Kapitulo Disiotso

Ginapasag-uli ni Jehova ang Espiritu Sang mga Mapainubuson

Isaias 57:1-21

1. Ano nga pasalig ang ginhatag ni Jehova, kag ano nga mga pamangkot ang ginapautwas sang iya mga pulong?

 “AMO ini ang ginsiling sang Isa nga Mataas kag Halangdon, nga nagapuyo sa wala sing katubtuban kag nga ang iya ngalan balaan: ‘Nagapuyo ako sa kahitaasan kag sa balaan nga duog, upod man sa pinigos kag may mapainubuson nga espiritu, agod ipasag-uli ang espiritu sang mga mapainubuson kag agod ipasag-uli ang tagipusuon sang mga ginapigos.’ ” (Isaias 57:15) Amo ini ang ginsulat ni manalagna Isaias sang ikawalo nga siglo B.C.E. Ano ang nagakatabo sadto sa Juda amo kon ngaa makapalig-on gid ining mensahe? Paano ining inspirado nga mga pulong nagabulig sa mga Cristiano karon? Ang pagbinagbinag sa Isaias kapitulo 57 magabulig sa aton sa pagsabat sining mga pamangkot.

“Palapit Kamo Diri”

2. (a) Daw san-o naaplikar ang mga pulong sang Isaias kapitulo 57? (b) Ano ang kahimtangan sang mga matarong sang panahon ni Isaias?

² Ini nga bahin sang tagna ni Isaias daw naaplikar sa panahon mismo ni Isaias. Binagbinaga kon ano na gid ka daku ang kalautan: “Ang matarong napatay, apang wala sing isa nga nagahupot sini sa iya tagipusuon. Kag ang mga tawo nga may mahigugmaon nga kaayo ginatipon sa mga patay, samtang wala sing isa nga nakahangop nga ang matarong nagakawala bangod sang kalaglagan. Nagasulod sia sa paghidait; nagapahuway sila sa ila mga higdaan, ang tagsatagsa nga nagalakat sing matadlong.” (Isaias 57:1, 2) Kon mapukan ang isa nga matarong, wala sing bisan sin-o nga nagaulikid. Indi matalupangdan  ang iya hilaw nga kamatayon. Ang pagtulog sa kamatayon nagahatag sa iya sing paghidait, kahilwayan gikan sa pagpaantos sang mga di-diosnon, kag paglikaw gikan sa kalaglagan. Ang pinili nga pungsod sang Dios nabutang sa malain gid nga kahimtangan. Apang pat-od nga napalig-on ang mga nagpabilin nga matutom sa paghibalo nga indi lamang nga nakita ni Jehova ang nagakatabo kundi sakdagon niya sila!

3. Paano si Jehova naghambal sa malaut nga kaliwatan sang Juda, kag ngaa?

³ Gintawag ni Jehova ang malaut nga kaliwatan sang Juda, nga nagasiling: “Kon tuhoy sa inyo, palapit kamo diri, kamo nga mga anak sang babayi nga nagapamakot, nga binhi sang isa ka tawo nga makihilahion kag sang isa ka babayi nga pampam.” (Isaias 57:3) Bagay gid sa ila ang makahuluya nga mga paglaragway subong mga anak sang babayi nga nagapamakot kag binhi  sang makihilahion kag pampam. Ang butig nga pagsimba nga ila ginbaton naglakip sang makangilil-ad nga mga buhat sang idolatriya kag espiritismo subong man sang imoral nga seksuwal nga mga buhat. Busa, ginpamangkot ni Jehova ining mga makasasala: “Tungod kay sin-o nga nagalipaylipay kamo? Batok kay sin-o nga ginanganga ninyo sing daku ang inyo baba, nga ginapadiwal ang inyo dila? Indi bala kamo mga anak sang paglapas, ang binhi sang kabutigan, ang mga nagapadabdab sang kailigbon sa tunga sang dalagku nga kakahuyan, sa idalom sang tagsa ka kahoy nga madabong, nga nagapatay sang mga kabataan sa ginailigan nga mga nalupyakan sa idalom sang mga guab sang gasanggasang nga mga igang?”—Isaias 57:4, 5.

