Kapitulo Nuebe

Ginatudluan Kita ni Jehova Para sa Aton Kaayuhan

Isaias 48:​1-​22

1. Ano ang ginahimo sang mga maalam sa mga pulong ni Jehova?

 ANG mga maalam nagapamati nga may daku nga pagtahod kag nagasunod sa mga pulong ni Jehova kon nagahambal sia. Ang tanan nga ginasiling ni Jehova para sa aton kaayuhan, kag interesado gid sia sa aton kaayuhan. Halimbawa, daw ano ka makalilipay nga binagbinagon kon paano si Jehova nakighambal sa iya nakigkatipan nga katawhan sang una: “O kon talupangdon mo lamang ang akon mga sugo!” (Isaias 48:18) Ang napamatud-an nga balor sang mga panudlo sang Dios dapat magpahulag sa aton nga mamati sa iya kag sundon ang iya panuytoy. Ang rekord tuhoy sa natuman nga tagna nagadula sang bisan ano man nga duhaduha tuhoy sa determinasyon ni Jehova nga tumanon ang iya mga saad.

2. Para kay sin-o ginrekord ang mga pulong sang Isaias 48, kag sin-o pa ang makabenepisyo sa sini?

² Ang mga pulong sang ika-48 nga kapitulo sang tulun-an sang Isaias mahimo gid nga ginsulat para sa mga Judiyo nga nabihag sa Babilonia. Dugang pa, ining mga pulong nagaunod sing mensahe nga indi mahimo nga indi pagsapakon sang mga Cristiano karon. Sa Isaias kapitulo 47, gintagna sang Biblia ang pagkapukan sang Babilonia. Ginalaragway karon ni Jehova kon ano ang iya ginahunahuna para sa Judiyong mga bihag sa sadtong siudad. Nagkasubo si Jehova bangod sang pagkasalimpapaw sang iya pinili nga katawhan kag sang ila matig-a nga indi pagtuo sa iya mga saad. Apang, luyag gihapon niya nga tudluan sila para sa ila kaayuhan.  Ginapanan-aw niya ang isa ka panahon sang pagpaputli nga magadul-ong sa pagbalik sang matutom nga mga nagkalabilin sa ila dutang natawhan.

3. Ano ang sayop sa pagsimba sang Juda?

³ Nagsipak gid ang katawhan ni Jehova gikan sa putli nga pagsimba! Makapahunahuna ang nagabukas nga mga pulong ni Isaias: “Pamatii ini, O panimalay ni Jacob, kamo nga nagatawag sa inyo kaugalingon sa ngalan sang Israel kag nagaguwa gikan sa katubigan mismo sang Juda, kamo nga nagasumpa sa ngalan ni Jehova kag nagasambit bisan sa Dios sang Israel, indi sa kamatuoran kag indi sa pagkamatarong. Kay gintawag nila ang ila kaugalingon subong naggikan sa balaan nga siudad, kag sa Dios sang Israel nagsandig sila, Jehova sang mga kasuldadusan ang iya ngalan.” (Isaias 48:1, 2) Daw ano ka salimpapaw! Ang ‘pagpanumpa sa ngalan ni Jehova’ maathag nga isa lamang ka pormalistiko nga paagi sa paggamit sang ngalan sang Dios. (Sofonias 1:5) Antes sila mabihag sa Babilonia, ginasimba sang mga Judiyo si Jehova sa “balaan nga siudad,” ang Jerusalem. Apang indi sinsero ang ila pagsimba. Ang ila tagipusuon malayo sa Dios kag ang ila mga buhat sang pagsimba “indi sa kamatuoran kag indi sa pagkamatarong.” Wala sila sang pagtuo sang mga patriarka.​​—Malaquias 3:7.

4. Ano nga sahi sang pagsimba ang kalahamut-an kay Jehova?

⁴ Ang mga pulong ni Jehova nagapahanumdom sa aton nga ang aton pagsimba indi dapat mangin pakulahaw. Dapat ini mangin tinagipusuon. Ang pakulahaw nga pag-alagad​—ayhan ginahimo agod lamang pahamut-an ukon pahalipayon ang iban—​indi makabig nga “mga buhat sang diosnon nga debosyon.” (2 Pedro 3:11) Ang pagtawag sang isa ka tawo sa iya kaugalingon nga Cristiano wala nagahimo sang iya pagsimba nga kalahamut-an sa Dios. (2 Timoteo 3:5) Importante nga kilalahon ang pagluntad ni Jehova, apang pamuno lamang ini. Luyag ni Jehova ang pagsimba nga bug-os kalag kag ginapahulag sang tudok nga gugma kag apresasyon.​​—Colosas 3:23.

