Leksion 11

Mga Pagpati kag mga Kinabatasan nga Wala Nagapahamuot sa Dios

Ano nga sahi sang mga pagpati kag mga kinabatasan ang malain? (1)

Dapat bala magpati ang mga Cristiano nga ang Dios isa ka Trinidad? (2)

Ngaa ang matuod nga mga Cristiano wala nagasaulog sang Krismas, Pagkabanhaw (Easter), ukon mga kaadlawan? (3, 4)

Mahimo bala makahalit ang mga patay sa mga buhi? (5)

Napatay bala si Jesus sa krus? (6)

Daw ano ka importante nga pahamut-an ang Dios? (7)

1. Indi tanan nga pagpati kag kinabatasan malain. Apang ang Dios wala nahamuot sa sini kon naghalin ini sa butig nga relihion ukon nagasupak sa mga panudlo sang Biblia.​—⁠Mateo 15:⁠6.

2. Trinidad: Si Jehova bala isa ka Trinidad​—⁠tatlo ka persona sa isa ka Dios? Indi! Si Jehova, ang Amay, amo “ang lamang matuod nga Dios.” (Juan 17:3; Marcos 12:29) Si Jesus amo ang Iya panganay nga Anak, kag napaidalom sia sa Dios. (1 Corinto 11:⁠3) Ang Amay daku pa sa Anak. (Juan 14:28) Ang balaan nga espiritu indi isa ka persona; amo ini ang aktibo nga puwersa sang Dios.​—⁠Genesis 1:2; Binuhatan 2:18.

3. Krismas kag Pagkabanhaw: Si Jesus wala matawo sang Disiembre 25. Natawo sia sang mga Oktubre 1, ang panahon sa sulod sang tuig nga ginahuptan sang mga manugbantay ang ila mga panong sa guwa sa kagab-ihon. (Lucas 2:​8-12) Si Jesus wala gid magsugo sa mga Cristiano nga saulugon ang iya pagkatawo. Sa baylo, ginsugo niya ang iya mga disipulo nga saulugon, ukon dumdumon, ang iya kamatayon. (Lucas 22:​19, 20) Ang Krismas kag ang mga kinabatasan sini naghalin sa butig nga mga relihion. Amo man ang mga kinabatasan sa Pagkabanhaw, subong sang paggamit sing mga itlog kag mga koneho. Ang unang mga Cristiano wala magsaulog sang Krismas ukon Pagkabanhaw, kag amo man ang matuod nga mga Cristiano karon.

4. Mga Kaadlawan: Ang duha lamang ka selebrasyon sang kaadlawan nga ginhinambitan sa Biblia ginsaulog sang mga tawo nga wala nagasimba kay Jehova. (Genesis 40:​20-22; Marcos 6:​21, 22, 24-27) Ang unang mga  Cristiano wala magsaulog sing mga kaadlawan. Ang kinabatasan sa pagsaulog sing mga kaadlawan naghalin sa dumaan nga butig nga mga relihion. Ang matuod nga mga Cristiano nagahatag sing mga regalo kag nagakinalipay sing tingob sa iban nga mga tion sang tuig.

5. Kahadlok sa mga Patay: Ang mga patay indi makahimo sing bisan anong butang ukon makabatyag sing bisan ano. Indi kita makabulig sa ila, kag indi sila makahalit sa aton. (Salmo 146:4; Manugwali 9:​5, 10) Ang kalag nagakapatay; wala ini nagakabuhi sing padayon pagkatapos sang kamatayon. (Ezequiel 18:⁠4) Apang kon kaisa ang malauton nga mga anghel, nga ginatawag mga demonyo, nagapakunokuno subong mga espiritu sang mga patay. Ang bisan anong kinabatasan nga may kaangtanan sa kahadlok ukon pagsimba sa mga patay malain.​—⁠Isaias 8:⁠19.

6. Krus: Si Jesus wala mapatay sa krus. Napatay sia sa isa ka kahoy, ukon usok. Ang Griegong tinaga nga ginbadbad nga “krus” sa madamong Biblia nagakahulugan sang isa lamang ka bilog nga kahoy. Ang simbulo sang krus naghalin sa dumaan nga butig nga mga relihion. Ang krus wala gingamit ukon ginsimba sang unang mga Cristiano. Gani, naga­hu­nahuna ka bala nga nagakaigo gamiton ang krus sa pagsimba?​—⁠Deuteronomio 7:26; 1 Corinto 10:⁠14.

7. Mahimo gid mabudlay biyaan ang pila sining mga pagpati kag mga kinabatasan. Ang mga himata kag mga abyan mahimo magatinguha sa paghaylo sa imo nga indi pagbayluhan ang imo mga pagpati. Apang ang pagpahamuot sa Dios mas importante sangsa pagpahamuot sa mga tawo.​—⁠Hulubaton 29:25; Mateo 10:​36, 37.

[Retrato sa pahina 22]

Ang Dios indi isa ka Trinidad

[Retrato sa pahina 23]

Ang Krismas kag Pagkabanhaw naghalin sa dumaan nga butig nga mga relihion

[Retrato sa pahina 23]

Wala sing rason nga simbahon ang mga patay ukon kahadlukan sila