4. Ano ang sala sang mga malauton sang Juda?

⁴ Ang mga malauton sang Juda nagahimo sang ila makapakibot nga paganong pagsimba sing dayag, nga “nagalipaylipay.” Ginayaguta nila ang mga manalagna sang Dios nga ginpadala agod tadlungon sila, nga ginapadiwal ang ila mga dila sa isa ka wala nahuya, di-matinahuron nga paagi. Bisan pa mga anak sila ni Abraham, ang ila rebelyuso nga mga dalanon naghimo sa ila nga mga anak sang paglapas kag binhi sang kabutigan. (Isaias 1:​4; 30:9; Juan 8:​39, 44) Gikan sa dalagku nga kakahuyan sa kaumhan, gindabukan nila ang relihioso nga kainit sa ila idolatroso nga pagsimba. Kag mapintas gid ang ila pagsimba! Ti, ginapatay pa gani nila ang ila mismo kabataan, kaangay sang mga pungsod nga bangod sang ila makangilil-ad nga mga dalanon, gintabog sila ni Jehova gikan sa pungsod!​​—1 Hari 14:​23; 2 Hari 16:​3, 4; Isaias 1:29.

Pagbubo Sing Halad-nga-Ilimnon sa mga Bato

5, 6. (a) Ano ang ginpili nga himuon sang mga pumuluyo sang Juda sa baylo nga simbahon si Jehova? (b) Daw ano ka daku kag kalapnag ang pagsimba sa mga idolo sa Juda?

⁵ Tan-awa kon daw ano gid nga nabuyo ang mga pumuluyo sang Juda sa idolatriya: “Ang imo bahin yara sa mahining nga mga bato sang ginailigan nga nalupyakan. Sila​—sila ang imo bahin. Dugang pa, sa ila nagbubo ka sing halad-nga-ilimnon,  naghatag ka sing dulot. Malugpayan bala ako sini nga mga butang?” (Isaias 57:6) Ang mga Judiyo katawhan nga nakigkatipan sa Dios, apang sa baylo nga simbahon sia, nagapamulot sila sing mga bato sa suba kag ginahimo ini nga mga dios. Si David nagsiling nga si Jehova amo ang iya bahin, apang ginpili sining mga makasasala ang walay kabuhi nga bato nga mga idolo subong amo ang ila bahin kag nagabubo sila sing halad-nga-ilimnon sa ila. (Salmo 16:5; Habacuc 2:19) Ano nga lugpay ang matigayon ni Jehova sa sining tiko nga pagsimba sang katawhan nga nagatiglawas sa iya ngalan?

⁶ Bisan diin​​—sa idalom sang dalagku nga kakahuyan, sa ginailigan nga mga nalupyakan, sa mga pukatod, sa ila mga siudad—​ang Juda nagahimo sing idolatriya. Apang nakita ni Jehova ang tanan, kag paagi kay Isaias, ginbuyagyag Niya ang kalaut sini: “Sa ibabaw sang bukid nga mataas kag ginbayaw ginpahamtang mo ang imo higdaan. Didto man nagtaklad ka agod magdulot sing halad. Kag sa likod sang ganhaan kag sang bakalan nagpahamtang ka sang imo handumanan.” (Isaias 57:7-8a) Sa mataas nga mga duog, ang Juda naghimo sang iya higdaan sang espirituwal nga kahigkuan, kag didto nagdulot sia sing mga halad sa dumuluong nga mga dios. a Bisan gani ang pribado nga mga balay may mga idolo sa likod sang ila mga ganhaan kag mga bakalan.

