1 Cronica 18:1-17
18 Sang ulihi, napierde ni David ang mga Filistinhon kag ginsakop niya sila. Naagaw niya sa mga Filistinhon+ ang Gat+ kag ang sakop* nga mga banwa sini.
2 Dayon napierde man ni David ang Moab+ kag nangin mga alagad niya ang mga Moabnon kag nagahatag sila sing buhis* sa iya.+
3 Napierde ni David si Hari Hadadezer+ sang Zoba+ malapit sa Hamat+ sang naglakat si Hadadezer sa pagsakop sa Suba Eufrates.+
4 Naagaw ni David sa iya ang 1,000 ka kangga, kag nabihag niya ang 7,000 ka manugkabayo kag 20,000 ka soldado.+ Dayon ginpamiang ni David ang tanan nga kabayo nga nagaguyod sang kangga luwas sa 100 ka kabayo.+
5 Sang ginbuligan sang mga Sirianhon sang Damasco si Hari Hadadezer sang Zoba, ginpamatay ni David ang 22,000 ka Sirianhon.+
6 Dayon nagbutang si David sing mga garison sa Damasco nga siudad sang Siria. Nangin mga alagad ni David ang mga Sirianhon kag nagahatag sila sing buhis sa iya. Ginpadaug* ni Jehova si David bisan diin sia nagkadto.+
7 Ginkuha man ni David ang mga taming nga bulawan sang mga alagad ni Hadadezer kag gindala ini sa Jerusalem.
8 Madamo gid nga saway ang ginkuha ni David sa Tibhat kag sa Cun nga mga siudad ni Hadadezer. Amo ini ang gingamit ni Solomon sa paghimo sing saway nga suludlan sang tubig,*+ sing mga haligi, kag sing saway nga mga kagamitan.+
9 Sang mabalitaan ni Hari Tou* sang Hamat nga napierde ni David ang tanan nga soldado ni Hari Hadadezer+ sang Zoba,+
10 ginpakadto niya dayon ang iya anak nga si Hadoram* kay Hari David sa pagkamusta sa iya kag sa pagpanginbulahan sa iya bangod napierde niya si Hadadezer sa inaway, (kay si Hadadezer pirme nagapakig-away sadto kay Tou) kag nagdala sia sing mga regalo nga human sa bulawan, pilak, kag saway.
11 Ginpakabalaan ini ni Hari David para kay Jehova,+ upod sa mga pilak kag mga bulawan nga ginpangkuha niya sa tanan nga pungsod: halin sa Edom kag sa Moab, halin sa mga Ammonhon,+ sa mga Filistinhon,+ kag sa mga Amaleknon.+
12 Ginpamatay ni Abisai+ nga anak ni Zeruias+ ang 18,000 ka Edominhon sa Nalupyakan sang Asin.+
13 Nagbutang sia sing mga garison sa Edom, kag nangin mga alagad ni David ang tanan nga Edominhon.+ Ginpadaug* ni Jehova si David bisan diin sia nagkadto.+
14 Naghari si David sa bug-os nga Israel.+ Nagpakita sia sing hustisya kag pagkamatarong sa tanan niya nga katawhan.+
15 Si Joab nga anak ni Zeruias amo ang pangulo sang mga soldado,+ kag si Jehosapat+ nga anak ni Ahilud amo ang manugrekord.
16 Si Zadok nga anak ni Ahitub kag si Ahimelec nga anak ni Abiatar amo ang mga saserdote, kag si Savsa amo ang sekretaryo.
17 Si Benaias nga anak ni Jehoiada amo ang nagadumala sa mga Keretnon+ kag sa mga Peletnon.+ Kag ang mga anak ni David amo ang may mataas nga posisyon masunod sa hari.
Footnote
^ Ukon “sa palibot.”
^ Ukon “mga regalo.”
^ Ukon “Ginluwas.”
^ Sa literal, “hinurma nga Dagat.”
^ “Toi” sa 2Sa 8:9, 10.
^ Ukon “Ginluwas.”
