1 Cronica 29:1-30
29 Nagsiling si Hari David sa bug-os nga katilingban: “Ang akon anak nga si Solomon nga ginpili sang Dios+ lamharon pa kag wala sing eksperiensia.+ Apang ang buluhaton daku gid, kay ang templo* indi para sa tawo kundi para kay Jehova nga Dios.+
2 Tubtob sa masarangan ko, ginhanda ko para sa balay sang akon Dios ang bulawan para sa mga kagamitan nga bulawan, ang pilak para sa mga kagamitan nga pilak, ang saway para sa mga kagamitan nga saway, ang salsalon para sa mga kagamitan nga salsalon,+ kag ang mga kahoy+ para sa mga kagamitan nga kahoy, ang oniks nga mga bato, ang pinasahi nga mga bato nga ginbutang sa matig-a nga palitada, ang lainlain sing kolor nga mga bato, ang tanan nga malahalon nga bato, kag ang madamo gid nga alabastro nga bato.
3 Bangod sang akon gugma sa balay sang akon Dios,+ ihatag ko man ang akon mismo bulawan kag pilak+ para sa balay sang akon Dios, dugang pa sa tanan nga ginhanda ko para sa balaan nga balay,
4 lakip ang 3,000 ka talanton* nga bulawan halin sa Ofir,+ kag ang 7,000 ka talanton nga pilak, nga ihaklap sa mga dingding sang mga hulot,
5 ang bulawan para sa kagamitan nga bulawan kag ang pilak para sa kagamitan nga pilak, kag para sa tanan nga ulubrahon sang sampaton nga mga manug-obra. Sin-o karon ang magboluntaryo sa paghatag sing regalo kay Jehova?”+
6 Gani nagboluntaryo ang mga pangulo sang mga panimalay, ang mga pangulo sang mga tribo sang Israel, ang mga pangulo sang mga linibo kag mga ginatos,+ kag ang mga nagadumala sa mga hilikuton sang hari.+
7 Naghatag sila para sa buluhaton sa balay sang matuod nga Dios sing 5,000 ka talanton nga bulawan, 10,000 ka darico,* 10,000 ka talanton nga pilak, 18,000 ka talanton nga saway, kag 100,000 ka talanton nga salsalon.
8 Ang may malahalon nga mga bato naghatag sini sa bahandian sang balay ni Jehova nga ginadumalahan ni Jehiel+ nga Gersonhon.+
9 Nalipay gid ang mga tawo sa paghatag sining kinabubut-on nga mga dulot, kay ginhatag nila ini sing bug-os tagipusuon+ kay Jehova, bisan ang hari nga si David nagkalipay gid sing daku.
10 Dayon gindayaw ni David si Jehova sa atubangan sang bug-os nga katilingban. Nagsiling si David: “Kabay pa nga dayawon ka, O Jehova nga Dios ni Israel nga amon amay, tubtob sa wala sing katubtuban.*
11 O Jehova, dalayawon ka+ kag gamhanan+ kag mahimayaon kag halangdon kag dungganon;+ kay imo ang tanan nga butang sa langit kag sa duta.+ O Jehova, imo ang ginharian.+ Ginabayaw mo ang imo kaugalingon nga labaw sa tanan.
12 Ang manggad kag ang himaya halin sa imo,+ kag ikaw ang nagadumala sa tanan nga butang.+ Gamhanan gid ikaw,+ kag may ikasarang ka nga himuon nga bantog ang mga tawo+ kag hatagan sing kusog ang tanan.+
13 Karon, O Dios namon, ginapasalamatan ka namon kag ginadayaw ang imo mahimayaon nga ngalan.
14 “Apang, sin-o gid bala ako kag ang akon katawhan, nga dapat pa kami maghatag sing kinabubut-on nga mga dulot pareho sini? Kay ang tanan nga butang halin sa imo, kag ginahatag namon sa imo ang nagahalin sa imo.
15 Kay kami dumuluong nga mga pumuluyo kag mga pangayaw sa imo atubangan pareho sa tanan namon nga katigulangan.+ Kay ang amon kabuhi sa duta daw landong+ kag wala sing paglaum.
16 O Jehova nga amon Dios, naghalin sa imo ining tanan nga manggad nga ginhanda namon sa pagpatindog sang imo balay para sa kadungganan sang imo balaan nga ngalan, kag imo ini tanan.