7. Sa ano nga sahi sang espiritu nga ang Juda nakigbahin sa imoral nga pagsimba?

⁷ Ang iban mahimo magpalibog kon ngaa nabuyo gid ang Juda sa di-matinlo nga pagsimba. May mas mabaskog nga gahom bala nga nagpilit sa iya nga biyaan si Jehova? Wala ang sabat. Ginhimo niya ini sing kinabubut-on, sing malangkagon. Si Jehova nagsiling: “Sang malayo ka sa akon naghublas ka kag nagsaka; ginpalapad mo ang imo higdaan. Kag para sa imo kaugalingon  nagpakigkatipan ka sa ila. Ginhigugma mo ang higdaan upod sa ila. Ang kinatawo sang lalaki nakita mo.” (Isaias 57:​8b) Nakigkatipan ang Juda sa iya butig nga mga dios, kag naluyagan niya ang iya ginadumilian nga kaangtanan sa ila. Labi na nga naluyagan niya ang imoral nga seksuwal nga mga buhat​—mahimo gid nga nagalakip sang paggamit sing mga simbulo sang kinatawo sang lalaki​—​nga kinaandan sa pagsimba sa sining mga dios!

8. Sa idalom sang sin-o nga hari labi na nga nag-uswag ang idolatriya sa Juda?

⁸ Ang paglaragway sa tuman ka imoral, mapintas nga pagsimba sa idolo nagabagay sa aton nahibaluan tuhoy sa pila ka malaut nga mga hari sang Juda. Si Manases, halimbawa, nagpatindog sing mataas nga mga duog, nagtukod sing mga altar para kay Baal, kag nagbutang sing mga altar para sa butig nga pagsimba sa duha ka luwang sang templo. Ginpaagi niya ang iya mga anak nga lalaki sa kalayo, nagbuhat sia sing salamangka, naggamit sia sing pagpamakot, kag ginsakdag niya ang espiritistiko nga mga padugi. Ginbutang man ni Hari Manases sa templo ni Jehova ang larawan nga tinigban sang sagrado nga poste nga iya ginhimo. b Ginhaylo niya ang Juda “sa paghimo sing malaut labi pa sa ginhimo sang mga pungsod nga ginlaglag ni Jehova.” (2 Hari 21:​2-9) Nagapati ang iban nga ginpapatay ni Manases si Isaias, bisan pa ang ngalan ni Manases indi mabasa sa Isaias 1:1.

‘Padayon nga Ginpadala Mo ang Imo mga Sinugo’

9. Ngaa ang Juda nagpadala sing mga sinugo “sa malayo”?

⁹ Indi lamang pag-alagad sa butig nga mga dios ang paglapas nga nahimo sang Juda. Ginagamit si Isaias subong humalambal niya, si Jehova nagsiling: “Nagpanaug ka pakadto sa Melec dala ang lana, kag padayon nga ginpadamo mo ang imo balanyos. Kag padayon mo nga ginpadala sa malayo ang imo mga sinugo,  amo nga ginpaubos mo ang mga butang tubtob sa Sheol.” (Isaias 57:9) Ang di-matutom nga ginharian sang Juda nagdulhog sa “Melec,” “ang hari” sa Hebreo​​—mahimo gid amo ang hari sang isa ka dumuluong nga gahom​—​nga nagahalad sa iya sing malahalon kag matahom nga mga regalo, nga ginasimbulo sang lana kag mahamot nga mga balanyos. Nagpadala ang Juda sing mga emisaryo sa malayo nga mga duog. Ngaa? Agod hayluhon ang Gentil nga mga pungsod nga makig-alyansa sa iya sa politika. Gintalikdan niya si Jehova, kag nagsalig sia sa dumuluong nga mga hari.

10. (a) Paano si Hari Ahaz nagtinguha nga makig-alyansa sa hari sang Asiria? (b) Sa anong paagi “ginpaubos [sang Juda] ang mga butang tubtob sa Sheol”?