Nagatagna Sang Bag-o nga mga Butang

5. Ano ang pila sang “nahauna nga mga butang” nga gintagna ni Jehova?

⁵ Ayhan kinahanglan nga palab-ason ang mga memorya sang mga Judiyo sa Babilonia. Gani, ginpahanumdom sila liwat ni Jehova nga sia ang Dios sang matuod nga tagna: “Ang nahauna nga mga butang ginsugid ko bisan kutob sadtong panahon, kag gikan sa akon baba nagguwa ini, kag padayon ko nga ginpabati ini. Hinali ako nga naghulag, kag ang mga butang nahanabo.” (Isaias 48:3) “Ang nahauna nga mga butang” amo ang mga butang nga nahimo na sang Dios, subong sang paghilway sa mga Israelinhon gikan sa Egipto kag paghatag sa ila sang Ginsaad nga Duta subong isa ka palanublion. (Genesis 13:​14, 15; 15:​13, 14) Yadto nga mga tagna nagkawas sa baba sang Dios; naghalin sila sa Dios. Ginpabati sang Dios sa mga tawo ang iya mga mando, kag ang ila nabatian dapat magpahulag sa ila nga mangin matinumanon. (Deuteronomio 28:15) Sia hinali nga nagahulag agod himuon ang iya gintagna. Ang katunayan nga si Jehova Labing Gamhanan nagapasalig nga ang iya katuyuan matuman.​​—Josue 21:​45; 23:14.

6. Tubtob sa anong kasangkaron ang mga Judiyo nangin “batinggilan kag mabinatuon”?

⁶ Ang katawhan ni Jehova nangin “batinggilan kag mabinatuon.” (Salmo 78:8) Prangka nga nagsiling sia sa ila: “Ikaw matig-a kag . . . ang imo liog lanitlanit nga salsalon kag ang imo agtang saway.” (Isaias 48:4) Kaangay sang mga metal, mabudlay patikuon ang mga Judiyo​—indi madali magsunod. Isa ina ka rason kon ngaa ginapahayag anay ni Jehova ang mga butang antes ini mahanabo. Kay kon indi, ang iya katawhan magasiling tuhoy sa mga butang nga ginhimo ni Jehova: “Ang akon idolo ang naghimo sa ila, kag ang akon larawan nga tinigban kag ang akon larawan nga tinunaw ang nagsugo sa ila.” (Isaias 48:5) May  epekto bala sa di-matutom nga mga Judiyo ang ginasiling ni Jehova karon? Ang Dios nagsiling sa ila: “Nabatian mo. Tan-awa ini tanan. Kon tuhoy sa inyo, indi bala ninyo ini pag-isugid? Nagpabati ako sa imo sang bag-ong mga butang kutob karon nga tion, bisan ang mga butang nga gintipigan, nga wala mo mahibalui. Sa karon nga tion tugahon ini, kag indi kutob sadtong panahon, bisan ang mga butang nga wala mo mabatii sang wala pa ini nga adlaw, agod indi ka magsiling, ‘Yari karon! Nahibaluan ko na ini.’ ”​—Isaias 48:6, 7.

7. Ano ang dapat batunon sang nabihag nga mga Judiyo, kag ano ang mapaabot nila?

⁷ Madugay sa wala pa, ginrekord ni Isaias ang tagna tuhoy sa  pagkapukan sang Babilonia. Karon, subong nga daw mga bihag na sila sa Babilonia, matagnaon nga ginasugo ang mga Judiyo nga pamalandungan ang katumanan sang tagna. Mapanghiwala bala nila nga si Jehova amo ang Dios sang natuman nga tagna? Kag sanglit nakita kag nabatian sang mga pumuluyo sang Juda nga si Jehova isa ka Dios sang kamatuoran, indi bala nga dapat man nila isugid ini nga kamatuoran sa iban? Ang napahayag nga pulong ni Jehova nagatagna sing bag-o nga mga butang nga wala pa matuman, subong sang pagbihag ni Ciro sa Babilonia kag ang paghilway sa mga Judiyo. (Isaias 48:​14-​16) Inang makapakibot nga mga hitabo daw hinali lang nga nag-abot. Wala sing bisan sin-o nga makapanan-aw sini paagi lamang sa pagbinagbinag sang mga kahimtangan sa kalibutan. Nag-abot ini nga daw nagtuhaw lamang. Sin-o ang nagpahanabo sini? Sanglit gintagna ini ni Jehova mga 200 ka tuig sa wala pa, maathag ang sabat.

