikuton sa pagpanaksi tuhoy kay Jesus. Simbaha ang Dios.’”—Bugna 19:10a.

21. (a) Ano ang ginapahayag sang Bugna tuhoy sa mga anghel? (b) Ano nga panimuot ang dapat ipakita sang mga Cristiano sa mga anghel?

²¹ Sa bug-os nga tulun-an sang Bugna talalupangdon nga panaksi ang ginahatag tuhoy sa katutom kag kaukod sang mga anghel. Isa sila sa alagyan nga ginagamit sa pagpahayag sing kamatuoran. (Bugna 1:1) Nagapanghikot sila upod sa mga tawo sa pagbantala sing maayong balita kag sa pagbubo sang simbuliko nga mga kalalat-an. (Bugna 14:6, 7; 16:1) Nagpakig-away sila upod kay Jesus sa pagtagbong kay Satanas kag sa iya mga anghel gikan sa langit, kag magapakig-away sila liwat upod sa iya sa Armagedon. (Bugna 12:7; 19:11-14) Sa pagkamatuod, sarang sila makatindog sa atubangan mismo ni Jehova. (Mateo 18:10; Bugna 15:6) Walay sapayan sini, mapainubuson sila nga mga ulipon sang Dios. Ang putli nga pagsimba wala nagalakip sa pagsimba sa mga anghel ukon sa bisan relatibo nga pagsimba, nga nagapatuhoy sa pagsimba sa Dios paagi sa “santo” ukon anghel. (Colosas 2:18) Si Jehova lamang ang ginasimba sang mga Cristiano, kag nagapangamuyo sila sa iya sa ngalan ni Jesus.—Juan 14:12, 13.

Ang Papel ni Jesus sa Tagna

22. Ano ang ginsiling sang anghel kay Juan, kag ano ang kahulugan sini?

²² Nian nagsiling ang anghel: “Kay ang pagpanaksi tuhoy kay Jesus amo ang nagainspirar sa pagpanagna.” (Bugna 19:10b) Paano? Nagakahulugan ini nga ang tanan nga inspirado nga tagna ginbungat bangod kay Jesus kag sang papel niya sa mga katuyuan ni Jehova. Ang una nga tagna sa Biblia nagsaad sang pagkari sang isa ka binhi. (Genesis 3:15) Ina nga Binhi amo si Jesus. Pasad sa sini nga saad, daw subong nga nagtukod ang masunod nga mga bugna sing isa ka daku nga tinukod sang matagnaon nga kamatuoran. Ginsilingan ni apostol Pedro ang nagtuo nga Gentil nga si Cornelio: “Ang tanan nga manalagna nagapanaksi tuhoy sa iya [Jesus].” (Binuhatan 10:43) Pagligad sang mga 20 ka tuig, nagsiling si apostol Pablo: “Bisan pa daw ano kadamo ang mga saad sang Dios, nangin Huo ini paagi sa iya [Jesus].” (2 Corinto 1:20) Pagligad pa sang 43 ka tuig, ginpahanumdom kita ni Juan: “Ang kamatuoran nagluntad paagi kay Jesucristo.”—Juan 1:17.

23. Ngaa ang mataas nga posisyon kag awtoridad ni Jesus wala nagabuhin sang pagsimba naton kay Jehova?

²³ Ginabuhinan bala sini ang aton pagsimba kay Jehova? Wala. Dumduma ang nagapaandam nga laygay sang anghel: “Simbaha ang Dios.” Wala gid nagatinguha si Jesus nga makigribal kay Jehova. (Filipos 2:6) Matuod, ang tanan nga anghel ginasugo  nga ‘magyaub kay [Jesus],’ kag dapat kilalahon sang tanan nga tinuga ang iya mataas nga posisyon agod nga “sa ngalan ni Jesus magluhod ang tagsa ka tuhod.” Apang talupangda nga para ini “sa himaya sang Dios nga Amay” kag sia ang nagasugo sini. (Hebreo 1:6; Filipos 2:9-11) Si Jehova ang naghatag kay Jesus sang iya mataas nga awtoridad, kag paagi sa pagkilala sina nga awtoridad, ginahimaya naton ang Dios. Kon indi kita magpasakop sa paggahom ni Jesus, daw subong nga ginasikway man naton si Jehova nga Dios mismo.—Salmo 2:11, 12.

24. Ano nga duha ka makatilingala nga hitabo ang ginapaabot naton, kag busa, ano nga mga pulong ang dapat naton ihambal?

²⁴ Gani, may paghiusa nga ihambal naton ang nagabukas nga mga pulong sang Salmo 146 tubtob 150: “Dayawa ninyo si Jah!” Kabay nga magadaguhob ang pag-amba sing Hallelujah samtang ginapaabot naton ang pagdaug ni Jehova batok sa Babiloniko nga bug-os kalibutan nga emperyo sang butig nga relihion! Kag kabay nga magbugana ang kalipay samtang nagahilapit ang kasal sang Kordero!

[Mga nota]

New World Translation Reference Bible, footnote.

New World Translation Reference Bible, footnote.

New World Translation Reference Bible, footnote.

Tan-awa man ang Bugna 1:3; 14:13; 16:15.