¹⁰ Ang isa ka halimbawa sini amo sang panahon ni Hari Ahaz. Bangod kinulbaan sia sa pag-alyansa sang Israel kag Siria, ining di-matutom nga hari sang Juda nagpadala sing mga mensahero kay Tiglat-pileser III sang Asiria, nga nagasiling: “Ako imo alagad kag imo anak. Taklad ka kag luwasa ako gikan sa kamot sang hari sang Siria kag gikan sa kamot sang hari sang Israel, nga nagtindog batok sa akon.” Nagpadala si Ahaz sing pilak kag bulawan subong  hamham sa hari sang Asiria, kag nagsabat ang hari paagi sa paglansar sing makahalapay nga pagsalakay sa Siria. (2 Hari 16:​7-9) Sa iya mga pagpakig-angot sa Gentil nga mga pungsod, ang Juda nagpaubos tubtob sa “kadadalman sang Sheol.” (An American Translation) Bangod sini nga mga pagpakig-angot, mapatay sia, ukon magadulog sa pagluntad subong isa ka independiente nga pungsod nga may hari.

11. Anong sayop nga pagbatyag sing kalig-unan ang ginpakita sang Juda?

¹¹ Nagpadayon si Jehova sa pagpamulong sa Juda: “Sa kadamuan sang imo mga dalanon nagpangabudlay ka. Wala ka magsiling, ‘Wala na sing paglaum!’ Nasapwan mo nga nagbalik ang imo kusog. Amo kon ngaa wala ka nagmasakit.” (Isaias 57:10) Huo, nangabudlay sing lakas ang pungsod sa iya apostata nga mga dalanon, kag wala niya makita ang pagkawalay pulos sang iya mga pagpaninguha. Sa kabaliskaran, ginlimbong niya ang iya kaugalingon sa pagpati nga magamadinalag-on sia sa iya kaugalingon nga gahom. Ginbatyag niya nga mabaskog sia kag mapagros. Daw ano nga kabuangan!

12. Ano nga mga kahimtangan sa Cristiandad ang nagaanggid sa Juda anay?

¹² Sa karon may yara isa ka organisasyon nga nagagawi kaangay sang Juda anay sang panahon ni Isaias. Ang Cristiandad nagagamit sang ngalan ni Jesus, apang nagapakig-alyansa sia sa mga pungsod kag ginpuno niya sing mga idolo ang iya mga duog sang pagsimba. Ang iya mga sumulunod nagpatindog pa gani sing idolatroso nga mga imahen sa ila pribado nga mga puluy-an. Ginhalad sang Cristiandad ang iya mga pamatan-on sa mga inaway sang mga pungsod. Makangilil-ad gid ini sa matuod nga Dios, nga nagasugo sa mga Cristiano: “Palayo kamo sa idolatriya”! (1 Corinto 10:14) Paagi sa pagpakigbahin sa politika, ang Cristiandad ‘nakahimo sing pagpakighilawas sa mga hari sang duta.’ (Bugna 17:​1, 2) Sa katunayan, sia ang panguna nga sumalakdag sang Nasyones Unidas. Ano ang nagahulat sa sining relihioso nga makihilawason? Ti, ano ang ginsiling ni Jehova sa iya sulundan, ang di-matutom nga Juda, ilabi na subong ginarepresentar sang iya kapital nga siudad, ang Jerusalem?

 ‘Ang Imo Gintipon Indi Magaluwas sa Imo’

13. Anong ‘pagbinutig’ ang ginhimo sang Juda, kag ano ang reaksion niya sa pagpailob ni Jehova?

¹³ “Kay sin-o ka nakugmat kag nahadlok, amo nga nagbinutig ka?” pamangkot ni Jehova. Isa ka nagakaigo nga pamangkot! Wala gid magpakita ang Juda sing mapuslanon, diosnon nga kahadlok kay Jehova. Kay kuntani wala sia mangin isa ka pungsod sang mga butigon, mga sumilimba sa butig nga mga dios. Nagpadayon si Jehova sa pagsiling: “Indi ako ang nadumduman mo. Wala ka sing ginhuptan sa imo tagipusuon. Indi bala naghipos ako kag nagtago sang mga butang? Gani wala ka mahadlok bisan sa akon.” (Isaias 57:11) Naghipos lamang si Jehova, kag wala sa gilayon ginsilutan ang Juda. Gin-apresyar bala ini sang Juda? Wala, sa baylo gintamod niya ang pagpailob sang Dios subong indi pagsapak. Nadula gid ang iya kahadlok sa iya.

