Kapitulo 14

Ang Nahauna nga mga Disipulo ni Jesus

SA TAPOS sang 40 ka adlaw sa kamingawan, nagbalik si Jesus kay Juan, nga nagbawtismo sa iya. Samtang nagapadulong sia, mahimo gid nga gintudlo sia ni Juan kag nagtuaw sia sa mga tawo nga didto sadto: “Yari karon, ang Kordero sang Dios nga nagakuha sang sala sang kalibutan! Ini amo sia nga nahanungod sa iya nagsiling ako, Nagasunod sa akon ang isa ka tawo nga nahauna sa akon, kay una sia sa akon.” Bisan pa magulang si Juan sa iya pakaisa nga si Jesus, nahibaluan ni Juan nga si Jesus nagluntad antes sa iya subong isa ka espiritu nga persona sa langit.

Apang, mga pila ka semana antes sini, sang magkari si Jesus agod magpabawtismo, mahimo gid nga wala pa mapat-od ni Juan nga si Jesus amo ang Mesias. “Bisan pa wala ako akon nakakilala sa iya,” baton ni Juan, “apang agod nga mapahayag sia sa Israel, sa sini nagkari ako nga nagabawtismo sa tubig.”

Padayon nga ginpaathag ni Juan sa iya mga manugpalamati kon ano ang natabo sang ginbawtismuhan niya si Jesus: “Nakita ko ang espiritu nga nagakunsad subong sang salampati gikan sa langit, kag nagpabilin ini sa ibabaw niya. Bisan pa wala ako akon nakakilala sa iya, apang ang Isa gid nga nagpadala sa akon sa pagbawtismo sa tubig nagsiling sa akon, ‘Sa iya nga makita mo ang espiritu nga nagakunsad kag nagapabilin, ini amo sia ang nagabawtismo sa balaan nga espiritu.’ Kag nakita ko ini, kag nasaksihan nga ini amo ang Anak sang Dios.”

Sang masunod nga adlaw si Juan nagatindog upod sa iya duha ka disipulo. Sa liwat, samtang nagapadulong si Jesus, sia nagsiling: “Yari karon, ang Kordero sang Dios!” Sa sini, ining duha ka disipulo ni Juan Bautista nagsunod kay Jesus. Ang isa sa ila amo si Andres, kag ang isa pa mahimo nga amo gid ang tawo nga nagrekord sining mga butang, nga ginhingalanan man nga Juan. Ining si Juan, suno sa mga palatandaan, pakaisa man ni Jesus, mahimo gid bangod anak sia sang utod ni Maria, nga si Salome.

Sang magbalikid sia kag nakita si Andres kag si Juan nga nagasunod sa iya, si Jesus namangkot: “Ano bala ang ginapangita ninyo?”

“Rabbi,” pamangkot nila, “diin ka bala nagadayon?”

“Kari kag tan-awa ninyo,” sabat ni Jesus.

Mga alas kuwatro na sadto sang hapon, kag si Andres kag si Juan nagpabilin upod kay Jesus sa nabilin nga bahin sadto nga adlaw. Sa tapos sadto nakunyag gid si Andres nga dalidali niya nga ginpangita ang iya utod nga gintawag Pedro. “Nakita namon ang Mesias,” siling niya sa iya. Kag gindala niya si Pedro kay Jesus. Mahimo man nga nakita ni Juan ang iya utod nga si Santiago kag gindala sia kay Jesus; apang, subong kinaandan kay Juan, wala niya ginlakip ining personal nga impormasyon sa iya Ebanghelyo.

Sang masunod nga adlaw, nakita ni Jesus si Felipe, nga taga-Betsaida, amo man ang siudad nga ginhalinan ni Andres kag ni Pedro. Gin-agda niya sia: “Sunod sa akon.”

Nian ginpangita ni Felipe si Natanael, nga gintawag Bartolome, kag nagsiling: “Nakita namon sia, nga nahanungod sa iya si Moises sa Kasuguan kag ang mga manalagna man nagsulat, si Jesus nga taga-Nazaret.” Nagduhaduha si Natanael. “May butang bala nga maayo nga magagikan sa Nazaret?” pamangkot niya.

“Kari kag tan-awa,” haylo ni Felipe. Sang nagapadulong sila kay Jesus, si Jesus nagsiling tuhoy kay Natanael: “Yari karon, ang isa ka matuodtuod nga Israelnon, nga sa iya wala sing limbong.”

“Paano bala nga nakilala mo ako?” pamangkot ni Natanael.

“Sa wala pa ikaw gintawag ni Felipe, sang ikaw yadto sa idalom sang higuera, nakita ko ikaw,” sabat ni Jesus.

Natingala si Natanael. “Rabbi [kon sayoron Manunudlo], ikaw ang Anak sang Dios, ikaw ang Hari sang Israel,” siling niya.

“Bangod nga nagsiling ako sa imo, nakita ko ikaw sa idalom sang higuera, nagatuo bala ikaw?” pamangkot ni Jesus. “Makita mo ang dalagku pa nga mga butang sa sini.” Nian nanaad sia: “Sa pagkamatuod, ginasiling ko sa inyo, makita ninyo ang langit nga nabuksan kag ang mga anghel sang Dios nga nagakayab kag nagakunsad sa ibabaw sang Anak sang tawo.”

Wala gid magdugay sa tapos sini, si Jesus, upod ang iya bag-o nga mga disipulo, nagbiya sa Nalupyakan sang Jordan kag naglakbay pa Galilea. Juan 1:29-51.

▪ Sin-o ang nahauna nga mga disipulo ni Jesus?

▪ Paano si Pedro, subong man si Santiago, ginpakilala kay Jesus?

▪ Ano ang nagkombinse kay Natanael nga si Jesus amo ang Anak sang Dios?