8. Anong bag-o nga mga butang ang ginalauman sang mga Cristiano karon, kag ngaa may bug-os nga pagsalig sila sa matagnaon nga pulong ni Jehova?

⁸ Dugang pa, ginatuman ni Jehova ang iya pulong suno sa iya orasan. Ang natuman nga mga tagna nagapamatuod sa iya pagka-Dios indi lamang sa mga Judiyo sang dumaan nga mga tion kundi sa mga Cristiano man sa karon. Ang rekord tuhoy sa madamo nga tagna nga natuman sang nagligad​—“ang nahauna nga mga butang”​—​isa ka pasalig nga ang bag-ong mga butang nga ginsaad ni Jehova​—ang nagapakari nga “dakung kapipit-an,” ang kaluwasan sang “isa ka dakung kadam-an” sa sina nga kapipit-an, ang “bag-ong duta,” kag ang madamo pa​—​matuman. (Bugna 7:​9, 14, 15; 21:​4, 5; 2 Pedro 3:13) Ina nga pasalig nagapahulag sa mga matarong sing tagipusuon karon nga maghambal tuhoy sa iya sing makugihon. Nagaugyon sila sa ginabatyag sang salmista, nga nagsiling: “Nabantala ko ang maayong balita sang pagkamatarong sa daku nga kongregasyon. Yari karon! Wala ko ginapunggan ang akon mga bibig.”​​—Salmo 40:9.

 Si Jehova Nagapugong Sang Iya Kaugalingon

9. Paano ang pungsod sang Israel nangin “malinapason gikan sa tiyan”?

⁹ Ang indi pagpati sang mga Judiyo sa mga tagna ni Jehova nagpugong sa ila nga mamati sa iya mga paandam. Amo kon ngaa nagpadayon sia sa pagsiling sa ila: “Dugang pa, wala mo mabatii, wala mo mahibaluan, kutob sadtong panahon wala mabuksan ang imo dulunggan. Kay nahibaluan ko sing maayo nga ikaw nagpadayon gid sa pagpakig-angot sing maluibon, kag ginatawag ka nga ‘malinapason gikan sa tiyan.’ ” (Isaias 48:8) Natakpan ang dulunggan sang Juda sa makalilipay nga mga balita ni Jehova. (Isaias 29:10) Ang reaksion sang nakigkatipan nga katawhan sang Dios nagapakita nga ang pungsod “malinapason gikan sa tiyan.” Halin sa iya pagkabun-ag kag sa iya bug-os nga maragtas, ang pungsod sang Israel nakatukod sing isa ka mabinatuon nga rekord. Ang paglapas kag pagluib nangin kinaandan na nga mga kasaypanan sang katawhan, indi panalagsahon lamang nga mga sala.​​—Salmo 95:​10; Malaquias 2:11.

10. Ngaa punggan ni Jehova ang iya kaugalingon?

¹⁰ Wala na gid bala sing paglaum? Indi naman. Bisan pa ang Juda mabinatuon kag maluibon, si Jehova matuod kag matutom gihapon. Para sa kadungganan sang iya daku nga ngalan, limitehan niya ang pagbubo sang iya kasingkal. Sia nagsiling: “Tungod sa akon ngalan punggan ko ang akon kaakig, kag tungod sa akon kadayawan punggan ko ang akon kaugalingon sa imo agod indi ka pag-utdon.” (Isaias 48:9) Daw ano nga pagkatuhay! Ang katawhan ni Jehova, ang Israel kag Juda, lunsay nangin di-matutom sa iya. Apang pakabalaanon ni Jehova ang iya ngalan, kag magahikot sia sa isa ka paagi agod madayaw kag mapadunggan ini. Tungod sini, indi niya pag-utdon ang iya pinili nga katawhan.​—Joel 2:​13, 14.