14, 15. Ano ang ginsiling ni Jehova sa mga binuhatan sang Juda kag sa iya “tinipon nga mga butang”?

¹⁴ Apang, ang panahon sang pagbatas sang Dios matapos. Sa pagpaabot sini nga tion, si Jehova nagsiling: “Ipahayag ko ang imo pagkamatarong kag ang imo mga binuhatan, nga indi ka makapanginpulos sa sini. Kon mangayo ka sing tabang indi ka pagluwason sang imo tinipon nga mga butang, kundi ini tanan paliron sang hangin. Isa ka alisngaw ang magakuha sini.” (Isaias 57:12, 13a) Ibuyagyag ni Jehova ang pakunokuno nga pagkamatarong sang Juda. Ang iya salimpapaw nga mga buhat wala sing kapuslanan. Ang iya “tinipon nga mga butang,” ang kadamuon sang iya mga idolo, indi magaluwas sa iya. Kon magbunal ang kalamidad, ang mga dios nga iya ginasaligan paliron sang isa lamang ka huyop sang hangin.

¹⁵ Ang mga pulong ni Jehova natuman sang 607 B.C.E. Sang tion ini nga ginlaglag ni Hari Nabocodonosor sang Babilonia ang Jerusalem, ginsunog ang templo, kag ginbihag ang kalabanan sang katawhan. “Gani ang Juda gintapok gikan sa iya duta.”​​—2 Hari 25:​1-​21.

16. Ano ang nagahulat sa Cristiandad kag sa nabilin nga bahin sang “Babilonia nga Daku”?

 ¹⁶ Sing kaanggid, ang madamo gid nga idolo sang Cristiandad indi magaluwas sa iya sa adlaw sang kaakig ni Jehova. (Isaias 2:​19-​22; 2 Tesalonica 1:​6-​10) Upod sa nabilin nga bahin sang “Babilonia nga Daku”​​—ang bug-os kalibutan nga katilingban sang butig nga relihion​—​ang Cristiandad pagalaglagon. Ang simbuliko nga duag-escarlata nga sapat nga mapintas kag ang iya napulo ka sungay “magahapay kag magapahubo sa [Babilonia nga Daku], kag kaunon nila ang iya unod kag sunugon sia sing bug-os sa kalayo.” (Bugna 17:​3, 16, 17) Malipayon gid kita nga gintuman naton ang sugo: “Guwa ka sa iya, katawhan ko, kon indi ninyo luyag makaambit sa iya mga sala, kag kon indi ninyo luyag makabaton sing bahin sa iya mga kalalat-an”! (Bugna 18:​4, 5) Kabay nga indi na gid kita magbalik sa iya ukon sa iya mga dalanon.

“Ang Nagadangop sa Akon Magapanubli Sang Duta”

17. Ano ang ginsaad sa ‘isa nga nagadangop kay Jehova,’ kag san-o ini natuman?

¹⁷ Apang, ano naman ang tuhoy sa masunod nga mga pulong sang tagna ni Isaias? “Ang nagadangop sa akon magapanubli sang duta kag magapanag-iya sang akon balaan nga bukid.” (Isaias 57:​13b) Kay sin-o nagapakighambal si Jehova karon? Ginatan-aw niya ang lampas pa sa tion sang kalamidad nga magaabot kag ginatagna niya ang kahilwayan sang iya katawhan gikan sa Babilonia kag ang pagpasag-uli sang putli nga pagsimba sa iya balaan nga bukid, ang Jerusalem. (Isaias 66:​20; Daniel 9:16) Isa gid ini ka kabangdanan sang pagpalig-on para sa bisan sin-o nga Judiyo nga nagpabilin nga matutom! Dugang pa, si Jehova nagsiling: “Ang isa pat-od nga magasiling, ‘Tampuki ninyo, tampuki ninyo! Hawani ang dalan. Kuhaa ang bisan ano nga balagbag sa dalan sang akon katawhan.’ ” (Isaias 57:14) Kon mag-abot na ang tion nga luwason sang Dios ang iya katawhan, ang dalan mangin handa kag ang tanan nga balagbag nakuha na.​​—2 Cronica 36:​22, 23.