[Mga Pamangkot sa Pagtinuon]

[Kahon sa pahina 273]

“Sulat sa Sodoma kag Gomorra”

Sa ubos sini nga tig-ulo, ang Daily Telegraph sang London sang Nobiembre 12, 1987, nagreport tuhoy sa isa ka panugda nga ginpresentar sa General Synod sang Church of England. Ginasiling sini nga dapat pahalinon sa simbahan ang homoseksuwal nga mga “Cristiano.” Ang kolumnista nga si Godfrey Barker nagsiling: “Ang Arsobispo sang Canterbury masubo nga nagkomento kahapon: ‘Kon magpadala si San Pablo sing sulat sa Church of England, maayo nga mamangkot kita kon ano ini nga sahi sang sulat.’” Si G. Barker mismo nagkomento: “Ang sabat amo ang sulat sa Sodoma kag Gomorra,” kag nagdugang pa sia: “May panagupnop si Dr. Runcie [ang arsobispo] nga mangin kaangay ini sang Roma, Kap. 1.”

Ginbalikwat sang manunulat ang ginsiling ni Pablo sa Roma 1:26-32: “Ginpabay-an sila sang Dios sa mga kailigbon sang ila tagipusuon sa mga kahigkuan. . . . Ang mga lalaki nagahimo sing makahuluya nga mga buhat upod sa mga lalaki . . . bisan pa nahibaluan gid nila ang mando sang Dios nga ang mga nagahimo sini nga mga butang dapat mapatay, indi lamang nga ginahimo nila ini kundi ginaaprobahan pa nila ang mga nagabuhat sini.” Naghinakop sia: “Ang ginakabalak-an lamang ni San Pablo amo ang mga nagasimba. Ang ginaproblema ni Dr Runcie amo ang mga pari.”

Ngaa nagaproblema gid ang arsobispo? Ang daku nga mga ulong-dinalan sa Daily Mail sang London sang Oktubre 22, 1987, nagsiling: “‘Isa sa kada tatlo ka klero agi’ . . . ‘Magasira ang Church of England’ kon sugdan ang kampanya nga tabugon ang mga homoseksuwal.” Ginbalikwat sini nga mga balita ang ginsiling sang “reberendo” nga sekretaryo heneral sang Lesbian and Gay Christian Movement: “Mapierde gid ang Simbahan kon batunon ini nga panugda, kag nahibaluan ini sang Arsobispo sang Canterbury. Nagapati kami nga mga 30 pa 40 por siento sang mga klerigo sa Church of England mga agi. Kag sila ang labing aktibo nga mga tawo nga nagabulig sa ministeryo sang Simbahan.” Walay duhaduha nga ang kangil-ad sa nagadamo nga agi nga mga pari amo ang isa ka rason kon ngaa amat-amat nga nagadiutay ang mga nagasimba.

Ano ang gindesisyon sang konsilyo sang simbahan? Ang mayoridad nga 388 ka katapo (95 porsiento sang klero) nagbotar pabor sa indi tanto kaestrikto nga panugda. Tuhoy sini, ang The Economist sang Nobiembre 14, 1987, nagreport: “Ang Church of England nagapamatok sa homoseksuwal nga mga buhat, apang indi sobra gid. Ang kabilugan nga konsilyo, ang parlamento sang Simbahan, nga ginahunahuna ang homoseksuwal nga klero, nagdesisyon sini nga semana nga ang homoseksuwal nga mga buhat, indi subong sang pagpakighilawas kag panghilahi, indi isa ka sala: isa lamang ini ka ‘hagyo nga pagsipak sa kon ano ang nagakadapat’ nga ang ‘seksuwal nga paghuliray isa gid ka obligasyon nga nagakaigo sa permanente nga relasyon sang kasado nga mag-asawa.’” Sa pagpatuhay sang panindugan sang Arsobispo sang Canterbury sa prangka nga ginsiling ni apostol Pablo sa Roma 1:26, 27, ginpasundayag sang The Economist ang binalikwat sang ginsiling ni Pablo sa ibabaw sang kapsion nga “Nanindugan si San Pablo sa iya ginsiling.”

Nanindugan man si Jesucristo sa iya ginsiling kag maathag nga ginhambal niya ini. Nagsiling sia nga “mahaganhagan pa sa duta sang Sodoma ang Adlaw sang Paghukom” sangsa para sa mga relihionista nga nagsikway sa iya mensahe. (Mateo 11:23, 24) Naggamit diri si Jesus sing indi kinaandan nga mga pulong agod ipakita nga yadtong relihioso nga mga lider nga nagsikway sa Anak sang Dios kag sa iya mga panudlo mas malaut sangsa mga Sodomanhon. Nagasiling ang Judas 7 nga yadtong mga Sodomanhon nag-antos sing “silot sang walay katapusan nga kalayo,” buot silingon dayon nga kalaglagan. (Mateo 25:41, 46) Gani, pat-od nga matigdas gid ang paghukom sa ginatawag nga Cristiano nga mga lider nga daw bulag nga nagatuytoy sa ila nabulagan nga mga panong pahilayo sa mataas nga mga talaksan sa moral sang Ginharian sang Dios padulong sa walay pagpugong kag mapatuyangon nga mga dalanon sang kalibutan karon! (Mateo 15:14) Tuhoy sa butig nga relihion, ang Babilonia nga Daku, ang tingog gikan sa langit nagaapura: “Gua kamo sa iya, katawhan ko, kon indi ninyo luyag makig-ambit sa iya sa mga sala niya, kag kon indi ninyo luyag magbaton sing bahin sang iya mga kalalat-an.”—Bugna 18:2, 4.

[Mga Retrato sa pahina 275]

Nagalanog sa langit ang apat ka Hallelujah, nga nagadayaw kay Jah tungod sang iya hingapusan nga kadalag-an batok sa Babilonia nga Daku