Kapitulo 80

Ang mga Toril sang mga Karnero kag ang Manugbantay

NAGKADTO si Jesus sa Jerusalem para sa Piesta sang Dedikasyon, ukon Hanukkah, isa ka piesta nga nagasaulog sang pagdedikar liwat sang templo kay Jehova. Sang 168 B.⁠C.⁠E., mga 200 ka tuig antes, ginbihag ni Antiochus IV Epiphanes ang Jerusalem kag gintamay ang templo kag ang halaran sini. Apang, tatlo ka tuig sang ulihi ang Jerusalem ginbawi kag ang templo gindedikar liwat. Pagkatapos sadto, ang tuigan nga selebrasyon sang pagdedikar liwat ginhiwat.

Ining Piesta sang Dedikasyon ginahiwat kon Chislev 25, ang Judiyong bulan nga katumbas sa katapusan nga bahin sang Nobiembre kag nahaunang bahin sang Disiembre sa aton modernong kalendaryo. Busa, sulusobra lang sa isa ka gatos ka adlaw ang nabilin tubtob sa importante nga Paskuwa sang 33 C.⁠E. Bangod panag-on ini sang matugnaw nga paniempo, ginatawag ini ni apostol Juan nga “tion sang tigtulugnaw.”

Si Jesus nagagamit karon sing ilustrasyon diin ginasambit niya ang tatlo ka toril sang mga karnero kag ang iya papel subong ang Maayo nga Manugbantay. Ang unang toril nga ginahambalan niya ginkilala upod sa kahimusan sang katipan sang Mosaikong Kasuguan. Ang Kasuguan nangin kudal nga nagapain sang mga Judiyo gikan sa malaut nga mga buhat sang mga tawo nga wala sa sining pinasahi nga katipan sa Dios. Si Jesus nagapaathag: “Sa pagkamatuod nagasiling ako sa inyo, Ang wala nagasulod sa ganhaan sang toril sang mga karnero kundi nagataklas sa iban nga alagyan, inang tawo makawat kag buyong. Apang ang nagasulod sa ganhaan amo ang manugbantay sang mga karnero.”

Ang iban nagakari kag nag-angkon nga Mesias, ukon Cristo, apang indi sila matuod nga manugbantay nga tuhoy sa iya si Jesus padayon nga nagasiling: “Sa iya nagabukas ang manugbantay sang gawang, kag ang mga karnero nagapamati sang iya tingog, kag ginatawag niya ang iya kaugalingon nga mga karnero sa ngalan kag ginapaguwa niya sila.  . . . Sa dumuluong indi sila magsunod kundi magapalagyo sa iya, kay wala sila makakilala sang tingog sang mga dumuluong.”

Ang “manugbantay sang gawang” sang unang toril amo si Juan Bautista. Subong manugbantay sang gawang, ‘ginbuksan’ ni Juan si Jesus paagi sa pagpakilala sa iya sa sadtong simbulikong mga karnero nga paguwaon niya sila pakadto sa halalban. Ining mga karnero nga ginatawag ni Jesus sa ngalan kag ginapaguwa ginpasulod sang ulihi sa isa pa ka toril, subong sang ginasiling niya: “Sa pagkamatuod nagasiling ako sa inyo, ako ang ganhaan sang mga karnero,” kon sayuron, ang ganhaan sang bag-ong toril. Sang ginsugdan ni Jesus ang bag-ong katipan upod sa iya mga disipulo kag gikan sa langit ginbubo ang balaan nga espiritu sa ila sang masunod nga Pentecostes, ginbaton sila sa sining bag-ong toril.

Nagapaathag sing dugang sang iya papel, si Jesus nagasiling: “Ako amo ang ganhaan; kon ang bisan sin-o nga tawo magsulod paagi sa akon maluwas sia, kag magasulod kag magaguwa kag makakita sing halalbon. . . . Ako nagkari agod nga may kabuhi sila kag may kabugana sini. . . . Ako ang maayong manugbantay, kilala ko ang akon kag ang akon nakakilala sa akon, subong nga ang Amay nakakilala sa akon kag ako nakakilala sa Amay; kag ako nagahatag sang akon kabuhi tungod sa mga karnero.”

Sining ulihi lang, ginlugpayan ni Jesus ang iya mga sumulunod, nagasiling: “Dili mahadlok, diutay nga panong, kay nahamut-an sang inyo Amay ang paghatag sa inyo sang ginharian.” Ining diutay nga panong, nga nagadamo sang ulihi sing 144,000, nagsulod sa sining bag-o, ukon ikaduha, nga toril. Apang si Jesus padayon nga nagasiling: “May iban ako nga mga karnero, nga indi sa sining toril; sila man dapat ko dalhon, kag magapamati sila sa akon tingog, kag gani mangin isa sila ka panong, isa ang manugbantay.”

Sanglit ang “iban nga mga karnero” “indi sa sining toril,” dapat nga para sila sa isa pa ka toril, ang ikatlo. Ining ulihi nga duha ka toril sang mga karnero may lainlain nga kaladtuan. Ang “diutay nga panong” sa isa ka toril magagahom upod kay Cristo sa langit, kag ang “iban nga mga karnero” sa iban nga toril magakabuhi sa Paraiso nga duta. Apang, walay sapayan nga yara sa duha ka toril, ang mga karnero wala nagahinisaay, ukon wala sila nagabatyag nga nahamulag, kay subong sang ginasiling ni Jesus, sila “nangin isa ka panong” sa idalom sang “isa ka manugbantay.”

Ang Maayo nga Manugbantay, si Jesucristo, kinabubut-on nga nagahatag sang iya kabuhi para sa duha ka toril sang mga karnero. “Ginahatag ko ini sing kinaugalingon,” siling niya. “Ako may gahom sa paghatag sini, kag ako may gahom sa pagbawi sini. Ining sugo nabaton ko sa akon Amay.” Sang ginsiling ini ni Jesus, ang pagbinahinbahin nagresulta sa tunga sang mga Judiyo.

Madamo sa kadam-an nagsiling: “May demonyo sia kag sia buang. Ngaa bala nagapamati kamo sa iya?” Apang ang iban nagsabat: “Ini indi mga pulong sang may demonyo.” Nian, sing maathag nagapatuhoy sa nagligad nga mga bulan sang gin-ayo niya ang tawo nga natawo nga bulag, sila nagadugang: “Makapamuklat bala ang demonyo sang mga mata sang bulag?” Juan 10:​1-22; 9:​1-7; Lucas 12:​32; Bugna 14:​1, 3; 21:​3, 4; Salmo 37:⁠29.

▪ Ano ang Piesta sang Dedikasyon, kag san-o ini ginsaulog?

▪ Ano ang una nga toril sang mga karnero, kag sin-o ang manugbantay sang gawang sini?

▪ Paano ginbuksan sang manugbantay sang gawang ang Manugbantay, kag sa ano pagkatapos sadto ginbaton ang mga karnero?

▪ Sin-o ang nagahuman sa duha ka toril sang Maayo nga Manugbantay, kag nangin pila sila ka panong?