11. Ngaa indi magtugot ang Dios nga malaglag sing bug-os ang iya katawhan?

¹¹ Ang pagsabdong sang Dios nagpukaw sa matarong-sing-tagipusuon nga mga indibiduwal sa tunga sang nabihag nga mga Judiyo kag nagdesisyon sing malig-on nga pamatian ang iya mga panudlo. Para sa ila makapasalig gid ang masunod nga ginpamulong:  “Yari karon! Ginpaputli ko ikaw, apang indi subong sang pilak. Ginpili ko ikaw sa tulunawan nga hurno sang kalisdanan. Tungod sa akon kaugalingon, tungod sa akon kaugalingon magapanghikot ako, kay paano bala nga tugutan sang isa nga pasipalahan sia? Kag indi ko pag-ihatag sa iban ang akon himaya.” (Isaias 48:10, 11) Ang mabudlay nga mga pagtilaw​—subong sang sa “hurno sang kalisdanan”​—​nga gintugutan ni Jehova sa iya katawhan nagtilaw kag nagpaputli sa ila, sa amo napadayag kon ano ang yara sa ila tagipusuon. Kaanggid sini ang natabo mga siglo antes sini sang si Moises nagsiling sa ila mga katigulangan: ‘Ginpalakat ka ni Jehova nga imo Dios sining kap-atan ka tuig sa kahanayakan, agod nga mapaubos ka niya, sa pagtilaw sa imo agod mahibaluan kon ano ang yara sa imo tagipusuon.’ (Deuteronomio 8:2) Walay sapayan sang ila pagkamabinatuon, wala paglaglaga ni Jehova ang pungsod sadtong tion, kag indi niya paglaglagon sing bug-os ang pungsod karon. Sa amo mabayaw ang iya ngalan kag dungog. Kon ang iya katawhan malaglag sa  mga kamot sang mga Babilonianhon, indi sia mangin matutom sa iya katipan kag mapasipalahan ang iya ngalan. Daw mangin subong bala nga ang Dios sang Israel wala sing gahom sa pagluwas sa iya katawhan.​​—Ezequiel 20:9.

12. Paano ginpaputli ang matuod nga mga Cristiano sa tion sang nahauna nga bug-os kalibutan nga inaway?

¹² Sa modernong mga tion man, ang katawhan ni Jehova dapat putlion. Sang una nga mga tion sang ika-20 nga siglo, madamo sang diutay nga grupo sang mga Estudyante sang Biblia ang nag-alagad sa Dios bangod sang isa ka sinsero nga handum nga pahamut-an sia, apang ang iban may sayop nga mga motibo, subong sang handum nga mangin prominente. Antes yadtong diutay nga grupo makapanguna sa bug-os kalibutan nga pagbantala sing maayong balita nga gintagna para sa tion sang katapusan, dapat anay sila tinluan. (Mateo 24:14) Si manalagna Malaquias nagtagna nga ina gid nga pagpaputli mahanabo may  kaangtanan sa pagkari ni Jehova sa iya templo. (Malaquias 3:​1-4) Natuman ang iya mga pulong sang 1918. Ang matuod nga mga Cristiano nag-agi sa panahon sang kalayuhon nga pagtilaw sang nagahingalayo gid ang nahauna nga bug-os kalibutan nga inaway kag yadto nga pagtilaw nagdul-ong sa pagkabilanggo ni Joseph F. Rutherford, presidente sadto sang Watch Tower Society, kag sang pila ka nagapanguna nga mga opisyales sini. Yadtong sinsero nga mga Cristiano nakabenepisyo gikan sa pagpaputli. Pagkatapos sang Bug-os Kalibutan nga Inaway I, nangin determinado sila sing labi pa nga alagdon ang ila daku nga Dios sa bisan anong paagi nga ipakita niya.

13. Ano ang ginhimo sang katawhan ni Jehova sang ginhingabot sila sa sulod sang mga tuig sugod sang nahauna nga bug-os kalibutan nga inaway?

¹³ Sugod sadto, ang mga Saksi ni Jehova nakaeksperiensia sa liwat kag liwat sing labing mapintas nga mga sahi sang paghingabot. Wala ini magpaduhaduha sa ila sa pulong sang ila Manunuga. Sa baylo, ginbinagbinag nila ang mga pulong ni apostol Pedro sa ginhingabot nga mga Cristiano sang iya panahon: “Ginapaantos kamo sang sarisari nga mga pagtilaw, agod ang natilawan nga kinaiya sang inyo pagtuo . . . masapwan nga sa kadayawan kag himaya kag kadungganan sa pagpahayag ni Jesucristo.” (1 Pedro 1:​6, 7) Ang kalayuhon nga paghingabot wala nagalaglag sa integridad sang matuod nga mga Cristiano. Sa baylo, ginapadayag sini ang kaputli sang ila mga motibo. Ginadugang sini sa ila pagtuo ang isa ka natilawan nga kinaiya kag ginapakita ang kadalumon sang ila debosyon kag gugma.​​—Hulubaton 17:3.