18. Paano ginlaragway ang pagkahalangdon ni Jehova, apang anong mahigugmaon nga kabalaka ang ginpakita niya?

 ¹⁸ Sa amo sini nga tion nga gin-asoy ni manalagna Isaias ang mga pulong nga ginbalikwat sa panugod: “Amo ini ang ginsiling sang Isa nga Mataas kag Halangdon, nga nagapuyo sa wala sing katubtuban kag ang iya ngalan balaan: ‘Nagapuyo ako sa kahitaasan kag sa balaan nga duog, upod man sa pinigos kag may mapainubuson nga espiritu, agod ipasag-uli ang espiritu sang mga mapainubuson kag agod ipasag-uli ang tagipusuon sang mga ginapigos.’ ” (Isaias 57:15) Ang trono ni Jehova yara sa pinakamataas nga kalangitan. Wala na sing kahimtangan nga mataas pa ukon halangdon pa. Isa gid ka paglipay ang mahibaluan nga gikan didto makita niya ang tanan nga butang​—indi lamang ang mga sala sang mga malauton kundi ang matarong man nga mga buhat sang mga nagatinguha sa pag-alagad sa iya! (Salmo 102:​19; 103:6) Dugang pa, ginapamatian niya ang mga pag-ugayong sang mga ginadaugdaug kag ginapasag-uli ang tagipusuon sang mga pinigos. Pat-od nga natandog sining mga pulong ang tagipusuon sang mahinulsulon nga mga Judiyo sang dumaan nga mga tion. Pat-od gid nga ginatandog sini ang aton tagipusuon karon.

19. San-o magaugdaw ang kasingkal ni Jehova?

¹⁹ Makalugpay, man, ang dugang pa nga mga pulong ni Jehova: “Indi ako makigsuay tubtob sa tion nga walay latid, ni magsingkal ako tubtob sa walay katubtuban; kay tungod sa akon ang espiritu magaluya, bisan ang mga tinuga nga nagaginhawa nga akon mismo ginhimo.” (Isaias 57:16) Wala sing tinuga sang Dios ang makalampuwas kon ang kaakig ni Jehova magapadayon, nga walay untat. Apang, makalilipay nga ang kasingkal sang Dios tubtob lamang sa isa ka limitado nga tion. Kon matuman na sini ang iya katuyuan, magaugdaw ini. Ining inspirado nga paghantop nagabulig sa aton sa pagpalambo sing daku nga apresasyon sa gugma ni Jehova sa iya mga tinuga.

20. (a) Paano si Jehova nagapakig-angot sa di-mahinulsulon nga nakasala? (b) Sa anong paagi ginalipay ni Jehova ang isa nga mahinulsulon?

²⁰ Makatigayon kita sing dugang pa nga paghantop samtang nagapadayon si Jehova. Una anay sia nagsiling: “Bangod sang  pagkasayop sang iya di-matarong nga daug nagsingkal ako, kag ginsakit ko sia, nga ginatago ang akon nawong, samtang nagasingkal ako. Apang padayon sia nga naglakat nga isa ka rebelde sa dalanon sang iya tagipusuon.” (Isaias 57:17) Ang mga sayop nga ginahimo bangod sang kakagod makapaakig gid sa Dios. Tubtob nagapabilin nga rebelde ang isa sa tagipusuon, si Jehova padayon nga nagasingkal gihapon. Apang ano kon batunon sang isa nga rebelde ang disiplina? Nian ginapakita ni Jehova kon paano ang iya gugma kag kaawa magapahulag sa iya sa paghikot: “Nakita ko ang iya mismo mga dalanon; kag ginpaayo ko sia kag gintuytuyan sia kag ginbalusan sia sing paglipay kag ang mga nagalalaw sa iya.” (Isaias 57:18) Sa tapos sang pagdisiplina, ginaayo ni Jehova ang isa nga mahinulsulon kag ginalipay sia kag ang mga nagalalaw upod sa iya. Amo kon ngaa sang 537 B.C.E., nakapauli ang mga Judiyo. Matuod, ang Juda wala na liwat mangin isa ka independiente nga ginharian. Apang, ang templo sa Jerusalem gintukod liwat, kag ang matuod nga pagsimba ginpasag-uli.

