Ano ang Ginapatihan sang mga Saksi ni Jehova?

“Luyag kami mamati sa imo ginapatihan, kay ang lamang nga nahibaluan namon nahanungod sining mga Cristiano amo nga ginapakamalain sila bisan diin!” (Binuhatan 28:​22, The Living Bible) Ining mga lider sang komunidad sadtong nahaunang-siglo nga Roma nagpahamtang sing maayo nga halimbawa. Luyag nila mamati sa tuburan, sa baylo nga sa mga kritiko lamang sa guwa.

Sing kaanggid, ang mga Saksi ni Jehova sa karon masunson nga ginapakalain, kag indi mapaabot nga mahibaluan ang kamatuoran nahanungod sa ila gikan sa may ginadampigan nga tuburan. Gani nalipay kami nga ipaathag sa imo ang pila sang amon pangunang pagtuluohan.

Ang Biblia, si Jesucristo, kag ang Dios

Nagapati kami nga “ang tanan nga Kasulatan inspirado sang Dios kag mapuslanon.” (2 Timoteo 3:16) Kag bisan pa nga ang iban nagasiling nga indi kami matuod nga mga Cristiano, indi ini matuod. Ginasakdag namon sing bug-os ang ginsiling ni apostol Pedro nahanungod kay Jesucristo: “Walay iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas.”​—⁠Binuhatan 4:⁠12.

Walay sapayan, bangod si Jesus nagsiling nga sia “Anak sang Dios” kag nga ang “Amay nagpadala sa akon,” ang mga Saksi ni Jehova nagapati nga ang Dios daku pa kay Jesus. (Juan 10:​36; 6:57) Si Jesus mismo nagsiling: “Ang Amay daku pa sa akon.” (Juan 14:​28; 8:28) Gani wala kami nagapati nga si Jesus tupong sa Amay, subong sang ginasiling  sang doktrina sang Trinidad. Sa baylo, nagapati kami nga gintuga sia sang Dios kag nga sia mas manubo sa Iya.​—⁠Colosas 1:​15; 1 Corinto 11:⁠3.

Sa Hiligaynon, ang ngalan sang Dios amo si Jehova. Ang Biblia nagasiling: “Ang iya ngalan amo si JEHOVA, amo lamang ang labing mataas sa bug-os nga duta.” (Salmo 83:⁠18, King James Version) Nahisuno sa sini nga pinamulong, ginpadaku ni Jesus ang ngalan sang Dios, nagatudlo sa iya mga sumulunod nga mangamuyo: “Amay namon nga yara sa langit, pakabalaanon ang imo ngalan.” Kag nangamuyo sia sa Dios: “Ginpahayag ko ang imo ngalan sa mga tawo nga ginhatag mo sa akon.”​—⁠Mateo 6:​9; Juan 17:⁠6.

Ang mga Saksi ni Jehova nagapati nga dapat sila mangin kaangay kay Jesus sa pagpahibalo sang ngalan kag mga katuyuan sang Dios sa iban. Amo kon ngaa ginbaton namon ang ngalan mga Saksi ni Jehova bangod ginailog namon si Jesus, “ang Matutom nga Saksi.” (Bugna 1:​5; 3:14) Sing nagakaigo, ang Isaias 43:​10 nagasiling sa katawhan nga nagarepresentar sa Dios: “ ‘Kamo akon mga saksi,’ siling ni Jehova, ‘kag ang akon alagad nga ginpili ko.’ ”

Ang Ginharian sang Dios

Gintudluan ni Jesus ang iya mga sumulunod nga mangamuyo, “Magkari ang imo ginharian,” kag ginhimo niya ina nga Ginharian nga nagapangibabaw nga tema sang iya panudlo. (Mateo 6:​10; Lucas 4:43) Ang mga Saksi ni Jehova nagapati nga ang Ginharian isa ka matuod nga pangulohan gikan sa langit, nga magagahom ini sa bug-os nga duta, kag nga si Jesucristo amo ang gintangdo nga dikitaon nga Hari sini. “Ang pagbulut-an manginsa iya abaga,” siling sang Biblia. “Nahanungod sang pagdugang sang iya pagbulut-an kag sang paghidait walay katapusan.”​—⁠Isaias 9:​6, 7, KJ.

Apang, indi lamang si Jesucristo ang hari sang pangulohan sang Dios. Madamo sia sing kaupod nga magagahom sa langit. “Kon magabatas kita,” sulat ni apostol Pablo, “magahari man kita kaupod niya.” (2 Timoteo 2:12) Ginapakita sang Biblia nga ang mga tawo nga pagabanhawon agod maggahom kaupod ni Cristo sa langit nalatiran sa “isa ka  gatos kag kap-atan kag apat ka libo nga tinubus gikan sa duta.”​—⁠Bugna 14:​1, 3.

Sa pagkamatuod, ang bisan ano nga pangulohan may mga sakop, kag ang mga Saksi ni Jehova nagapati nga binilyon pa luwas sining langitnon nga gumalahom ang magabaton sing kabuhi nga walay katapusan. Sa ulihi ang duta, nga nahimo nga isa ka matahom nga paraiso, pagapun-an sining takus nga mga sakop sang Ginharian sang Dios, ang tanan nagapasakop sa pagginahom ni Cristo kag sang iya kaupod nga mga gumalahom. Gani ang mga Saksi ni Jehova kombinsido gid nga ang duta indi malaglag kag nga ang saad sang Biblia matuman: “Ang mga matarong magapanubli sang duta, kag magapuyo dira sing dayon.”​—⁠Salmo 37:​29; 104:⁠5.