‘Ako ang Una, Ako ang Ulihi’

14. (a) Sa anong paagi si Jehova amo “ang una” kag “ang ulihi”? (b) Anong gamhanan nga mga buhat ang ginhimo ni Jehova paagi sa iya “kamot”?

¹⁴ Mapinalanggaon nga nagapangabay karon si Jehova sa iya nakigkatipan nga katawhan: “Pamati sa akon, O Jacob, kag ikaw Israel nga akon tinawag. Ako amo gihapon inang Isa. Ako ang una. Dugang pa, ako ang ulihi. Dugang pa, ang akon kamot ang nagpasad sang sadsaran sang duta, kag ang akon kamot nga tuo ang naghumlad sang kalangitan. Nagapanawag ako sa ila,  agod magpabilin sila nga nagatingob.” (Isaiah 48:12, 13) Indi kaangay sang tawo, ang Dios dayon kag wala nagabaylo. (Malaquias 3:6) Sa Bugna, si Jehova nagasiling: “Ako ang Alpha kag ang Omega, ang una kag ang ulihi, ang ginsuguran kag ang katapusan.” (Bugna 22:13) Antes kay Jehova wala sing labing gamhanan nga Dios kag wala man sa tapos niya. Sia ang Isa nga Supremo kag Dayon, ang Manunuga. Ang iya “kamot”​—ang iya ginagamit nga gahom​—​nagpasad sang duta kag naghumlad sang mabituon nga kalangitan. (Job 38:​4; Salmo 102:25) Kon tawgon niya ang iya mga tinuga, handa sila sa pag-alagad sa iya.​​—Salmo 147:4.

15. Sa anong paagi kag sa anong katuyuan ‘ginhigugma’ ni Jehova si Ciro?

¹⁵ Isa ka importante nga imbitasyon ang ginpatuhoy sa mga Judiyo kag mga di-Judiyo: “Magtipon kamo tanan, kag magpamati. Sin-o sa ila ang nagpahayag sining mga butang? Si Jehova mismo naghigugma sa iya. Himuon niya sa Babilonia ang butang nga iya ginakahamut-an, kag ang iya mismo butkon mangin sa mga Caldeanhon. Ako​—ako ang nagpamulong. Dugang pa, gintawag ko sia. Gindala ko sia, kag himuon ang iya dalanon nga madinalag-on.” (Isaias 48:14, 15) Si Jehova lamang ang labing gamhanan kag may ikasarang sa pagtagna sang mga hitabo sing sibu. Wala sa tunga ‘nila,’ ang walay pulos nga mga idolo, ang may ikasarang sa pagsugid sining mga butang. Si Jehova, indi ang mga idolo, ang “naghigugma sa iya,” kay Ciro​—buot silingon, ginpili sia ni Jehova para sa isa ka espesipiko nga katuyuan. (Isaias 41:​2; 44:​28; 45:​1, 13; 46:11) Napanan-aw na niya ang pagguwa ni Ciro sa danyag sang kalibutan kag sia ang napilian subong palaabuton nga mandadaug sa Babilonia.

16, 17. (a) Ngaa masiling nga wala ginhatag sang Dios ang iya mga tagna sing sekreto? (b) Paano ginapahibalo ni Jehova ang iya mga katuyuan karon?

¹⁶ Sa isa ka nagapangagda nga mensahe, si Jehova nagpadayon: “Palapit kamo sa akon. Pamatii ini. Kutob sa ginsuguran nagpamulong ako indi sa tago nga duog. Kutob sa panahon nga natabo ini didto na ako.” (Isaias 48:​16a) Ang mga tagna gikan kay Jehova wala ginhatag sing sekreto ukon ginpahibalo sa pila lamang nga pinili. Ang mga manalagna ni Jehova tampad nga mga humalambal  para sa Dios. (Isaias 61:1) Dayag nga ginbantala nila ang kabubut-on sang Dios. Halimbawa, ang mga butang nga natabo may kaangtanan kay Ciro indi bag-o sa Dios ukon mga butang nga wala niya mapanan-aw. Mga 200 ka tuig sa wala pa, dayag nga gintagna ini sang Dios paagi kay Isaias.