21. (a) Paano ginpasag-uli ni Jehova ang espiritu sang hinaplas nga mga Cristiano sang 1919? (b) Anong kinaiya subong mga indibiduwal ang nagakaigo nga palambuon naton?

²¹ Ang “Isa nga Mataas kag Halangdon,” nga si Jehova, nagpakita man sing kabalaka sa kaayuhan sang hinaplas nga nagkalabilin sang 1919. Bangod sang ila mahinulsulon kag mapainubuson nga espiritu, maluluy-on nga gintalupangod sang daku nga Dios, nga si Jehova, ang ila pag-antos kag ginluwas sila gikan sa pagkabihag sa Babilonia. Ginkuha niya ang tanan nga makasalandad nga mga sablag, kag gintuytuyan sila padulong sa kahilwayan agod makahimo sila sing putli nga pagsimba sa iya. Sa amo ang mga pulong ni Jehova paagi kay Isaias natuman sadto. Kag sa likod sining mga pulong may yara mga prinsipio nga naaplikar sa tagsatagsa sa aton. Ginabaton ni Jehova ang pagsimba gikan lamang sa mga mapainubuson sing hunahuna. Kag kon makasala ang isa sang mga alagad sang Dios, dapat niya kilalahon sa gilayon ang iya sayop, batunon ang sabdong, kag tadlungon ang iya mga dalanon. Kabay nga indi gid naton kalimtan nga ginaayo  kag ginalipay ni Jehova ang mga mapainubuson apang ‘ginasumpong niya ang mga matinaastaason.’​​—Santiago 4:6.

‘Paghidait Para sa mga sa Malayo kag sa Malapit’

22. Anong palaabuton ang gintagna ni Jehova para sa (a) mga mahinulsulon? (b) mga malauton?

²² Sa pagpatuhay sang palaabuton sang mga nagahinulsol gikan sa mga nagapadayon sa ila malaut nga mga dalanon, si Jehova nagsiling: “Ginatuga ko ang bunga sang mga bibig. Makatigayon sing dalayon nga paghidait ang isa nga sa malayo kag ang isa nga sa malapit, . . . kag ayuhon ko sia. Apang ang mga malauton kaangay sang dagat nga nagaalimbukad, kon wala ini nagalinong, ang mga tubig sini padayon nga nagaalimbukad sing kusaykusay kag lunang. Wala sing paghidait . . . para sa mga malauton.”—Isaias 57:19-21.

23. Ano ang bunga sang mga bibig, kag sa anong paagi si Jehova ‘nagatuga’ sini nga bunga?

²³ Ang bunga sang mga bibig amo ang halad sang pagdayaw nga ginahalad sa Dios​​—ang dayag nga pagpahayag sa iya ngalan. (Hebreo 13:15) Paano “ginatuga” ni Jehova inang dayag nga pagpahayag? Agod makahalad sing halad sang pagdayaw, dapat anay magtuon ang isa ka indibiduwal tuhoy sa Dios kag dayon magtuo sa iya. Ang pagtuo​​—isa ka bunga sang espiritu sang Dios​—​nagapahulag sa sina nga tawo sa pagsugid sa iban sang iya nabatian. Kon sa aton pa, nagahimo sia sing dayag nga pagpahayag. (Roma 10:​13-​15; Galacia 5:22) Dapat man dumdumon nga si Jehova amo ang katapusan nga nagasugo sa iya mga alagad nga ibantala ang iya kadayawan. Kag si Jehova amo ang isa nga nagahilway sa iya katawhan, agod makahalad sila sina nga mga halad sang pagdayaw. (1 Pedro 2:9) Busa, nagakaigo isiling nga ginatuga ni Jehova ini nga bunga sang mga bibig.

