Job 40:1-24
40 Nagpadayon si Jehova sa pagpamangkot kay Job:
2 “Magapakigsuay bala sa Labing Gamhanan ang tawo nga nagapangita sing sala?+
Pasabta ang luyag magsabdong sa Dios.”+
3 Nagsabat si Job kay Jehova:
4 “Nangin wala ako sing pulos.+
Ano ang isabat ko sa imo?
Ginatabunan ko sang akon kamot ang akon baba.+
5 Nakahambal na ako, gani indi na ako magsabat liwat;Nakaduha na ako, indi na ako maghambal.”
6 Dayon nagsiling si Jehova kay Job halin sa buhawi:+
7 “Palihug, ihanda ang imo kaugalingon, magpakalalaki ka;Pamangkuton ko ikaw, kag sugiri ako.+
8 Ginaduhaduhaan* mo bala ang akon katarungan?
Pakamalauton mo bala ako agod mangin matarong ka?+
9 Ang imo bala butkon subong kakusog sa butkon sang matuod nga Dios,+Ukon mapadaguhob mo bala ang imo tingog kaangay sa iya?+
10 Palihug, magsul-ob ka sing himaya kag pagkagamhanan;Magpanapot ka sing kadungganan kag pagkahalangdon.
11 Ipakita ang imo daku nga kaakig;Pangitaa ang bisan sin-o nga bugalon, kag dulaa ang iya bugal.
12 Pangitaa ang bisan sin-o nga matinaastaason, kag paubsa sia,Kag tasaka ang mga malauton sa ila ginatindugan.
13 Ilubong sila tanan sa yab-ok;Gapusa sila sa madulom nga lugar,
14 Kon mahimo mo ina, ako mismo magakilala sa imo*Nga ang imo tuo nga kamot makaluwas sa imo.
15 Tan-awa ang sapat nga Behemot,* nga kaangay sa imo gintuga ko man.
Nagahalab sia sing hilamon kaangay sang baka.
16 Tan-awa ang kabakod sa iya balikawangKag ang kusog sa mga maskulo sang iya tiyan!
17 Ang iya ikog daw kaangay sang sedro;Ang mga maskulo sang iya paa daw kaangay sang nagasinambod nga mga kable.
18 Ang iya mga tul-an daw kaangay sang mga tubo nga saway;Ang iya mga tiil daw kaangay sang salsalon.
19 Sia ang una* sa iya sahi nga gintuga sang Dios;Ang Isa nga naghimo sa iya lamang ang makapatay sa iya.
20 Kay ang kabukiran nagapatubas sing pagkaon para sa sini,Diin ang tanan nga ilahas nga sapat nagahampang.
21 Nagaluko sia sa idalom sang mga kahoy nga lotus,Sa mga katabun-akan kag katunggan.
22 Ginahandungan sia sang mga kahoy nga lotus,Kag yara sia sa tunga sang mga kahoy nga alamo sa nalupyakan.*
23 Wala sia nahadlok kon magsulog ang suba.
Wala sia ginakulbaan, bisan pa ang tubig sang Jordan+ nagalab-ot na sa iya baba.
24 May makadakop bala sa iya samtang nagatan-aw sia,Ukon may makakaw-it* bala sang iya ilong?
Footnote
^ Ukon “Balewalaon.”
^ Ukon “magadayaw sa imo.”
^ Mahimo nga ang hippopotamus.
^ Sa literal, “Ini ang ginsuguran.”
^ Sa literal, “makasiod.”