¹⁷ Sa karon man, wala ginasekreto ni Jehova ang iya mga katuyuan. Minilyon ka tawo sa ginatos ka kadutaan kag kapuluan sang dagat ang nagabantala sa mga pamalay, sa mga kalye, kag sa bisan diin nga masarangan nila sang paandam tuhoy sa nagapakari nga katapusan sining sistema sang mga butang kag sang maayong balita sang mga pagpakamaayo nga magaabot sa idalom sang Ginharian sang Dios. Sa pagkamatuod, si Jehova isa ka Dios nga nagapaalinton sang iya mga katuyuan.

‘Talupangda ang Akon mga Sugo!’

18. Ano ang handum ni Jehova para sa iya katawhan?

¹⁸ Bangod sang gahom gikan sa espiritu ni Jehova, ang manalagna nagsiling: “Ang Soberanong Ginuong Jehova mismo nagpadala sa akon, bisan sang iya espiritu. Amo ini ang ginsiling ni Jehova, nga imo Manunubos, ang Balaan sang Israel: ‘Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.’” (Isaias 48:16b, 17) Ining mahigugmaon nga pagpabutyag sang pag-atipan ni Jehova dapat magpasalig sa pungsod sang Israel nga luwason sila sang Dios gikan sa Babilonia. Sia ang ila Manunubos. (Isaias 54:5) Ang tinagipusuon nga handum ni Jehova amo nga ipasag-uli sang mga Israelinhon ang ila kaangtanan sa iya kag talupangdon ang iya mga sugo. Ang matuod nga pagsimba napasad sa pagtuman sa mga instruksion sang Dios. Ang mga Israelinhon indi makalakat sa matarong nga dalanon luwas kon matudluan sila sang ‘dalanon nga dapat laktan.’

19. Ano ang tinagipusuon nga ginapangabay ni Jehova?

¹⁹ Ang handum ni Jehova nga malikawan sang iya katawhan ang kalamidad kag makatigayon sing kabuhi matahom nga ginpabutyag:  “O kon talupangdon mo lamang ang akon mga sugo! Nian ang imo paghidait mangin subong sang suba, kag ang imo pagkamatarong subong sang mga balod sang dagat.” (Isaias 48:18) Daw ano ka tinagipusuon nga pangabay gikan sa labing gamhanan nga Manunuga! (Deuteronomio 5:​29; Salmo 81:13) Sa baylo nga mabihag, ang mga Israelinhon sarang makatigayon sing paghidait nga mangin subong kabugana sa tubig sa suba. (Salmo 119:​165) Ang ila mga binuhatan sang pagkamatarong mangin di-maisip subong sang mga balod sang dagat. (Amos 5:24) Subong isa nga interesado gid sa ila, ginapangabay ni Jehova ang mga Israelinhon, mahigugmaon nga ginapakita sa ila ang dalan nga dapat nila laktan. O, kon mamati lamang sila!

20. (a) Ano ang handum sang Dios para sa Israel walay sapayan sang ila pagkamabinatuon? (b) Ano ang matun-an naton tuhoy kay Jehova gikan sa iya mga pagpakig-angot sa iya katawhan? (Tan-awa ang kahon sa pahina 133.)

²⁰ Ano nga mga pagpakamaayo ang magaabot kon maghinulsol ang Israel? Si Jehova nagsiling: “Ang imo kaanakan mangin subong sang balas, kag ang mga kaliwat gikan sa imo nasulod nga mga bahin kaangay sang mga binilog sini. Ang ngalan sang isa indi pag-utdon ukon laglagon gikan sa akon atubangan.” (Isaias 48:19) Ginapahanumdom ni Jehova ang katawhan sang iya saad nga ang binhi ni Abraham magadamo, “subong sang kabituunan sang mga langit kag subong sang balas nga yara sa baybayon.” (Genesis 22:​17; 32:12) Apang, ining mga kaliwat ni Abraham nangin mabinatuon, kag wala sila sing kinamatarong nga mabaton ang katumanan sang saad. Sa pagkamatuod, tuman gid kalain ang ila rekord nga pasad sa Kasuguan ni Jehova, takus nga utdon ang ila ngalan subong isa ka pungsod. (Deuteronomio 28:45) Apang, wala gihapon ginahandum ni Jehova nga malaglag ang iya katawhan, kag indi niya luyag nga biyaan sila sing bug-os.

