2 Cronica 5:1-14
5 Gani natapos ni Solomon ang tanan nga hilikuton nga dapat niya himuon para sa balay ni Jehova.+ Dayon ginpasulod ni Solomon ang mga butang nga gindedikar* ni David nga iya amay,+ kag ginbutang niya ang pilak, ang bulawan, kag ang tanan nga kagamitan sa mga bahandian sang balay sang matuod nga Dios.+
2 Sina nga tion, gintipon ni Solomon ang mga gulang sang Israel, ang tanan nga nagapanguna sa mga tribo, kag ang mga pangulo sang mga panimalay ni Israel. Nagkadto sila sa Jerusalem agod kuhaon ang kaban sang katipan ni Jehova sa Siudad ni David,+ nga amo ang Sion.+
3 Nagtipon ang tanan nga lalaki sang Israel sa atubangan sang hari sa tion sang kapiestahan* nga ginahiwat sa ikapito nga bulan.+
4 Gani nag-abot ang tanan nga gulang sang Israel, kag ginkuha sang mga Levinhon ang Kaban.+
5 Gindala nila ang Kaban, ang tolda nga tilipunan,+ kag ang tanan nga sagrado nga kagamitan nga yara sa tolda. Gindala ini sang mga saserdote kag mga Levinhon.*
6 Si Hari Solomon kag ang bug-os nga katilingban sang Israel nga ginpatawag niya yara sa atubangan sang Kaban. Madamo gid ang ginahalad nga mga karnero kag mga baka,+ nga indi maisip ang kadamuon sini.
7 Dayon gindala sang mga saserdote ang kaban sang katipan ni Jehova sa lugar sini sa pinakasulod nga hulot sang balay, nga amo ang Labing Balaan, sa idalom sang mga pakpak sang mga kerubin.+
8 Nagahumlad ang mga pakpak sang mga kerubin sa ibabaw sang Kaban, gani ginalipdan sang mga kerubin ang Kaban kag ang mga tuwangtuwangan sini.+
9 Malaba ang mga tuwangtuwangan, gani kitaon ang mga punta sini sa Balaan nga hulot sa atubangan sang Labing Balaan nga hulot,* apang indi ini kitaon sa gua. Yara pa ini didto tubtob sini nga adlaw.
10 Wala sing iban nga sulod ang Kaban kundi ang duha ka tapitapi nga ginbutang ni Moises sang didto sia sa Horeb,+ sang nakigkatipan si Jehova+ sa katawhan sang Israel sang naggua sila sa Egipto.+
11 Sang naggua ang mga saserdote sa balaan nga duog (kay ang tanan nga saserdote didto nagpakabalaan sang ila kaugalingon+ bisan ano man ang ila nga grupo),+
12 ang tanan nga Levinhon nga mga manug-amba+ nga si Asaf,+ si Heman,+ si Jedutun,+ kag ang ila mga anak kag mga utod, nga nagasuksok sang maayo sing klase nga bayo kag may mga simbal, de-kuerdas nga mga instrumento, kag mga arpa, nagatindog sa sidlangan sang halaran upod sa 120 ka saserdote nga nagapatunog sing mga trumpeta.+
13 Sang nagdungan ang pagpatunog sing mga trumpeta kag ang pag-amba sang mga manug-amba sa pagdayaw kag pagpasalamat kay Jehova, kag sang ginpatunog ang mga trumpeta, ang mga simbal, kag ang iban pa nga mga instrumento sa musika samtang ginadayaw nila si Jehova, “kay maayo sia; ang iya mainunungon nga gugma wala sing katapusan,”+ nahil-ob sang panganod ang balay ni Jehova.+
14 Indi na makahimo sang ila hilikuton ang mga saserdote bangod sang panganod, kay napuno sang himaya ni Jehova ang balay sang matuod nga Dios.+
Footnote
^ Sa literal, “ginpakabalaan.”
^ Kapiestahan sang mga Payagpayag.
^ Ukon “Levinhon nga mga saserdote.”
^ Sa literal, “pinakasulod nga hulot.”