Apang paano magakari ang Ginharian sang Dios? Paagi bala sa boluntaryo nga pagpasakop sang tanan nga tawo sa pangulohan sang Dios? Sa kabaliskaran, ginapakita sing realistiko sang Biblia nga ang pagkari sang Ginharian nagakinahanglan sang direkta nga pagpasilabot sang Dios sa nagakatabo sa duta: “Ang Dios sang langit magapatindog sing ginharian nga dili gid malaglag. Kag ang gin­harian . . . magadugmok kag magapapas sining tanan nga ginharian, kag ini magapadayon tubtob sa tion nga dinapat-od.”​—⁠Daniel 2:⁠44.

San-o magakari ang Ginharian sang Dios? Pasad sa mga tagna sang Biblia nga nagakatuman karon, ang mga Saksi ni Jehova nagapati nga magakari ini sa dili madugay. Ginaagda namon kamo sa pagbinagbinag sa pila ka tagna nga nagatagna sang matabo sa “katapusan nga mga adlaw” sining malauton nga sistema sang mga butang. Ginarekord ini sa Mateo 24:​3-14; Lucas 21:​7-13, 25-31; kag 2 Timoteo 3:​1-5.

 Bangod amon ‘ginahigugma si Jehova nga amon Dios sa amon bug-os nga tagipusuon, kalag, hunahuna, kag kusog, kag ang amon isigkatawo subong sang amon kaugalingon,’ nahiusa kami sa pungsod, rasa, kag katilingban. (Marcos 12:​30, 31) Kilala kami kaayo bangod sang gugma nga makita sa tunga sang amon Cristianong mga kauturan nga makita sa tanan nga pungsod. (Juan 13:​35; 1 Juan 3:​10-12) Gani ginahuptan namon ang neutral nga tindog sa politika sina nga mga pungsod. Ginatinguhaan namon nga mangin kaangay sa dumaan nga mga disipulo ni Jesus, nga tuhoy sa ila sia nagsiling: “Sila indi iya sang kalibutan, subong nga ako indi iya sang kalibutan.” (Juan 17:16) Nagapati kami nga ang pagpabilin nga tuhay sa kalibutan nagakahulugan sing paglikaw sa imoral nga paggawi nga kinaandan katama sa karon, lakip ang pagbutig, pagpangawat, paghilawas, panglahi, homoseksuwalidad, sayop nga paggamit sang dugo, idolatriya, kag iban pa nga mga butang nga ginapakamalaut sang Biblia.​—⁠1 Corinto 6:​9-11; Efeso 5:​3-5; Binuhatan 15:​28, 29.

Paglaum Para sa Palaabuton

Ang mga Saksi ni Jehova nagapati nga ang aton karon kabuhi sa sining kalibutan indi lamang ang tanan nga yari sa sini. Nagapati kami nga ginpadala ni Jehova si Cristo sa duta agod iula ang iya dugo subong gawad agod ang mga tawo makatigayon sing matarong nga tindog sa Dios kag makabaton sing kabuhi nga walay katapusan sa bag-ong sistema sang mga butang. Subong sang ginsiling sang isa ka apostol ni Jesus: “Ginpakamatarong kita paagi sa iya dugo.” (Roma 5:​9; Mateo 20:28) Ang mga Saksi ni Jehova nagapasalamat sing daku sa Dios kag sa iya Anak tungod sining aman nga gawad nga nagapaposible sang palaabuton nga kabuhi.

Ang mga Saksi ni Jehova nagasalig sing bug-os sa palaabuton nga kabuhi, pasad sa pagkabanhaw gikan sa minatay sa idalom sang Ginharian sang Dios. Nagapati kami, subong sang ginatudlo sang Biblia, nga kon ang isa mapatay wala  na sia nagaluntad, nga “sa amo nga adlaw nagakawala ang iya mga hunahuna.” (Salmo 146:​3, 4; Ezequiel 18:​4; Manugwali 9:5) Huo, ang palaabuton nga kabuhi sang patay nasandig sa pagdumdom sang Dios sa ila sa pagkabanhaw.​—⁠Juan 5:​28, 29.

Apang, ang mga Saksi ni Jehova kombinsido nga madamo sang nagakabuhi karon ang makalampuwas kon tapuson sang Ginharian sang Dios ang tanan nga mga pangulohan karon kag, subong nga si Noe kag ang iya pamilya nakalampuwas sa Anaw, magakabuhi sila sing dayon sa natinluan nga duta. (Mateo 24:​36-39; 2 Pedro 3:​5-7, 13) Apang nagapati kami nga ang kaluwasan nasandig sa pagsunod sa mga kinahanglanon ni Jehova, subong sang ginasiling sang Biblia: “Ang kalibutan nagataliwan . . . , apang ang nagahimo sang kabubut-on sang Dios magapadayon sing dayon.”​—⁠1 Juan 2:​17; Salmo 37:​11; Bugna 7:​9, 13-15; 21:​1-5.

Sing hayag indi mahimo nga matuptupan diri ang tanan nga pagtuluohan sang mga Saksi ni Jehova, apang ginaagda namon kamo sa pagtigayon sing dugang nga impormasyon.

Luwas kon tuhay ang ginapakita, ang tanan nga mga kinutlo sa Biblia gikan sa New World Translation of the Holy Scriptures.

[Blurb on page 4]

Ginbaton namon ang ngalan mga Saksi ni Jehova bangod ginailog namon si Jesus