21. Anong mga pagpakamaayo ang maeksperiensiahan naton karon kon magpatudlo kita kay Jehova?

²¹ Ang mga prinsipio nga naunod sa sining makatalandog nga mga dinalan naaplikar sa mga sumilimba ni Jehova karon. Si Jehova  amo ang Tuburan sang kabuhi, kag labaw kay bisan sin-o nakahibalo sia kon paano naton dapat gamiton ang aton kabuhi. (Salmo 36:9) Ginhatagan niya kita sing mga panuytoy, indi agod dingutan kita sing kalipay, kundi agod makabenepisyo kita. Ang matuod nga mga Cristiano nagasabat paagi sa pagtinguha nga matudluan ni Jehova. (Miqueas 4:2) Ang iya mga panuytoy nagaamlig sang aton espirituwalidad kag sang aton kaangtanan sa iya, kag nagataming sa aton batok sa makapalain nga impluwensia ni Satanas. Kon ginaapresyar naton ang prinsipio sa likod sang mga sugo sang Dios, makita naton nga ginatudluan kita ni Jehova para sa aton kaayuhan. Narealisar naton nga ang “iya mga sugo indi pabug-at.” Kag indi kita pag-utdon.​​—1 Juan 2:​17; 5:3.

“Guwa Kamo Gikan sa Babilonia!”

22. Ano ang ginapalig-on sa matutom nga mga Judiyo nga himuon nila, kag ano nga mga pasalig ang ginhatag sa ila?

²² Kon mapukan ang Babilonia, may mga Judiyo bala nga magapakita sing matarong nga tagipusuon? Himuslan bala nila ang pagluwas sang Dios, magbalik sa ila dutang natawhan, kag ipasag-uli ang putli nga pagsimba? Huo. Ang masunod nga mga pulong ni Jehova nagapakita sang iya pagsalig nga mahanabo ini. “Guwa kamo gikan sa Babilonia! Palagyo kamo gikan sa mga Caldeanhon. Ipahayag nga may hugyaw sang kalipay, ipabati ini. Padangata ini tubtob sa ukbong sang duta. Isiling: ‘Gintubos ni Jehova ang iya alagad nga si Jacob. Kag wala sila pag-uhawa sang ginpalakat niya sila sa nahapay nga mga duog. Ang tubig gikan sa igang ginpailig niya para sa ila, kag ginpihak niya ang igang agod ang tubig magsagawak.’” (Isaias 48:20, 21) Ang katawhan ni Jehova matagnaon nga ginapalig-on nga indi magpalantang sa paghalin sa Babilonia. (Jeremias 50:8) Ang pagtubos sa ila dapat ipahibalo sa kaukbungan sang duta. (Jeremias 31:10) Sa tapos sang Exodo (Pagbiya) sa Egipto, gin-aman ni Jehova ang mga kinahanglanon sang iya katawhan samtang nagapanglakaton sila sa desyerto. Sing kaanggid man, magaaman sia para sa iya katawhan samtang nagalakbay sila pauli gikan sa Babilonia.​​—Deuteronomio 8:​15, 16.

23. Sin-o ang indi makatigayon sing paghidait gikan sa Dios?

 ²³ May isa pa ka importante nga prinsipio nga dapat tandaan sang mga Judiyo tuhoy sa mga buhat sang pagluwas ni Jehova. Ang mga may huyog sa pagkamatarong mahimo mag-antos bangod sang ila mga sala, apang indi sila paglaglagon. Tuhay naman para sa mga di-matarong. “ ‘Wala sing paghidait,’ siling ni Jehova, ‘para sa mga malauton.’ ” (Isaias 48:22) Ang di-mahinulsulon nga mga makasasala indi magabaton sing paghidait nga ginatigana sang Dios para sa mga nagahigugma sa iya. Ang mga buhat sang pagluwas wala ginatuyo para sa batinggilan nga mga malauton ukon mga wala nagatuo. Ina nga mga buhat para lamang sa mga nagatuo. (Tito 1:​15, 16; Bugna 22:​14, 15) Ang paghidait gikan sa Dios wala sa mga malauton.