17 O Dios ko, nahibaluan ko gid nga ginausisa mo ang tagipusuon+ kag nahamuot ka sa integridad*+ sang isa ka tawo. Ining tanan nga butang ginahatag ko sing kinabubut-on nga may matarong* nga tagipusuon, kag tuman gid ang akon kalipay nga makita ang imo katawhan nga yari diri nga nagahatag sa imo sing kinabubut-on.
18 O Jehova nga Dios ni Abraham, ni Isaac, kag ni Israel nga amon mga katigulangan, buligi ang imo katawhan nga mahuptan ini nga mga huyog kag mga panghunahuna sa ila tagipusuon sing dayon, kag alagdon ka nila sing bug-os tagipusuon.+
19 Buligi ang akon anak nga si Solomon nga tumanon niya sing bug-os tagipusuon+ ang imo mga sugo,+ mga pahanumdom, kag mga pagsulundan. Buligi sia nga mahimo niya ini tanan kag mapatindog ang templo* nga ginhanda ko.”+
20 Dayon nagsiling si David sa bug-os nga katilingban: “Dayawa ninyo si Jehova nga inyo Dios.” Kag gindayaw sang bug-os nga katilingban si Jehova nga Dios sang ila mga katigulangan, kag nagduko sila kag nagyaub kay Jehova kag sa hari.
21 Pagkadason nga adlaw, naghalad sila sing mga halad kay Jehova kag naghalad sila sing mga dulot nga sinunog+ kay Jehova, 1,000 ka torite nga baka, 1,000 ka karnero nga lalaki, 1,000 ka kordero nga lalaki, kag sing mga dulot nga ilimnon.+ Madamo gid ang ila ginhalad para sa bug-os nga Israel.+
22 Malipayon sila nga nagkaon kag nag-inom sa atubangan ni Jehova sina nga adlaw,+ kag sa ikaduha nga higayon ginhimo nila nga hari si Solomon nga anak ni David. Ginhaplasan nila sia sa atubangan ni Jehova bilang ila lider,+ kag ginhaplasan man nila si Zadok bilang saserdote.+
23 Nagbulos si Solomon kay David nga iya amay sa pagpungko sa trono ni Jehova+ bilang hari. Nagmadinalag-on sia nga hari kag ang tanan nga Israelinhon nagtuman sa iya.
24 Ang tanan nga pangulo,+ isganan nga mga soldado,+ kag ang tanan nga anak ni Hari David+ nagpasakop kay Solomon nga hari.
25 Ginpabantog gid ni Jehova si Solomon sa atubangan sang bug-os nga Israel kag ginhatagan sia sing kadungganan bilang hari nga wala matigayon sang bisan sin-o nga hari sa Israel.+
26 Gani naghari si David nga anak ni Jesse sa bug-os nga Israel.
27 Ang kalawigon* sang iya paghari sa Israel 40 ka tuig. Naghari sia sa Hebron sing 7 ka tuig,+ kag sa Jerusalem sing 33 ka tuig.+
28 Napatay sia nga tigulang na+ kag kontento sa iya malawig nga kabuhi,* manggaranon kag dungganon. Si Solomon nga iya anak amo ang nagbulos sa iya bilang hari.+
29 Ang mga natabo sa kabuhi ni Hari David, halin sa umpisa tubtob sa katapusan, nasulat sa mga sinulatan ni Samuel nga makakita sing palanan-awon, ni Natan+ nga manalagna, kag ni Gad+ nga nagasugid sing mga palanan-awon.
30 Nasulat sa sini ang iya paghari, ang iya pagkagamhanan, kag ang mga natabo sa iya kag sa Israel kag sa tanan nga ginharian sa palibot nila.
Footnote
^ Ukon “kuta; palasyo.”
^ Ang isa ka talanton katumbas sang 34.2 ka kilo. Tan-awa ang Apendise B14.
^ Ang darico isa ka bulawan nga sensilyo sang mga Persianhon. Tan-awa ang Apendise B14.
^ Ukon “halin sa wala sing katapusan tubtob sa wala sing katapusan.”
^ Ukon “pagkamatarong; pagkatadlong.”
^ Ukon “sinsero.”
^ Ukon “kuta; palasyo.”
^ Sa literal, “mga adlaw.”
^ Sa literal, “mga adlaw.”
