SANG Abril 14, 1989, nagadumala ako sing miting sa banwa sang Maumere, sa Flores Island sang gulpi lang nagsulod sa balay ang mga opisyal sang gobierno, kag gin-aresto ako upod sa tatlo ka kauturan.

Ginpilit kami sang mga guardia sang prisuhan sa amon lugar nga magsaludo sa bandera. Sang nangindi kami, ginbakol nila kami kag ginsipa kag ginpatindog sa nagatagiti nga init sa sulod sang lima ka adlaw. Nagakurog kami sa gab-i nga nagahigda sa salog nga semento sang amon gamay nga mga selda, mahigko, kapoy, kag nagapalanakit ang amon mga pilas. Sulitsulit kami nga ginsugyot sang warden nga magkompromiso, pero nagsabat kami, “Bisan mapatay kami, indi gid kami magsaludo.” Pareho sa indi maisip nga mga Cristiano nga nauna sa amon, nagbatyag kami nga isa ka pribilehiyo nga ‘mag-antos tungod sa pagkamatarong.’—1 Ped. 3:14.