24. Ano ang naghatag sing kasadya sa katawhan sang Dios sa modernong mga tion?

²⁴ Sang 537 B.C.E., ang kahigayunan sa pagbiya sa Babilonia naghatag sing daku nga kalipay sa matutom nga mga Israelinhon. Sang 1919 ang kahilwayan sang katawhan sang Dios gikan sa pagkaulipon sa Babilonia nagdul-ong sa ila pagkasadya. (Bugna 11:​11, 12) Napun-an sila sing paglaum, kag ginhimuslan nila ang kahigayunan nga pasangkaron ang ila hilikuton. Matuod, dapat magpakita sing kaisog ining diutay nga hubon sang mga Cristiano agod himuslan ang bag-ong mga posibilidad sa pagbantala sa isa ka di-mainabyanon nga kalibutan. Apang sa bulig ni Jehova, ginsugdan nila ang hilikuton nga pagbantala sing maayong balita. Ang maragtas nagapamatuod nga ginpakamaayo sila ni Jehova.

25. Ngaa importante nga mamati sing maayo sa matarong nga mga mando sang Dios?

²⁵ Ini nga bahin sang tagna ni Isaias nagapadaku nga ginatudluan kita ni Jehova para sa aton kaayuhan. Importante gid nga mamati kita sing maayo sa matarong nga mga mando sang Dios. (Bugna 15:​2-4) Kon pahanumdumon naton ang aton kaugalingon sang kaalam kag gugma sang Dios, magabulig ini sa aton sa pagsunod sa ginasiling ni Jehova nga amo ang husto. Ang tanan niya nga sugo para sa aton kaayuhan.​​—Isaias 48:​17, 18.

[Mga Pamangkot sa Pagtinuon]

 [Kahon/Mga piktyur sa pahina 133]

Ang Labing Gamhanan nga Dios Nagapugong sa Iya Kaugalingon

“Punggan ko ang akon kaakig . . . punggan ko ang akon kaugalingon,” siling ni Jehova sa apostata nga mga Israelinhon. (Isaias 48:9) Ina nga mga pinamulong nagabulig sa aton sa paghangop nga ang Dios nagapahamtang sing isa ka himpit nga huwaran nga indi gid mag-abuso sa gahom. Matuod nga wala sing bisan sin-o nga may daku pa nga gahom sa Dios. Amo kon ngaa ginapatuhuyan naton sia subong ang Isa nga labing gamhanan, ang Isa nga makagagahom. Nagakaigo nga ginaaplikar niya sa iya kaugalingon ang titulo nga “Labing Gamhanan.” (Genesis 17:1) Indi lamang nga wala sing latid ang iya kusog kundi sia ang may bug-os nga awtoridad bangod sang iya posisyon subong ang Soberanong Ginuo sang uniberso, nga iya gintuga. Amo kon ngaa wala sing bisan sin-o nga makapangahas sa pagpugong sa iya kamot ukon magsiling sa iya, “Ano ang ginahimo mo?”​—Daniel 4:35.

Apang, ang Dios mahinay sa pagpangakig bisan pa kon dapat niya ipabutyag ang iya gahom batok sa iya mga kaaway. (Nahum 1:3) Si Jehova ‘makapugong sa iya kaakig’ kag husto nga ginalaragway subong “mahinay sa pagpangakig” bangod ang gugma​—indi ang kaakig—ang iya nagapangibabaw nga kinaiya. Ang iya kaakig, kon ginapabutyag, pirme matarong, pirme may rason, pirme kontrolado.​—Exodo 34:​6; 1 Juan 4:8.

Ngaa nagapanghikot si Jehova sa sining paagi? Bangod ginatimbang niya sing himpit ang iya labing gamhanan nga gahom upod sa iya tatlo pa ka kinaiya​—ang kaalam, katarungan, kag gugma. Ang iya paggamit sing gahom pirme nga nagahisanto sa sining tatlo pa ka kinaiya.

 [Piktyur sa pahina 122]

 Ang mensahe ni Isaias tuhoy sa pagpasag-uli naghatag sing paglaum sa nabihag nga matutom nga mga Judiyo

[Piktyur sa pahina 124]

May huyog ang mga Judiyo nga ipatungod ang mga buhat ni Jehova sa mga idolo

1. Istar 2. Isa ka mahining nga tisa nga sanipa nga puni gikan sa “Processional Way” sang Babilonia 3. Dragon nga simbulo ni Marduk

[Piktyur sa pahina 127]

Ang isa ka “hurno sang kalisdanan” makapadayag kon bala putli ukon indi ang aton mga motibo sa pag-alagad kay Jehova

[Mga piktyur sa pahina 128]

Naagihan sang matuod nga mga Cristiano ang labing mapintas nga mga sahi sang paghingabot