24. (a) Sin-o ang nakakilala sa paghidait sang Dios, kag ano ang resulta? (b) Sin-o ang wala makakilala sang paghidait, kag ano ang resulta para sa ila?

²⁴ Pat-od nga makakulunyag gid nga bunga sang mga bibig ang ginhalad sang mga Judiyo samtang nagapauli sila sa ila dutang natawhan nga nagaamba sing mga pagdayaw kay Jehova! Pat-od nga nalipay gid sila sa pagkilala sa paghidait sang Dios,  “malayo” man sila​​—malayo gikan sa Juda, nga nagahulat pa agod makapauli​—​ukon “malapit”​​—nakalambot na sa ila dutang natawhan. Sa kabaliskaran gid, tuhay ang kahimtangan sang mga malauton! Ang bisan sin-o nga wala nagabaton sang pagdisiplina ni Jehova, ang malauton, bisan sin-o man sila kag bisan diin man sila, wala gid sing paghidait. Nagabalingaso sa kaakig kaangay sang mabalod nga dagat, padayon sila nga nagapatubas, indi sing bunga sang mga bibig, kundi sing “kusaykusay kag lunang,” tanan nga butang nga indi matinlo.

25. Paano ang madamo gikan sa malayo kag sa malapit nagakilala sa paghidait?

²⁵ Sa karon man, ginabantala sang mga sumilimba ni Jehova bisan diin ang maayong balita sang Ginharian sang Dios. Ang mga Cristiano sa malayo kag sa malapit sa kapin sa 230 ka kadutaan nagahalad sing bunga sang mga bibig, nga ginapalanog ang pagdayaw sa lamang matuod nga Dios. Ang mga kadayawan nga ila ginaamba mabatian “gikan sa ukbong sang duta.” (Isaias 42:​10-​12) Ang mga nagapamati sa ila ginahambal kag nagabaton sini nagabaton sang kamatuoran sang Pulong sang Dios, ang Biblia. Ginakilala nila ang paghidait, nga nagagikan sa pag-alagad sa “Dios nga nagahatag sing paghidait.”​​—Roma 16:20.

26. (a) Ano ang nagahulat sa mga malauton? (b) Ano ang daku nga saad para sa mga mahagop, kag ano ang dapat nga mangin determinasyon naton?

²⁶ Matuod, ang mga malauton wala nagapamati sa mensahe sang Ginharian. Apang, sa indi madugay, indi sila pagtugutan nga tublagon ang paghidait sang mga matarong. “Sa diutay pa nga tion, kag ang malauton wala na,” panaad ni Jehova. Ang mga nagadangop kay Jehova magapanubli sang duta sa isa ka dalayawon nga paagi. “Ang mga mahagop magapanubli sang duta, kag magakalipay sila sa kabuganaan sang paghidait.” (Salmo 37:​10, 11, 29) Daw ano gid katahom nga duog ang aton duta sa sina nga tion! Kabay nga mangin determinado kita tanan nga indi gid pagdulaon ang paghidait sang Dios, agod nga makaamba kita sang kadayawan sang Dios tubtob sa walay katubtuban.

[Mga nota]

[Mga Pamangkot sa Pagtinuon]

[Piktyur sa pahina 263]

Ang Juda naghimo sing imoral nga pagsimba sa idalom sang tagsa ka madabong nga kahoy

[Piktyur sa pahina 267]

Nagpatindog ang Juda sing mga halaran sa bug-os nga pungsod

 [Piktyur sa pahina 275]

“Ginatuga ko ang bunga sang mga bibig”